Oqqannernik assersuutit

ARNAP misigissutsiminik oqaluttuarinninnissani pisariaqartittarpaa. Angut aaqqiissutissanik saqqummiussaqarusuttarpoq. Aappariit millionilikkuutaat ukiut ingerlanerini oqqattarnerat qularnanngitsumik assigiinngiiartorujussuarmik ingerlasarsimapput, tunngaviusutigulli tamarmik assigiillutik. Aappap attaveqatiginneriaasianik imaluunniit pissutsinik isiginneriaasianik paasinninnerup anorersuaq pitoraattussaagaluaq ilaqutariinni pilluartuni pinngitsoortittarpaa.

„Inuunera aqukkunnaarniaruk!“

Arnap anneruniartup oqqassiumatuullu uia siunnersorneqartuartutut, apersorneqartuartutut isornartorsiorneqartuartutullu misigisarpoq. Misigissutsit tamakku aamma Biibilimi eqqaaneqarput: „Arnat saqitsaassisarnerata assigaa qalianit kusertuarneq.“ (Ussatit 19:13) Immaqa nuliaasoq uimi kajumiginngisaanik piumasaqarpoq. Isumaqarami tusanngikkaani maanna uini qanoq iliussasoq ilitsersuutilerpaa. Kajuminngissusia suli annerulerpoq. Nuliaq oqqassiumatooq uialu nuliaminit naalagarsiortitaq? Imaluunniit inuit marluk paaseqatigiillutik oqaloqatigiissinnaanngitsut?

Nuliaasoq isumaqarpoq pitsaasunik siunnersuuteqartarnermigut asanninnini pitsaanerpaamik ersersissinnaallugu. Uiusoq isumaqarpoq naalagarsiortitaavallaarluni atorsinnaanngitsutullu pineqarluni. „Pooqattat puiorniaqinagu,“ isumassuinini ersersinniarlugu oqartarpoq; atugassani tamaasa nassarnerai qulakkeertarpaa. Uisulli taamatut pineqaraangami qanga anaanami suaartarnera eqqaasarpaa: „Aaqqatitit eqqaamavigit?“

Nuliaasoq qasoqqasoq immaqa ima oqarpoq: „Neriniartarfimmut neriartorusunngilatit?“ iluamilli oqaatigalugu ima oqarusukkaluarpoq: „Qaaqqorusunngilinga? Nerisassiornissannut qasuallaaqaanga.“ Uiatali tunniusimarpalulluni periarfissaq atorpaa nuliani igallaqqinnerarlugu oqarfigalugulu nammineq sanaanik nererusunnerulluni. Imaluunniit uiata ima paasivaa: ’Sunissarput aalajangerniarsaraa!’ Nulialu eqqarsarsinnaavoq: ’Sooq nammineq aperisariaqartuassaanga?’

„Asanngilarma!“

„Qanoq ililluni taama eqqarsalersinnaava?“ uiusoq uissuummilluni nillerpoq. „Sulisarpunga, akiligassat akilertarlugit allaallu ilaannikkut naasunik tunisarlugu!“

Inuit tamarmik asaneqarlutit misiginissartik pisariaqartippaat, arnalli tamatuminnga uppernarsaaffigineqartuarnissaminnik immikkut pisariaqartitsipput. Immaqa nipituumik oqaatiginngikkaluarpaa, immaqali ilumigut misigaaq nanertuutaalluni kissaatiginngisaq, ingammik aaqarnermi nalaani isummani ajorpat. Piffissani tamakkunani immaqa uia tunuarsimaalaartarpoq, eqqarsarluni kisimiilaarnissani pisariaqartikkaa. Arnap uimi qaninniannginnera siooraginerpaasaminut uppernarsaatitut paasisinnaavaa — ’asajunnaarsimavaanga’. Immaqa sakkortuumik nillertarpoq uinilu pinngitsaalillugu  asanninnermik annertoqqusersorneqarnissaminillu piumaffigisarlugu.

„Ajortoqarpa, asak?“

Angut ajornartorsiuteqaraangami immaqa inimut ataatsimut mattuttarpoq ajornartorsiut eqqarsaatigeqqissaarumallugu. Nuliata ingerlaannaq malugisarpaa ajortoqartoq eqqarsaqqaarnanilu uini ammartinnialersarlugu. Ajunngitsussaq pigaluaraa uia ittuujuisaarfigineqartutut nikanarsarneqartutullu misigisinnaavoq. Kisimiilaarluni ajornartorsiut eqqarsaatigerusunniarlugu nuliani ilumoortoq imminut nipputtutut misigaa. Oqaasii asannippaluttut tussajuarpai: „Ajunngilatit, asak? Ajortoqarpa? Oqaloqatigiissutiginiartigu.“

Uini qisuarianngippat nulia ajuallassinnaavoq. Namminermi ajornartorsiuteqaraangami uiminut oqaloqatigiissutigerusuttarpaa, angutilli asasaata misigissutsiminik avitseqatigiumanngilaa. „Immaqaana asajunnaarsimagaanga,“ immaqa isummertarpoq. Taava uiata sumik isumaqarnani takkuteqqikkuni, ajornartorsiummut aaqqiissutissamik naammagisimaakkaminik nassaarsimalluni, nuliani isumassuillunilu asannippalussimagaluaqisoq ajuallassimasoq soorlu akuliuteqqusaasimannginnerminik paasisaqarusuttoq naammattoortarpaa.

„Tusarnaanngisaannarparma!“

Pasilliut quianaannartutut ippoq. Isumaqaraluarpormi tusarnaarneq kisiat suliarisarlugu. Nuliali oqalukkaangami misigisarpoq oqaatsini paasissutissanngortinneqartartut qarasaasiakkut misissorneqariarlutik sukuiarneqariarlutillu aaqqiissutissinneqartussat. Taama misiginera uppernarsineqartutut ittarput suli oqalunniartilluni uia oqaraangat: „Soormi imaattuinnarnianngilatit . . .?“

Nuliaasoq ajornartorsiuteqarluni uiminukartarpoq, imaanngitsoq arlaannut pisuutinniarlugu, imaluunniit ajornartorsiummik aaqqiitinniarlugu. Kissaatigisaa tassaavoq misiginneqataaffigineqarluni tusarnaarneqarnissani, pissutsinik piviusunik annernartunik soqutiginniinnanngitsumit, aammali qanoq misiginerminik soqutiginnittumit. Siunnersorneqarnissani kissaatiginngilaa, misigissutsimili akuerineqarnissaat. Taamaattuminguna uiusut amerlaqisut ima oqaraangamik ’qaartoornersuaqartitsisartut: „Asasannguara, taamatut misigissanngilatit. Taama soqutaanngitsigisoq.“

Inuit ilimagigajuttarpaa aapparmik eqqarsaatitik nalunngikkaat. „Ukiuni 25-ni aappariippugut,“ angut oqaluttuarpoq. „Kissaatigisakka paasiartunngikkunigit taava soqutigisimassanngilai sianiginagilluunniit.“ Atuakkiortoq aappariinneq pillugu atuakkiamini ima allassimavoq: „Aappariit kissaatiminnik imminnut oqaluttuuttanngippata, aappartillu kissaatiminik naammassinninnginnerarlugu isornartorsioqatigiittuartarpata, tupinnarpallaanngilaq asanninnerat suleqatiginnikkumassusiallu tammartarmat. Taarsiullugu pilersarpoq . . . pissaaneqarniuunneq tamarmik immikkut pisariaqartitaminnik aappartik matussutissiinissaanik pinngitsaaliniarlugu.“

’Soqutigittaassuaq!’

Immaqa nuliaasup uiminut toqqaannartumik tamanna oqaatiginngikkaluarpaa, oqariaatsimigulli oqaatigimisaarsinnaavaa. „Sooq taama kingusinaartigaat?“ apeqqut ingasattajaanngitsutut issinnaavoq. Qitinili patillugu isiginerata apeqqut ima nipeqalersissinnaavaa: „Susutinuna? Isumaalullunga utaqqivakkit. Sooq sianinnginnavit? Soqutigittaappallaarnak! Kiisa nerisassavut nillorput!“

Soorunami nerisassat eqqarsaatigalugit nuliaasoq paasinaraluarpoq. Tamannali oqqaterujussuarnermut pissutaasinnaappat  aappariinnerata asserornissaa aarlerinartoqnnginnerpa? „Oqqannerit amerlanersaat inuit marluk isumaqatigiinninnerannik pissuteqartanngillat, pissutaasorli tassaanerusarpoq uiusoq misigisarmat pissutsit immisut isiginngikkai, imaluunniit nuliaasup uimi imminut oqaloriaasia nuannarineq ajormagu,“ ph.d. John Gray taama allappoq.

Inuit ilaat isumaqarput angerlarsimaffik qanorluunniit piumasamik oqalussinnaatitaaffiusariaqartoq. Oqaloqatiginnillaqqikkaannili eqqisseqatigiinnissaq kamageqatigiinnissarlu ujartortariaqarput, tusaasullu misigissusii eqqarsaatigisariaqarlutik. Naatsumik oqaatigalugu tamanna assersuunneqarsinnaavoq aappaasup aappani immiartorfimmut imermik allequtserlugu sassaallerfigippagu tamatuminnga milornissaanut taarsiullugu. Assigiinngissut sassaalliutigineqariaasianiippoq.

Kulorsamiunut agdlagkat 3:12-14-imi unnersuussut maleruaanni oqqaanerit pitsaalineqarsinnaapput ilaqutariinnilu eqqissinermut siuarsaataassalluni. ’Atiniarsigik imaattut: nallittuingaarneq avaaginninnerlu nikanartinnerlu qanilaarnerlu kamajuinnerlu; immissinnut unnerluutissaqaraluarussi kamageqatigiillusilu isumakkeerfigeqatigiigitsi; soorlu [Jehovap] isumakkeerfigigaasi, taamattaaq ilissi pigitsi. Tamakkual tamarmik qaasigut atiniarsiuk asanninneq; tamanna iluarluinnassutsip nimeraa.’ (gD 22/1 94)

[Qupp. 25-mi assiliartaq]

Angutip pissutsit piviusut illersortarpai arnallu misigissutsit illersortarpai