Filippinerimiorpassuit suliartorlutik Maryp uiatalu Johnip a nunaannut nuuttarput, taakkulu oqaluus­siffigineqartarput. COVID-19-imik nappaalanersuaqarnerata nalaani Maryp nunagisamini nunanilu allani Biibilimik pikkoris­sarnerit arlallit aallartippai. Qanoq ililluni?

Maryp Biibilimik ilinniartitani ima aperisarpai: “Biibilimik misissuerusuttunik allanik nalunngisaqarpit?” Angeraangata aperisarpai taakkununnga ilisaritis­sinnaaneraani. Taamatut aperisarneq kinguneqarluartarpoq. Sooq? Inuit Guutip oqaasianik pingaar­titsisut ilikkakkatik ilaquttaminnut ikinngutiminnullu oqaluttuarerusut­tarmatigit. Maryp taamatut aperisarnera qanoq kinguneqarpa?

Maryp Jasmin Biibilimik ilinniar­tittarpaa, Jasminillu Biibilimik misissuerusuttut sisamat Marymut ilisaritippai. Taakkua ilaata Kristinep misissueqatigineqar­tarnini nuannaringaaramiuk Mary aperaa sapaatip-akunneranut marloriarlutik misissueqatigiit­tarsinnaanerlutik. Maryp aperimmani Biibilimik misissuerusuttunik allanik nalunngisaqarnersoq Kristine ima akivoq: “Aap, ikinngutikka ilinnut ilisaritis­savakka.” Sapaatit-akunnialuisa ingerlaneranni Kristinep ikinngutini sisamat Biibilimik misissuerusuttut Marymut ilisaritippai. Kingusin­nerusukkullu ikinngutini suli allat ilisaritippai, taakkualu ilaat Biibilimik misissuerusuttunik suli allanik ilisarititsipput.

Kristinep aamma kissaatigaa ilaquttani Filippineriniittut Biibilimik ilinniassasut. Taamaattumik panini Andrea oqaluuppaa. Aallaqqaammut Andrea isumaqaraluarpoq Nalunaajaasut upperisarsiortuusut immikkoor­niartut, Jiisusi upperin­ngikkaat Testamentitoqarlu kisiat atortaraat. Ataasiaan­narlutilli misissuereerlutik paasivaa kukkusumik isumaqarsimalluni. Misissueqatigiik­kaangamik ima oqartarpoq: “Biibilimi taama allassimasoqarpat ilumoorsimassaaq!”

Andreap ikinngutini marluk suleqatinilu ataaseq Marymut piffissap ingerlanerani ilisaritippai, taakkulu Biibilimik misissuisalerput. Aamma Andreap atsaa tappiitsoq, Angela, Maryp nalusaanik misissueqatigiinnernut tusarnaartarpoq. Taava ullut ilaanni Angelap Andrea aperaa Marymut ilisaritis­sinnaaneraani Biibilimillu nammineq ilinniar­tinneqarsin­naanerluni. Angelap ilikkakkani nuannaringaarpai. Qaammatip ataatsip ingerlanerani allassimaf­fippassuit alanngaarsin­naalerpai sapaatillu-akunneranut sisamariarluni misissuisarusulerluni. Andreap ikiuineratigut internetikkut ataatsimeeqataasalerpoq.

Maryp paasigamiuk Kristine misissueqatigigaangamiuk uia Joshua tusarnaartartoq aperaa  peqataarusunnersoq. Joshua oqarpoq: “Tusarnaagin­nartassaanga, aperisas­sanngilarmalu. Taamaalioruimmi anissaanga.” Minutsini tallimaannarni misissueqatigiin­neranni Joshua Kristinemiit apeqquteqar­neruvoq namminerlu Biibilimik misissueqatigineqarusulerluni.

Maryp apeqqutaa allaaserisap matuma aallaqqaataani eqqaaneqartoq Biibilimik misissueqatigiin­nerpassuarnik kinguneqarpoq. Ilinniartitami ilaasa Nalunaajaasunit allanit ilinniar­tinneqar­nissaat isumagaa. Maryp aperisarnera pissutigalugu inuit katillugit 28-t nunani sisamani assigiin­ngitsuniittut Biibilimik misissuisalerput.

Jasmin, Maryp ilinniartitaa allaaserisami matumani eqqaaneqaq­qaartoq, 2021-mi apriilimi imermut morsutsin­neqarpoq. Kristine 2022-mi maajimi imermut morsutsin­neqarpoq, ilaquttanilu ornillugit Filippinerinut nooqqippoq. Biibilimik misissuisartut allat marluk Kristinep Marymut ilisarititai aamma imermut morsutsin­neqarput. Kristinep imermut morsutsin­neqarnerata kingorna qaammatialuit qaangiuttut Angela imermut morsutsin­neqarpoq maannalu pioneritut kiffartorluni. Kristinep uia, Joshua, paniallu, Andrea, aamma Biibilimik misissuisartut arlallit allat siumukarluarput.

Jiisusip kristumiullu siulliit nalaanni inuit nutaarsiassat nuannersut pillugit ilikkakkatik ilaquttaminnut ikinngutiminnullu oqaluttuarisarpaat. Taamaat­tumillu taamani kristumiut amerliar­tupallapput. (Joh 1:41, 42a; ApS 10:24, 27, 48; 16:25-33) Soormi illit Biibilimik ilinniar­titatit soqutigin­nittullu allat ima aperisarukkit: “Biibilimik misissuerusuttunik allanik nalunngisaqarpit?” Taama aperisaruit immaqa amerlanerusunik Biibilimik ilinniar­titaqalissaatit.