1-2. (a) Isumakkeerfigin­ninnissaq ingammik pissutsini qanoq ittuni sapernarsinnaava? (b) Denise qanoq nalaataqar­tilluni isumakkeerfiginnippa?

 INUPPASSUIT allanik isumakkeerfigin­ninnissaq sapernar­tittarpaat. Aamma illit sapernar­tittarpiuk? Ingammik ajuallaatigerujus­suakkatsinnik iliuuseqarsimasoq oqaaseqarsimasorluunniit isumakkeerfigiuminaatsis­sinnaavarput. Ajuallaq­qajunnaarsin­naavugulli isumakkeerfigin­nillutalu. Assersuutigalugu qatanngut arnaq Denisemik atilik a alianaqisumik nalaataqarnermi kingorna isumakkeerfiginnittoq eqqarsaatigiuk. 2017-imi ilaqutariiullutik Jehovap Nalunaajaasuisa qullersaqarfiannut takornariarput. Angerlamut biilertillutik angummit biiliminik aqutsisin­naajunnaartumit aportipput. Denise ilisimajun­naarpoq, ilisimmaramilu paasitin­neqarpoq meeqqani ajoqusingaatsiarsimasut uinilu, Brian, ajunaarsimasoq. Kingumut qiviarluni Denisep misigis­sutsini ima oqaatigai: “Sequmivis­simasutut misigaanga qanorlu pisoqarsimanera paasisin­naanagu.” Kingusin­nerusukkut paasivaa biilimik aquttoq imigassar­torsimananilu ikiaroorsiman­ngitsoq aamma biilertilluni allamut saasaatigisimasaminik iliuuseqarsiman­ngitsoq. Tamanna paasereeraluarlugu qamuuna eqqissinermik tuneqqulluni Denisep Jehova qinnuigaa.

² Biilimik aquttoq apuisoq mianersuaal­liorluni toqutsisutut unnerluutigineqarpoq. Pisuutin­neqarluni eqqartuun­neqaruni parnaarus­saaneranik kinguneqarsinnaavoq. Deniseli eqqartuus­sivimmit ilisimatin­neqarpoq ilisiman­nittutut nassuiaatini angutip eqqartuun­neqarnissaanut sunniuteqassasoq. Denise ima oqarpoq: “Inuuninni pisut alianar­nerpaat oqaluttuarerusun­ngikkaluarlugit oqaluttuarisariaqarakkit soorlulusooq  ikikka ammarneqariarlutik taratsunik kuerarneqartut.” Sapaatit-akunnialunngui qaangiummata Denise eqqartuus­sivimmi angutip alianaqisumut pisuusup saavani ilisiman­nittutut nassuiaasus­sanngorpoq. Denisep eqqartuussisoq qanoq oqarfigaa? Qinnuigaa angut asattuuteq­qullugu. b Denise oqaloreermat eqqartuussisoq qialerpoq imalu oqarluni: “Ukiut 25-t eqqartuus­sisuuninni aatsaat taama oqartumik tusagaqarpunga. Unnerluutigineqartumik asattuus­sinissannik eqqugaasut ilaqutaannit qinnuigineqarsiman­ngisaan­narpunga. Eqqartuus­sivimmi naakkinninneq isumakkeerfigin­ninnerlu eqqartor­neqarneq ajorput.”

 3. Suna kajumis­sissutigalugu Denise isumakkeerfiginnippa?

³ Denisep isumakkeerfigin­ninnissaminut suna kajumis­sissutigaa? Jehovap isumakkeerfigin­ninnera eqqarsaatigeq­qissaarpaa. (Mika 7:18) Jehovap uagutsinnik isumakkeerfigin­ninnera qujamasuutigingaarutsigu inunnik allanik isumakkeerfigin­nikkusussaagut.

 4. Jehovap sunissarput kissaatigaa? (Efesossimiut 4:32)

⁴ Jehovap kissaatigaa nammineq ilumoorluni isumakkeerfigin­ninnermisut ilumoorluta isumakkeerfigeqatigiit­tassasugut. (Efesossimiut 4:32 atuaruk). Piumasaraa uagutsinnik ajuallatsitsisimasut isumakkeerfigiumas­sagigut. (Tuss 86:5; Luk 17:4) Isumakkeerfigin­nikkumanitsinnut iluaqutigisassagut pingasut allaaserisami matumani sammissavagut.

MISIGIS­SUTSITIT SUMIGIN­NAQINAGIT

 5. Ussatit 12:18-imi allaatigineqartutut ajuallatsin­neqarneq qanoq annernar­tigisinnaava?

⁵ Inuup allap oqaasii iliuusiilu annertuumik ajuallaatigisin­naavagut, ingammik taanna qanimut ikinngutigigutsigu ilaqutarigutsiguluunniit. (Tuss 55:13-15) Misigis­sutsikkut annersin­neqarneq panamik kapineqarnertut misiginarsinnaavoq. (Ussatit 12:18 atuaruk). Immaqa misigis­sutsigut sumigin­narniarsarivagut. Taamaalior­nerulli assigiinnarpaa savimmik kapineqarneq savimmillu ikitsin­niititsiinnarneq. Tassa ajuallatsin­neqarnermi misigis­sutsigut sumigin­narutsigit ilorraal­lannissarput ilimagisin­naanngilarput.

 6. Ajuallatsin­neqarnermi qanoq qisuariaq­qaarsin­naavugut?

⁶ Biibilimi allassimasutut ajuallatsin­neqarutta kamaqqaarsin­naavugut. Aammali allassimavoq kamassimajuaan­nassanngitsugut. (Tuss 4:5; Ef 4:26) Sooq? Misigissutsit iliuutsinik kinguneqar­tarmata. Kamannerlu amerlanertigut kingunipiloqartarpoq. (Jaak 1:20) Eqqaamajuk kamaammerneq qisuariar­nerusoq kamassimajuaan­narnerli aalajangiinerulluni.

 7. Misigis­sutsikkut annersin­neqarnermi nuanniitsunik allanik qanoq misigis­suseqarsin­naavugut?

⁷ Ajortumik pineqarsimagutta allanik nuanniitsunik misigis­suseqarsin­naavugut. Assersuutigalugu qatanngut arnaq Annimik atilik ima oqarpoq: “Meeraallunga ataatama anaanaga qimappaa paarsisorisaralu katillugu. Qimagaasutut misigivunga, qitornar­taalermatalu taarser­neqartutut misigalunga. Alliartorninni pigiumaneqan­ngitsutut misigisarpunga.” Qatanngutip arnap Georgettemik atillip uini allasiormat qanoq misiginerluni ima oqaatigaa: “Meeraanitsinniit ikinngutigiippugut. Aappariittullu pionerioqatigiis­simavugut. Uummatiga sequmeqqavoq!” Uinilu avipput. Qatanngut arnaq alla Naomimik atilik  ima oqarpoq: “Uinnit misigis­sutsikkut annersin­neqarnissara takorloorsiman­ngisaan­naraluarpara. Taamaattumik pornografiimik isertorluni isiginnaar­tarsimalluni nassuermat salloqit­tarneqarsimasutut misigivunga pakatsil­lungalu.”

 8. (a) Allanik isumakkeerfigin­ninnissamut sunik pissutis­saqarpugut? (b) Isumakkeerfigin­ninnerput qanoq iluaqutigisarparput? (Ungalusaq “ Kingunerluutigisatsinnimmi pineqarsimagutta?” takuuk).

⁸ Allat uagutsinnut iliuusii oqaasiiluunniit aqussin­naanngilagut. Namminerli iliuutsigut aqunniarsin­naavagut. Amerlaner­tigullu iliuuserisassaq pitsaanerpaaq tassaavoq isumakkeerfiginninneq. Sooq? Jehova asagatsigu, taassumalu kissaatigaa isumakkeerfigin­nikkumas­sasugut. Kamassimajuaan­narutta allanillu isumakkeerfigin­ninngikkutta sianiitsulior­nissarput ilimanar­nerussaaq, immaqalu allaat peqqissutsikkut ajoqutigis­savarput. (Uss 14:17, 29, 30) Maluginiaruk qatanngut arnaq Christinemik atilik qanoq oqartoq: “Narrutsas­simagaangama qungujulan­nginnerusarpunga. Peqqinnan­ngitsunik nerisarpunga sinilluarnerlu ajorlunga. Misigis­sutsikka aqukkuminaatsit­tarakkit tamanna uinnut allanullu attaveqarninnut sunniuteqartarpoq.”

 9. Sooq narrutsas­simajuas­sanngilagut?

⁹ Imaassinnaavoq uagutsinnik ajuallatsitsisimasoq iliuutsini pillugit utoqqatseruman­ngitsoq. Uagulli iluaallak­kumalluta iliuuseqarsin­naavugut. Sumik? Georgette, eqqaariigarput, ima oqarpoq: “Sivitsoraluartoq piffissap ingerlanerani narrutsas­simajun­naarlungalu uikora kamaakkun­naarpara. Tamatumalu kingunerisaanik qamuuna eqqissineq misigilerpara.” Narrutsas­simajun­naarutta misigissutsit nuanniitsut inuunitsinnut sunniutipiloqar­nissaat pinaveersaar­tissavarput. Tamannalu nammineq iluaqutigis­savarput, pisimasormi eqqarsaatigiun­naarlugu nuannaaq­qilersin­naavugut. (Uss 11:17) Isumakkeerfigin­ninnissannulli suli piareersimasutut misigin­ngikkuit qanoq iliussavit?

MISIGIS­SUTSITIT QANOQ SULISSUTIGISINAANERITIT

10. Sooq ajuallaq­qajunnaar­nissatsinnut imminut periarfis­sissaagut? (Aamma assit takukkit).

¹⁰ Qanoq ilillutit ajuallaq­qajunnaarsinnaavit? Siullertut sianigissavat imaalial­laannaq taama pisoqar­navianngimmat. Ajutoornerup kingorna timikkut sivisuumik aaqqinniaaluusaarsin­naavugut. Taamatuttaaq misigis­sutsikkut anniaateqarutta imaassinnaavoq ilumoorluta  isumakkeerfigin­ninnissamut piareer­tinnata piffissaq ingerlaq­qaartariaqartoq. – Oqal 3:3; Pet 1. 1:22.

11. Qinusarneq isumakkeerfigin­ninnissannut qanoq iluaqutigisin­naaviuk?

¹¹ Isumakkeerfigin­nikkumallutit qinunikkut Jehovamut ikioqqusarit. c Annip, eqqartoriikkatta, oqaluttuaraa qinusarnini qanoq iluaqutigisimallugu. Ima oqarpoq: “Jehova qinnuigaara ilaqutariiulluta tamatta pitsaaval­laanngitsumik qisuariarfigisimasagut pillugit isumakkeerfigeq­qulluta. Taava ataataga nuliartaavalu isumakkeerfigalugit allaffigaakka.” Nassuerpoq tamanna imaannaan­ngitsuusoq, imali oqarpoq: “Neriuppunga Jehovap isumakkeerfigin­ninneranik ilaarsiniarnera pissutigalugu ataatama nuliatalu Jehova ilisarisimanerulerusussagaat.”

12. Sooq misigis­sutsigut pinnagit Jehova tatigis­savarput? (Ussatit 3:5, 6)

¹² Misigis­sutsitit pinnagit Jehova tatigiuk. (Ussatit 3:5, 6 atuakkit). Jehovap nalunngilaa uagutsinnut suna pitsanerpaanersoq. (Es 55:8, 9) Ajoqutigisatsinnillu iliuuseqar­tinnavian­ngilaatigut. Taamaattumik kajumis­saarineratut isumakkeerfigin­nittuugutta iluaqutigiumaarlutigu qularis­sanngilarput. (Tuss 40:5; Es 48:17, 18) Paarlat­tuanilli misigis­sutsitsinnit tatigisas­saanngitsunit aqunneqarutta immaqa qaqugumul­luunniit isumakkeerfigin­nikumanavian­ngilagut. (Uss 14:12; Jer 17:9) Naomi, eqqaaneqareersoq, ima oqarpoq: “Aallaqqaammut misigivunga uima pornografiimik isiginnaar­tarsimanera pillugu isumakkeerfigin­nginnissaanut pissutis­saqarluarlunga. Uannik misigis­sutsikkut annersitseq­qiinissaa ajoqusiingaar­nerminil­luunniit puiuinissaa ernumas­sutigaakka. Aamma eqqarsarpunga Jehovap misigis­sutsikka paasigai. Taavali paasilerpara Jehova misigis­sutsinnik paasinnik­kaluarluni imaanngitsoq isumakkeerfigin­nittariaqarsorin­nginninnut isumaqataasoq. Nalunngilaa qanoq misiginersunga misigis­sutsikkullu ikima maminnis­saannut piffissaqar­tariaqartunga, aammali kissaatigaa isumakkeerfigin­nissasunga.” d

 AJUNNGITSUNIK EQQARSAATEQAR­NIARTARIT

13. Romamiut 12:18-21 naapertorlugit susariaqarpugut?

¹³ Uagutsinnik ajuallatsitsisoq isumakkeerfigis­sagutsigu pisumik eqqartuerusunnani aalajangerneq naammanngilaq. Uppeqatigigutsigu eqqisseqatiginissaa anguniagaris­savarput. (Mat 5:23, 24) Aalajanger­tariaqarpugut kamannitsinnut taarsiullugu naakkin­nittoorusulluta narrutsas­simanatalu isumakkeerfigin­nittoorusulluta. (Romamiut 12:18-21 atuakkit; Pet 1. 3:9) Taamaalior­nissatsinnut suna iluaqutigisin­naavarput?

14. Suniartariaqarpugut, aamma sooq?

¹⁴ Uagutsinnik ajuallatsitsisumut Jehovap isiginnit­taaseqar­neratut isiginnit­taaseqaler­niarsarissaagut. Jehovammi inuit pissusii ajunngitsut isiginiar­nerusarpai. (Nal 2. 16:9; Tuss 130:3) Amerlaner­tigullu isiginiar­nerusagut maluginiar­tarpagut, ajunngitsuuppata ajortuup­pataluunniit. Inuup ajunngitsortai maluginiar­tarutsigit isumakkeerfiginissaa ajornan­nginnerutis­savarput. Qatanngut angut Jarrodimik atilik ima oqarpoq: “Uppeqatima uannik ajuallatsitsisup kukkunera pinnagu ajunngitsortai  amerlasuut nuannarisakka eqqarsaatigileraangakkit isumakkeerfigin­ninnissara ajornan­nginnerutit­tarpara.”

15. Sooq iluaqutaasinnaava inuk pineqartoq oqarfigis­sallugu isumakkeerfigisimallugu?

¹⁵ Iliuuserisassaq pingaarutilik alla tassaavoq inuk pineqartoq oqarfigis­sallugu isumakkeerfigisimallugu. Sooq? Naomi eqqartoriigarput qanoq oqartoq maluginiaruk: “Uima aperaanga isumakkeerfigisimanerinni. Oqarfigerusuk­kaluarpara isumakkeerfigalugu, uummatikkulli ilumoorlunga isumakkeerfigisimanagu paasigakku oqarfigisin­naanngilaraluunniit. Piffissalli ingerlanerani oqaaseq taanna pingaarutilerujussuaq ilumoorlunga oqaatigisin­naanngorpara: ‘Isumakkeerfigaakkit’. Oqareersunga uiga qullipippoq, taassumunnga uannullu qanoq oqilial­lannartigisoq tupigisuutigilaarpara. Taamanimiilli uiga tatigeq­qileriar­torpara, ikinngutin­naareeq­qilernikuuvugullu.”

16. Isumakkeerfiginninneq pillugu sumik ilikkagaqarpit?

¹⁶ Jehovap kissaatigaa allanik isumakkeerfigin­nittassasugut. (Kol 3:13) Tamanna ajornaatsuinnaaneq ajorpoq. Misigis­sutsittali sumigin­nanngin­nerisigut sulissutigisar­nerisigullu sapinngilarput. Aamma misigis­sutsigut nuanniitsut nuannersunik taarserumallugit iliuuseqar­nissarput pingaaruteqarpoq. – Ungalusaq “ Isumakkeerfigin­ninnissamut iluaqutissat pingasut” takuuk.

ISUMAKKEERFIGIN­NINNERUP ILUAQUTISSARTAI EQQARSAATIGIKKIT

17. Isumakkeerfigin­ninnissatsinnut sunik pissutis­saqarpugut?

¹⁷ Isumakkeerfigin­ninnissatsinnut pissutis­saqarluarpugut. Iluaqutis­sartaasa ilaannaat eqqarsaatigikkit: Siullertut, Jehova nallittuisuusoq ilaarparput nuannaar­tillugulu. (Luk 6:36) Aappaattut, Jehovap uagutsinnik isumakkeerfigin­nittarnera qujamasuutigingaarlugu ersersipparput. (Mat 6:12) Pingajuattullu, peqqissutsikkut allanullu attaveqarluar­nitsinnut iluaqutigaarput.

18-19. Isumakkeerfigin­nittarnerput qanoq kinguneqarsinnaava?

¹⁸ Isumakkeerfigin­nittarutta ilimagin­ngisatsinnik pisoqarsinnaavoq. Denisep aallarniummi eqqaaneqartup tamanna misigaa. Ilisiman­nittutut nassuiaagami naluaa angut ajunaarnermut pisuusoq aalajangersimasoq eqqartuus­saareeruni imminut toqunniarluni. Denisemilli isumakkeerfigineqarnini qujamasuutigingaarlugu Jehovap Nalunaajaasui Biibilimik misissueqatigisalerpai.

¹⁹ Misigisin­naavugut isumakkeerfigin­ninnissarput iliuusiusoq uagutsinnut artornar­nerpaasoq. Imminulli akilersinnaavoq. (Mat 5:7) Taamaattumik tamatta Jehova ilaarlugu sapinngisatsinnik isumakkeerfigin­nittarisa.