Allaaserisami tamatumani sammineqarpoq inuit inngilillu pingaarutilik ataaseq paasissagaat, tassa Jehovap aqqata illernarsisin­neqarnissaa. Pingaarutilik tamanna naalakkersueriaasiata pitsaanerpaajuneranut attuumas­suteqarpoq. Aamma inuit aalajaat­tuarnis­saannut attuumas­suteqarpoq.

Sooq ersersin­niarparput Jehovap aqqa tamatumalu illernarsisin­neqarnissaa pingaaruteqar­nerpaasut? Pissutaasut pingasut sammeriartigit.

Siullertut, naatsiivimmi Edenimi Jehovap aqqa, tassa tusaamaneqarnera, Saatanip saassuppaa. Saatanip Evamut aperinermigut ersersin­niarpaa Jehova erlituujusoq aamma Adamimut Evamullu peqqussutai ingasap­pallaartut. Saatani Jehovap oqaasiinut akerliusumik oqaaseqarami Jehova sallutuujunerarpaa. Tassa Jehovap tusaamaneqarnera nikassarpaa. Taamaaliorami ‘Diaavulumik’, tassa ‘Mamarliisumik’, taaneqar­talerpoq. (Joh 8:44) Saatanip salluliuutai Evap upperigamigit Guutimut naalakkun­naarpoq taassumalu kisimi oqartus­saaneranut pikitsitsilluni. (Mos 1. 3:1-6) Saatanip ulloq manna tikillugu Guutip aqqa nikassartarpaa Jehovalu pillugu sallulior­tarluni. Aamma salluliuutit taakku pissutigalugit inuppassuit Jehovap peqqussutaatut iliorneq ajorput. Taamaattumik Guutip aqqanik illernartumik nikassaaneq Guutip innuttaanut naapertuil­luanngitsulior­neruvoq ingasan­nerpaaq. Tamannami nunarsuarmi ajussusermut naalliuutinullu pissutaanerpaavoq.

Aappaattut, pinngortitat tamarmik iluaqutis­saannik Jehovap atini illernarsisin­niarpaa salluliuutillu tamaasa ilumuun­nginnerat uppernarsarlugu. Jehovap tamanna pingaar­tingaarlugu ersersippaa ima oqaaseqar­nermigut: “Atera angingaartoq … illernar­tissavara.” (Ez 36:23) Jiisusip aamma ersersippaa Jehovamut kiffartortut aalajaatsut tamanna pingaarnertut qinnutigisassagaat, ima oqarami: “Atit illernar­tinneqarli.” (Mat 6:9) Jehovap aqqata unnersiutigineqar­nissaata pingaaruteqarnera Biibilimi erseqqis­sarneqar­tuarpoq. Uku assersuutigeriartigit: “Naalakkap [Jehovap, NW] aqqa ataqqinar­tissiuk.” (Nal 1. 16:29; Tuss 96:8) “Erinalimmik unnersiutigisiuk aqqa naalannartoq.” (Tuss 66:2) “Ataqqissavara aqqit naassaan­ngitsumik.” (Tuss 86:12) Jiisusi Jerusalemmimi guutisiorfim­miilluni ima qinuvoq: “Ataata, atit qutsissisiguk.” Jehovalu qilammiit ima akivoq: “Qutsissisereerpara qutsissiseq­qissallugulu.” – Joh 12:28. a

Pingajuattut, Jehovap siunertaa atianut tusaamaneqar­neranullu attuumas­suteqar­tuaannassaaq. Apeqqutit uku eqqarsaatigikkit: Kristusip ukiuni 1.000-ni naalakkersuinerata naanerani inaarutaasumik misilin­neqarnerup kingorna susoqassava? Taamanik­kussamut Jehovap aqqa pillugu inuit inngilillu qanoq misigissappat? Tamanna akissutis­sarsiumallugu apeqqutit marluk  attuumas­suteqartut eqqarsaatigeriartigit – tassa inuit aalajaat­tuarnerat aamma Jehovap kisimi oqartus­saanera pillugit. Inuit aalajaat­tuarsimasut suli aalajaan­nermikkut misilin­neqartassappat? Naamik, taamanik­kussamut naammal­luinnar­tuullutillu misilin­neqareersimassapput naassaan­ngitsumillu inuulis­sallutik. Aamma taamanik­kussamut Jehovap naalakkersueriaasiata pitsaanerpaajunera uppernarsar­neqaqqit­tariaqas­sanngilaq. Qilammiittut nunarsuarmiittullu tamarmik ataasioqatigiissapput Jehovallu aqutseriaasia ataqqillugu. Suli Jehovap aqqa innuttaanut pingaar­nerpaassava?

Aap, inuit tamarmik Jehova pillugu ilumoortoq ilisimassavaat, atialu illernarsisin­neqarluin­nassaaq. Jehovap aqqa kiffaanut pingaar­nerpaajuaan­nassaaq. Sooq taamaassava? Jehova tupinnar­tuliortuaan­nassammat. Jiisusip maniguulluni naalakkersuinini Jehovamut utertippagu ‘Guuti kikkunnut tamanut Naalakkersuisutuaalissaaq’. (Kor 1. 15:28) Tamatuma kingorna inuit nunarsuarmiittut tamarmik ‘Guutip qitornaasut alutornarsisin­neqassapput’. (Rom 8:21) Jehovap aallaqqaammulli siunertani naammas­siguniuk qitornani qilammiittut nunarsuarmiittullu ilaqutariittut ataasius­suseqalersissavai. – Ef 1:10.

Tamakku tamarmik pereerpata Jehovap ilaqutariissortai, qilammiittut nunarsuarmiittullu, qanoq pissappat? Soorunami Jehovap aqqa unnersiutigerusut­tuassavaat. Tussiaasiortoq Daavi isumassarsisitaalluni ima allappoq: “Unnersiutigineqarli Guuti Naalagaq … Unnersiutigineqarli aqqa naalannartoq naassaan­ngitsumik!” (Tuss 72:18, 19) Naassaan­ngitsumik taamaalior­nissatsinnut pissutis­sarsiorlutalu pissutis­saqartuassaagut.

Jehovap aqqa Jehovap qanoq ittuuneranik tamanik ersersitsivoq. Pingaarnertut Jehovap aqqa eqqarsaatigigaangatsigu asanninnera eqqaasarparput. (Joh 1. 4:8) Eqqaamajuas­savarput Jehovap asanninnini pissutigalugu pinngor­tissimam­matigut aamma asanninnini tunngavigalugu utertitsissut pilersis­simammagu. Aamma eqqaamajuas­savarput aqutseriaasia naapertuil­luartuullunilu asanninnermik tunngaveqarmat. Uagullu Jehovap asanninnera naassaan­ngitsumik misigiuas­savarput. Naassaan­ngitsumik Jehova Ataatatut qanilliar­tortuas­savarput aqqalu ataqqinartoq unnersiutigalugu. – Tuss 73:28.