Inuit eqiasuitsut sulinis­saq tunuarsimaarfigineq ajor­paat. Suliatik al­lanit nersor­neqaatigin­ngik­kaluarlugu pisariaqar­titamin­nik im­minut pilersor­niarlutik al­lanil­lu ikiuiniarlutik suliner­tik nuan­naarutigisar­paat.

Nuan­niigigaluarutsiguluun­niit inuunermi akisus­saaf­fip­pas­suaqar­poq. Silarsuarmi suleruloor­nis­samik nuan­niigineqarfiusumi eqiasuitsuuneq iluaqutigis­savat. – Oqaluus­sisar­tup oqaasii 3:13.

“Suleruloor­neq ilik­karaangatsigu tul­luusimaar­tar­pugut nalerisimaar­tarlutalu. Taamatut misigisarama sulineq nuan­narilersimavara. Aam­ma sulil­luar­taruit tusaamasaal­lualis­sutigis­savat.” – Reyon.

BIIBILIMI NAJOQQUTASSIAQ: “Suleruloornerit tamatigut pissarsisitsisarput.” – Ussatit 14:23.

Sulinermut ajun­ngitsumik isigin­nit­taaseqar­neq ineriar­tor­tiguk ukua iliuuserinerisigut.

Sulilluartuuneq pingaartiguk. Angerlarsimaf­fim­mi suliaagaluar­pat, atuarfim­mi ilin­niagas­saagaluar­pat, aningaasarsiorluni sulinerugaluar­pat suliat tun­niusimaarfigiuk. Sulil­luar­neq ilik­karuk­ku pitsan­ngorsaanis­san­nut naam­mas­sisaqapal­lat­tar­nis­samul­lu periarfis­sarsiulis­saatit. Pik­korin­nerujar­tor­til­lutit sulinerit nuan­narinerujar­tus­savat.

BIIBILIMI NAJOQQUTASSIAQ: “Takusaqaruit angummik suliamini pikkorissaartumik taava taanna kunnginut sassartiguk; inuinnannguimmi sassarfigissanngilai.” – Ussatit 22:29.

Kikkunnut iluaqutaanera eqqaamajuk. Suliat suugaluar­pal­luun­niit akisus­saaf­fiit naam­mas­sil­luaruk­ku al­lat iluaqusis­savatit. As­sersuutigalugu eqiasuil­lutit angerlarsimaf­fim­mi suliaqaruit ilaqut­tatit oqilisaatis­savatit.

BIIBILIMI NAJOQQUTASSIAQ: “Tunisineq pilluarnarneruvoq tigusinermit.” – Apustilit Suliaat 20:35.

Peqquneqarnermit iliuuseqarnerugit. An­nikin­ner­paamik iliuuseqar­nak peq­quneqar­nin­nit iliuuseqar­neruniarsarigit. Taamaalioruit illit inuunerit nam­mineq aqus­savat – kajumis­suseqaravim­mi, imaan­ngitsoq pin­ngitsaalineqaravit, iliuuseqar­neruvutit. – Mat­thæusi 5:41.

BIIBILIMI NAJOQQUTASSIAQ: ‘Illit ajunngitsuliornerit pinngitsaaliinermit pinnani kajumissutsinnit pisussaavoq.’ – Fiilimuut 14.

Oqimaaqatigiissaarigit. Inuit eqiasuitsut suleruloor­taraluarlutik oqimaaqatigiis­saarineq anguniarlugu qasuersaarfeqar­nis­saq pingaar­tit­tar­paat.

BIIBILIMI NAJOQQUTASSIAQ: “Pitsaaneruvoq itummap ataasiinnaap imaanik peqaraanni qasuersaarsinnaallunilu itummat illuttut suleruloornikkut ulikkaarnerannit anorimillu tigusiniarsarinermit.” – Oqaluussisartup oqaasii 4:6.