’savat avdlat’ Nâlagkavdlo únúkorsiortitsinera

„[Jesus] ajortivta matôrneĸautigât, uvaguínáungitsúme, silarssuarmiútaoĸ tamarmik.“ — 1 JUÁNASE 2:2.

1. ’nâlagauvfingmik tusagagssap nuánersup oĸalũssíssutigineĸarnera’ sunik nuánersunik kinguneĸarpa?

JESUS oĸarpoĸ: „nâlagauvfingmigdlo tusagagssaĸ nuánersoĸ tamána oĸalũssíssutigineĸásaoĸ nunarssuarme inuit najugarissãne tamarssuarme inuiaĸatigît tamarmik nalujungnaerutigssãnik; tauvalo naggatigssaĸ nagdliúsaoĸ.“ (Matîuse 24:14, NW) inuit kinguârît 1914-ime inûssut ilait sule ûmáput, táukualo nalunaiautigisínauvât Jehovap nalunaiaissuisa inássut tamána ilumôrtumik nãmagsisimagât. tamatuma kingunerissânik inuit untritilingnik tûsintigdlit ilumôrtumik ũmatigdlit, silamiut iluagtíngitsôrtarnere pakatsíssutigigamíkik, tusagagssaĸ nuánersoĸ ilagsisimavât. Jehova Gûtimut túniutdluínarsimáput túniutdluínarnertigdlo imermut morssugtitauníkut kuisitdlutik takutitdlugo, nâlagauvfianut ilumôrtumik ínugtaujumagamik. 1985-ime inuit 189.800-t silatûmik taimailiorput. Gûtip ínugtai Gûtip arĸanik atsersimassut oĸarfigaitdlusôĸ: „ingerdlaĸatigilavse, tusâmagavta Gûtip najorâse.“ — Saggaria 8:23.

2. perĸârtariaĸarsimassup sûp aulajangerpâ Jesusip ’savautiminik avdlanik’ katerssuilernigssânut pivfigssaĸ?

² patdlorfigingnigtut „amerdlangârtut“  amerdliartuínartut táuko iláuput Jesusip ’savanik avdlanik’ taissainut. (sarĸúmersitat 7:9, 15; Juánase 10:16) nuáningârtumik neriugissaĸarput pâratîsime nuname nâgssáungitsumik inûnigssamik. (Tussiaat 37:29) Jesusip sujuligtûtigâ maligtine ilumôrtut táuko katerssorumârine, kisiánile savanik pârssissutut ’savarpánguit’ savanut ássersûtaussut, pivdlugit angerusisâmut atatitdlugo akúnermiliútûvdlune, katerssorneĸarnigssât kiserdluínât sangmerĸârêruniuk. (Lúkarse 12:32; Eprîarit 9:15) savanut ássersûtaussut katerssat mardlûssut táuko ’savautitut atausíngortíneĸarnigssât’ erĸarsautigalugo, pâsisínãngorparput suna píssutigalugo apustile Johannes oĸartoĸ Jesus Kristus „ajortivta matôrneĸauti[gigât], uvaguínáungitsúme, silarssuarmiútaoĸ tamarmik“. — 1 Juánase 2:1, 2.

pâsingningneĸ avdlángortitaĸ

3, 4. (a) Nâlagkap únúkorsiortitsineranik nagdliútorsiutigingningneĸ pivdlugo pâsissartik inugpagssuit ĸanoĸ avdlángortítariaĸarsimavât? (b) Paulus ĸanoĸ isumaĸarpa oĸarame: „nerissarângavsiuk . . . imerângavse“?

³ ’savat avdlat’ ilagîngnut ilánguterĸámersut ilarpagssue nerdlîviliartaraluarput, ilagît átavigissaraluamik maligagssiait nâpertordlugit imatut iliûseĸardlutik imatutdlo akulikitsigissumik. mãnale táukua pâsilersimavât Nâlagkap únúkorsiortitsinera ukiumut atausiáinardlune nagdliútorsiutigineĸartugssaussoĸ. sôĸ taimáipa? jûtit nagdliússiviat pôrske ukiumut atausiáinardlune nagdliútorsiutigineĸartarpoĸ, pôrskivdlo únuane, nisanip uvdluisa 14-iáne, erĸainiaivdlune nagdliútorsiortarnigssaĸ Jesusip pilersípâ. tauva ajoĸersugkane oĸarfigai: „taimailiortaritse erĸaivdlunga.“ Paulus nangitdlune oĸarpoĸ: „timiussarme tamána nerissarângavsiuk, ermutsimitdlo tamatumánga imerângavse, Nâlagkap toĸua oĸautigissásavarse tikiutserdlugo.“ (1 Korintumiut 11:24-26) ersserĸigpoĸ Jesusip kigsautigigâ ajoĸersugkame toĸunine erĸainiardlugo nagdliútorsiorneĸ pôrskip uvdluane, ukiumôrtumik nagdliútartume, nagdliútorsiutigissásagât. ilagît kristumiut piunerisa ukiuine ĸavsêriardlune nagdliútorsiutigineĸartarsimavoĸ. máname tikitdlugo erĸainiaivdlune nagdliútorsiorneĸ 1953-eriardlune nagdliútorsiutigineĸarsimavoĸ.

⁴ katerssat ’savat avdlat’ avdlatigútaoĸ nutâmik pâsissaĸalersimáput. timiussamik vĩnimigdlo ilangîssarnatik, mássa ilagîngne átavigissaraluamingne ilarpagssue ilangîssaraluartut, pâsilersimavât nutâmik píssuseĸartariaĸalerdlutik, issigingnârtúngordlutik. suna tamatumúnga píssutauva, bîbilimilo túngavigssaĸarpa periausigssamut issigingnârtut ãma ilangîssartut najũnigssãnut? — 2 Korintumiut 13:11; 2 Timûtiuse 3:16, 17.

5. (a) Jesusip pigdliutâ iluaĸutigisínáusaguníko sulíssutigissagssat túngaviussut inuit sulíssutigissariaĸagait navsuiákit. (b) suna pivdlugo Kristus Jesusip maligtaisa ilait 144.000-iussut Gûtip ingmíkut iliûseĸarfigisimavai?

⁵ kíkutdlũnît Kristusip Jesusip tuníssutâ ’ajortit matôrneĸautigssât’ iluaĸutigisínáusaguníko, ĸilangme inûnigssamik neriugissaĸartut ãmátaoĸ pâratîsime nuname inûnigssamik neriugissaĸartut ássigîgdlutik, aulajangersimassut sulíssutigissariaĸarpait. sulíssutigissagssat túngaviussut ukũput: (1) Gûtip oĸausianik erĸordluartumik ilisarssineĸ (Rûmamiut 10:13-15); (2) ugpernermik suliaĸarneĸ (Eprîarit 11:6); (3) avdlamik isumatârneĸ (Matîuse 4:17); (4) avdlamut sângniarneĸ (apustilit suliáinik agdlagkat 3:19); (5) túniutdluínarneĸ (Lúkarse 9:23); tauvalo (6) kuisíneĸ (Matîuse 28:19). sulíssutigissagssat tamákua sulíssutigineĸarêrneráne aitsât Gûtip inuk 144.000-inut, tássa ’savarpánguanut’, ilaussortángortitdlugo, ĸinigkane ingmíkut iliûseĸarfigilersarpâ. suna sujunertaralugo? inuk táuna anersãkut ĸitornarsiariumavdlugo, Kristus Jesus peĸatigalugo palasíngornigssânik kúngíngornigssânigdlo neriûtigssíkumavdlugo. (sarĸúmersitat 20:4, 6) anersãkut ĸitornaussut sule ûmassut sivnerútuínángorput, tássáuputdlo ássersûtinik ilangîssugssaussut. tamána píssutigalugo Jehovap nalunaiaissuisa ilarparujugssue ilangîssartûnatik issigingnârtũput.

pôrske ãma erĸainiaivdlune nagdliútorsiorneĸ

6. erĸarsaut suna túngavigalugo isumaĸartoĸarpa ’savat avdlat’ ássersûtinik ilangîssugssaugaluartut, kisiáne tamatuma aperĸut suna aperĸutíngortípâ?

⁶ sujúnersûtigineĸarpoĸ ’savat avdlat’ amerdliartuínartut  ássersûtinik ilangîssásassut. una píssutiginiarpât: ’inatsisit ajúngitsûtit nagdliútugssat tarráinãnik peĸarmata,’ inatsisinilo Israelíkut ãmátaoĸ nunane avdlamiut Israelíkut nunãne najugaĸavigsut kipineĸartut pôrskisiortarnigssât inássutigineĸarmat, tamána pâsissariaĸarpoĸ savanut ássersûtaussut katerssat mardlûssut tamarmik, „pârssissoĸ atauseĸ“ pârssissigalugo ’savautine atautsine’ ítut, erĸainiaivdlune nagdliútorsiorníkut ássersûtinik ilangîssugssaugaluartut. (Eprîarit 10:1; Juánase 10:16; 4 Môrsase 9:14) tamatuma aperĸut pingârutilik aperĸutíngortípâ: pôrske erĸainiaivdlune nagdliútorsiornigssamut sujumut ássersûtauva?

7. sût tungâtigut pôrske „ajúngitsûtit nagdliútugssat tarráinãnik“ peĸarpa?

⁷ Ægyptenime pôrskisiornermut túngássuteĸartut ilait aulajangersimassut ĸularnángitsumik Jesusime piviussúngorsimangmata ilumôrpoĸ. Paulusip Jesus savârĸamut pôrskisiutigssaussumut ássersũpâ, oĸarame: ’uvagut savâraĸ pôrskisiutigssarput toĸutauvoĸ, tamássa Kristus.’ (1 Korintumiut 5:7) savârĸap pôrskisiutaussup auata ilâta Israelíkut igdluisa matserfînut serpartarneĸarnerata angajugdliliat tássanimiut aniguisíneĸarumârnigssât ĸulákêrpâ. tamatumúnga ássingussumik, Kristusip auanit serpartarneĸarnermíkut „[angajugdlersat] ilagît ĸilangme agdlagsimassut“ aniguisíneĸarput, imalũnît ’utertíneĸarput’. (Eprîarit 12:23, 24; Evfisumiut 1:3, 7) ãmátaoĸ, savârĸap pôrskisiutip saorne navdlorneĸásángitdlat, tamánátaoĸ Kristus Jesusime erĸûtíneĸarpoĸ. (2 Môrsase 12:46; Tussiaat 34:21; Juánase 19:36) taimáitumik ilumôrpoĸ oĸásavdlune pôrske ilâtigut ilaussoĸ inatsisinut túngássuteĸartunut „ajúngitsûtit nagdliútugssat tarráinãnik“ peĸartunut. inatsisinut túngássuteĸartut tamákua tamarmik Kristus Jesus, „Gûtip savârâ“, uparuartorpât. — Juánase 1:29.

8-10. (a) aup tungâtigut pingârtúkut súkut pôrske erĸainiaivdlune nagdliútorsiornermit avdlauva? (b) angerutsit erĸainiaivdlune nagdliútorsiornermut atassut ĸanoĸ takutípât sule atautsimik avdláussuteĸartoĸ? (c) tamáko erĸarsautigalugit tauva isuma suna inersínauvarput?

 ⁸ kisiánile, pôrske Nâlagkap únúkorsiortitsineranut tamatigordluínaĸ sujumut ássersûtáungilaĸ. suna pivdlugo taimáingila? pôrske Ægyptenime pilersíneĸarmat, savârĸap sujatap neĸâ nerineĸarpoĸ, kisiánile savârĸap pôrskisiutip auata iláinâlũnît nerineĸángilaĸ. tamatumángale avdlauvdluínartumik, toĸunine erĸainiardlugo nagdliútorsiortarnigssaĸ pilersíkamiuk, Jesusip taimane najũtut ersserĸigdluínartumik perĸuvai ’timine nererĸuvdlugo’ ’aunilo imerĸuvdlugo’, timiussaĸ vĩnilo táukunúnga ássersûtaungmata. (2 Môrsase 12:7, 8; Matîuse 26:27, 28) tamatuma tungâtigut pingârtorujugssûssúkut — aup tungâtigut — pôrske Nâlagkap únúkorsiortitsineranut sujumut ássersûtáungilaĸ.

⁹ ãma una arajutsísángilarput: Jesusip ajoĸersugkaminut angerutsit mardluk ingmingnut atássuteĸartut — „angerusisâĸ“ ãma ’nâlagauvfik pivdlugo angeruseĸ’ — navsuiarpai. (Lúkarse 22:20, 28-30, NW) angerutsit táuko mardluk tamarmik ilangîssut Kristus Jesus peĸatigalugo palasíngortugssauneránut kúngíngortugssauneránutdlo túngáput. kisiánile nunane avdlamiut Israelíkut nunãne najugaĸavigsut kipineĸartut Israelíkúne palasíngortugssaunatigdlo kúngíngortugssáungitdlat. tamatuma tungâtigútaoĸ Israelíkúne pôrskimik nagdliússivik Nâlagkavdlo únúkorsiortitsinera ássigĩngíssuteĸarput.

¹⁰ tauva erĸarsautit tamáko túngavigalugit, isuma suna inersínauvarput? nunane avdlamiut Israelíkut nunãne najugaĸavigsut kipineĸartutdlo nauk timiussamik sêrnarsauteĸángitsumik, naussunik ĸasilitsunik savârĸavdlo pôrskisiutaussup neĸânik nerigaluartut, tamána píssutigssáungilaĸ uvdlumíkut Nâlagkap ’savautaisa avdlat’ erĸainiaivdlune nagdliútorsiornermut najũtut timiussamik vĩnimigdlo ilangînigssãnut.

erĸainiaivdlune nagdliútorsiornermut najũtariaĸarneĸ

11. pingârtut sût píssutigalugit ’savat avdlat’ erĸainiaivdlune nagdliútorsiornermut najũtariaĸarpat?

¹¹ tamánale ima pâsissariaĸarpa katerssanut ’savanut avdlanut’ ilaussut erĸainiaivdlune nagdliútorsiornermut najũnigssât pissariaĸángitsoĸ? nâggardluínaĸ! uvdlorme tássane Jesusip maligtaisa savatut píssusigdlit tamarmik Jesus ingmíkut ítumik erĸaissariaĸarpât. erĸainiaivdlutik nagdliútorsiorângamik ’savat avdlat’ erĸaimassarpât Kristusip auanik kuissamik ugperingningnertik iluaĸutigerêrsimagigtik, mãna Jehovap issigingmatik uvane agdlagsimassutut: „atissatigdlo takisût savârĸap auanik errorpait ĸaĸorsardlugitdlo.“ tamána píssutigalugo ’Gûtip nâlagfiutâne ivdlernartumik kivfartũssisínáuput uvdlúkutdlo únuákutdlo’. (sarĸúmersitat 7:14, 15) ãmátaoĸ erĸaimasínauvât ’Jehova ujartuáinartariaĸarigtik, iluarnigssardlo ilalârnigssardlo ilungersûtigiuáinartariaĸaritik’, ’Jehovap kamangnerata uvdluane’ aniguisíneĸarumârnigssartik neriugalugo, tauvalo inugtut nãmagdluínartúngoriartuârnigssartik tipaitsûtigísavdlugo. naggatâtigut Jehovamit piviussumik iluartûtitaujumârput, tamánalo piumârpoĸ Jesusip nâlagauvfik atâtaminut pisiterêrpago. — Sivfânia 2:2, 3; 1 Korintumiut 15:24; sarĸúmersitat 20:5.

12. erĸainiaivdlune nagdliútorsiornermut atatitdlugo oĸalugiaut tusarnârdlugo ĸanoĸ iluaĸutigineĸarsínauva?

¹² najũnigssamut pingârtumik píssutauvortaoĸ erĸainiaivdlune nagdliútorsiornermut atatitdlugo oĸalugiautigineĸartartut ilagingmatigik ’Gûtip itíssusê’, ’nerissagssat imerpalassũngitsut inersimassunut pissariaĸartut’, „ajoĸersûtaussut autdlarĸautait“ ímugtut ítut  ilagĩnarnagit. (1 Korintumiut 2:10; Eprîarit 5:13-imît 6:1 ilángutdlugo) bîbile túngavigalugo oĸalugiautip ikiúsavâtigut pingârtínerorĸuvdlugo asangningneĸ Jehovap nivtagâ nuáningârtumik ârĸigssũssigame nâlagauvfiup pilersíneĸarnigssâ ârĸigssoramiuk inuiagssuit pivdluarĸussaunigssãnut. ãmátaoĸ periarfigssauvdluarpoĸ ’ugpernivtínik akúnermiliútoĸ pingârneĸ inerititsissordlo, Jesus, ârdlorfigiuáinásavdlugo’. uvagut pivdluta asangningneĸ Jesusip nivtagâ nâgdliungneritdlo atugai taimáitugssáinartut issigíngisáinásavavut. (Eprîarit 12:2, 3, NW) tamatuma saniatigut tamavta isumaĸatigĩssutigisínauvarput erĸarsautit erdlingnartut ilarpagssue — atausiússuseĸarneĸ, asangningneĸ Jehovavdlo arĸata nâlangnarsisitaunigssâ  pivdlugit erĸarsautit — erĸainiaivdlune nagdliútorsiortarnigssamik pilersitsinermigut Jesusip apustiliminut navsuiagai ’savat avdlat’ ãmátaoĸ ’savarpánguit’ peĸatigisínáusagait.

tamanik asangnigtumik soĸutigingningneĸ

13. suna pivdlugo ássersûtit najũtunut tamanut savssaigdliutigineĸarnigssât pingârpa?

¹³ Nâlagkap únúkorsiortitsineranut najũtut tamarmik erĸaisíneĸartariaĸarput periautsimik Jesusip pilersitânik. timiussap vĩnivdlo najũtunut tamanut savssaigdliutigineĸarnerat ivdlernartunik únungme tássane oĸalugiautigineĸarĸámersunik pingârtitsinivtínut sujuarsautaoĸatauvoĸ. tássûnákútaoĸ najũtut tamarmik ingmíkut periarfigssíneĸarput sarĸumissumik takutísavdlugo sume inûnigssamik neriugissaĸarnertik — ĸilangme inûnigssamik imalũnît nuname inûnigssamik. * ilagît periauseĸ erĸortoĸ periauseriguníko únungme tássane nunarssuarme tamarme nãmagsineĸartutigut ilagît avdlat tamaisa peĸatigísavait. — 1 Korintumiut 14:40.

14. erĸainiaivdlune nagdliútorsiornerup únuane tanitaussut ilât náparsimagpat, utorĸaunertat ĸanoĸ ilivdlutik asangnigtumik soĸutigingningnertik erssersísínauvât?

¹⁴ oĸarta ilagîngnut ilaussortaussut ilât tanitaussoĸ náparsimassoĸ erĸainiaivdlunilo nagdliútorsiornermut najũsínáungitsoĸ. tauva? sapíngisaĸ tamákerdlugo utorĸaunertat ilâta kristumioĸ náparsimassoĸ táuna takusartariaĸarpâ ássersûtit nagsardlugit, ãma, ajornángigpat, ássersûtit savssaigdliutigíngitsiardlugit utorĸaunertaĸ nalerĸútunik oĸauseĸarsínauvoĸ naggatâtigutdlo tugdluartumik ĸinuvdlune. náparsimassup ila kajumigsíssusigssâ! ĸatángutinik soĸutigingningneĸ erssersitdlugo taima asangnigtigissumik suliat ilagîngne asangningnerup anersâvanut sujuarsautaussarput. — Tussiaat 133:1.

15. Nâlagkap únúkorsiortitsinera avdlatigut ĸanoĸ ilivdluta atarĸisínaugigput navsuiaruk.

¹⁵ erĸainiaivdlune nagdliútorsiornerme ĸanoĸ ilioriautsit ássersûtitdlo ĸanoĸ ítut atortugssaussut aperĸutigineĸartarput. aperĸutit tamákua akíssutigssait ĸúpernerme 13-me „Nâlagkap únúkorsiortitsinera ĸanoĸ ilivdlugo atarĸisínauvarput“ ĸuleĸutaralugo atuagagssáuput. utorĸaunertat akissugssaussut ĸanoĸ ilioriausigssat tássane navsuiarneĸartut perĸigsârtumik maligtariaĸarpait.

ingminut misiligtariaĸartoĸ

16, 17. (a) erĸainiaivdlune nagdliútorsiornermut najũnigssaĸ erĸarsautigalugo, inuit ilaisa suna aperĸutigât, aperĸutdlo tamána kíkut kisimik akisínauvât? (b) inuk Gûtip anersâvanit ĸitornarsiarineĸarsimanersoĸ Gûtip ĸanoĸ ilivdlune nakimaitdlinartumik nalunaiautigâ?

¹⁶ inoĸarpoĸ erdloĸissunik nalorníssutigigamíko ássersûtinik ilangîssugssaunerdlutik. Nâlagkap únúkorsiortitsinerata ĸanigdliartornerane sapâtit akúnerine ardlalingne aperĸut tamána aperĸutigineĸarnerussarpoĸ. Jehovap nalunaiaissuinut ilánguterĸámersut tamatumúnga ássingussunik aperĸuteĸartarput. ivdlit nalorníssut tamána erĸarsautigissarpiuk? suna erĸortumik iliûsigssaussoĸ ĸanoĸ aulajangersínauviuk?

¹⁷ Nâlagkap únúkorsiortitsinera pivdlugo Paulus imáitumik sujúnersûteĸarpoĸ: „inuk ingminut misilerêrdlune ingminut akuererĸârdle, taimaitdlunilo timiussamit nerigile ermutsimitdlo imerile.“ (1 Korintumiut 11:28, 29, NW) malugaiuk Paulus oĸartoĸ inuk nangmineĸ ’ingminut misilerêrdlune ingminut akuerísassoĸ’? sôruname erĸarsautigissagssaĸ taima ilungersornartigingmat, ajúsángilaĸ kristumioĸat inersimavdluartoĸ tamatumínga oĸaloĸatigísavdlugo, kisiánile ivdlit kisivit aulajangertariaĸarpat Jehovamut erneranutdlo ĸanoĸ ítumik píssuseĸarnerit. 144.000-inut ilaussut ardláinâtdlũnît Gûtip ĸulartísángilâ. imatut ĸularungnaersíneĸarpugut: „anersâp táussuma anersârput nalunaiaeĸatigâ Gûtip ĸitornarigâtigut.“ Gûtip anersâva Kristusip timânut ilaussunik tamarmik ingmíkut ũmataisigut ĸularungnailersitsissûvoĸ Gûtip anersãkut ĸitornarigâtik. ĸinigaussup tamána ilisimavâ, ilagîngnĩtutdlo avdlat ĸínuvigissariaĸángilai  tangeĸarterĸuvdlune. — Rûmamiut 8:15, 16.

18. ’savat avdlat’ pivdlugit ĸanga pisimassuviussut sût uvagut soĸutiginartípavut?

¹⁸ ukiune nutaunerussune Jehovap nalunaiaissuisa oĸalugtuagssartáinit pâsineĸarsínauvoĸ 1931-mîtdle ’savat avdlat’ nâlagauvfingmik tusardliússákut angnerussumik soĸutigineĸaleriartortut. tauva majip 31-áne 1935-me oĸalugiaut „amerdlangârtut“ * oĸalugiautigineĸarmat, pâsitíneĸarpoĸ „amerdlangârtut“ apustile Johannesip Gûtip anersâvata súnîneratigut takussai tássaussut ’savat avdlat’. táukua angnerussumik soĸutigineĸalernerata suna nalunarungnaersípâ? nalunarungnaersíneĸarpoĸ ’savarpánguit’ katerssorneĸarnerat nâlersoĸ, pivfigssángorsimassordlo Jesusip, ’inugsiap ilumôrdlunilo silatûp’ nákutigdlîssûneratigut, ’savanik avdlanik’ katerssuilernigssânut. — Matîuse 24:45-47, NW.

19. ilagîngnut ilánguterĸámersut tanitaussunut ilaussûnerartut nangmingnêrdlutik ingmingnut ĸanoĸ misiligtariaĸarnigssât sujúnersûtigissariaĸarpa?

¹⁹ tamatuma sujulianĩtut erĸarsautigalugit, Jehovap ínugtainut ilánguterĸámersut tamaisa katerssanutdlo tanitaussunut ímaĸa ilaussûnerartut tamaisa oĸarfigerusugpavut: Jehovamut píssutsit perĸigsârtumik misigssorniaruk. ingminut apereriarit: ĸilangme inûnigssamik neriugissaĸ pigineraravko píssutigisínaunerpara sujornatigut ilagîngnut nalingínaussunut ilaussortaugatdlarama ilagîngnut ilaussortat tamarmik ĸilaliarumârnigssãnik ilagît táukua ajoĸersûtãnik ugperingnigsimanera? ĸilangme inûnigssamik neriugissara nangminigssarsiortumik pilerigissaĸarnermik píssuteĸarsínaunerpa, imalũnît misigíssutsivnit tigutínerpunga? Paulus oĸarpoĸ: ’Gûte sagdlusuitsûvoĸ.’ (Eprîarit 6:18) ãma anersâĸ ivdlernartoĸ anersãkut ĸitornáussusigssamik pigingnilersitsissartoĸ sagdlusuitsûvoĸ. taimáitumik kinalũnît Gûtip anersâvatigut ilumut ĸitornarsiarineĸartoĸ ĸularnermit nâgdliugtitáusángilaĸ, kisiánile ilerasûteĸarane Gûtip ĸitornaisa ilagigãne nalunaiautigisínáusavâ.

1986-ime nagdliútorsiornigssaĸ

20. erĸainiaivdlune nagdliútorsiorneĸ Jehovap nalunaiaissuinut ĸanoĸ pingâruteĸartigâ?

²⁰ ĸularutigssáungivigsumik Nâlagkap únúkorsiortitsinera ukiumôrtumik nagdliútorsiorneruvoĸ kristumiut ilumôrtut tamarmik nagdliútorsiornernit avdlanit pingârnerutitdlugo pingârnerpâjutitât. avdlamik nagdliútoĸángilaĸ pingãssusiatigut, sujunertâtigut periausiatigutdlũnît naligissânik. tauva nunarssûp kâvivfingmigut kâvínera maligdlugo seĸineĸ nunarssuarme tamarme nunane tamane tarríkângat, Jehovap nalunaiaissuine ilagît tamarmik angisût mikissutdlo ássigîgdlutik, igdloĸarfingnilo nunaĸarfingnilo ilagêĸarfiúngitsune atautsimôrtut tamarmik, nâpeĸatigĩsáput Nâlagkap inássutâ maligdlugo.

21. Gûtip ínugtaisa 1986-ime erĸainiaivdlune nagdliútorsiornigssaĸ ĸanoĸ isumaĸarfigísavât, ĸanordlo ilivdlugo pigssarsivfiginigssâ ilimagisínauvât?

²¹ taimáitumik ajoĸersugkat savatut píssusigdlit tamarmik tipaitsûtigingârpât ĸilanârisínaugamíko erĸainiaivdlutik nagdliútorsioĸatigêrĸingnigssartik. ukioĸ mána nagdliútorsiornigssaĸ Jehovap kivfaisa tamarmik ineriartornigssãnut kajumigsârneĸarnigssãnutdlo pile. isumavdluautigilíssuk maligagssiortumik, Jesus Kristusip, isumavdluarneranut ássingussumik, táuna oĸarmat: „tugpatdleritsile, silarssuarmut ajugaugama.“ — Juánase 16:33. (wD 15/2 85)

[Quppernerup ataani ilanngussaq]

erĸaimaviuk —

□ suna pivdlugo pôrske erĸainiaivdlune nagdliútorsiornermut sujumut ássersûtáungitsoĸ?

□ Jesusip pigdliutâ iluaĸutigísaguniuk inûp sulíssutigissagssat arfiniliussut sût sulíssutigerĸârtariaĸarai?

□ suna pivdlugo erĸainiaivdlune nagdliútorsiornermut ivdlit najũnigssat taima pissariaĸartigissoĸ?

[Atuaqqissaarnermi apeqqutit]

[Qupp. 13-mi ungalusaq]

Nâlagkap únúkorsiortitsinera ĸanoĸ ilivdlugo atarĸisínauvarput

ássersûtit atortariaĸartut

timiussaĸ sêrnarsauteĸángitsoĸ: timiussat, sôrdlo jûtit matzosiliait, ĸajûssat imerdlo kisîsa sananeĸautigalugit, atorneĸarsínáuput. matzos avdlanik, sôrdlo taratsunik, sioraussanik, ímiagssanik, máningnik uvanitsunigdlũnît akulik, atorneĸásángilaĸ. timiussaĸ sêrnarsauteĸángitsoĸ ivdlit nangmineĸ sanasínauvat imailiordlutit: tîtorfik atauseĸ agfardlo ĸajûssat (pineĸarsínáungigpata ĸaĸorterĸassut imalũnît karrit ilait avdlat ĸajûssaussut atorneĸarsínáuput) tîtorfingmut atautsimut imermik akúkit naĸítardlugitdlo, naĸítagaĸ kinerpatdlârtínago. tauva naĸítagaĸ sãtúnguángordlugo tasitsaruk. kâgiliorfingmut sãtumut iliuk ajagssáumigdlo tamatigut tôrtardlugo. timiussagssaĸ igfiorfingme kíssangâtsiartume, 200-nik kíssássuseĸartume, ũneĸásaoĸ panernigssâta sikagtúngornigssâtalo tungânut.

vĩne: vĩnigssap tunguanit ĸápiorsimassumit vĩniliaĸ akoĸángitsoĸ augpalârtoĸ atorneĸásaoĸ, sôrdlo Chianti, Bourgogne imalũnît Bordeaux. vĩnit nerivdlune kingulerĸiutinut atorneĸarnerussartut aulakôrnartumik avdlanigdlũnît akussaussut, sôrdlo sherry, portvin imalũnît muskatel, atorneĸásángitdlat. vĩnit akûtigssaniĸ naussunigdlũnît akussat, sôrdlo Dubonnet vĩnitdlo tumánguersautit avdlat atorneĸásángitdlat. vĩne augpalârtoĸ igdlume suliausimassoĸ atorneĸarsínauvoĸ tungusungnitsulersugáungíkune akûtigssalersugáungíkune aulakôrnartulersugáungíkunilo.

rigssalime piarêrsarnerit

nerrivik ássersûtit ilineĸarfigssât: nerrivik ipîtsumik ĸalilerneĸásaoĸ, najũtutdlo tamarmik saĸíssutdluarneĸarnigssãnut pûgútanik imertarfingnigdlo nãmagtunik nerriviliorsimásaoĸ. atautsimĩnerup autdlartíngínerane timiussaĸ avgorneĸarsínauvoĸ vĩnilo imertarfingnut kuineĸarsínauvdlune. tamatuma tungâtigut Jesus periausigssamik maligtarissagssiúngilaĸ perĸigsârtumik malingneĸartugssamik. pissariaĸarpat ássersûtit ĸalermik ipîtsumik ĸagdlerneĸarsínáuput sugdlinernut igdlersornigssãnut.

ĸatángutit angutit ássersûtinik savssaissut: atautsimĩnerup sujornatigut ĸatángutit periausigssamik navsuiáuneĸásáput, ássersûtinik najũtunut tamanut, oĸalugiartumut ĸatángutinutdlo savssaissunut ássersûtinik savssainermut atatitdlugo kinguartôrneĸarĸunago pâtsivêrúneĸarĸunagulo.

agssuarnartuliortailiuissut: agssuarnartuliortailiuissut nãmagtunik amerdlássusigdlit atautsimĩnerup sujuningâvatigut aggersimassariaĸarput, aggersut tamarmik tikitdluarĸuneĸarnigssãnut inigssisíneĸarnigssãnutdlo.

naussunik pínersaineĸ: atautsimĩtarfik naussunik pínersarneĸarsínauvoĸ, kisiáne pilimángitsumik kussanardluartumigdlo.

atautsimĩneĸ nangmineĸ

nagdliútorsiornerup nalunaerĸutaĸ ĸavsinut autdlartínigssâ: oĸalugiarneĸ seĸineĸ sule tarríngitsoĸ autdlartísínauvoĸ, ássersûtitdle seĸineĸ tarrerêrpat aitsât savssaigdliutigineĸásáput. ilagît tamarmik ingmíkut pâsiniartariaĸarpât najugkame tássane martsip 24-áne seĸernup ĸavsinut tarrínigssâ.

oĸalugiarneĸ erĸainiaivdlune nagdliútorsiornermut túngassoĸ: oĸalugiartup oĸalugiautigssane perĸigsârtumik piarêrsartariaĸarpâ, pivfigssarititaĸ ĸângernago oĸalugiautigssane nãmagsisínaorĸuvdlugo. oĸalugiaut ersserĸigsumik pâsiuminartumigdlo oĸalugiautigineĸásaoĸ, najũtut tamarmik kajumilersíneĸarnigssãnut.

[Qupp. 11-mi assiliartaq]

Jehovamik erneranigdlo asangningnivta erĸainiaivdlune nagdliútorsiorneĸ agdlíssutigissarpâ