Malussarippallaartut iluaqutissaat

ATORTUNUT nalingannaasunut soorlu eau de cologne-nut eqqiaanermiluunniit atortunut malussarippallaarnerup napparsimasut nakorsaatitiguinnaq ajornartorsiortinngilai, aammattaarli inuttut atugarisaasigut. Katerisimaarusunneq inunnguuseraarput, tipigissunulli kemikalianullu malussarippallaarnerup, imaluunniit MCS-ernerup, inuppassuit inussiarnersuugaluit nuannaartuugaluillu kiserliortunngortittarpai. „Siornatigut allatut peqqiilliortarsimavunga,“ Shelly MCS-ertoq oqarpoq, „misilissimasannilli manna ajornerpaavoq. Immikkoorneq artornarnerpaavoq.“

Ajoraluartumik MCS-ertut ilaannikkut „eqqumiilaartutut“ isigineqartarput. Soorunami MCS-ip assigiinngitsorpassuarnik katitigaasup suli nalinginnaasumik ilisimaneqannginnera akuerisaannginneralu pissutaaqataapput. MCS-imilli ilisimasakinneq taama naalliuutilinnut pasillerajunnissamut patsisissaanngilaq. Atuagassiami American Family Physician-imi allassimavoq: „Napparsimasut taakkua malugisatik naalliuutigivippaat.“

MCS-ertut naalliuutaat eqqumiimmat paasissutissartakimmallu qissimigaarnagit, Ussatit 18:13-imi najoqqutassiamit siulersorneqartariaqarpugut: „Oqaaserineqartut naalaarluaqqaarnagit akissuteqarneq sianiitsorpallanneruvoq, kanngunarsaataallunilu.“ Nappaateqartunut tamanut, kinaassusersiornani, kristumiutut asanninneq pitsaanerungaarpoq. Taamatut asanninneq, nakorsaatitigut ilisimatusarnikkut qanorluunniit paasisaqartoqassagaluarpat, peqqissimissutiginngisaannassavarput.

Kristumiutut asannigit

Kristumiutut asanninneq diamantitut kusanartortalittut ippoq periarfissanut pisariaqartitanullu tamanut naleqqulluni. Ikinngut MCS-ilerpat, kristumiutut asanninnerput misiginneqataanermik qillalaartariaqarpoq, soorlulusooq  nammineq taama atugaqartugut. Asanninneq ’namminissaminik piniartarinngilaq’ — imaluunniit nammineq pisinnaatitaaffini piniartarinngilai. Allat atugarissaarnissaat siulliuttarpaa. ’Kamajuitsittarpaatigut, tamatigut kamaginnitsittarluta, tamatigut uppertittarluta tamatigullu ilalaartittarluta.’ Asanninneq taamaattoq ’soraarnavianngilaq’. — 1 Korintumiut 13:4-8.

Mary MCS-inngilaq, ikinngutaasali ilaat MCS-erput. „Nammineq tipigissaatit nuannareqaakka,“ Mary allappoq, „aalajangersimavungali  MCS-ertunut pulaaraangama tamakkuninnga atortassananga.“ Mary Jesusitulli oqarpoq: ’Ikiuiumavunga.’ (Mákorse 1:41) Trevor meeraalluni MCS-ilersimavoq. Arnaa oqaluttuarpoq: „Suleqatikka erninnut naleqqussarniarlutik iliuuseqangaarsimmapput.“ Joy, Austrauliami Jehovap Nalunaajaasua MCS-imik naalliuuteqangaartoq, oqarpoq ilaquttami ikinngutimilu aalajangersimasumik pulaartarneri ajornartorsiutiminillu paasinnillutik erseqqissumik takutitsisarnerat qiimmassaatigisarlugu.

Aappaatigulli MCS-ertup tipigissarsimasut eqqaminiittut nikallussutiginaveersaartariaqarpai. Ernest, allaaserisami siuliani issuarneqartoq, Iteritsi!-mut oqarpoq: „MCS-ip artornartua nammineq nammattariaqarparput. Allat ajornartorsiutitik akiorpaat. Taamaattumik ajornartorsiuterput eqqarsaatigineqaraangat pingaartittarparput.“ Tatisinani inussiarnersumik suleqatiserinninneq pitsaanerpaasarpoq. Lorraine oqaluttuarpoq: „Tipigissaammik eau de cologne-milluunniit tipigissarsimasoq aperigaangat sooq taama isikkulutsigisunga oqarfigisarpara: ’Tipigissut ajornartorsiutigaakka, unnummullu nalinginnaasumit ajornerugunarpoq.’ Paasinnillaqqissunut tamanna naammattarpoq.“ MCS-eraanni soorunami ikinngutit inussuarnersumik ikiortariaqarnermik eqqaasinneqarsinnaapput.

Pam, siusinnerusukkut issuarneqartoq, isumalluarluni oqarpoq: „Tamarmik naalliuutaagallaannarput.“ Sooq Pamip „-gallaannarput“-mik eqqaavai? Guutip naalagaaffiata nunarsuarmi naalliuutinik tamanik piiaanissaanik Biibilimi tunngaveqartumik neriuuteqarami. Allaat toqu — inuit peqqinnerpaalluunniit naggataagut atortariaqagaat — peqarunnaassaaq. — Daniel 2:44; sarĸúmersitat 21:3, 4.

Taamaalitinnaguli ullumikkut katsorsarneqarsinnaanngitsumik nappaatillit, Guutip naalagaaffiata aqutsilernissaa qilanaarisinnaavaat, taamanikkussaq „ima oqartoqassanngilaq: „Napparsimavunga.“ (Jesaja 33:24) Jesusitulli akissarsiassaq siunitsinniittoq isiginiarneruniartigu, pissutsit aaqqissuussaaneranni maanna atuuttumi misilinneqaatigisinnaasagut tamaasa naammagittarluta atuutigalugit. — Eprîarit 12:2; Jâko 1:2-4. (gE 8/8 2000)

[Qupp. 9-mi ungalusaq/​assiliartaq]

Asaqatigiigitsi

Nammineq tipigissunut kemikalianullu malussarippallaaraanni (MCS-eraanni), ikinngulluunniit ilaqutaasorluunniit malussarippallaarpat, Biibilimi najoqqutassiat uku iluaqutigineqarsinnaapput:

’Taamaattumik inunnut qanorluunniit iliorfigeqqugussi ilississaaq taamatut iliorfigisigik.’ — Matîuse 7:12.

’Tullit ilittut asassavat.’ — Matîuse 22:39.

’Misissoqatigiinniartalu asanninnermut ajunngitsuliornermullu kajumissaaqatigiilluta, katisimasarfippullu qimannaveertigu, ilaat taamaattarmata; kisianni oqaaqqissaaqatigiilluta pisa; annerusumilli taamaassaagut ullussaq qanillilersoq malugilerassiuk.’ (Eprîarit 10:​24, 25) Tamatta, ingammik napparsimagutta, anersaakkut qiimmassarneqartariqarpugut. Kristumiorpassuit MCS-eraluarlutik ataatsimiinnernut najuunnissartik ilungersuutigisarmassuk nersornarput. Allat eqqugaanerusut telefonikkut peqataasarput. Naalagaaffilersaarfiit ilaanni „tipigissortaqarfiunngitsumik“ MCS-ertunut inniminnigaqarpoq. Taamaatulli aaqqiisoqarnissaa ajornanngittuaannanngilaq periarfissaqartuaannarnaniluunniit.

„Puioqinasili avaaginnittassagassi . . . pilliutit taamaattut Guutip iluarimmagit.“ (Eprîarit 13:16) Ajunngitsuliussagaanni inuttut pilliuteqartariaqarajuppoq. MCS-ertut ikiorniarlugit pilliuteqariaannaavit? Aappaatigulli MCS-imik eqqugaasimasut allanut neriuutigisatik inornartuutissanngilaat. Assersuutigalugu kristumiut utoqqaanertat tipigissaatinik aamma eau de cologne-​nik atuinerit malittarisassaliorsinnaanngilaat tamakkununngalu tunngasunik nalunaaruteqarneq ajornanngittuaannanngilaq. Aammattaaq ilagiit oqaluussisartunik ilagiinnit allaneersunik soqutiginnilerlaanillu tipigissarsimasunik pulaartoqartarput, soorunami taakkua tikilluaqqusaapput. Tamakkuninnga atuinerat pissutigalugu peqqusiileqitinnianngilavut tujormisinniarnagilluunniit.

’Eqqissinissaq kajungeralugulu noqqaassutigiuk.’ (1 Pîtruse 3:11) Soorunami apeqqutit taamaattut kristumiut akornanni eqqissiunnaarsitsissanngillat. ’Ilisimassut pavannga pisoq . . . eqqissisitsiniarlunilu isumagillunilu . . . nallittuingaarpoq,’ Jâko 3:17-imi allassimavoq. Eqqissisitsiniartut, MCS-eraluarunik MCS-inngikkaluarunilluunniit, ingasaassiniassanngillat kemiimillu sanaanik atuineq pillugu piumasaqaateqassanatik. Taamatuttaaq ingasaassinngitsut ’nallittuingaartullu’ allanik peqqiilliortitsisinnaanerat nalunngikkunikku tipigissarsinnaatitaanertik aalajangiusimassanngilaat. Taamaalillutik aamma taakkua eqqissinissaq noqqaassutigalugulu ’eqqissisitsisuullutillu’ takutissavaat. — Jâko 3:18.

Naleqqutinngitsumik killissaanngitsumillu isiginnittaaseqarneq, MCS-ertup allalluunniit isiginnittaaserigaluarpagu, avissaartuutaassaaq. Taamatut isumaqarneq arlaannaannulluunniit iluaqutaanngilaq. Allaat Guutimut attaveqarneq ajoquserneqarsinnaavoq. — 1 Juánase 4:20.

Soorunami kristumiut annertoorujussuarmik ajunngequteqarput — Jehovap anersaava pigaat. Jehovap anersaavanik akuttoqatigiimmik qinugaangamik, anersaap inerititaanik, ingammik asanninnermik, — ’iluarluinnassutsip nimianik’, — ineriartortitsisarput. (Kulorsamiut 3:14) Tamanna ilutigalugu naammagittaramik anersaaq tamanna kristumiut pissusii allani ineriartuutaatippaat. — Galâsiamiut 5:22, 23.

[Qupp. 10-mi assiliartaq]

Inuit MCS-ertut allatulli ikinnguteqarnissartik pisariaqartippaat