Biibili qanoq oqarpa?

Nammineq eqqarsarnissarput Biibilimi akerlerineqarpa?

INNEQ silaannarmi naaralaarpoq atuakkanik naleqaqisunik tyskit naalagaaffimmi atorfillit innermut eqqaatillugit. Nazistit nalaanniunerpa? Aap, aammali pisoq 1199-imeersuusinnaagaluarpoq, taamani katuullit biskopiunerat peqqusimmat biibilit tyskisuut tamarmik ikuallanneqassasut.

Atuakkanik ikuallaasarneq — nunarsuaq tamakkerlugu nammineq eqqarsarsinnaassutsimik oqaaseqarsinnaassutsimillu  naqisimanninnermut nalunaaqutaasoq — nunarpassuarni piffissallu sivisuup ingerlanerani pisarsimavoq, amerlasuutigut inuinnaat nammineq eqqarsarsinnaassutsumik kiffaanngissuseqarnissaata qanoq sunniuteqarnissaanik palasit nuimasut annilaanngatiginninnerat pissutaalluni.

Taamaattumik tupinnanngilaq nalitsinni inuppassuit isumaqarmata Biibili silassorissutut misissueqqissaarnissamut kiffaanngissutsimik sukannersumik killilersuinermut isumaqataasoq. Taamaappali? Inuit ataasiakkaat namminneq eqqarsaqqusaannginnissaat Biibilimi ilalerneqarpa?

’Jehova asassavat isumakkut iluunngarlutit’

Eqqarsarsinnaassutsitsinnik atuinissarput Biibilimi akerlerineqanngilaq. Jesusimi kajumissaarisimavoq ’Jehova asassagipput isumatsigut iluunngarluta’. (Mákorse 12:30) Kiffartornermi nalaani assut soqutigisimavai taamanikkut pisartut (Lúkarse 13:1-5), biologiimut tunngasut (Matîuse 6:26, 28; Mákorse 7:18, 19), nunalerinermut tunngasut (Matîuse 13:31, 32) kiisalu inuttut pissutsit (Matîuse 5:28; 6:22-24). Assersuusiaasigut erserpoq Guutip oqaasiani najoqqutassianik paasisimasaqarluartuusoq tusarnaartimilu tunuliaqutaat eqqarsariaasiallu nalunngilluarai. Najoqqutassiallu tamakku tusarnaartiminut ingerlateqqinniarlugit ilungersorluni iliuuseqarniartarsimavoq.

Paulusip ilungersorluni kristumiut tamaasa ilungersorluni qinnuigisimavai Guuti ’siuneqartutut’ kiffartuuteqqullugu. (Rûmamiut 12:1) Thessalonikamiut kajumissaarsimavai ’tassanngaannaq eqqarsaatimikkut nakimasunngoqqunagit . . . oqaatsikkut [ilumuunngitsukkut]’. (2 Tásalûníkamiut 2:2) Ilisimasaqarfigingaatsiarsimavai griikerit Kretamiullu taallioriaasii (apustilit suliait 17:28; Títuse 1:12) aammalu sakkussaqarnermut sakkutooqarnermullu tunngasut (Evfisumiut 6:14-17; 2 Korintumiut 2:14-16). Kiisalu sumiiffinni ileqqulersuutaasartut maluginiartarsimavai. — apustilit suliait 17:22, 23.

Taamaalillutik Jesus Paulusilu isumakkut annertuumik kiffaanngissuseqarsimapput, tamannali pissutigalugu suna eqqortuusoq sunalu eqqunngitsuusoq eqqarsaatigalugu kisimik aalajangiisussatut isigilersimanatik. Jesusip Allakkat nammineq isumaminit pingaarnertut isigiuaannarsimavai, arlaleriaqalunilu issuaaffigisarsimallugit. Pilliutitut toqutaanissaminik Guutip siunertarisaa pinngitsoortequllugu Peterip siunnersuutaanut ingerlaannaq aalajangersimalluinnarlunilu qisuariarnerata ersersippaa taamatulluunniit eqqarsarnissani siunertarinngikkini. (Matîuse 16:22, 23) Paulusilu Korinthimiunut ima allassimavoq: ’Uangali tikikkassi, qatanngutikka, Guutip nalunaajaataa ilissinnut oqaatigalugu oqaatsikkulluunniit ilisimassutsikkulluunniit malunnarumallunga pinngilanga.’ (1 Korintumiut 2:1) Jesusitut iliorluni oqaatsini Allakkanik tunngavissaqartilluartarsimavai. — apustilit suliait 17:2.

Biibilimi kajumissaarneqarpugut anersaakkut piginnaassutsivut tamakkiisumik atoqqullugit, sumulluunniilliunngitsoq. Eqqarsariaatsitta Jehovap eqqarsaataanut naapertuuttuutinnissaat uagut nammineq, ilagiit pinnatik, akisussaaffigaarput. Efesusimiut ilaat anersaarsiortuunertik qimallugu kristumiunngormata atuagaataasa ikuallannissaat Paulusip nammineq isumaginiarsimanngilai,  kisianni ’ikinngitsut angakkuarninniartaraluartut mappersakkat ataatsimut pissuppaat tamarmillu takkuanni ikikkarlugit’. (apustilit suliait 19:19) Sooq kristumiut taakku atuagaatiminnik namminneq ikuallaanissartik pisariaqartutut isigisimavaat?

Illersuisut saarliit

Assersuut manna eqqarsaatigeriassagit: Pallittaalisaq tiguaruminaatsoq arlalinnik siassimasunik illersuisoqartarpoq. Sakkutuut naalagaat pikkorissoq kinaluunniit isumaqarnavianngilaq illersuisut siassimasut arlaat pinngitsoorneqarsinnaasoq akersuunnermilu atunngitsoorneqarsinnaalluni. Aamma kristumiut ajortimut akersuunnerminni arlalinnik illersuuteqarput.

Jâko 1:14, 15-imi allassimavoq: ’Kinaluunniit usserneqararaaq, nammineq piummatsiminit qiisagaangami uerillunilu, taavalu piummasia pilereeraangat ajorti pinngoraraaq.’ Ajortuliornissamut alloriarneq siulleq tassa eqqarsaatikkut kissaatinik eqqunngitsunik ineriartortitsineq, taamaattumik ’illersuisut saarliit’ pigiuaannarumagaanni eqqarsaatit naalakkersortariaqarput eqqunngitsumik kissaateqarneq alliartoqqunagu.

Tassaana eqqarsaatit iliuutsillu imminnut atassuteqarnerat tamanna pissutigalugu Biibilimi ima kajumissaarneqartugut: ’Pavaniittut pilerigisigit nunamiittut pinnagit.’ (Kulorsamiut 3:2) Taamaattumik kristumiut kanngunartuliorneq, anersaarsiorneq tunussinerluunniit eqqarsaatiginaveersaaraangamikku imaanngilaq eqqarsaatit tamakku Biibilip ajoqersuutaanit nukittunerulernissaat ersissutigigamikku, kisianni imminnik ajortuliortitsisinnaasut suulluunniit ingalassimarusukkamikkik.

’Suut tamarmik uleersimapput’

Eqqarsaatinik aqutsinissamut pissutissat pingaartut ilagaat Jehovamut asanninnerput eqqarsaatitsinnillu atuaasinnaaneranik ataqqinninnerput. Takorlooriaruk ikinnguteqartutit asasannik imaluunniit qanigisaqartutit pujoralammut ipermullu malussarissorujussuarmik. Illumik immikkut ittumik ipertaajaaqqissaarnissat eqiagiinnarlugu taanna qaaqqusarunnaassagaluarpiuk? Asanninnerpit immikkut ipertaajaalluaqqissaarnissannut killissannginnerpaatit? Eqqarsaatitsinnik ilorlerpaanik Jehovap malussarilluinnarnera Tussiaat 44:22-mi erserpoq: ’Nalunngilai uummatip isertarisai [isertugai, NV].’ Paulus oqarsimavoq eqqarsaatitsinnut Guuti naatsorsuiffigisassarigipput: ’Pinngortitamik taassumunnga ersinngitsoqanngilaq, suulli tamarmik taassuma isaanut saqqumillutillu uleersimapput, tassa naatsorsuiffigisassatta.’ — Eprîarit 4:13; Tussiaat 10:4; Ussatit 6:16, 18.

Uagut inuit eqqarsaatitsinnut akisussaanissatsinnik Guutip piumasarinninnera Jobip paasillugu akuerisimavaa. Meeqqani festereeraangata ikikkagassanik pilliisarsimavoq, ima oqarluni: „Immaqa ernikka ajortuliorsimassapput uummatimikkullu Guuti perloqqusimallugu.“ (Job 1:5) Piaaraluni eqqunngitsumik isumaliornerinnaq Jehovap isaani ajortuliornerusinnaavoq. — Naleqqiuguk Mosesimik allakkat aappaat 20:17.

Eqqarsarsinnaanermut kiffaanngissuseq piviusoq

Kristumiut tamarmik Biibilimi kajumissaarneqarput anguniagarissagaat ’eqqarsaatiminnik tamanik tigusatut kiffartortitsinissartik Kristusimut naalattunngorlugit’. (2 Korintumiut 10:5) Tamanna upperisarsiornikkut pisortat killilersuineratigut anguneqarneq ajorpoq, anguneqartarporli inuup nammineq imminut naalakkersorniarneratigut aammalu Jehovamik, pissusiinik najoqqutassiaanillu paasinninnermik asanninnermillu ineriartortitsiniarneratigut. Tamanna angusimagaanni eqqarsarsinaanermut kiffaanngissuseq piviusoq anguneqartarpoq, kiffaanngissuseq taamaallaat Guutip najoqqutassiaanit killilersugaasoq, allaallu eqqarsaatitsigut Jehovap nuannaartissinnaaneranik ilisimanninnikkut nuannaarnermit nukittorsarneqartartoq. (gD 8/6 94)

[Qupp. 16-mi suminngaanneernera]

Atuakkamit Bildersaal deutscher Geschichte-mit