Siunissat pillugu ullorissat qanoq oqarpat?
Siunissat pillugu ullorissat qanoq oqarpat?
Brasiliami Iteritsi!-p ilanngutassiortuanit
„TUSARPIUK ullorissani allassimasoq juulimigooq tullermi Marsilu apussasugut?” Oqaatsini taakkunani Cole Porterip qiimasumik erinarsugaani ersersinneqarpoq inuit siunissaannut ullorissat attuumassuteqarnerannik nalinginnaasumik qangarsuummalli upperisaqarneq. * Qilammiittulli inuillu nunami siunissaat imminnut attuumassuteqarpat? Taamaappat inunnut qanoq sunniuteqarpat? Taamaanngippat ullorissat sumik siunertaqarpat?
Inuit taama amerlatigisut siunissamik soqutiginninnerat tupigisassaanngilaq qanittukkut pisimasut eqqarsaatigigutsigik: Berlinimi qarmarsuup uppititaanera, Sovjetunionip atorunnaariartupallannera, politikkikkut siulersuisut tatiginannginneri, Afrikami Europamilu inuiannik allanik uumissuinerit, Indiami Irlandimilu upperisarsiorneq pissutigalugu akerariinnerit, nunani taama amerlatigisuni aningaasat naleerukkiartupallanneri inuusuttullu pikitsitsisarneri. Hamborgimi universitetip nalunaarusiaa naapertorlugu sorsunnersuup aappaata kingorna 1992 sorsunnerpaaffiulluni nunani assigiinngitsuni sakkutuulersuulluni 52-inik akersuuffiusimavoq. Eqqissinermik asannittut aperiumassapput: ’Toqqissisimaneq, eqqissisimaneq siooranartoqannginnerlu sumi nassaassaappat?’
Siunissap nalunartuunera pissutigalu siulittuiniartarnerit assigiinngitsut atugaasorujussuanngorsimapput. Ullorissat najoqqutaralugit siulittuiniartarneq ilisimaneqarnerpaajugunarpoq. Ilisimatusarluni ulloriarsiornermit astronomimit allaanerulluni ullorissat najoqqutaralugit siulittuiniartarneq astrologi „siulittuiniarneruvoq ullorissat inuit inissisimanerannut pissusiinullu sunniisinnaassuseqarsorineqarmata“. Ullumikkut inuit millionilikkuutaasa siunissaminnik paasisaqalaarusullutik horoskopitik atuanngitsoorsinnaangilaat. *
Ullorissat najoqqutaralugit siulittuiniartartut siulittuiniarfigisarpaattaaq aappariinnerni ajornartorsiutit napparsimanerillu qanoq kinguneqarnissaat, politikkikkut siulersuisut uppititaanissaat ivertitaanissaallu, nutaamik niuerniuteqassagaanni ulloq suna pitsaanerunersoq eqquiniaanernilu normut sorliit eqqorneqassanersut.
Reuterimi tusagassiortup nalunaarutigisimavaa ulloriarsiortoq Joan Quigley Nancy Reaganimit akulikitsumik orninneqartarsimasoq uini, USA-mi præsidentiusimasoq, oqalugiartussanngoraangat, timmisartoq ilaaffia tingisussanngoraangat mittussanngoraangallu. New Catholic Encyclopedia-mi allassimavoq „Paavi Julius II-p [1503-13] kunngitut ivertitaanissami ullussaa aalajangernialeramiuk ullorissat najoqqutaralugit siulittuiniartartut atorsimagai Paul III-illu [1534-49] ilagiit naalakkersueqatigiivisa piffissalerneqarneri tamaasa ullorissat najoqqutaralugit siulittuiniartartut aalajangiisuutittarai.“ Schweizimi suliffiit ilaanni direktøriusoq Alfred Hug ulloriarsiorluni siulittuisarneq atorlugu aktienik pisisartut siunnersortarpai, taammalu angusaqarluartarnissaannik neriorsortarlugit. „Ullorissani allassimapput,“ oqartarpoq.
Amerlasuut isumaqarunarput ullorissat inuunermut sunniuteqartartut. Ullorissat najoqqutaralugit siulittuiniartarneq qanoq ililluni aallartippa? Atuagatoqqap Biibilip ulloriarsiorluni siulittuisarnerit ulloriarsiortullu oqaaseqarfigai? (gD 8/7 94)
[Quppernerup ataani ilanngussat]
^ imm. 3 „Itsaq Kinami isumaqartoqarsimavoq . . . qilammi nalunaaqqutit ajunaarnerillu Kaasarip naalakkersuisuisalu ajunngitsuliorsimanerannut ajortuliorsimanerannullu nalunaaqutaasut.“ — The International Encyclopedia of Astronomy.
^ imm. 5 Horoskop tassaavoq „piffissami aalajangersimasumi (soorlu inuuimmi) ullorissat inissisimanerannik titartagaq nalunaaruteqartartoq“ ulloriarsiortullu inuit siunissaannik siulittuiniartarnerminni atortagaat.