1. Oqaluttuarisaanerup ingerlanerani Jehovamut kiffartortut qanoq maligas­saalluarsimappat?

 JEHOVAMUT attaveqarnerit pingaar­tippiuk? Qularnanngilaq pingaartikkit. Itsarli inuppassuit ilittut Jehova asallugu kiffartorfigisimavaat. (Tuss 104:33, 34) Imminut pilliutigeriaan­naallutik Jehovamut kiffartorsimapput. Taakkua ilagaat itsaq Israalimi nasiræerit. Taakku kikkuuppat? Aamma qanoq ilinniarfigisin­naavagut?

2. (a) Nasiræerit kikkuuppat? (Mosesimik 4. 6:1, 2) (b) Israalikkut ilaat sooq nasiræerin­ngorniarlutik aalajangersimappat?

² Oqaaseq “nasiræeri” hebræerisut oqaatsimit “immikkoor­titaasumik” aamma “tunniul­luinnarsimasumik” isumalimmit naggueqarpoq. Nasiræerit tassaapput Israalikkut Jehovamut kiffartor­niarlutik immikkuul­larissumik imminut pilliutigeriaannaasut. Moorsisip inatsisai naapertorlugit angut arnarluunniit immikkuul­larissumik Jehovamut neriorsuisinnaavoq piffissap ilaani nasiræeritut inuuniarluni. a (Mosesimik 4. 6:1, 2 atuakkit). Taama neriorsuisup Israalikkut allat maleruar­tariaqan­ngisaat maleruar­tariaqalissavai. Taavami sooq Israalikkuusoq taama aalajangerusussava? Ilimanarpoq Jehovamut asanningaarnini kajumis­sissutigalugu taassumalu tunissutai qujamasuutigalugit taama aalajangerumasinnaasoq. – Mos 5. 6:5; 16:17.

3. Ullutsinni Guutip innuttai qanoq nasiræerinut assinguppat?

³ Moorsisip inatsisai ‘Kristusip inatsisaanit’ taarser­neqarmata  nasiræeritut aaqqiis­suussaq atuukkun­naarpoq. (Gal 6:2; Rom 10:4) Taamaak­kaluartorli ullutsinni Jehovap innuttai nasiræerit ilaarlugit uummat, tarneq, isummat nukitillu tamakkerlugit Jehova kiffartorfigisarpaat. (Mak 12:30) Jehovamut tunniul­luinnaratta kajumilluta taama iliorniarluta neriorsuinikuuvugut. Neriorsuut tamanna eqqortin­niarlugu Jehovap piumasaatut iliortuassaagut kiffartorfiginiarlugulu imminut pilliutigeriaan­naalluta. Nasiræerit neriorsuutertik qanoq inuunerminni eqqortis­simaneraat misissorutsigu paasissavarput uagut neriorsuuterput qanoq eqqortis­sinnaaneripput. b – Mat 16:24.

IMMINUT PILLIUTIGERIAANNAAGIT

4. Mosesimik allakkat sisamaat 6:3, 4-lu naapertorlugit nasiræerit qanoq imminut pilliutigeriaan­naasarpat?

⁴ Mosesimik 4. 6:3, 4 atuakkit. Nasiræerit imigassamik aalakoor­nartortalimmik imeqqusaanatillu viinnissanik parnaaq­qanillu nereqqusaan­ngillat. Israalikkut allat aalakoor­nartortalinnik imerlutillu viinnissanik parnaaq­qanillu nerisin­naapput. Taamaaliornerat ajortulior­nerunngilaq. Biibilimimi viinni Guutimit tunissutitut ‘inunnik nuannaalersitsisartutut’ allaaserineqarpoq. (Tuss 104:14, 15) Taamaak­kaluartorli nasiræerit imminut pilliutigeriaan­naanertik ersersippaat tamakkutun­ngilluin­narniarlutik. c

5. Madián Marcelalu qanoq pilliuteqar­niarlutik aalajangerpat, aamma sooq?

⁵ Uaguttaaq nasiræerit ilaarlugit Jehovamut kiffartor­neruniarluta pilliuteqarsin­naavugut. Madiánip Marcelallu maligassiaat eqqarsaatigiuk. d Aappariit taakku ilorrisimaar­nartumik inooriaaseqarput. Madián aningaasarsiorluar­tuugami inigissaarluarsin­naapput. Jehovamulli kiffartor­nerminni iliuuseqar­nerorusupput. Tamanna anguniarlugu aalajangerput allannguiniarlutik. “Aningaasar­tuutigut annikil­livagut,” oqaluttuarput. “Inissiamut mikinerusumut nuuppugut biiligullu tunillugit.” Madián Marcelalu taamaalior­tariaqan­ngikkaluarput – Jehovamulli kiffartor­nerujumagamik taamatut aalajangerput. Aalajangersimanertillu iluarusuutigalugulu nuannaarutigaat.

6. Sooq ullutsinni kristumiut pilliuteqartarpat? (Aamma assiliaq takuuk).

 ⁶ Ullutsinni Nalunaajaasorpassuit Jehovamut kiffartor­nerujumallutik pilliuteqar­nissartik nuannaarutigisarpaat. (Kor 1. 9:3-6) Tamakkuninnga pilliuteqar­nissatsinnik Jehovap piumaffigin­ngikkaluarpaatigut. Imaanngilarlu pilliutigisagut – soorlu suliffik nuannarisaq, namminerisamik angerlarsimaffik uumasuuteqar­nerluunniit – imminni ajortuusut. Amerlasuut aalajangersimapput kisimiit­tuugallar­niarlutik imaluunniit katereernermi kingorna meerartaan­ngikkal­larniarlutik. Allat aalajangersimapput asasatik qimallugit pisariaqar­titsiffiunerusumi kiffartor­niarlutik. Jehova pitsaanerpaamik tunerusuk­katsigu amerlasuujusugut taama pilliuteqar­tarpugut. Nalussanngilat kiffartorninni pilliutitit, annertuppata annikip­pataluunniit, Jehovap naleqangaartutut isigisarmagit. – Hebr 6:10.

ALLAANERUNISSAT SIOORAGEQINAGU

7. Nasiræerit neriorsuutiminnik eqqortitsinissartik sooq ilaannikkut ajornakusoor­tittarsimasin­naavaat? (Mosesimik 4. 6:5) (Aamma assiliaq takuuk).

⁷ Mosesimik 4. 6:5 atuaruk. Nasiræerit nujaajar­tinniarnatik neriorsuisarput. Nujaajar­tinngin­nermikkut Jehovamut tunniul­luinnarsimanertik ersersit­tarpaat. Nujai tallisimagaangata allat paasisarpaat sivisuumik nasiræeriusimasoq. Allanit tapersersor­neqaraangami nasiræeritut neriorsuutiminik eqqortitsinissani ajornan­nginnerutittarpaa. Ajoraluar­tumilli Israalikkut oqaluttuarisaanerata ilaanni nasiræerit ataqqineqar­natillu tapersersor­neqartarsiman­ngillat. Pruffiitip Aamosip nalaani Israalikkut tunussisimasut ‘nasiræerit viinnisoq­qusarpaat’, qularnan­ngitsumik viinnisun­nginnissamik neriorsuutaannik unioqqutitsisin­niarlugit. (Am 2:12) Nasiræeri neriorsuutiminik eqqortitsiniarluni allaanerujumallunilu sapiissuseqar­tarsimassaaq.

8. Benjaminip misigisaa qanoq qiimmaal­laatigaajuk?

⁸ Uaguttaaq, allaat ittuutugaluarutta, Jehovap ikiuineratigut allaanerunis­satsinnut sapiissuseqarsin­naavugut. Benjaminip qulinik ukiullip Norgemi Nalunaajaasuusup maligassiaa eqqarsaatigeriaruk. Atuarfiani Ukrainemiunik sorsunnermik eqqugaasunik tapersersuiniarlutik aaqqissuus­sisimapput. Meeqqat Ukrainemiut erfalasuata qalipaataannik atisalersorlutik erinarsoq­quneqarput. Benjamin inuiaqatigiis­sutsimik pingaar­torsiutigin­ninnermut peqataajuman­nginnami avinngarusimalaartumi nikorfavoq. Ilinniar­titsisulli takugamiuk suaarpaa: “Qaaniarit, utaqqivatsigit!” Benjaminip ilinniar­titsisuni orneriarlugu sapiilluni oqarfigaa: “Arlaannaan­nilluunniit illersugaqan­ngilanga, aamma politikkimut  tunngasumut akuliunneq ajorpunga. Jehovap Nalunaajaasuisa ilarpassui sorsunnermut peqataajuman­nginnertik pillugu parnaarus­saaqqapput.” Nassuiaataa ilinniar­titsisuata akueraa peqataasariaqan­nginnerarlugulu. Atuaqataasali apersulerpaat sooq peqataajuman­nginnersoq. Benjamin pissangangaarami qiangajaavippoq, sapiillunili atuaqatini oqaluttuuppai ilinniar­titsisumut qanoq oqarsimanerluni. Angerlarami angajoqqaani oqaluttuuppai upperisani illersor­niarlugu Jehovap qanoq ikiorsimagaani.

9. Jehovap uummataa qanoq nuannaar­tissinnaavarput?

⁹ Jehovap piumasaatut iliortuarumalluta aalajangeratta inuit allaanerunerput maluginiar­tarpaat. Uagut suliffitsinni atuarfitsin­niluunniit Jehovap Nalunaajaasuatut ilisaritin­niarnitsinni sapiissuseqar­tariaqarpugut. Aamma inuit isiginnit­taasiat pissusaallu ajorsigalut­tuinnar­tillugit Biibilimi najoqqutassiat malillugit inuuniarnerput tusarlius­samillu nuannersumik oqaluus­siniarnerput sapernar­tinnerulersin­naavarput. (Tim 2. 1:8; 3:13) Eqqaamas­savarpulli Jehovamut kiffartun­ngitsunit allaanerunis­satsinnut sapiissuseqaraangatta Jehovap uummataa nuannaar­tittaripput. – Uss 27:11; Mal 3:18.

JEHOVA INUUNINNI PINGAAR­NERPAATITTUARUK

10. Mosesimik allakkat sisamaat 6:6, 7-milu peqqussut nasiræerinut qanoq misilin­neqaataasimasinnaava?

¹⁰ Mosesimik 4. 6:6, 7 atuakkit. Nasiræerit toqusut timaannut qanilleq­qusaanngillat. Qanigisamik toqusoornermi nasiræerinut peqqussutip tamatuma maleruarnissaa unamminiar­narsinnaavoq. Taamanikkut ileqqut malillugit ilisinermi toqusup timaa qanillineqartarpoq. (Joh 19:39, 40; ApS 9:36-40) Nasiræeritulli neriorsuisup ileqqoq taanna maleruarsin­naanngilaa. Pisumi alianartumi aliasungaaraluarluni nasiræeritut neriorsuutiminik eqqortitsinermigut upperluar­tuunini ersersittarpaa. Nasiræeritut tunniul­luinnarsimasut artornartumik taama nalaataqartut Jehovap nakussatsis­simassavai.

11. Ilaqutariinnermut atatillugu aalajangiiniar­nermini kristumiup suna aalajangiusimasariaqarpaa? (Aamma assiliaq takuuk).

¹¹ Kristumiutut Jehovamut tunniul­luinnarsimanerput pimoorupparput. Neriorsuuterpullu ilaqutariinnermut atatillugu aalajangiiniar­nitsinnut iliuuseqar­niarnitsinnullu sunniuteqartarpoq. Ilaquttagut pisariaqar­titaannik isumaginiarlugit tamaviaar­tarpugut, Jehovalli piumasaqaatai ilaquttatta  kissaataanin­ngarnit pingaar­nerutit­tarpagut. (Mat 10:35-37; Tim 1. 5:8) Taamaattumik Jehovap iluarisaanik, immaqali ilaquttatta nuannarin­ngisaannik, aalajanger­tariaqar­tarpugut.

12. Alexandru nuliaminit akerlilersor­neqarami qanoq iliorpa, aamma qanoq iliunngila?

¹² Alexandrup nuliatalu Dorinap misigisimasaat eqqarsaatigiuk. Ukioq ataaseq aappariittut Biibilimik atuaqqis­saaqatigineqar­tareerlutik Dorina aalajangerpoq taamaatin­niarluni, aamma kissaatigaa Alexandru taamaatissasoq. Alexandrulli eqqissilluni pissuseris­saarlunilu nuliani oqarfigaa ingerlaan­narniarluni. Dorina nuannaanngilaq atuaqqis­saartarun­naarnis­saanillu pinngitsaaliniarsaralugu. Alexandrup nuliami pissusaa paaserusuk­kaluarpaa, tamannali oqitsuin­naanngilaq. Dorina isornar­torsiuisarmat akipiloor­tarlunilu atuaqqis­saartarnini unitsin­nialeraluarpaa. Taamaattorli Jehova salliut­tuarpaa nuliaminullu asanninnermik ataqqin­ninnermillu ersersitsisarluni. Naggataatigut uimi maligas­siuilluarnera pissutigalugu atuaqqis­saaqqit­talerusuppoq, kingusin­nerusukkullu imermut morsutsitaavoq. – Video Alexandru og Dorina Văcar: “Kærligheden er tålmodig og venlig” jw.org-imiittoq isiginnaaruk.

13. Jehova ilaquttagullu asallugit qanoq ersersis­sinnaavarput?

¹³ Ilaqutariittut aaqqissuussaaneq Jehovap pilersitaraa, kissaatigaalu ilaqutariittut pilluas­sasugut. (Ef 3:14, 15) Pillualivis­saguttalu Jehovap piumasaatut iliortariaqarpugut. Qularin­ngisaannaruk imminut pilliutigeriaan­naallutit Jehovamut kiffartornerit ilaquttannillu isumassuinerit aamma asannittumik ataqqin­nittumillu pinnittarnerit Jehovap nuannaarutigingaartarai. – Rom 12:10.

NASIRÆERIT ILAARNIS­SAANNUT KAJUMIS­SAAQATIGIITTA

14. Pingaartumik kikkut oqaatsitsinnik kajumis­saassavagut?

¹⁴ Jehovamut kiffartor­niarlutik aalajangertut tamarmik asanninneq killitsis­sutigalugu kajumillutik imminut pilliutigeriaan­naasariaqarput. Ilaannikkulli tamanna oqitsuinnaaneq ajorpoq. Taava qanoq ikioqatigiis­sinnaavugut? Oqaatsitsigut qiimmas­saqatigiilluta. (Job 16:5) Ilagiinni ilaaffigisanni Jehovamut kiffartor­nerminni iliuuseqar­nerorusullutik inuunerminnik pisariil­lisaaniar­toqarpa? Atuarfimmi allaanerunissartik ajornakusoor­tittaraluarlugu meeqqanik inuusut­tuaqqanil­luunniit sapiillisaartunik nalunngisaqarpit? Biibilimik ilinniar­titanik uppeqatin­nilluunniit  ilaquttaminnit akerlilersor­neqarnertik pissutigalugu aalajaan­niarlutik ilungersortunik ilagiin­niittoqarpa? Uppeqatit asanartut taakku imminut pilliutigeriaan­naanerat sapiissuseqangaar­nerallu pillugit nersualaar­nissaannut periarfis­sarsior­tuarisa. – Flm 4, 5, 7.

15. Qatanngutit ilaat piffissaq tamaat kiffartortunik qanoq ikiuisimappat?

¹⁵ Piffissaq tamaat kiffartortut ikiornis­saannut periarfis­saqartarsin­naavugut. (Uss 19:17; Hebr 13:16) Qatanngut arnaq utoqqaq Sri Lankami najugalik ikiuinis­saminik kissaateqangaarpoq. Utoqqalinersiai qaffanneqarmata arnat inuusuttut marluk pioneriusut aningaasatigut ajornar­torsiortut pioneriuin­narsinnaaq­qullugit ikiorusuppai. Aalajangerpoq qaammatit tamaasa aalajangersimasumik oqarasuaatimik akiliutis­saannut tapiisar­niarluni. Tuniserusus­suseqarnera nuanningaarami!

16. Itsaq nasiræerit qanoq ilinniarfigisin­naavagut?

¹⁶ Nasiræerit maligas­siuilluarnerat ilinniarfigil­luarsin­naavarput! Aamma Ataatarput qilammiusoq, Jehova, pillugu ilikkagaqarpugut. Jehovap nalunngilaa iluarisamisut iliorusukkatta tunniul­luinnar­nitsinnilu neriorsuutitsinnik eqqortitsiniar­nitsinni pilliuteqarusuttugut. Ataqqilluta periarfis­sippaatigut asanninnermik ersersitsiviginissaanut. (Uss 23:15, 16; Mak 10:28-30; Joh 1. 4:19) Nasiræeritut aaqqissuussap ersersippaa Jehovap kiffartor­nitsinni ilungersornigut maluginiartarai tamannalu pillugu asalluta. Taamaattumik sapinngisatsinnik tunineratigut Jehovamut kiffartor­tuarnissarput aalajangiusimatigu.