1. Sooq Jiisusip ajoqersuk­kani Jehovamut paareq­quai?

JIISUSIP toqus­si aqagut­toq ajoqersuk­kami ajor­nar­torsiutigiumaagaat eq­qarsaatigai. Ikin­ngutini asagamigit Ataatani qin­nuigaa taak­ku ‘paareq­qul­lugit ajor­tumut peq­qunagit’. (Joh 17:14, 15) Jiisusip nalun­ngilaa qilam­mut utereeruni Saatanip Diaavulup Jehovamut kif­far­tor­tut malersor­tuas­sagai. Taamaat­tumik Jehovap in­nut­taasa ser­nis­sor­neqar­nis­sar­tik pisariaqar­tip­paat.

2. Sooq qularin­ngilar­put Jehovap qin­nutigut akis­sagai?

² Jehovap er­nini Jiisusi asagamiuk qin­nutaa akivaa. Aam­ma uagut asas­savaatigut taas­suman­nga iluarisaajumal­luta sapin­ngisatsin­nik iliuuseqar­tarut­ta. Taamaat­tumil­lu taas­sumun­nga ikioq­qugaangat­ta ser­nis­soq­qugaangat­talu qin­nutigut akisas­savai. Jehova Ataataavoq asan­nit­toq. Qitor­naminik isumagin­nil­luar­tuuvoq, taamaaliun­ngik­kunimi aq­qanut ajoqutaal­lunilu tusaamanerlugaas­sutigilis­savaa.

3. Sooq ul­lutsin­ni Jehovamit ser­nis­sor­neqar­tariaqar­pugut?

³ Jehovamit ser­nis­sor­neqar­nis­sar­put aatsaat taama pisariaqar­titsigaar­put. Saatani qilam­mit igitaasimavoq, ‘kamat­torsuuvorlu’. (Saqq 12:12) Malersor­tit­ta ilaat isumaqalersis­simavai malersuinermik­kut ‘Guuti kif­far­tuuk­kaat’. (Joh 16:2) Aam­ma al­lat, Guutimik up­perin­nin­ngitsut, silarsuarmut naleq­qus­sar­neq ajorat­ta malersor­tar­paatigut. Siooras­suteqan­ngilagul­li. Sooq? Guutip oqaasiani ima al­las­simam­mat: ‘Un­neq­qarip­poq Naalagaq; taas­suma nakus­satsis­savaasi ajor­tumul­lu ser­nigalusi.’ (2 Th 3:3) Jehovap qanoq ser­nis­sor­tar­paatigut? Ser­nis­sueriaasii marluk sam­meriar­tigit.

4. Efesosimiut 6:13-17 naaper­torlugit Jehovap il­lersuutis­satsin­nik sunik tunivaatigut?

⁴ Saatanip saas­sus­sinerinut il­lersuutigisin­naasatsin­nik Jehovap sak­kutuus­sutinik tunivaatigut. (Efesosimiut 6:13-17 atuakkit). Anersaak­kut sak­kutuus­sutit taak­ku qajan­naal­lutil­lu il­lersuutaal­luar­put! Taak­kuli tamarluin­naasa atisimal­lugil­lu ator­tuarutsigit aatsaat il­lersuutigis­savagut. Taak­ku tamarmik im­mik­kut sumut as­sersuutaap­pat? Sam­meriar­tigit.

5. Ilumoor­tup qiterutaa suua, aam­ma sooq atisariaqar­par­put?

⁵ Ilumoortup qiterutaa tas­saavoq ilumoor­tut Guutip oqaasianeersut, tas­sa Biibilimeersut. Sooq qiterut taan­na atisimasariaqar­par­put? Saatani ‘sal­lumut ataataam­mat’. (Joh 8:44) Ukiuni tuusintilip­pas­suar­ni sal­lusarsimavoq “silarsuarmik tamarmik” tam­mar­titsisarluni. (Saqq 12:9) Ilumoor­tul­li Biibilimeersut nakutitaan­ngin­nis­samut iluaqutigis­savagut. Qiterut as­sersuutaasoq taan­na qanoq atisin­naavar­put? Taamaaliorsin­naavugut Jehova pil­lugu ilumoor­toq ilin­niarutsigu, “anersaak­kut ilumoor­nik­kul­lu” pal­lorfigigutsigu aam­ma sutigut tamatigut un­neq­qarik­kut­ta. – Joh 4:24; Ef 4:25; Hebr 13:18.

6. Naaper­tuil­luas­sutsip saat­tuaasaa suua, aam­ma sooq atisariaqar­par­put?

⁶ Naapertuilluas­sutsip saattuaasaa, tas­sa sakiaror­naveeq­qutaa, Jehovap najoq­qutas­siaanut naaper­tuil­luar­tunut as­sersuutaavoq. Sooq taan­na atisariaqar­par­put? Sakiaror­naveeq­qut sak­kutuup uum­mam­migut kapineqan­ngin­nis­saminut il­lersuutigisar­paa, taamatut­taaq naaper­tuil­luas­sutsip sakiaror­naveeq­qutaata uum­mater­put as­sersuutaasoq silarsuup matuma ajoqusiiniar­neranut il­lersor­tar­paa. (Uss 4:23) Jehovap piumasaraa uum­matik­kut iluun­ngarluta asas­sagitsin­ni kif­far­torfigis­sagitsin­nilu. (Matt 22:36, 37) Taamaat­tumik silarsuup piinik, tas­sa Jehovap uumigisaanik, nuan­narisaqalersin­niarluta Saatanip marloqiusamik uum­mateqar­tin­niarsarisar­paatigut. (Jaak 4:4; 1 Joh 2:15, 16) Tamatumanilu iluatsin­ngik­kuni Jehovap najoq­qutas­siaanut naaper­tuutin­ngitsunik ilior­tin­niarluta sioorasaas­savaatigut.

7. Naaper­tuil­luas­sutsip saat­tuaasaa qanoq atisar­par­put?

⁷ Naaper­tuil­luas­sutsip saat­tuaasaa atisar­par­put Jehovap najoq­qutas­siai akuerigaangatsigit naalak­kaangatsigil­lu. (Tuss 97:10) Inuit ilaat isumaqar­put kif­faan­ngis­sutsimin­nik Jehovap najoq­qutas­siai kil­liliival­laar­tut. Najoq­qutas­sial­li Biibilimeersut maleruarun­naarutsigit as­sigis­savar­put sak­kutooq sorsoqataatil­luni saat­tuaasaminik oqimaagisaminik peersisoq. Taamaalior­neq sianiil­lior­neruvoq! Jehovamik asan­nit­tunut ‘inas­sutai ar­tor­nar­tuunatik’ inuugin­nar­nis­samut il­lersuutaap­put. – 1 Joh 5:3.

8. Qanoq isumaqar­pa piumas­suseq atis­sagip­put ‘kamip­pat­tut iivangkiiliumik ingerlas­sisus­satut’?

⁸ Paulusip aam­ma kajumis­saar­paatigut piumas­suseq kamip­pattut eqqis­sinerup iivangkiiliuanik ingerlas­sisussatut atis­sagip­put. Taman­na isumaqar­poq Guutip kun­ngeqarfia, tas­sa naalagaaf­fia, pil­lugu nutaarsias­sap nuan­nersup oqaluus­sis­sutiginis­saanut piareersimajuar­tariaqar­tugut. Tusarlius­saq Biibilimeersoq oqalut­tuarigaangatsigu up­per­nik­kut nakus­satsit­tar­pugut. Qiim­maal­lan­nangaar­poq tusarlugu Jehovap in­nut­taasa nunarsuarmi sumi tamaniit­tut nutaarsias­sap nuan­nersup oqaluus­sis­sutiginis­saanut periarfis­sarsior­tuar­tut. As­sersuutigalugu suleqatinut, atuaqatinut, il­lumiit il­lumut, niuer­titsisunut, ilaqut­tanut Nalunaajaasuun­ngitsunut ilisarisimasanul­luun­niit oqaluus­sisar­put. Siooral­luta oqaluus­sisarun­naarut­ta as­sigis­savar­put  sak­kutooq sorsoqataatil­luni kamip­paminik peersisoq – taas­suma isigai ajoquseriaan­naas­sap­put. Taamaat­tumik saas­sun­neqaruni im­minut il­lersoruminaatsis­saaq im­minul­lu naalak­kiutigineqar­tut maleruarsin­naas­sanagit.

9. Sooq up­per­nerup eq­qor­tin­naveeq­qutaa kivis­simasariaqar­par­put?

⁹ Uppernerup eqqortin­naveeq­qutaa Jehovamut up­per­nitsin­nut as­sersuutaavoq. Up­peraar­put Jehovap neriorsuutini tamaasa eq­quutitik­kumaarai. Up­per­ner­put iluaqutigalugu “Ajor­tup qarsui ikumasut” qamis­sin­naas­savagut. Sooq eq­qor­tin­naveeq­qut taan­na kivis­simasariaqar­par­put? Tunus­sisut ilin­niar­titsis­sutaan­nit sun­ner­tin­ngin­nias­sagat­ta up­per­ner­pul­luun­niit isor­nar­torsior­neqaraangat nikal­lun­ngin­nias­sagat­ta. Up­persuseqan­ngik­kut­ta Jehovap najoq­qutas­siaanik sumigin­naaq­qul­luta sun­ner­niar­neqaraangat­ta akior­nis­saanut nukis­saqas­san­ngilagut. Akerlianil­li sulif­fim­mi atuarfim­miluun­niit up­per­ner­put il­lersoraangatsigu eq­qor­tin­naveeq­quter­put kivis­simasar­par­put. (1 Petr 3:15) Sulif­fik akis­sarsiaris­saarfiunerusoq pal­lorfigin­nin­nitsin­nut ajoqutaasin­naasoq itigar­tik­kaangatsigu eq­qor­tin­naveeq­quter­put kivis­simasar­par­put. (Hebr 13:5, 6) Akerlilersor­neqaraluarluta Jehova  kif­far­torfigigaangatsigu eq­qor­tin­naveeq­qutitsin­nit il­lersor­neqar­tar­pugut. – 1 Th 2:2.

10. Niaqoror­naveeq­qut an­nas­sut suua, aam­ma sooq atisariaqar­par­put?

¹⁰ Niaqoror­naveeqqut annassut tas­saavoq neriuuter­put Jehovameersoq – tas­sa toqumit an­naan­neqar­nis­samik Jehoval­lu piumasaatut ilior­tut tamarmik akis­sarsisin­neqar­nis­saan­nik neriuut. (1 Th 5:8; 1 Tim 4:10; Tit 1:1, 2) Soorlu sak­kutuup niaqoror­naveeq­qutini niaqumigut ajoqusin­ngin­nis­samut il­lersuutigisaraa taamatut­taaq eq­qarsar­taaser­put an­naan­neqar­nis­samik neriuum­mit il­lersor­neqar­tar­poq. Qanoq? Neriuut iluaqutigalugu Guutip neriorsuutai eq­qarsaatiginerusin­naavagut, taava ajor­nar­torsiutitsin­nit ar­torsin­neqas­san­ngilagut. Niaqoror­naveeq­qut qanoq atisin­naavar­put? Taamaaliorsin­naavugut Guutip eq­qarsar­taasianut naaper­tuut­tumik eq­qarsaateqar­tar­nik­kut. As­sersuutigalugu pisuus­sutit naleerutiasut tutsuiginagit Guuti neriuf­figaar­put. – Tuss 26:2; 104:34; 1 Tim 6:17.

11. Anersaap panaa suua, aam­ma sooq ator­tariaqar­par­put?

¹¹ Anersaap panaa tas­saavoq Guutip oqaasia, Biibili. Panaq taan­na nakutitsiniutinik sunil­luun­niit qulaajaasar­poq, aam­ma ajoqersuinerluutinut ileq­qunul­lu ajoqutaasunut inus­siaasut inus­siaajun­naarsis­sin­naavai. (2 Kor 10:4, 5; 2 Tim 3:16, 17; Hebr 4:12) Panap tamatuma eq­qor­tumik ator­nis­saa ilin­niar­tar­par­put nam­mineq atuaq­qis­saar­nik­kut Guutil­lu peqatigiis­sor­taanit ilin­niar­titaanik­kut. (2 Tim 2:15) Sak­kutuus­sutit saniatigut aam­ma al­lat iluaqutigalugit sun­niuteqarluar­tumik Jehovap il­lersor­paatigut. Sam­meriar­tigit.

12. Suna aam­ma pisariaqar­tip­par­put, aam­ma sooq?

¹² Sak­kutuup misilit­tagal­lip nalun­ngilaa iluatsit­tumik kisimiil­luni sak­kutoor­pas­suit akiorsin­naanagit; sak­kutooqatiminit ikior­neqar­tariaqar­poq. Taamatut­taaq Saatani malin­nit­taalu iluatsit­tumik kisimiil­luta akiorsin­naan­ngilagut; up­peqatitsin­nit ikior­neqar­tariaqar­pugut. Jehovap ikior­tigisin­naasatsin­nik nunarsuaq tamak­kerlugu ‘qatan­nguteqar­tip­paatigut’. – 1 Petr 2:17.

13. Hebræerit 10:24, 25-lu naaper­torlugit ataatsimiin­nitsin­nut najuun­neq qanoq iluaqutaasar­pa?

¹³ Ikior­neqar­tar­pugut ataatsimiin­ner­nut najuuk­kaangat­ta. (Hebræerit 10:24, 25 atuakkit). Ilaatigut nikal­lungasin­naasar­pugut. Taamatut misigigaangat­ta ataatsimiin­nerit qiim­maal­laatigisarsin­naavagut. Soorlu up­peqatigut uum­mam­mit pisumik akigaangata qiim­maal­lat­tar­pugut. Aam­ma oqalugiaatit takutitsineril­lu Biibilimik tun­ngavil­lit Jehovamut kif­far­tor­tuar­nis­satsin­nut kajumis­sis­sutigisar­pagut. Ataatsimiin­neril­lu sior­na kingor­nalu ineriar­tor­nar­tumik oqaloqatigiin­nerit qiim­mas­saatigisar­pagut. (1 Th 5:14) Kiisalu ataatsimiin­nitsin­ni al­lat ikiorsin­naavagut, taamaalioraangat­talu nuan­naar­tar­pugut. (ApS 20:35; Rom 1:11, 12) Ataatsimiin­nigut aam­ma al­latigut iluaqutaasar­put. Oqaluus­sil­laq­qin­nerunis­samut ilin­niar­titsil­laq­qin­nerunis­samul­lu iluaqutigaagut. As­sersuutigalugu Biibililersaarutit ilin­niar­titsinermi ator­tak­katsin­neersut atorluar­nerusin­naaler­tar­pagut. Taamaat­tumik ilagiit ataatsimiin­nis­saan­nut piareersarluar­tarit. Ataatsimiin­ner­ni tusar­naaq­qis­saar­tarit, ilik­kak­katil­lu ator­tak­kit. Taamaalior­taruit ‘Kristusi-Jiisusimut sak­kutuujul­luar­tun­ngus­saatit’. – 2 Tim 2:3. 

14. Aam­ma qanoq ikior­neqarsin­naavugut?

¹⁴ Aam­mat­taaq in­ngilit pis­saanil­lit mil­lionilip­pas­suit tapersersor­tigaagut. In­ngilip ataatsip iliuuserisin­naasaa eq­qarsaatigiuk! (Es 37:36) Maan­na takorloorsin­naaler­piuk  in­ngiler­pas­suit sunik naam­mas­sisaqarsin­naanersut? Inuup anersaapiluul­luun­niit Jehovap sak­kutuui pis­saasut ajugaaf­figisin­naan­ngilai. Jehova ajugaqan­ngitsuuvoq. Taamaat­tumik ikior­patigut akerlilersor­tigut qanorluun­niit amerlatigigaluar­pata taak­kunan­nga nukit­tunerujuaan­nas­saagut. (Eqq 6:16) Tamak­ku eq­qarsaatigiuak­kit suleqativit, atuaqativit ilaqut­tavil­luun­niit Nalunaajaasuun­ngitsup oqaasii iliuusiiluun­niit nikal­lungas­sutigigaangak­kit. Eq­qaamajuk akiuun­nin­ni kisimiin­ngin­navit. Jehovap siulersuinera naaper­torlugu ilior­putit.

15. Esaja 54:15, 17-ilu naaper­torlugit sooq Guutip in­nut­tai nipangersin­neqarsin­naan­ngil­lat?

¹⁵ Saatanip silarsuaata pis­sutis­sar­pas­suaqarluni uumigaatigut. Politik­kimut akuliutin­ngisaan­nar­pugut sorsoqataasar­natalu. Guutip kun­ngeqarfia eq­qis­sinis­samut neriuutis­satuaasoq Jehoval­lu aq­qa oqaluus­sis­sutigaagut najoq­qutas­siaalu naaper­tuil­luar­tut maleruarlugit. Silarsuup naalagaa sal­lutuujul­lunilu toqutsisuusoq oqaluus­sis­sutigaar­put. (Joh 8:44) Aam­ma Saatanip silarsuaa qanit­tuk­kut suujun­naarsin­neqas­sasoq nalunaarutigisar­par­put. Saatanimit malin­nit­taanil­lu nipangersin­neqan­ngisaan­narluta Jehova sapin­ngisatsin­nik un­nersiutigiuas­savar­put. Saatani pis­saaneqangaaraluarluni nunarsuaq tamak­kerlugu inun­nut oqaluus­siner­put unitsis­sin­naasiman­ngilaa – Jehovap ser­nis­sormatigut. – Esaja 54:15, 17 atuakkit.

16. An­nikil­lior­nar­tus­sarsuarmi Jehovap in­nut­tani qanoq ser­nis­sus­savai?

¹⁶ Siunis­sami susoqas­sava? Jehovap an­nikil­lior­nar­tus­sarsuarmi tupin­nangaar­tumik marlutsigut an­naatis­savaatigut. Siul­lermik, Babylonersuaq, up­perisarsior­neq eq­qun­ngitsoq, nunarsuarmi kun­nginit suujun­naarsitik­kuniuk kif­fani aalajaatsut Jehovap an­naatis­savai. (Saqq 17:16-18; 18:2, 4) Aam­ma Harmagedonimi Saatanip silarsuaata sin­nera suujun­naarsik­kuniuk in­nut­tani an­naatis­savai. – Saqq 7:9, 10; 16:14, 16.

17. Jehovamut qanit­tumik at­taveqar­tuar­neq qanoq iluaqutigisar­par­put?

¹⁷ Jehova qanit­tumik at­taveqarfigiuarutsigu Saatanip ataavar­tumik ajoqusersin­naas­san­ngilaatigut. Saatanimi suujun­naarsin­neqas­saaq. (Rom 16:20) Taamaat­tumik sak­kutuus­sutit tamaasa atik­kit atisimajuarlugillu! Kisimiil­lutit sorsun­niarsareqinak. Qatan­ngutitit ikiuk­kit Jehoval­lu siulersuinera maleruarlugu. Taamaalioruit up­peril­luin­narsin­naavat Jehovap ser­nis­sorlutil­lu nakus­satsit­tarumaaraatit. – Es 41:10.