Biibilimi qanoq allassimava?

Sanngiissutsivut Guutip isiginngitsuusaartarpai?

’Ajortuunngilanga! Sapinngisara tamaat ileqqupilukka akiorniaraluarpakka. Sanngiippallaalaaginnartungaana!’

OQAATSIT qulaaniittut ilisaraagit, allalluunniit taamatut oqartut tusarnikuuigit? Amerlasuut isumaqarput ileqqussatigut sanngiiffigisaq takkuttuartoq ajugaaffigissallugu sapernartuusoq. Inuit ilaasa imigassamik, tupamik ikiaroornartunilluunniit pinngitsuuisinnaajunnaarnertik ajornartorsiutigaat. Allat piumatussuseq ajornartorsiutigaat. Allallu kinguaassiuutitigut pileritussuseq ajornartorsiutigaat. Atoqatigiinneq pinngitsoorsinnaangivinnerarlugu kanngunartuliorlutik inuupput.

Soorlu Matthæusip allagaani 26:41-mi allassimasoq inuttut sanngiissutsivut pillugit Jiisusi paasinnilluinnartuuvoq. * Aap, Biibili tamakkerlugu ersarippoq Jehova Guuti Jiisusi Kristusilu inunnut naakkinnilluinnartuusut. (Tussiaat 103:8, 9) Tamannali tunngavigalugu ilimagissavarput kukkussutivut amigaativullu Guutip isiginngitsuusaassagai?

Mosesi Daavilu

Assersuutitut Mosesimik oqaluttuaq sammisinnaavarput. Oqaatigineqarpoq „inunnit nunarsuarmiittunit tamanit anneruniajuinnerpaasoq“, pissuserlu tamanna ileqqoriuaannarniarlugu ilungersuutigiuarpaa. (4 Mosesi 12:3) Israelikkulli inoqajuitsumi angalaarnermi ingasaassiniarajuttarput ataqqinninnginnermillu Guutimut kiffaanullu takutitsisarlutik. Tamakku pitillugit Mosesi maniguulluni Jehovamut siulersoqqulluni saaffiginnittarpoq. — 4 Mosesi 16:12-14, 28-30.

Inoqajuitsumi sivisuumik qasunartumillu angalaarneq naalermat, inuiaat takkuanni Mosesi kamalerpoq Guutillu peqqussutaa naalannagu. Guutip isumakkeerfigaa, pisimasorli isiginngitsuusaanngilaa. Mosesi Aronilu oqarfigai: „Upperinnginnassinga . . ., taava katersorsimasut uku nunamut taakkununnga tunniussannut siulersorlugit apuutitissanngilassi.“ Mosesi nunamut neriorsuutigisamut isissanngilaq! Tamanna anguniarlugu ukiuni 40-ni ilungersunartorpassuit  naammagittarfigereerlugit inuttut kukkuneq sualuttoq pissutigalugu kissaataa piviusunngunngitsoorpoq. — 4 Mosesi 20:7-12.

Angut Guutimik mianerinnittoq alla aamma inuttut sanngiissuteqartoq tassaavoq kunngi Daavi. Ilaanni kinguaassiuutitigut pilerissutsiminut nakkaannarpoq allallu nulia atoqatigalugu. Taavalu isertorniarlugu uiusoq toqutaatippaa. (2 Samueli 11:2-27) Kingorna iliuutsini peqqissimissutigingaarpai, Guutillu isumakkeerfigaa. Daavilli ilaqutariit aserorsimavai, kingunipiluinillu Jehovap pinngitsuutinngilaa. Nukappiaraq kanngunartuliorneq pissutigalugu inunngortoq napparsimalerpoq, meerarlu annaanniarlugu Jehova akuliutinngilaq naak Daavi ilungersorluni qinusaraluartoq. Meeraq toquvoq, kingusinnerusukkullu Daavip illuani alianartut allat tulleriiaatilerput. (2 Samueli 12:13-18; 18:33) Ileqqussatigut sanngiissutsini nakkaannarfigigamiuk Daavi annertuumik akiliisariaqarpoq.

Assersuutit tamakkua takutippaat Guutip iliuutitsinnut akisussaatikkaatigut. Taassumunnga kiffartorusuttut anersaakkut sanngiissutiminnik akiuunissartik kristumiuulluarnerunissartillu sulissutigiuartariaqarpaat. Ukiuni hundredelinni siullerni amerlasuut tamanna iluatsippaat.

Ajortulioqqajaasarnerit qaangerniarnerinut akiuunneq

Apustili Paulusi kristumiunut eqqortumik maligassaalluartutut isigineqarpoq. Nalunngiliulli sanngiissutsiminik qaangiiniarnermini akiuuttuartuusoq? Romamiunut allakkani 7:18-25-mi ilumigut akersuunneq uummaarissumik allaatigaa. Versi 23-mi ’akerartortutut’ oqaatigaa. Paulusi akiuuttuarpoq nalunnginnamiuk ajorti takkuttuartuusoq. — 1 Korinthimiut 9:26, 27.

Ilagiinni Korinthimiittumi kristumiut ilaat ajortuliortuusimagaluarput ajorluinnartut. Biibilimi allassimavoq taakku siornatigut ’kinguaassiuutitigut inuunerluttuusimasut, allasiortuusimasut, anguteqatiminnoortartuusimasut, tillittuusimasut, piumatuujusimasut, imerajuttuusimasullu’. Aammattaarli allassimavoq ’uffarneqarsimasut’. (1 Korinthimiut 6:9-11) Qanoq ilillutik? Iliuutsitsik ajortut unitsinnissaannut nakussatsinneqarsimapput eqqorluartumik ilisimasaqalerlutik, kristumiut allat katerisimaaqatigalugit Guutillu anersaava ikiortigalugu. Naggataatigullu Guutimit Kristusip aqqani iluartuutitanngorput. Aap, Guutip isumakkeerfigai, taamaalillutik ilerasuutaarupput. — Apustilit Suliaat 2:38; 3:19.

Paulusip kristumiullu Korinthimiittut ajortulioqqajaasarnitik suusupaginngilaat. Ajugaaniarfigaat, Guutillu ikiuineratigut iluatsippaat. Ukiuni hundredelinni siullerni pallorfiginnittut taakku ileqqorissaarnikkut maligassaalluartunngorput ajortulioqqajaassusertik avatangiisillu akornutiginagit. Uagummi?

Guutip sanngiissutitta akiornissaannut ilimasuffigaatigut

Sanngiissutivut ajugaaniarfigigatsigit isumaqanngilaq ajugaaffigisinnaagivut. Naammalluinnanngissuserput peersinnaanngilarput, tunniutiinnarfigisariaqanngilarpulli. Sanngiissutinut ajugaaffigiuminaatsunut taanna pissutaavoq. Taamaakkaluartorli tunniutiinnartariaqanngilagut. (Tussiaat 119:11) Sooruna tamanna taama pingaaruteqartigisoq?

Naammalluinnanngissuseq inuunerlunnermut utoqqatsissutissatut Guutip akueriinnartuartussaanngimmagu. (Judasi 4) Jehovap kissaatigaa minguiarnissarput, ileqqussatigullu minguitsumik inuussasugut. Biibilimi allassimavoq: „Ajussuseq maajugisiuk.“ (Romamiut 12:9) Sooruna Guutip tamanna taama aalajangiussimatigigaa?

Ilaatigut pissutigalugu sanngiissusermut tunniutiinnarneq ajoqutaasarmat. Galatiamiunut allakkani 6:7-imi allassimavoq: „Inuup siaruartikkani aamma katersorumaarpai.” Assersuutigalugu imigassamik, tupamik ikiaroornartunilluunniit pinngitsuuisinnaajunnaarnermut, imaluunniit piumatussutsimut kinguaassiutitigulluunniit pilerissutsimut tunniutiinnartut inuunerminni ajortunik inerititaqakulasarput. Taassumanngali pingaarnerusumik pissuteqarpoq.

Ajorti Guutimut narrunarsaataavoq taassumunngalu avissaarsimatilluta. (Esaja 59:2) Ajortuliortartut taassumunnga qanimut attaveqalersinnaanngillat, taamaattumillu taakku ima kajumissaarpai: „Uffarniaritsi, eqqiarniaritsi! . . . Ajortumik iliussaaritsi.“ — Esaja 1:16.

Pinngortitsisorput asannittuuvoq naakkinnittuullunilu. ’Kimilluunniit tammaqqusinngilaq, tamaasa allamik isumataarnissamut periarfissikkumagamigit’. (2 Petrusi 3:9) Sanngiissutitsinnut tunniutiinnartuarutta, Guutimut attaveqarlualernissatsinnut akornutigissavarput. Sanngiissutivut Guutip isiginngitsuusaanngippagit, uaguttaaq nammineq taamaaliortariaqanngilagut. (gE 11/8 02)

[Quppernerup ataani ilanngussaq]