Jehova naalagaraarput!
Jehova naalagaraarput!
„Guuti Naalakkatsitut inunnit naalattariaqarneruarput.“ — apustilit suliáinik agdlagkat 5:29, NV.
1, 2. Inuit Guutip piumasaa akerleralugu piumasaqaraangata, apustilit assigalugit Jehovap nalunaajaasui qanoq isummertarpat?
JEHOVA GUUTIP angutit 12-t eqqartuussisut qullersaannut sassartitaanerat akuerisimavaa. Tamanna ukiumi 33-mi u.n.a.k. pisimavoq, eqqartuussivik tassaavoq juutit eqqartuussissoqatigiivi Sanhedrinimik taaneqartut, unnerluutigisallu tassaallutik Jesusip apustilii. Tusarnaariarit. ’Ilungersorluta inerteraluarpassi atikkut tamatumuuna ajoqersueqqunasi,’ palasiuneq oqarpoq, ’tassalu Jerusalem ajoqersuutissinnik tamakkerparsi.’ Peter apustilillu allat ima akipput: ’Guuti inunnit naalattariaqarneruvoq.’ (apustilit suliait 5:27-29) Allatut oqaatigalugu, oqarput: ’Jehova Naalagaraarput!’
2 Aap, Jesusimit ajoqersukkat ilumoortut Jehova Naalakkamittut isigaat. Atuakkami Bibelimeersumi apustilit suliáinik agdlagkat-ni ukiumi 61 missaani Romami ’Lukasip nakorsaasup asanartup’ allassimasaani tamanna erseqqissarneqarpoq. (Kulorsamiut 4:14) Ullumikkut Jehovap innuttaasa, apustilitut, inunnit Guutip piumasaata akerlianik piumaffigineqaraangamik Naalagartik qilammiusoq naalattarpaat. Suulli allat apustilit suliáinik agdlagkat-nit ilinniutigisinnaavavut? (Nammineq piareersarninni allassimaffiit ersarissumik naqinnillit atuarnissaat siunnersuutigaarput.)
Jesusip ajoqersukkani oqaluussinissaannut piginnaaneqartippai
3. ’Anersaamik illernartumik kuineqareerlutik’ Jesusip ajoqersugaasa suliassaat pingaarnerpaaq sunaava?
3 Apustilit Guutimut aalajaatsumik isumaqarsinnaapput anersaakkut nakussatsinneqaramik. Kristus nappakkami naalliutsitaaffimmi toqusimavoq, makitinneqarsimasorli nalunngilaat. (1:1-5) Jesus ’uumalluni taakkununnga saqqummersarpoq’, ullut 40-t ingerlanerini timeqalerluni takutittarami Naalagaaffimmillu sallusuissummik ajoqersorlugit. Ajoqersukkani peqquai Jerusalemimiiginnaqqullugit ’anersaamik illernartumik’ kuineqarnissaasa tungaanut. Tamatuma kingorna oqaluussisarneq tassaalissaaq suliassaasa pingaarnersaat, soorluttaaq ullumikkut Jehovap nalunaajaasuinut taamaattoq. — Lúkarse 24:27, 49; Juánase 20:19–21:24.
4. Jesusip ajoqersugai anersaamik illernartumik kuineqareerpata suna pisussaasimava?
4 Apustilit anersaamik illernartumik kuineqanngikkallaramik eqqunngitsumik isumaqarsipput, tassa naalakkersueriaatsip nunamiusup Romamiut naalagaassusiat soraarsissagaa, Jesusimi aperigamikku: ’Naalagaq, taamaalisukkut naalagaaffik Israelikkunnut kingumut iluarsissaviuk?’ (1:6-8) Jesusip akuerinngilai, oqarluni taakkununnga ’nalunaariaqanngilaq qaquguluunniit qanoq ilisukkulluunniit pissasoq’. ’Anersaap illernartup taakkununnga piumaartup pissaanera pigilerumaarpaat’ Guutip naalagaaffia qilammiusoq — nunamiunngitsoq — nalunaajaassutigisinnaaqqullugu. Jerusalemimi, Judæami Samariamilu, ’nunallu isuanut allaat’ oqaluussissapput. Ulluni kingullerni makkunanni anersaaq ikiortigalugu Jehovap nalunaajaasui nunarsuaq tamakkerlugu assingusumik oqaluussisarput.
5. Jesus qilaliarnermisut tikiukkumaartoq qanoq paasisariaqarpa?
5 Nunarsuarmi tamarmi oqaluussisarnissamik peqqussuteqarnermi kingorna Jesus qilalialerpoq. Siullermik pavunnartitaavoq, ajoqersukkaminit ungasilliartorluni, taavalu Naalakkami qilammiusup eqqaanut pisinneqarluni tassani anersaajusut akornanni sulissalluni. (1:9-11) Nuiap Jesus apustilit isaannut ersikkunnaarsimmagu, inuttut timini iperaarpaa. Inngilit marluk takkupput oqarlutillu ’taamaalluni tikiukkumaartoq’. Tamannalumi ilumoorpoq. Soorluttaaq Jesusip ajoqersugaasa kisimik qilaliarnera takusimagaat, taamaattaaq Jesus takusaanani tikiuteqqissimasoq Jehovap nalunaajaasuisa kisimik ’takuaat’ imaluunniit akueraat.
Apustilimik nutaamik toqqaaneq
6. Judas Iskariotip kingoraartaa qanoq ililluni toqqarneqarpa?
6 Tamatuma kinguninnguatigut apustilit Jerusalemimeeqqipput. (1:12-16) Inimi qullermi (immaqa Markusip anaanaani, Mariami) apustilit aqqanillit aalajaatsut Jesusillu qatanngutai, anaanaa Maria, ajoqersukkallu allat katersuupput qasusuillutillu qinusarlutik. (Mákorse 6:3; Jâko 1:1) Kina Judasip ’paarsisuussutaanik’ tunineqarpa? (Tussiaat 109:8) Ajoqersukkat 120-t missaanni najuupput Guutip Judasip, Jesusimut pisitsisup, kingoraartaa toqqaramiuk apustilit aqqaneq-marlunngoqqissinnaaqqullugit. Toqqagassaq Jesusip kiffartuussinerani ajoqersugaasimasariaqarpoq taassumalu makissimaneranut takunnilluni. Toqqakkap soorunami aamma Jehova Naalakkamisut akuerisariaqarpaa. Qinoreerlutik Mattias Josef Barsabbasilu immeraatigaat. Immeraat aqqutigalugu Guutip Mattias eqqorpaa.
7. (a) Sooq oqartoqarsinnaava Judasip ’nunaat iluaatsumik akissarsiaminik pisiarigaa’? (b) Judas qanoq toqua?
7 Judas Iskariotip Jehova Naalakkamisut akuerinngilluinnarsimavaa; aningaasammi siilvit 30-t pillugit Guutip ernera pisippaa. Judasip aningaasat palasiunermut utertissimavai, Peterili oqarpoq pisitsisup ’nunaat iluaatsumik akissarsiaminik pisiarigaa’. Tamanna qanoq paasisariaqarpa? Aap, Judasip aningaasat pissarsiarai taannalu pissutigalugu Nunaammik Aattalimmik taaneqartoq pisiarineqarsimavoq. Tassaasorineqarpoq Hinnomip Ernerata Qooruata saqqaani nunaat manissoq. Judasip paasileramiuk Naalakkaminut qilammiusumut attaveqarnini aserorsimasoq, imminik nivinngarluni qimippoq. (Matîuse 27:3-10) Immaqa allunaasaq kittorarpoq, avalequlluunniit napivoq, allaatigineqarmammi ’nakkarami qaarpoq erlaviilu tamarmik anipput’ qaarsut inngigissut nakkarfigigamigit. Qanortoq tamatta qatanngutaasuusaartunngornaveerisa!
Anersaamik illernartumik ilumioqangaarput!
8. Qanga Jesusip ajoqersugai anersaamik illernartumik kuineqarpat, sunalu tamatuma kinguneraa?
8 Anersaamik illernartumik kuineqarneq neriorsuutigineqartoq qanga piva? Ukiumi 33-mi, piinsip ulluani, ullut qulit Jesusip qilaliarnerata kingornagut. (2:1-4) Kuineqarneq tamanna killinnangaartumik misigisaavoq! Pisimasoq takorlooriaruk. Inimi qullermi ajoqersukkat 120-t missaat katersuupput ’tassaangaannarlu ittuppaluk qilammit pivoq soorlu anorersuaq pitorartoq illullu taakkua najugaata ilua tamakkerpaa’. Anorlinngilaq, taama nipeqaannarpoq. ’Oqqat nuungajuttuut innerinnaasullusooq’ ajoqersukkat apustilillu tamaasa tuffigaat. ’Tamarmik anersaamik illernartumik ilumioqangaalerput, oqaatsinillu allanertanik oqalulerput.’ Taama kuineqaramik aamma anersaakkut Guutimit kinguaassiarineqarput, tanitaallutik kingornussaminnillu uppernarsaatitut naqissuserneqarlutik. — Juánase 3:3, 5; 2 Korintumiut 1:21, 22; 1 Juánase 2:20.
9. Ajoqersukkat anersaamik illernartumik ilumioqangaaleramik suut oqaluussissutigaat?
9 Pisimasup tamatuma juutit inuillu juutit upperisaannut ilanngussimasut ’inuiaqatigiinnit tamanit qilaap ataanittunit’ Jerusalemimiittut killippai. (2:5-13) Tupigusullutik aperipput: ’Qanormi taava tamatta immikkut oqaatsivut inunngorfitsinni oqaaserineqartut atoraat tusarpavut?’ Tassaasimasinnaapput oqaatsit Mediami (Judæap kangianiittumi), Frygiami (Asiaaqqami) Romamiluunniit oqaaserineqartut. Ajoqersukkat oqaatsit assigiinngitsut atorlugit ’Guutip malunnangaartuliai’ oqaluussissutigimmatigik, inuppassuit tupigusoqaat, allalli mitaatilliipput putumanerarlugillu.
Peter killinnartumik nalunaajaavoq
10. Ukiumi 33-mi ullormi piinsimi siulittuut suna eqquuppa, ullutsinnilu tamanna qanoq ililluni eqquutsitinneqarpa?
10 Peter nalunaajaalluni aallartippoq oqarluni ullaakkut nalunaaqqutaq qulingiluanut putumasoqareersinnaanngitsoq. (2:14-21) Aap, Guutip innuttami anersaamik illernartumik kuineqarnissaannik neriorsuutaa pisimasumi tamatumani eqquuppoq. Guutip Peter isumassarsitippaa oqaatsit ’ullussani kingullerni’ aamma ’siulittuissapput’ ilannguteqqullugit, tassuuna nalerput siumut tikkuarneqarluni. (Joel 3:1-5) Jehovap ullussani angisooq sioqqullugu qilammi tupinnartuliat nunamilu nalunaaqqutit nalliutsitikkumaarpai, taassumalu aqqanik torlorfiginnittut kisimik annattussaassallutik. Ullutsinni tanitat anersaamik illernartumik kuineqarsimagamik, taamatuttaaq aallussilluarlutik piginnaassuseqarluarlutillu ’siulittuissinnaapput’.
11. Juutit Jesus qanoq iliorfigaat, Guutilu tamatuma kingorna qanoq iliorpa?
11 Taava Peterip Messias kinaanersoq nassuiarpaa. (2:22-28) Guutip uppernarsarsimavaa Jesus Messiasiusoq killinnartuliorsinnaanermik, tupinnartuliorsinnaanermik nalunaaqqutiliorsinnaanermillu piginnaanileramiuk. (Eprîarit 2:3, 4) Juutilli ’assatsigut iluaatsutigut nappakkamut naalliutsitaaffimmut paaguppaat’ tassa romamiutigut, Guutip inatsisaanik malinninngitsutigut. Jesus angutinut taakkununnga ’tunniussaavoq Guutip siunnersuutaa atoqqusaq siumullu ilisimanninnera naapertorlugu’. Guutilli Jesus makitippaa inuttullu timaa asiutinneqaqqunagu peersimallugu. — Tussiaat 16:8-11.
12. Davidip suna siulittuutigisimavaa, sunalu annannissamut aalajangiisuua?
12 Peterip oqaasiini tulliuttuni Messias pillugu siulittuutit ersarissisinneqaqqipput. (2:29-36) Takutippaa Davidip siulittuutigisimagaa kinguaassami pingaarnersaat, Messias, Jesus, makikkumaartoq. Qilammi Guutip talerpiata tungaani qutsissisitaaffimminit Jesusip anersaaq illernartoq Ataataminit pisani kuivaa. (Tussiaat 110:1) Peterip tusarnaartaasa anersaap sunniuteqarnera takullugulu tusarpaat, oqqat nuungajuttuut innerinnaasut ajoqersukkat niaqquisa qulaanniittut takugamikkik takornartallu oqaasii atorlugit oqaluttut tusaramikkik. Peterip aamma eqqartorpaa Jesus Naalakkatut Messiasitullu akuerineraanni annannissamut aalajangiisuusoq. — Rûmamiut 10:9; Filípimiut 2:9-11.
Jehova amerliartortitsivoq
13. (a) Eqqortumik kuisinniarlutik juutit juutillu upperisaannut ilanngussimasut suna akuerisariaqarpaat? (b) Qassit kuisippat, tamannalu Jerusalemimi qanoq sunniuteqarpa?
13 Peterip oqaasii sunniuteqaqaat. (2:37-42) Tusarnaartai uummatimikkut killinneqarput Messiasip toqutaanissaanut akuersisimagamik. Taamaattumik ima kajumissaarpai: ’Allamik isumataaritsi, nungullusilu kueqqugitsi Jesusip Kristusip aqqagut ajortit isumakkeerneqaatissaannik; taava anersaap illernartup tunissutaa pigilerumaarparsi.’ Juutiugamik imaluunniit juutit upperisaannut ilanngussimagamik Jehova Guutimittut akuerereerpaat nalunagulu taassuma anersaava pisariaqartikkitsik. Maannali allamik isumataartariaqarput Jesusilu Messiasitut ilassillugu Ataatap, Ernerup anersaallu illernartup aqqanut kuineqarsinnaaqqullutik, tassa taakkua inissisimanerat imaluunniit sunniutaat akueralugu. (Matîuse 28:19, 20) Juutit juutillu upperisaannut ilanngussimasut taakku oqaluussiffigamigit Peterip matuersaatit assersuutaasut Jesusip tunniussimasaasa siulliat atorpaa, juutit uppertut naalagaaffik qilammiusoq pillugu ilisimasaqalersinnaaqqullugit isersinnaaleqqullugillu. (Matîuse 16:19) Ulloq taanna 3000-t kuisipput! Takorlooriaruk Jehovamut nalunaajaasut amerlasuut taakku Jerusalemimi angivallaanngitsumi oqaluussisut!
14. Sooq qanorlu ilillutik uppertunngortut ’suut tamaasa pigeqatigiippaat’?
14 Ungasissumit tikerarsimasut ilaat amerlasuut sivisuunerusumik Jerusalemimiiginnaarnissaminnut aningaasaateqanngikkaluarput, kisianni upperisartaartik ilisimanerulerusuppaat allallu oqaluussiffigerusullugit. Taammaattumik ajoqersukkat asannillutik ikioqatigiipput, soorluttaaq Jehovap nalunaajaasui ullumikkut iliortartut. (2:43-47) Utaqqiisaagallartumik ’suut tamaasa pigeqatigiippaat’. Ilaasa nunaatitik pequtitillu akigisarpaat, tamatumanngalu isertitat pisariaqartitsisunut tamanut agguaanneqartarput. Taamaalillutik ilagiit aallartilluarput, ’Jehovami annattunik ullut tamaasa ilagiinnut ilanngussisarpoq’.
Ajorunnaarsitsineq tamatumalu kinguneri
15. Peterip Johannesillu naalaffik iserfigimmassuk sumik pisoqarpa, inuillu qanoq qisuariarpat?
15 Jehovap ’nalunaaqqutiliornernik’ Jesusip ajoqersugai tapersersorpai. (3:1-10) Peter Johannesilu ualikkut nalunaaqqutaq pingasut missaanni unnukkut pilliuteqartarfimmut atatillugu qinusarfiup nalaani naalaffimmut majuarmata, Matup Pinnersup eqqaani angut inunnguutsiminit niuluttoq nalavoq tunissummillu qinulluni. ’Siilvimik kuultimilluunniit peqanngilanga,’ Peter oqarpoq, ’pigisannilli tunissavakkit: Jesusip Kristusip Nazaretimiup aqqani nikuigit pisullutillu!’ Erniinnarluinnarlu angut ajorunnaarsitaavoq! Naalaffillu iserfigalugu ’angalallunilu pissittarlunilu Guutilu unnersiutigalugu’, inuillu ’tupigutsangaarput’. Ilaasa immaqa Esajasip oqaasii eqqaavaat: „Tusiattoq tuttutut pissigarumaarpoq.“ — Jesaja 35:6.
16. Suna nukigalugu apustilit angut niuluttoq ajorunnaarsissinnaavaat?
16 Qilaaginnalimmi Salomonip piani, aqqutissiami qallikkami sukarsualimmi naalaffiup kangianiittumi, inuppassuit tupigusuttut katersuupput. Tamaani Peter nalunaajaavoq. (3:11-18) Nassuiarpaa Guutip pissaaneragut taassuma kiffaa naalannarsisitaasoq Jesus, aqqutigalugu apustilit angut niuluttoq ajorunnaarsissimagaat. (Jesaja 52:13–53:12) Juutit ’illernartoq iluartorlu’ miserratigisimavaat, Jehovalli makitissimavaa. Inuit taakkualu pisortaasa nalugaluarlugu Messias toquppaat, Guutilli tamatumuuna ’tanitani anniassasumik’ siulittuut eqquutsippaa. — Daniel 9:26.
17. (a) Juutit qanoq iliortariaqarpat? (b) Ullutsinni Messiasip aallartinneqarnerata kingorna suna pisimava?
17 Peterip juutit tikkuuppai taama Messiasimik iliorfiginnissimanertik pissutigalugu sumik iliuuseqartariaqartut. (3:19-26) ’Allamik isumataartariaqarput’, ajortuliatilluunniit peqqissimissutigalugit, ’allamullu saanniarlutik. Jesus Messiasitut upperfigigunikku utertitsissullu ilassillugu, ajortuliaminnik isumakkeerfigineqassapput Jehovamillu inuummarissisinneqassallutik. (Rûmamiut 5:6-11) Juutit eqqaasinneqarput Guutip siuaassaminnut angerusianut qitornaallutik, Abraham ima oqarfigisimammagu: ’Illit kinguaassakkut nunarsuarmi inuiaqatigiit tamarmik pilluaqqunarsissapput.’ Taamaattumik Guutip kiffani Messiasiusoq aallarteqqaarpaa juutit peqqissimisut aniguisinniarlugit. Messiasip aallartinneqarnerata kingorna — tassa 1914-imi naalagaaffimmi qilammiusumi pissaaneqartitaalernerata kingorna — soqutiginartumik Jehovap Nalunaajaasuisa akornanni ilumoorsutsit teokratiilu tunngavigalugu aqqissuussaaneq atuutilerseqqinneqarsimavoq. — 1 Mosesimik allakkat 12:3; 18:18; 22:18.
Uniinnarumanngillat!
18. ’Ujaraq’ suna ’illuliortut’ juutiusut asiginnarpaat, kimilu kisimi annaffissaqarpa?
18 Peterip Johannesillu Jesusip makissimaneranik oqaluussinerat kamaatigalugu, palasit, naalaffiullu paarsisaasa naalagaata saddukæerillu parnaarunneqartippaat. (4:1-12) Saddukæerit makinnissaq upperinngilaat, allalli amerlasuut uppertunngorput. Angutit kisiisa amerlassusaat 5000-t missaanniipput. Peter Jerusalemimi eqqartuussisut qullersaannit killisiorneqarami, oqarpoq angut niuluttoq ’Jesus Kristusip Nazaretimiup’, taakkua nappakkamut paagussimasaata Guutilli makititaata aqqagut ajorunnaarsinneqartoq. Ujaraq ’illuliortut’ juutiusut asiginnagaat, ’teqeqqussanngorluni ujaraalerpoq’. (Tussiaat 118:22) ’Allamik annaffissaqanngilaq,’ Peter oqarpoq.
19. Apustilit oqaluussiunnaaqquneqaramik qanoq akissuteqarpat?
19 Taama oqalunnera unitsinniaraluarpaat. (4:13-22) Angulli ajorunnaarsimasoq akornanni angalammat, ’nalunaaqqutiliamik nalunaatsumik’ tamatuminnga miserratiginninneq ajornaqaaq. Taamaattorli Peter Johannesilu inerterneqarput ’Jesusip aqqa immannguarluunniit oqaluussissutigeqqunagu ajoqersuutigeqqunagulu’. Qanoq akippat? ’Takusavut tusakkavullu oqaatiginnginneq saperpavut.’ Jehova Naalakkamittut naalappaat!
Qinnutit akineqartut
20. Ajoqersukkat sumik qinnuteqarpat, sunalu kinguneraa?
20 Soorlu Jehovap nalunaajaasui ataatsimiinnerminni qinusartut, taamattaaq ajoqersukkat qinupput apustilit iperagaasut pisimasunik oqaluttuarmata. (4:23-31) Oqaluttuarineqarpoq siulersuisut Herodes Antipasip Pontius Pilatusillu, romamiut juutiunngitsut Israelikkullu ilagalugit, katersuuttut peqatigiillutillu Messias akerartorlugu. (Tussiaat 2:1, 2; Lúkarse 23:1-12) Qinnut akillugu Jehovap ajoqersukkat anersaamik illernartumik ilumioqangaalersippai Guutip oqaasia siooranatik oqaluutigeqqullugu. Naalakkaminnut malersugaaneq soraarseqqullugu qinnutiginngilaat, qinnutigaalli malersugaagaluarlutik siooranatik oqaluussisinnaanissartik.
21. Barnabas kinaava, sunillu ajunngitsunik pissuseqarpa?
21 Uppertunngortut suli suut tamaasa pigeqatigiippaat, ajorsartoqanngilarlu. (4:32-37) Tapiissuteqartut ilaat tassaavoq Levikkuusoq Josef Cypernimiu. Apustilit Barnabasimik, tassa ’Tuppallersaanerup ernera’-nik, ateruserpaat, qularnanngitsumik ikiuiumatuullunilu naakkittartuummat. Tamatta taama pissuseqarusuppugut. — apustilit suliait 11:22-24.
Salluttuut qulaarneqarput
22, 23. Ananias Safiralu qanoq ilillutik ajortuliorpat, taakkualu pisimanerat qanoq ilinniutigisinnaavarput?
22 Ananiasilli nuliatalu, Safirap, Jehova Naalakkamittut akueriunnaarpaat. (5:1-11) Nunaat pigisartik tunivaat aningaasallu ilaat namminneq pillugit, sinnerilu ilanngarneqarsimanngitsutut apustilinut aggiullugit. Guutip anersaava ikiortigalugu Peter immikkut ilisimasaqalerpoq, ilumoortuusaarnerallu paasisinnaallugu, taamaattumillu inuunertik annaavaat. Satanimit tarraqqutsinissamut usserneqartoqarpat tamanna mianersoqqussutaavoq sakkortooq! — Ussatit 3:32; 6:16-19.
23 Tamatuma kingorna ajoqersukkanut ilanngukkumasunik ajortunik pissuteqartunik sapiisersoqanngilaq. Allalli uppertunngorput. (5:12-16) Napparsimasullu anersaanillu minguttuunit naalliutsitaasut Guutip pissaanera upperigaangamikku ’taakku tamarmik ajorunnaarsitaasarput’.
Guuti inunnit naalannerujuk
24, 25. Siulersuisut juutiusut sooq apustilit malersorpaat, apustilillu tassuuna Jehovap kiffai tamaasa sumik maligassaqartippaat?
24 Uppertunngortut tupinnartumik amerliartornerat akimmisinniarlugu palasiunerup saddukæerillu maanna apustilit tamaasa parnaaruppaat. (5:17-25) Unnuarli tamanna Guutip inngiliata aniguisippai. Ullaarorlutillu naalaffimmi ajoqersuipput! Malersugaanerup Jehovap kiffai unitsissinnaanngilai.
25 Apustilit Killisiuisoqatigiinnut pisinneqaramik tatineqarput. (5:26-42) Oqaluussiunnaaqquneqarput, akippulli: „Guuti naalakkatsittut inunnit naalattariaqarneruarput.“ (NV) Tamatumuuna Jesusip ajoqersugaanut maligassiaq tunngavilerneqarpoq, maligassiaq Jehovap nalunaajaasuisa ullumikkuttaaq malittarisaat. Inatsisinik ajoqersuisumit Gamalielimit mianersoqquneqareerlutik siulersuisut apustilit iperartortiinnarpaat, inerterlugit oqaluusseqqunagit taavalu iperarlugit.
26. Apustilit oqaluusseriaasiat Jehovallu nalunaajaasuisa ullumikkut oqaluusseriaasiat sutigut assigiissuteqarpat?
26 Apustilit nuannaarutigaat Jesusip aqqa pillugu mitaatigineqaqqusaagamik. „Ullullu tamaasa, naalaffimmi illumillu illumut angalaarlutik, soraarnatik ajoqersuiuaannarput Messiasimillu, Jesusimik, tusagassaq nuannersoq oqaluussissutigalugu.“ (NV) Aap, illumiit illumut oqaluussisarput. Ullumikkuttaaq Guutip nalunaajaasui taamaaliortarput. Taakkuttaaq anersaamik illernartumik tunineqarput, naalakkamikku oqarlutik: „Jehova Naalagaraarput!“ (wD 1/6 90)
Qanoq akissavit?
□ Jesusip ajoqersugai sukkulluunniit sumik suliassaqartarsimappat?
□ Ukiumi 33-mi ullormi piinsimi sumik pisoqarpa?
□ Qanga qanorlu ililluni Peterip matuersaatit assersuutaasut Jesusip tunniussaasa siulliat atorsimavaa?
□ Ananias Safiralu pillugit oqaluttuaq qanoq ilinniarfigisinnaavarput?
□ Apustilit oqaluussiunnaaqquneqaramik Jehovap nalunaajaasui tamaasa sumik maligassiuuppaat?
[Atuaqqissaarnermi apeqqutit]