nisanip 14-iat – uvdlok erkaimassariakartok

„taimailiortaritse erĸaivdlunga.“ — 1 KORINTUMIUT 11:24.

1. ĸanoĸ ilivdlune Jesus silarssuarmut ajugauva?

’TUGPATDLERITSE, silarssuarmut ajugaugama.’ oĸautsit tugpatdlernartut kajumingnartutdlo tamáko oĸauseralugit, toĸunigssane aĸagútoĸ únúkut Jesusip apustiline ilumôrtut arĸaniliussut píssagtípai. Jesus takutitserêrpoĸ silarssuarmut ajugaussûvdlune! agssortuissime, Satanip Djævelip, Jehovamut ilumôrtuarnerminik uniorĸutitsiniarnere tamaisa Jesusip akiorsínauvdluartarsimavai. mãnalo, nápagkame ániartitauvfingme toĸunigssane nalunaerĸútap akúnerpâlúnguinik sujorĸutdlugo, ĸularíngilâ agssuarnáissutse ilumôrtumik aulajangiúsagine toĸunigssane tikivigdlugo. — Juánase 16:33; Eprîarit 12:2.

2. suna pivdlugo Jesusip „Nâlagkap únúkorsiortitsinera“ pilersípâ?

² pisimassoĸ ĸilangme nunamilo tamarme pingâruteĸartoĸ tamána ukiut 1953-it matuma sujornagut nisanip, tássa jûtit ugperissarsiornerup tungâtigut ĸáumatisiutáine ĸáumatip ingerdlanera maligdlugo ĸáumatip sujugdliup, uvdluisa 14-iáne nagdliúsimavoĸ. Jesusip tumai atuardlugit ajoĸersugaisa túniutdluínartut uvdloĸ táuna puiúngisáinásavât. ajoĸersugaisa ilumôrfigissagssamingnut ilumôrtut taimane nagdliutilersup pingâruteĸarneranik arajússíngisáinarnigssât ĸulákêrniardlugo, Jesusip erĸainiaivdlune únúkorsiorneĸ ingmíkut ítoĸ pilersípâ, apustile Paulusip taissâ „Nâlagkap nerdliutâ“, imalũnît „Nâlagkap únúkorsiortitsinera“ (NW). Gûtip súnîneratigut isumagssarsisitauvdlune Paulusip oĸalugtuarâ taimane Jesusip ajoĸersugkane najũtut perĸugai: „taimailiortaritse erĸaivdlunga.“ (1 Korintumiut 11:20, 24) Jesusip ajoĸersugainut ilaorusugkuvit, pâsiviuk suna pivdlugo taimatut perĸússuteĸartoĸ, perĸussâta sumik piumavfigigâtit, sujunigssangnutdlo sumik pingâruteĸarsínaunera?

uvdloĸ erĸaimassariaĸartoĸ

3. ĸanga, sûtdlo pisimaneráne, nisanip uvdluisa 14-iat uvdlortut erĸaimassariaĸartúngortíne- ĸarĸârpa?

³ tássáungilaĸ inuiait oĸalugtuarissauneráne nisanip uvdluisa 14-iata erĸaimassariaĸartutut ingmíkôrtíneĸarĸârnera. ukiume 1513-ime u.n.m.a.s. Jehovap, kivfane Moses avĸutigalugo, Israelíkut perĸuvai: „uvdlordlo tamána [nisanip uvdluisa 14-iat] ilivsínut erĸainiarfiúsavoĸ, nagdliútorssuartutdlo [Jehovamut] nagdliússissásavarse; kingulerîgsugssavsigut nagdliússissásavarse.“ taimanerssuaĸ suna nagdliússivingmut píssutauva? Jehova nangmineĸ akivoĸ: „[Jehovamut] tuníssut ĸângîvfigsiutigssaĸ tamássa, táussuma Israîlip kinguaisa igdlue ĸângerai Egivtinime, taimane Egivtinimiut perdlugtíkamigit.“ — 2 Môrsase 12:14, 27.

4. aperĸutit akerdlerĩssutaussut sût Israelíkut Ægyptenimit aniguisíneĸarneránut túngápat?

⁴ Israelíkut inuit akornáne ûmassûtitaisalo akornáne angajugdliliaisa Ægyptenime tupingnangârtumik aniguisitaunerat nisanip 14-iata únuane pisimavoĸ. gûtipilungnut íngilipilûssunut ægyptenimiut patdlorfigissartagáinut narrunarsainerit perêrsut ĸulingiluaussut tamána sákortuserugtorfigât, tássûnalo Jehovap sujunertâ nalunaerutigerîgaĸ Faraomut makitasûmut oĸautigissâ ersserĸigsarneĸarpoĸ: „tamánale pivdlugo atatípavkit, píssaunera ilingnut takutíkumavdlugo, ateralo oĸautigineĸarĸuvdlugo nunane tamane.“ uvdlut ardlalialuit matuma kingornagut Jehovap arĸa píssauneralo nalunarungnaersíneĸarĸigput táussuma Israelíkut milliûnigdlit ilauniartorpagssuitdlo Ímame Augpalârtume aniguisingmagit, Faraop sákutûisa píssaunerpârtait ipititdlugit. tupingnángilaĸ tauva Moses Israelivdlo kinguâve erinarssormata: „[Jehova] erínersârfigísavara, inornangârmat.“ — 2 Môrsase 9:16; 15:1.

5. pôrskimik nagdliútorsiornerup suna sujunertarâ?

⁵ Israelíkut nuname sujuaissãnut Abrahamimut neriorssûtigissaussume najugaĸalerêrsimangmata, ĸângîvfigsiorfik, tássa pôrske, ukiumôrtumik Jerusalemime inuiait nagdliússiviátut nagdliútorsiutigineĸartásaoĸ, inássut Môrsasip agdlagaisa tatdlimait 16:1-8-me agdlagsimassoĸ maligdlugo. taimailivdlune Jehovap isumagâ ínugtame piumârtugssanut ássersûtaussut nisanip uvdluisa 14-iánik ingmíkut erĸainiagaĸartuáinarnigssât. erĸainiagaĸarnerup tamatuma suna sujunertarísavâ? uvdlorme tássane Jehovap arĸa akitsisíneĸartásaoĸ, aniguisitsivdlune suliaisa angingârtut erĸainiarneĸartarfigssât. taimáitumik ukiut untritiligpagssuit matuma kingornagut Jesusip angajorĸâvisa pôrskip pingâruteĸarnera ũmatimíkut erĸarsautigissartuarsimavât, sôrdlo oĸalugtũneĸartugut: „ukiut tamaisa Jerusalâliartarput pôrskisioriartordlutik.“ jûtit ilerĸoriuartagât maligdlugo, ernertik Jesus ilagissarpât. — Lúkarse 2:41, 42.

6. sût píssutigalugit Jesus ĸilanârpa ukiume 33-me u.n.m.a.n. pôrskisiutigssamik apustiline ilumôrtut nereĸatigiumavdlugit?

⁶ Jordanip kûgssuane kuisínerme oĸalũssissalernermilo kingornagut Jesusip pôrskisiorângame nuname anânane Maria táussumalo ernere, ĸatángutigssane, ilagissánguatsiarpai. kisiánile, nisanip 14-iáne ukiume 33-me u.n.m.a.n. Jesusip ârĸigssorpâ apustiline arĸaneĸ mardlûssut nagdliússivingmik nagdliútorsioĸatiginigssât. nagdliútoĸ tamána Jesusip ĸanoĸ misigigâ Lukasip oĸalugtuâne pâsineĸarsínauvoĸ: „ĸilanâĸaunga savârĸamik pôrskisiutigssamik matumínga ániartínanga nereĸatigiumavdluse.“ (Lúkarse 22:15) suna pivdlugo Jesus taima ĸilanârtigâ? uvdlorme erĸaimassariaĸartume seĸernup tarrínerane autdlartítume katsorna nagdliúkumârtugssat pingâruteĸarnerat nalúngínamiuk. Jesusip nalúngilãtaoĸ nagdliúkumârtugssat tamáko ukiume 1513-ime u.n.m.a.s. pisimassunit pingâruteĸarnerungãsassut. uvdlorme tássane piumârtugssat Jehovap arĸa aitsât taima angnertutigissumik akitsisísavât nunamiutdlo ilaĸutarîgsortaisa pivdluarĸuneĸarumârnigssât túngavilerdlugo. ãmátaoĸ toĸúngínermine ajoĸersugkane amerdlasûnik oĸalugtũkumavai, maligtimisut ilumôrtuarnigssãnut sapîsertíkumavdlugit. îvangkîliumik agdlagkane pisimassut angnikitsualugtait agdlauserineĸarmata, Jesusip oĸauserissai iliûserissailo tusarnârsínauvavutdlusôĸ. — Juánase 12:31; 17:26.

 sût pisimápat? ĸanoĸ pingâruteĸarpat?

7. (a) toĸunerme erĸaineĸarnigssânut nagdliútorsiortarnigssaĸ pilersitsínago, Jesusip pôrskisiutigssamik nerinerata kingugdliup nalâne nagdliútut sût perĸârpat? (Juánase 13:1-30) (b) Nâlagkap únúkorsiortitsineranik pilersitsinermine Jesusip periausê navsuiákit.

⁷ nerinerup nalâne Jesus nikuípoĸ ajoĸersugkamilo isigait uvfardlugit, tássûna nikanartínermik maligagssiuivdluardlune. tauva Jesus oĸarpoĸ: „ilavse pisíkumârpânga.“ tamatuma kinguniánguagut Judasimut sâgpoĸ oĸarfigalugulo: „pinasuarit.“ Johannesip agdlauserissâne agdlagsimavoĸ: „ernĩnaĸ anivoĸ, mássa únuaussoĸ.“ (Juánase 13:21, 27, 30) tamána perêrmat, Jesusip toĸunerme erĸaineĸarnigssânut nagdliútorsiortarnigssaĸ pilersípâ. issigingnigtûssup Mattæusip suna pisimassoĸ ĸanoĸ navsuiarâ tusarnâriartigo: „nerisitdlutigdle Jîsusip timiussaĸ tiguvâ, pivdluarĸussivdlunilo avgorpâ ajoĸersugkaminutdlo túniutdlugo oĸardlunilo: tigusivdluse nerigitse, tássa timiga [táuna isumaĸarpoĸ timiga, NW]. ermuserdlo tiguvâ, ĸujavdlunilo táussumínga tunivai oĸardlune: tamavse tássánga imeritse, tássaungmat auga [táuna isumaĸarmat auga, NW], angerutsip pia, amerdlasût pivdlugit kuissoĸ ajortit isumákêrneĸautigssãnik. oĸarfigâvsile: matuma kingorna matumánga vĩneĸutip inerititânit imísáisaunga uvdloĸ ivna nagdliutserdlugo, nutaussoĸ imerumâruvko ilagaluse atâtama nâlagauvfiane. ĸujaniutdlo tugsiutigerêramíko ûliap ĸáĸânukarput.“ — Matîuse 26:26-30; ãmátaoĸ takúkit Mákorse 14:22-26, Lúkarse 22:19, 20 ãmalo Korintumiunut agdlagkat sujugdlît 11:23-26.

8. suna pivdlugo pissariaĸardluínarpa erĸainiaivdlune nagdliútorsiortarnigssamik pilersitsinermigut Jesusip oĸausê iliûsîlo pâsísagivut?

⁸ taimane Jesusip oĸauserissai iliûserissailo ĸanorpiaĸ pingâruteĸarpat? Kristusip ajoĸersugaisa tanitaussut tamarmik tamákua pingâruteĸarneránik pâsingningnigssâta ĸanoĸ pissariaĸartiginera Paulusip ersserĸigsarpâ, oĸardlune: „tamána pivdlugo timiussamit tamatumánga nerissoĸ, Nâlagkavdlũnît ermusianit imertoĸ ĸíngarĸúnardlune, táuna pitdlagagssautípoĸ Nâlagkap timâlo aualo pivdlugit.“ sôruname tanitaussut ilâtdlũnît Jehovap issaine „ĸíngarĸúnar“umásángilaĸ, táussumalo erĸartũssutânit pitsáungitsumik inernilingmit naláuneĸardlune. ãmátaoĸ, „amerdlangârtu“nut ilaussut tanitaussut sivnerútut ilagissáitut ĸíngarĸúnángitsutut nautsorssûtigineĸarumásáput. tauva, erĸainiaivdlune nagdliútorsiorneĸ atausíngornerme martsip 24-áne 1986-ime nagdliútorsiutigineĸarĸigtugssángormat, tugdluarpoĸ tamavta aperĸut tamána perĸigsârtumik misigssorĸísaguvtigo. — 1 Korintumiut 11:27.

9. (a) suna pivdlugo Jesusip oĸausînik nugtigaĸ „táuna isumaĸarpoĸ timiga“ nugtigkamit „tássa timiga“-mit erĸorneruva? (ĸúpernerup atâne navsuiausiutdlugo ilángússaĸ takûk.) (b) timiussaĸ Jesusip ĸanoĸ ingmíkut isumaĸartípâ? (c) vĩne ĸanoĸ ingmíkut isumaĸartípâ?

⁹ Jesus oĸarpoĸ: „táuna isumaĸarpoĸ timiga.“ * taima oĸardlune Jesusip timiussaĸ ingmíkut isumaĸartípâ — ássersûtauvoĸ uviníkut timânut ajorteĸángitsumut „silamiut inûtísavdlugit“ túniússagssânut. (Juánase 6:51) ãma oĸarame ’táuna isumaĸarpoĸ auga’, „angerutsip  pia, . . . kuissoĸ ajortit isumákêrneĸautigssãnik“, vĩne ĸápiorsimassoĸ ermutsimĩtoĸ aungminut ássersũpâ. auk táuna ’angerusisâp’ atûtilersíneĸarnigssânut túngaviúsaoĸ. aua kuissoĸ ãmátaoĸ „ajortit isumákêrneĸauti“gisimásavât. — Matîuse 26:28; Jerimia 31:31-33; Eprîarit 9:22.

10. timiussamik vĩnimigdlo ilangîneĸ ĸanoĸ isumaĸarpa?

¹⁰ tauva erĸainiaivdlune nagdliútorsiornerup nalâne timiussamik vĩnimigdlo ilangîssunut tamána ĸanoĸ isumaĸarpa? ilangînerata ilangêĸataussut issigingnârtutdlo pâsitípai Kristusip Jesusip pigdliutâ utertitsíssutaussoĸ iluaĸutigerêrsimagât, kisiáne ingmíkut ítumik ingmíkutdlo sujunertaĸartumik. tamána ĸanoĸ pâsissariaĸarpa? Kristusip pigdliutânut ugpernerat Jehovamutdlo túniutdluínarnerat perĸutigalugit Jesusip inugtut pigdliutâta iluaĸutigssartainik pissagssaĸartutut Gûtip táuko nautsorssûtigai. suna sujunertaralugo? inugtut nãmagdluínássuseĸartûtíneĸarsínaorĸuvdlugit Gûtip issaine iluartutut nautsorssûtigineĸarnigssãnut. tauva Jehovap táuko anersâmigut ivdlernartúkut kinguâgssiarai, anersãkutdlo ĸitornarsiarilerdlugit. mãna nuname inûsínautitaunertik taimaitísínãngorpât taorserdlugulo ĸilangme kingornússagssaĸ pisínãngordlugo. tamáko tamarmik pisimáput Nâlagkap únúkorsiortitsineranut peĸataulersínagit. — Rûmamiut 5:1, 2, 8; 8:15-17; Jâko 1:18.

11, 12. (a) ãmátaoĸ sût mardluk vĩnimik ilangîníkut takutíneĸarpat? (b) angeruseĸ Jesusip ilangîssartut angerfigeĸatigalugit pilersitâ navsuiaruk.

¹¹ tauva pâsiniariartigo vĩnimik ilangîníkut suna takutíneĸartartoĸ. Jehovap anersãkut ĸitornane nauk iluartûtíkaluarai ĸitornarsiaralugitdlo, sule nãmagdluínángitsumik uviniliúput. sule ajortuliorajugput, ajortuliorajungnertigdlo miserratiginiarnago. vĩnimik ilangînermíkut erssersípât Kristusip Jesusip aua, „amerdlasût pivdlugit kuissoĸ ajortit isumákêrneĸautigssãnik“, uvdlut tamaisa pissariaĸartíkigtik. — 1 Juánase 1:9, 10; 2:1.

¹² sulile atauseĸ vĩnimik ilangîníkut takutíneĸarpoĸ. ilangîssut nalunaiautigât „angerusisâ“mut Jehovap itsarssuardle pruvfîtíkut Jeremiasíkut sujuligtûtigissânut ilautíneĸarnertik. angeruseĸ tamána Jesusip auagut atortûlersíneĸarpoĸ. angerutsime tássane angerfigeĸatigît tássáuput Jehova Gûte anersãkutdlo ĸitornai, katitigauvdlutik tássa anersãkut Israel. ilaussut tamarmik ingmíkut Gûtimit ĸinigáuput. Jesus angerutsimik akúnermiliútûvoĸ, angeruserdlo iluaĸutigalugo angerutsimut ilaussut 144.000-iussut táuko ikiorpai Abrahamip kinguâgssânut ilángúnigssãnut. (Jerimia 31:31-34; 2 Tásalûníkamiut 2:13; Eprîarit 8:10, 12; 12:22-24; Galâsiamiut 3:29) táukũpútaoĸ Jesusip ’nâlagauvfik pivdlugo angerfigeĸatigissai’. ’nâlagauvfik pivdlugo angerutsimut’ ilaugamik, nagdlerpat kúngertik Jesus Kristus peĸatigalugo kivfarineĸásáput Jehovap pivdluarĸússutai inũssutaussut nunamiut ilaĸutarîgsortáinut tamanut avĸutigssiûtísavdlugit. — Lúkarse 22:28-30, NW; Juánase 6:53; sarĸúmersitat 5:9, 10; 1 Môrsase 22:15-18.

13. tauva nisanip uvdluisa 14-iáne sût erĸaissariaĸarpat?

¹³ Jesusip oĸausîsa uvdlorme erĸaimassariaĸartume oĸauserissaisa tamákîssumik pingâruteĸarnerat misigssortitdlugo, píngitsailineĸarpugut Jehovap ernerminik túniússinermigut asangningnera erĸaerĸuvdlugo. ãmátaoĸ erĸaisíneĸarpugut Jesusip asangningneranik, inûnine utertitsíssutigssatut túniúkamiuk, inuiait ugpertut tamarmik utertíneĸautigssãnik. (Juánase 3:16; Rûmamiut 5:8; 1 Timûtiuse 2:5, 6) ãmátaordle avdlanik ajoĸersûteĸarpoĸ ilumôrtunik erdlingnartunik Jesusip únuk táuna ajoĸersugkaminut navsuiagainik. bîbilimik  agdlagtune apustile Johannesip kisime oĸaloĸatigĩssut oĸaloĸatigîgsunut túnganerussoĸ tamána agdlauserâ.

nâlangnarsisitaunigssaĸ, asangningneĸ, atausiússuserdlo

14. (a) erĸainiaivdlune nagdliútorsiornerit tamaisa Jehovap ĸanoĸ nâlangnautigissarpai? (b) Jesusimik erĸainiainivtíne asangningneĸ ĸanoĸ pissariaĸartigâ, tamánalo erĸarsautigalugo ilangêĸataussut tamarmik ĸanoĸ ilivdlutik ingminut misilísápat?

¹⁴ Jesus oĸarpoĸ: „mãna inûp ernera nâlangnarsivoĸ, Gûtilo táussumûna nâlangnarsivoĸ.“ (Juánase 13:31) Israelíkut Ægyptenimit aniguisitauneránîtdle, nisanip uvdluisa 14-iat atatíneĸartuáinarpoĸ Gûtip arĸata akitsisíneĸarneranut, Gûtip kisime oĸartugssauneranut, píssauneĸarneranutdlo. mãna, Jesusip toĸo tikitdlugo ilumôrneragut, tauvalo Gûtip píssauneragut Jesusip makitíneĸarneragut alutornangârtúkut, Gûtip arĸa sule angnerussumik atarĸineĸarpoĸ nâlangnarsisíneĸardlunilo. (nalerĸiuguk ússatit 27:11.) Jesusip ajoĸersugkane oĸarfigai ajoĸersugaunertik ugpernarsásagât ’inássúmik nutâmik’ maleruainermíkut, tássa ’asaĸatigîgdlutik, sôrdlo Jesusip asagâtik’. (Juánase 13:34, 35) uvagut ĸatángutivtínut asangningnivta ĸanoĸ ititigíssusiata erssersípâ Jesusip uvavtínik asangningnera taimane takutitâ ĸanoĸ pingârtitsigigigput. — 1 Juánase 4:19.

15. (a) ĸíngarĸúnángitsumik ilangîssut tamarmik sume inûnigssamik neriugissaĸarpat? (b) Jesusimik asangningnine inûp ĸanoĸ takutísínauvâ?

¹⁵ Kristus nâlagkersueĸatigísavdlugo ĸinigaussut tipaitsungnerata ilagâ ĸilangme najugaĸarumârnigssamik neriugissaĸarneĸ. (sarĸúmersitat 20:6) neriugissaĸ tamána Jesusip erĸartulerpâ oĸardlune: „inigssioriartorpavse. . . . kingumut tikiúkumârpunga, uvavnutdlo pisíkumârpavse.“ (Juánase 14:2-4) naggatigssamut ilumôrtuartut ĸilangme najugagssamingnut ’angerdlarnigssâta’ ila pivdluarnássusigssâ! taimáitumik Jesusip oĸaorĸigsârpai: „asaguvsinga inássutíka maleruarsigik.“ tássûna inássutai tamarmik pineĸarput, ãmátaoĸ ajoĸersuinigssamik ajoĸersugángortitsinermigdlo inássutâ. — Juánase 14:15, 21; Matîuse 28:19, 20.

16. (a) ajoĸersugaisa akornáne atausiússuseĸarnerup pissariaĸássusia Jesusip ĸanoĸ ersserĸigsarpâ, sunalo píssutigalugo atausiússuseĸ tamána taima pissariaĸartigâ? (b) Jesusip maligtaisa tamarmik sût atugagssarait, ĸasusuíniarnermingnile suna píssagtíssutigisínauvât?

¹⁶ Jesusip maligtaisa Jesusimut ingmingnutdlo atausioĸatigîngnigssâta ila pissariaĸardluínássusia! vĩneĸut avaleĸutailo ássersûtigalugit Jesusip tamána ersserĸigsarpâ. atausiússutsip inerititaĸarneĸ kingunerissarpâ, inerititaĸarnerdlo atâtap nâlangnautigâ. (1 Korintumiut 1:10; Juánase 15:1, 5, 8) Jesusip maligtaisa tamarmik malerssugauneĸ agssortugaunerdlo atugagssarait. ugperníkutdle píssagtínássusia nalúngínavtigo Jesusip silarssuarmut ajugauniarnermigut agssuarnáissutse aulajangiúkâ Satan sãssússivdlune ĸanoĸ ilioraluartitdlugulũnît! — Juánase 15:18-20; 16:2, 33.

17. Jesusip ĸinunermine ĸínutaisa Juánase, kapitale 17-ime, agdlagsimassut ilait erĸartoriákit.

¹⁷ Jesusip únungme tássane pisimassut naggaserpai atâtane ĸamánga pissumik ĸínuvigalugo. atâtanilo nâlangnarsinigssâ ĸinunermine sujugdliutípâ. ĸínuteĸarpoĸ maligtaisa ajortumit, Satanimit, sernigssorneĸarnigssãnik, silamiunit ingmíkôrsimaniardlutik inûnermingne. ĸínutigãtaoĸ asangnigtumik atausiússuseĸ ernerup atâtâtalo atausiússusiat Jesusip tumai atuardlugit maligtaisa amerdliartuínartut  akornáne agdliartortuásassoĸ. — Juánase, kapitale 17.

18. 1985-ime inuit taima amerdlatigissut erĸainiaivdlune nagdliútorsiornermut najûngmata, suna píssutigalugo taima ikigtigissut ássersûtinik ilangĩpat?

¹⁸ ukiut 1953-it matuma sujornagut únungme tássane ajoĸersûtit ilumôrtut erĸarsautitdlo erdlingnartut Jesusip ajoĸersugkaminut navsuiardlugit túniússaisa iláinait tamatumûna sangmivavut, tamákuale pâsitísimásavãtigut suna pivdlugo nisanip uvdluisa 14-iat uvdlûssoĸ erĸaimassariaĸartoĸ. tauva tupingnángilaĸ sujorna Jehovap nalunaiaissuisa ikíngutaisalo 7.792.109-iussut pâsigât nâpeĸatigîgtariaĸardlutik Nâlagkap únúkorsiortitsinera nagdliútorsiutigalugo. najũtutdle nauk taima amerdlatigigaluartut, ilaisa 9.051-ínait ássersûtinik ilangĩput. suna pivdlugo? uvdlumíkúme Jehovap nalunaiaissuisa amerdlanerpârtaisa pâsivât „amerdlangârtu“nut „igsiavíssârssûp sâne savârĸavdlo sâne“ ĸeĸartunut ilauvdlutik. táukua ĸilanârât nuna mána nâgssáungitsumik angerdlarsimavfigalugo inûnigssartik, neriugissaríngínamíko ĸilangme inûnigssaĸ, tássanime 144.000-iussut ’Kristus kúngioĸatigísavât ukiut tûsintigdlit’. — sarĸúmersitat 7:9; 20:6; Tussiaat 37:11.

19. tugdliane sût atuarĸigsâĸatigĩssutigísavavut, sunalo pivdlugo tamarmik najũnigssât pissariaĸarpa?

¹⁹ aperĸutitdle ardlagdlit aperĸutíngorput Nâlagkap únúkorsiortitsineranut túngássuteĸartut ’savatdlo avdlat’ „amerdlangârtut“ tamatumúnga píssusiat pivdlugit. (Juánase 10:16) taimáitumik nalerĸutdluarpoĸ tamáko ilángutagssiame tugdlerme sangmineĸarpata, erĸainiaivdlune nagdliútorsiorĸingnigssaĸ ĸanigdlilermat pâsinerdluissoĸarĸunago. — 1 Tásalûníkamiut 5:21.

[Quppernerup ataani ilanngussaq]

erĸaimaviuk —

□ erĸainiaivdlune nagdliútorsiornerme kíkut ássersûtinik ilangîssugssaussut?

□ erĸainiaivdlune nagdliútorsiornerup erĸarsautigissagssanik pingârutilingnik sunik erĸaisísagâtigut?

□ ĸanoĸ ilivdluta takutísínaugigput Jesus uvdlut tamaisa erĸaissarigput?

□ aperĸut akerdlerĩssutaussoĸ pingârutilik suna nisanip 14-iánut atatitaussoĸ?

[Atuaqqissaarnermi apeqqutit]