Ullorissat ilinnut oqariartuuteqarput!

ALLAASERISAMI siullerni takoriikkatsitut ullorissat kusanartorsuupput, taamatuinnarli isigisassaallutik: uumassuseqanngitsutut Pinngortitsisiminnit qilammi inissitatut. Upperisarsiorfigisassaanngillat. Jehovap pinngortitaanut tupinnangaartunut ilaasutut ullorissat ’oqaluttuaraat Guutip naalannassusia’ saniatigullu inunnut Pinngortitsup piumasaanik naammassinninniarnerini qaammaaqutaallutik. — Tussiaat 19:2; 5 Moses 4:19.

Biibilimi ima allassimavoq: ’Ilissi akornassinni . . . naasaanik nassuiaasartoqassanngilaq, pisussanik eqquiniartartoqassanani, siulittuisartoqassanani angakkuartartoqassananiluunniit. Serrasoqartassanngilaq, timaajagarsiortunik anersaanillu siulittuisartunik siunersiuisoqartassanani toqoreersunillu apersuisoqartassanani. Inerteqqutinik tamakkuninnga unioqqutitsisut tamaasa Jehovap maajugai.’ (5 Moses 18:10-12) Esajas oqarsimavoq: „Qilammik misissuisut sassaqqugaluarniakkit, annaanniaraluarniarlitsit qilassiortartut ulloriarsiortartullu. . . . Taakku ivikkatut innermit nungutitaasutut ilissapput.“ — Jesaja 47:13,14.

Ullorissat sunik ilinniarfigisinnaanerivut

Ullorissat uumassuseqanngikkaluartut ammasumik pissuseqarutta ilinniarfigisinnaavavut. Edwin Way Teale allassimavoq: „Piffissami naassanngitsumi inuit suunngitsutut innerannik ullorissat oqaluttuartuupput.“ Ulloriarpassuit isaannatsinnik takusartakkavut ukiut hundredelikkuutaat matuma siorna siuaasatta takoreersimagaat nassuerutigigutsigu maniguunnermik misiginnginnerpugut? Ataqqinartorsuarmut ’pileqqaarnerani’ taakkuninnga kingusinnerusukkullu inuiannik pinngortitsisumut ataqqinningaarnermik misiginngilagut? Israelip kunngia David ataqqinningaarluni allassimavoq: „Takugaangakkit qilak pigisat, assappit pinngortitaat, qaammat ullorissallu tassani ivertitatit - taava inuk suummat eqqaasarpiuk? Inuup qitornaa suummat isumagisarpiuk?“ Qilaap maniguunnermik misigitittariaqarpaatigut imminullu aperitilluta inuunerput sumut atornerlutigu. — 1 Moses 1:1; Tussiaat 8:4,5.

David taamaalluni ima qinusimavoq: „Ajoqersunnga illit piumasattut ilioqqullunga,  Guutigigakkimmi illit.“ (Tussiaat 143:10) Davidip inuunerata oqaluttuariasaanerata takutippaa qinnutaa akineqarsimasoq. Guutip piumasaanik Inatsisaani allasimasutut iliornissaq ilikkarsimavaa. Pinngortitsisullu inuiannut piumasaa ilikkarsimavaa, allaaseralugulu. „Guutiitsoq erniinnaq peeruttussaavoq . . . Kisianni qanilaartut nuna kingornutissavaat, pilluangaarlutillu inuussapput. . . . Nigorsimajuk ajortoq, ajunngitsuliorillu, taava eqqissillutit tamatigut inuusinnaassaatit. . . . Iluartut nuna kingornutissavaat najugaqassallutillu tassani naassaanngitsussamut.“ Inuk pinngortitaavoq Guutip piumasaanik nunami iliortussatut. — Tussiaat 37:10,11,27-29; 1 Moses 1:28.

Ullorissat inuiannut tamanut assigiimmik oqariartuuteqarput. Pallorfiginagit ’siunersiorfiginagilluunniit’ Pinngortitsisup asanninnera, ilisimassusia pissaaneqarneralu taakkunani takusinnaavarput. Ilisimatusarluni ulloriarsiornerup, siulittuiniarluni ulloriarsiornerup akerlerisaata, uummaterput ataqqinningaarnermik misigitittariaqarpaa. Aammattaarli Taassuminnga ilinniarusunnerput suli annertunerulersinngilaa? Taamaaliorsinnaaqqulluta oqaatsini Biibili allanneqartissimavaa. Ullorissat oqariartuutaat paasisimagukkit, Jehovap inuiannut siunertarititaa ilikkarsinnaavat, pingaarnerusumillu pilluaqqusinissaanut qanoq ilillutit peqataasinnaanerlutit ilikkarsinnaavat. Guuti pillugu inuunerullu siunertaanik apeqqutissaqaruit, najugarisanni Jehovamut Nalunaajaasut atassuteqarfigikkit, quppernermiluunnit 5-imi adresseq ilinnut qaninnerpaaq allaffigiuk. (gD 7/8 94)

[Qupp. 8-mi assiliartaq]

Ullorissat maniguunnermik misigitssinnaavaatsigut