Silarsuaq nutaaq qanillivoq!

SILARSUARMI ajornartorsiutit qanoq ililluni anigorneqarnissaannik siunnersuutinik amigaateqanngilaq. Amerlanertigut soqutiginninneq suleqatigiinnerlu siunnersuutigineqartarput — silarsuarmi inuiaat tamarmik ataatsimut annertoorujussuarmik qanoq iliuuseqarnissaat. Ilaat isumaqarput ajornartorsiutit annertunerujartortillugit, inuiaqatigiit aniguiumallutik allatut pilersaarusiortariaqassasut, silarsuarlu nutaaq, allanngujuitsoq pilersinniarlugu suleqatigiittariaqassasut. Siulittuipput aningaasat sakkutooqarnermut atortussat annertuumik millisinneqarumaartut, taarsiullugulu aningaasat amerlanerusut mingutsitsinermik aarlerinartorsiortitsinerup ajugaaffiginiarnissaanut atorneqassasut. Soorlu State of the World 1990-imi allassimasoq, „naalagaaffiit imminnut illersorniarlutik aaqqissuussinitik annertoqisut atorunnaarlugit FN-ip siulersugaanik eqqissisimatitsiniartunik sakkutooqarneq annertusisaq, nunanik ilaasortaasunik tamanik eqqissiviilliortinniarneqartunik illersuinissamut pissaaneqarlunilu piginnaaneqartoq, isumalluarfigilerumaarpaat“.

Pilersaarutilli taama ittut pissutsit atuagassiami matumani qupperneq 3-mi allaatigineqartut atuutilersissinnaanngilluinnarpaat. Ajorti piumatunerlu, imaluunniit paqummisunneq naggueqatigiikkuutaallu akerleriinneri, peersissinnaanngilaat. Inuit allat namminissarsiornatik asaqatigiilersissinnaanngilaat. Imaluunniit nappaatit toqulu peersinnaanngilaat. Pinerluttuliorneq ajugaaffigisinnaannginnamikku, atamanna upperisarsiornikkut assortuunnerit uumissuinerullu peernissaat saperaat. Ajunaarnersuillu pinngortitap immini pilersitaasa pitsaalinissaannik eqqarsaat piviusorsiortuunngilaq. Inuiaassutsimik pingaartitsivallaarneq suli atuuppoq ajornartorsiuterpassuit nassataralugit. Taamaattumik ajoraluartumik paasinarsivoq inuit aaqqiissutissamik atorsinnaasumik saqqummiussisinnaasimanngitsut.

Aaqqiissutissaqarporli! Guuti, ’sallusuitsoq’, neriorsuisimavoq pissutsit erinigeqisavut pilersikumaarlugit. (Títuse 1:2) Qanoq iliortariaqarnissaq nalunngilluinnarpaa siunertamilu naammassinissaannut pisariaqartumik ilisimassuseqarpoq, pissaaneqarlunilu piginnaassuseqarlunilu. — sarĸúmersitat 7:12; 19:1.

Guuti neriorsuivoq: „Guutiitsoq erniinnaq peeruttussaavoq, inaani takuniaraluarukku peerutereersimassaaq. Kisianni qanilaartut nuna kingornutissavaat, pilluangaarlutillu inuussapput.“ — Tussiaat 37:10, 11.

Tamanna qanoq ililluni naammassineqarumaarpa? Jesaja 11:9-mi akineqarpoq: „Ajortumik iliortoqarnanilu ajoqusiisoqassanngilaq qaqqanni illernartumi, [Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“ Aap, inuiaat tamarmik ajoqersorneqarumaarput ’Jehovamik ilisarsitinneqarlutik’. Maleruukkumanngitsorli allanik eqqissiviilliortitsiniartoq kinaluunniit inuutitaanavianngilaq. Nunarsuarput alianaatsoq aserorterneqarunnaassaaq.

„Nunarsuarmi tamarmi sorsunnerit soraarsikkumaarpai,“ Tussiaat 46:9, 10-mi neriorsuineqarpoq. (Aamma takuuk Mika 4:3, 4) Silarsuarmi tamarmi eqqissinissamut tamatumunnga pissutissaq pingaartoq tassaavoq inuiaassutsimik akunnequtit tamarmik peerneqarnissaat. Suleqatigiinneq qulakkeerneqassaaq silarsuaq tamarmi ataasiinnarmit naalakkersugaassammat, tassa Guutip naalagaaffianit. Naalagaaffillu tamanna ’qaqugumulluunniit atassaaq’. (Daniel 2:44) Aammattaaq naalagaaffimmi tassani kunngi Jesus Kristus makissimasoq toqusuitsoq, iluartumik naapertuilluartumillu naalagaasaaq. — Jesaja 9:6, 7; 32:1.

 Tamakkuli tamarmik naammalluinnanngissutsimit inuit inunnguutsimit pigisaannit aserorneqassanngillat, naalliunnermillu, nappaatinit, aliasunnermit toqumillu takussunarsitaassanatik? Aap, tamakkuttaaq tamarmik qaangerneqartussaapput. sarĸúmersitat 21:4-mi neriorsoqqissaarneqarpugut: ’Qulliillu tamaasa isaannit aallarterumaarpai, toqulu peqarunnaassaaq, aliasuttoqarunnaarlunilu nilliasoqarunnaarlunilu anniartoqarunnaassaaq, siulliit peermata.’ Jesusip utertitsisutissatut pilliutaa tunngavigalugu ajorti kingornussaasoq isumakkeerfigineqassaaq, inuillu naammalluinnassutsimut utertinneqassallutik. (Rûmamiut 6:23; Evfisumiut 1:7) Pinngortitallu pissaaneri uagutsinnik ajoquseeqqunagit Pinngortitsisuannit namminermit kia pitsaanerusumik nakkutigisinnaanerpai? Tussiaat 148:5-8; Jesaja 30:30.

Uagut inuit neriugiinnarsinnaasavut sinnattoriinnarsinnaasavullu, Guutip pilersissavai. Qaquguli? Bibelimi siulittuutit takutippaat inuiaqatigiit ’kamattunngorpata’ inuillu ’nunamik aseruippata’ tamanna pissasoq. (sarĸúmersitat 11:18) Silarsuup pisoqqap matuma ulluini kingullerni ’ajornartunik nalliuttoqassaaq’ — tamannalu maanna eqquuttoq takusinnaavarput. (2 Timûtiuse 3:1-5, 13) Jesusip siulittuutigisimavaa kinguaariit tamakkuninnga misigisaqartut aammattaaq Guutip neriorsuutaasa eqquunnissaa najuuffigiumaaraat. — Matîuse 24:3-14, 32-34.

Bibelimi neriorsuutit tamakku misissornissaannut piffissaqarniarit. Taava silarsuaq nutaaq qanillisoq paasilissavat! (wD 1/10 90)