Angerlarsimaffik pilluarnartoq marluk ataasiussuseqarfigisaat

ILLUMIK ussissumik, aalajaatsumik ilorrisimaarnartumillu sananiaruit suut atussagaluarpigit? Qisuit? Qarmasissiat? Ussatit-ni ima siunnersuuteqarpoq: „Ilisimassut atorlugu illu sananeqartarpoq, siuneqarneq atorlugu tunngavilerneqartarpoq. Silatusaarnikkut initai pequsersorneqartarput pinik tamalaanik akisuunik kusanartunillu.“ (Ussatit 24:3, 4) Aap, angerlarsimaffimmik pilluarnartumik pilersitsiniaraanni ilisimassut, naliliisinnaassuseq paasisimasaqarnerlu pisariaqarput.

Kina sanassava? „Arnat ilisimassuseqartut angerlarsimaffik sanasarpaat, kisianni arnap sianiitsup assamminik ingutsertarpaa.“ (Ussatit 14:1) Aamma angutit taamatut oqaatigineqarsinnaapput. Suut assigiinngissutaappat? Soqutiginarpoq ullumikkut aappariinnik siunnersuisartut siunnersuutaat Guutip oqaasiata ilisimassusianut taamaattuaannartumut, ukiut tuusintilikkuutaat matuma siorna allanneqarsimasumut, assingupajaartorujussuummata.

Tusarnaarneq: „Tusarnaaqqissaarneq oqaluttumut ajunngisaarutit annerpaartaannut ilaavoq, tamannalu qanimut attaveqarnermik ineriartortitsinissamut atatitsinissamullu pingaarluinnarpoq,“ aappariinneq pillugu atuagaaqqiami taama allassimasoqarpoq. „Sianisuup tusarnaarneq ilinniarnerlu pingaartittarpai,“ Ussatit 18:15-imi taama allassimavoq. Siutilli ’ammanersut’ takuneqarsinnaanngimmata, soorlu isit qanerluunniit ammanersut takuneqarsinnaasut, taava qanoq ililluni aappaq takutinneqarsinnaava ilumut tusarnaarluni? Ilaatigut iliuuseqarluni tusarnaarnikkut. — Takuuk qupperneq 27-mi ungaluligaq.

Ammasuuneq anngigisaqanngissuserlu: „Kulturerput ammasuunissamik akornusersuivoq,“ atuakkami One to One — Understanding Personal Relationships-imi taama allassimavoq. „Meeraniitsinniilli  ilinniartarparput imminut paarinissarput — aningaasanik, isumassarsianik, misigissutsinik, . . . immitsinnut tunngasunik sunilluunniit oqaluuserinninnginnissarput. Isuma tamanna nammineq peernavianngilaq, ’asannilersooraluaraanniluunniit’. Ammasuunissaq ataavartumik ilungersorluni suliniutiginngikkaanni tatiginninneq pilernavianngilaq.“ „[Anngigisaqarani, NV] siunnersuisoqarsimanngikkaangat pilersaarutit asuliinnartarput,“ Ussatit-ni allassimavoq, „silatuujupput siunnersuutinik ilassinnittut.“ — Ussatit 13:10; 15:22

Ilumoorfigeqatigiinneq tatigeqatigiinnerlu: Uisoq nuliaasorlu ilumoorfigeqatigiinnissaminnik Guutimut neriorsuuteqarsimapput. Aappariit marluullutik tamarmik tatigippassuk aappartik imminnut ilumoortoq asanninnerat pasinnikajussutsimit, makitassutsimit, unammillerumatussutsimit namminissarsiussutsimillu piginnikkumatussutsimik ilalimmit artorsinneqarnavianngilaq.

Peqatigiinneq: Aappariinneq misigisaqaqatigiittarnikkut nukittorsarneqartarpoq. Piffissap ingerlanerani aappariit misigisimasaminnik marluullutik nuannaarutigisaminnik assilialiussappullusooq ikaartitikkamik. Ikinngutigiinnerup nimianik tamatuminnga aseruinissaq eqqarsaataanniinngilarluunniit. „Ikinngutaasoqartarpoq qatanngummit tatiginarnerusumik.“ — Ussatit 18:24.

Inussiarnerneq qajassuussisuunerlu: Inussiarnernerup suut tamaasa akimmiffeqannginnerusumik ingerlatittarpai pingaarniassutsimillu peersitsisarluni. Inussiarnissuseq inuttut pissutsimut ilaalluinnarpat allaat isumaqatigiinnginnermi misigissutsinik aniatitsiffiusumi inussiarnernermik ersersitsisoqarsinnaavoq, taamaalillunilu ajoqusiineq minnerulersinneqarsinnaalluni. Qajassuussisuuneq pissutsinik asannippalaartitsilertarpoq asanninnerup alliartorluarnissaanut periarfissiisarluni. Ingammik angutit qajassuussinermik ersersitsinissartik ajornakusoortittarpaat. Biibilimi ima allassimasoqarpoq: ’Asannittoq kamajuillunilu inussiarneraraaq.’ (1 Korintumiut 13:4) Aamma: ’Anersaap inerititai tassa . . . kamajuinnerlu avaaginninnerlu angajoqqaatsernerlu . . . qanilaarnerlu.’ — Galâsiamiut 5:22.

Maniguunneq: Maniguunneq pingaarniassutsip ’toqunartuanut’ akiuussutissaavoq; maniguussuseq qujariaannaatitsisarpoq utoqqatseriaannaatitsisarlunilu. Pisuutitaanermili ilumut pisuussuteqanngivikkaanni? Taava ima saamasumik oqartoqarsinnaavoq: „Isumatsassimanikkut misigeqatigaakkit.“ Aapparpit misigissusii qajassuutikkit taavalu marluullusi kukkuneq aaqqinniarsiuk. „Saqitsaassiumannginneq inummut ataqqinaatavoq.“ — Ussatit 20:3.

Ataqqinninneq: „Inuttut assigiinngissutsit paaseqatigiiffiginiaraanni sulissutiginiaraannilu ataqqinninneq pingaartortaavoq. Aappaanut pingaartoq immaqa aappaanut taama pingaartiginngilaq. Aappariilli tamarmik  aapparmik isumai ataqqiniarsinnaavai.“ (Keeping Your Family Together When the World Is Falling Apart) „Makitassuseq saqitsaannermut peqqutaaginnartarpoq, silatuujupput siunnersuutinik ilassinnittut.“ — Ussatit 13:10.

Quiasaarsinnaassuseq: Ajornartorsiorfiit artornarnerpaat illaqatigiissinnaanermit oqilisarneqarsinnaasarput. Illaqatigiissinnaaneq asanninnerup nimianik ninngunerulersitsisinnaavoq sukanganerlu ersarissumik eqqarsarsinnaassutsimik sanngiillisitsisartoq noqqillatsittarlugu. „Uummatikkut nuannaarnerup kiinaq saamasunngortittarpaa.“ — Ussatit 15:13.

Tukkorneq: Aapparpit ajunngitsortai qinertakkit, naammattorsuarmillu nersualaartaruk. Nersualaarinitit pingaartinneqassapput qilernerusamillu siilikimik sanaamit imaluunniit naasunit nuannaarutaanerussallutik. Soorunami pissusissamisoorpoq tunissuteqarfigeqatigiittarneq iliorfigeqatigiittarnerlu. Soorluli atuakkami Lifeskills for Adult Children-imi ima allassimasoqartoq: „Tunissutigineqarsinnaasut annerpaat tassaanngillat poortorneqartartut, tassaappulli asanninnermik pingaartitsinermillu ersersitsinerit, aammalu qiimmassaarineq ikiuiumatunerlu.“ „Puugutaasat sølviusut iipiliusartaattut kuultiusutut ipput oqaatsit oqaaserineqarfissamikkut oqaaserisat.“ — Ussatit 25:11.

Pissutsit tamakku qisuttut aappariinnerup sananeqaataatut isigigutsigik attaveqatigiinneq kikissanut qisunnik kattutsitsisunut assersuussinnaavavut. Isumaqatigiinngissuteqaraangamik aappariit qanoq iliorsinnaappat? „Aapparpit isummamigut allaanerussutai saqitsaassutissatut isiginagit . . . ilisimasaqarnerulissutissatut isigisakkit. . . . Ulluinnarni paasissutissarpassuarnik nassaassaqarfiusarpoq,“ atuakkami Getting the Love You Want-imi taama allassimasoqarpoq.

Isumaqatigiinngissutit ’sorsulernermut’ suaarutitut isigisassanngilatit, isigisassavatilli asasavit ilikkarnerunissaanut periarfissatut. Assigiinngissutinik suliarinninnikkut unamminiarnartoq peqatigiiffigisiuk. Ataasioqatigiissutsip imaani qatsunganermut pigitsi; taamaalillusi asaqatigiinerup nimia, ilissinnik ataasiussuseqartitsisoq, nukittorsassavarsi.

Suleqatigiinneq Jehova Guutip sutut kusanartutut isigaa taamaattumillu pinngortitaminut ilaatillugu — iltip uumasullu naasullu akornanni kaaviiaarnerani, ullorissat kaaviiaarneranni aammalu sullernit naasullu akornanni iluaqutigeqatigiinnermi tamanna takuneqarsinnaavoq. Aamma aappariinnermi asannittumik suleqatigiittoqarsinnaavoq, uiusup oqaatsimigut iliuutsimigullu nuliani asanninnermik uppernarsaaffigisarlugu nuliaasullu, asannittup tatiginnittullu, nalerisimaarluni uimi siulersuinera maleruarlugu. Taamaalillutik marluk taakku ataasiulluinnalissapput imminnut nuannaarteqatigiillutik aappariinnerullu pilersitsisua, Jehova Guuti, nuannartillugu. (gD 22/1 94)

[Qupp. 27-mi ungalusaq]

’Sianiginiaritsi qanoq ilillusi tusartusi.’ — Lúkarse 8:18

Iliuuseqarluni tusarnaarneq tassa oqaloqatigiittut qulakkeerluinnarsimagaat paaseqatigiillutik. ’Akisuffigeqatigiinnertut’ taaneqarsinnaavoq. Tassa imaappoq tusarnaartup malugitippaa oqaatigineqartut paasillugit oqaaseqartutullu isumaqarfigalugit. Pingaarnerpaat aamakku:

1. Tusarnaaqqissaarit; ingammik paasissutissat pingaaruteqartut tusarnaaqqissaakkit.

2. Misigissutsit oqaatsinut tunuliaqutaasut eqqumaffigikkit.

3. Oqaaserineqartut uteqqikkit. Eqqartuusseqinak, isornartorsiueqinak imaluunniit nalornisaareqinak. Malugitiguk nalunaarutigineqartoq eqqortumik paasisimallugu misigissutsillu tunuliaqutaasut maluginiakkit.

4. Oqaluttup qularnanngitsumik oqaatsitit ilumoornerassavai imaluunniit naqqillutit, immaqalu nassuiaaneroqqilluni.

5. Paatsoorsimaguit, misileeqqigit.

Iliuuseqarluni tusarnaartarneq ingammik isornartorsiorneqarnerup annernartuanik eqqorneqarnermi sunniuteqarluartarpoq. Akueriniaruk isornartorsiuneq amerlasuutigut eqqortumik pissuteqartartoq. Immaqa ajuallannaraluarpoq, taamaakkaluartorli akisillutit pisuutitsiniaassanngilatit; akerlianilli iliuuseqarluni tusarnaariaaseq atorlugu pissutsit ilungersornartorsuartut isikkoqarunnaarsinniarsarikkit. Misigissutsinik aalassatsitsinermut pisuusimaninnik paasinninnerit ersersiguk, paasiniarullu ajornartorsiut qanoq ililluni aaqqinneqarsinnaanersoq.

[Qupp. 28-mi ungalusaq]

’Immissinnut unnerluutissaqaraluarussi.’ — Kulorsamiut 3:13

Unnerluutissaqaruit, imaluunniit isorisassaqaruit, qanoq ilillutit pitsaanerpaamik saqqummiussinnaaviuk saqitsaannermik pilersitsinngikaluarlutit? Siullermik oqarit upperalugu aappat pitsaanerpaamik siunertaqartoq. Immaqa isumaqarputit aappat eqqarsarluaqqaarani, tuaviupiluttumik imaluunniit sianiitsumik iliorsimasoq — ilimanaateqanerpaavorli ajortumik siunertaqanngitsoq. Eqqissisimallutit unnerluussinallu qanoq misiginninnik oqaluttuuguk: „Taamatut ilioravit (imaluunniit oqaravit) misigaanga . . .“ Tamanna saqitsaalersitsissutissartaqanngilaq. Qanoq misiginerit oqaluttuariinnarpat, aappallu unnerluutiginngilat. Immaqa ajuallatsinnissat siunertarinngilluinnarsimagamiuk aallaqqaammut akerliliisinnaavoq, imaluunniit pisuunngitsutut imminut oqaatiginiarluni. Ajornartorsiut sammiuk aaqqiissutissamillu siunnersuuteqarnissannut piareersimagit.

[Qupp. 26-mi assiliartaq]

Tusarnaaqqissaarneq oqaluttumut ajunngisaarutissat annerpaat ilagaat