Siunissaq isumalluarfigisinnaasaq

„Takorluukkat peeraangata inuit isumaminnik ingerlasaraat,“ qangali Bibelimik allattoq taama allappoq. (ússatit 29:18, nutsigaq pisoqaq) Takorluukkanik, siunissamut neriuummik qaamasumik, inuit pisariaqartitsipput. Taamaanngippat ileqqorluttunngussapput paatsiveerullutillu. Siunissarli isumalluarfigisinnaavarput?

Siorna Amerikamiut oqaluttualiornermik unnammisitsineranni qulequtaavoq „Amerikap siunissaanut piareersimaneq“. Naalagaaffimmi Virginiami niviarsiaraq 16-inik ukiulik Jehovamut nalunaajaasoq ajugaavoq. Kingornagut tassani sakkutuujusimasut peqatigiiffiata ataatsimiinneranut qaaqqusaavoq, tusarnaartunullu hundredet missaanniittunut oqaluttualiani atuffassissutigaa. Aammattaaq oqaluttualiaq tamaani aviisimi „Saltville News-Messenger“-imi 1988-imi decemberip ulluisa 15-ianni ilanngunneqarpoq. Niviarsiaqqap inuusuttup oqaluttualiaa atuaruk takullugulu sooq siunissaq qaamasoq upperineraa.

„Paratiisimiillutit takorlooruk. Narsami torsusuunik qorsooqqissunillu ivigalimmi ipputit. Illuatunginni kuuk alutornangaartumik qaqqap sinaatigut kuuppoq. Orpik kusanaqisoq tunguusanik tipigeqisunik naasoqaqisunik avalequtilik niaqquvit qulaaniippoq. Ungasiartumi tuttualuit ivigartorput. Nannup qasertap ornippaatit meqqunilu torsusuut ilinnut tagiartortillugit. Paratiisip timmiai qalipaatigeqisut qiimasumik qarlorput. Siunissaq taamaattoq neriugissallugu nuannerunaq, ilaa?

Takorluukkamili uani amigaateqanngila? Kuunni igalaamernit aseqqukui qerlertuusallu takussunartitsisut? Peqanngimmata eqqaanngilakka. Kiinnallu atomi atorlugu sorsunneqalernissaanut aarlerisoq eqqaanngilara, taamatut aarlerinartoqanngimmat. Eqqaanngilaralu qaammatit marluk qaangiuppata AIDS-imik toqussasutit, toqussannginnavimmi. Takorluugaq sorleq piviusumut naleqqunnersoq malugiuk. Nalunanngilaq. Amerikamiulli siunissaat qanoq issava?

Ukiut 40-t ingerlaneranni, 1945-miit 1985-imut, USA atomip nukinga atorlugu qaartartunik 60.000-inik sanaartorpoq, inuiaqatigiinnut dollarinik 82 milliardinik [koruunit 600 milliardit missaannik] akeqartunik. Tassa ukiumut atomip nukinga atorlugu qaartartuliat 1500-t sinnerlugit, imaluunniit ullormut sisamat. Oqaaseq ’mingutsitsineq’ nassuiartariaqanngilaq. Eqqatsinni nunallu aggornerisa tulliini takussaavoq. Ungasinngitsumi kooqarpoq nunap aggornerinik arlalinnik aqqusaarisumik, uninngaannartuuvoq kemiimillu atukkanik mingutsitaanermik tipittuulluni. Naak-uku nunat isorartuut attorneqanngitsut nunasisut siulliit qimerloorsinnaasimasaat? Ukioq 2000-imi nunap inuisa amerliartuinnartut 3/4-iisa illoqarfinni najugaqarnissaat naatsorsuutigineqarpoq.

Ileqqussatiguttaaq ajortunngorluinnarsimavoq. New Yorkimiinnaq ukiut qulikkuutaat ingerlaneranni nalinginnaq kinguaassiuutitigut  atoqateqartarnerup kinguneranik 250.000-t 400.000-tillu akornanniittut AIDS-imik tunillatsissimapput. Tamanna ukiumut dollarinik 50.000-inik [koruuninik 360.000-t sinnerlugit] tunillatsinnikumut aningaasartutaasarpoq. Inuunerlunneq pissutaalluni USA-mi meeqqat inuusuttullu 12 millionit kinguaassiuutitigut atoqateqartarput. Taamaattumik tupinnanngilaq Amerika nunani siuarsimasuni inuusuttuaqqat 13-init 19-inut ukiullit naartusartut procentinngorlugit annerpaaffigisaattut tusaamasaammat. Peqquserlunneqarportaaq. Piffissamik tillittartut, tassa sulisut sulisitsisuminnit piffissamik tillittut, USA-mut ukiumut dollarinik 170 milliardinik [koruuninik 1,2 billioninik] annaasaqaataasarput.

Tamatta ajornartorsiutit tamakku nalunngilavut tamattalu tamakkunannga eqqorneqartarpugut. Isumatsannarsinnaanera miserratissaanngilaq, ilaannili taalliaq imaattoq tusarsimavara: ’Angutit marluk parnaarussivimmi itsuannisaarput, aappaata maralluk isigaa, aappaata ullorissat.’ Ajornartorsiutit aaqqinniarlugit ullorissat isigisariaqarpavut, isumalluartuusariaqarpugut. Ukiuni tusintilikkuutaani inuit naalakkersuisunik pilersitsisarput tamarmik assigiinngitsunik pitsaalluinnartoqaratillu ataavarsinnaanngitsunik. Ilaanni pruffiiti oqarsimavoq: ’Angutip aalajangigassarinngilaa qanoq ingerlanissani alloriartarnissanilu.’ Kunngi silatooq oqarsimavoq inuit inoqatiminnut ajoqutaasumik naalagaaffiginnittartut. Siunissaq ilisimaniarlugu ullorissat isigisariaqarpavut, erfalasumiittuunngitsut ulloriarsiortulluunniit siunissamut siulittuutigissutigisinnaaneragaat. Suli ungasinnerusumut isigisariaqarpugut, pilerfimmut qutsinnerusumut, tassa Pinngortitsisumut.

Pinngortitsisup Tussiaat 46:10-mi neriorsorpaatigut sorsunnerit soraarsikkumaarlugit. sarĸúmersitat kapitali 11, versi 18-imi, neriorsoqqissaarpaatigut nunamik aseruisut aserussallugit. Daniel 2:44-llu eqquunnissaa isumalluarfigisinnaavarput, tassani eqqartorneqarpoq naalagaaffik imaluunniit naalakkersuisut ittuinnartussat. Naalakkersuisut taakkua naammalluinnartuusut, aallaqqaammut takorluukkatsitut nunarsuaq paratiisinngortissavaat.

Bibeli atuaqqissaaraangatsigu Jehova Guutip sumik siunissaqartinneraatigut ilinniartarparput. Tamannalu præsidenti Reaganip ilisimavaa, aalajangersagarmi 1983-imi atsiugaa Kongresip immikkoortuisa marluullutik akueraat, aalajangersagaq nalunaartoq 1983 naalagaaffiit ’Bibelip ukiorissagaat’. Aalajangersakkami miserratigineqanngilaq nuna tamakkerlugu Bibelip ajoqersuutaanik atuaqqissaarnissamik maleruaanissamillu pisariaqartitsineqartoq. Reagan aperivoq: ’Oqariartuut nallerneqarsinnaanngitsoq, Guutip oqaasia, Bibeli, ilinniarniarlugu maleruarniarlugulu aalajangerutta, ukiut ingerlaneranni inuit ajornartorsiutigisartagaasa aaqqiissutissaat nassaarissagaluarpavut.’

Paratiisi takorlooqqeriaruk. Siunissaq tamanna upperaara, siunissaq inuit peqqusersuinnermik asanninnermillu ilumoortumik killinneqarlutik inuuffigisaat. Amerikap ajornartorsiutai Amerikap kisimiunngitsoq ajornartorsiutigai. Nunarsuaq tamakkerlugu ajornartorsiutaapput. Avisini atuarsinnaavavut Tom Brokawsilluunniit TV-mi nutaarsiassai malinnaaffigalugit. Ajornartorsiutit aaqqissinnaavavut aatsaat Pinngortitsisoq isumalluarfigigutsigu. Nunarsuup paratiisiunissaa aallaqqaammut siunertaraa. Edenip naatsiivia eqqaamaviuk, Adamimut Evamullu inissiffigisaa? Siunertarisaminik naammassinninnissaa uanga upperaara. Tatiginissaa ilinniaannartariaqarparput. Taamaattumik Bibelip siunissaq qanoq oqaatigineraa misissortigu — isumalluarfigalugulu.“ (gD 22/10 89)