Oqaluutsit tusaamasaanerpaartaat

Jesusip inuunera ajoqersuineralu

MANNA tassaavoq Bibelip oqaluttuarisaanerani pisimasut puiunaannerpaat ilaat: Jesus qaqqap sivingarnani issiavoq kingorna tusaamasaalersumik oqaluussilluni. Galilæap Tasersuata eqqaaniippoq, qularnanngitsumik Kapernaumimit ungasinngitsumi. Jesus unnuaq naallugu Guutimut qinusimavoq, kingornalu ajoqersukkami ilaat aqqarneq-marluk apustilisut toqqarlugit. Taavalu tamaasa ilagalugit qaqqap ilaanut maanga atersimavoq.

Maanna Jesus qasussagunaqaaq, sininniarlunilu innassangatinnaraluarpoq. Inuppassuilli aggiasimapput, ilaat allaat Judæamit Jerusalemimillu, 100 kilometerisut ungasitsigisumit. Allat sinerissamit Tyrusip eqqaanit Zidonillu avannaaniittumit tikerarsimapput. Jesus tusarnaarniarlugu nappaatiminnillu ajorunnaarsitaajumallutik aggersimapput. Allaat inuit anersaapilunnit  (Satanip inngilipiluinit) naalliutsitaasut tikissimapput.

Jesus atermat, napparsimasut taassumunnga qerlertoruutilerput attorniarlugu, tamaasalu ajorunnaarsippai. Taamaalioreerami Jesus qaqqamut majuarterneruvoq. Ingippoq, inuppasuillu qaqqap toqqinnerusortaani siunerminiittut ajoqersulerlugit. Takualli! Maanna inuppassuit akornanni sualuttumik nappaateqartoqanngivippoq!

Ajoqersuisoq taama tupinnartuliorsinnaatigisoq qanoq oqaaseqassanersoq inuit pissanngatigaat. Ajoqersukkamili qaninnerpaallutik katersuussimannguatsiartut iluaqutissaat eqqarsaatiginerullugu oqaluussivoq. Uaguttaarli oqaluusaa iluaqutigisinnaaniassagatsigu Mattæusip Lukasillu tamarmik allassimavaat.

Mattæusip iivangkiiliuani Jesusip qaqqami oqaluusaa Lukasip iivangkiiliuaniittumit sisamariaammik tanneruvoq. Mattæusip iivangkiiliuani eqqartorneqartut ilaat, Lukasip piffissami allami Jesusimit oqaatigineqartutut eqqartorpai, tamanna takuneqarsinnaavoq Mattæus 6:9-13 Lukas 11:1-4-mut naleqqiukkaanni, taavalu Mattæus 6:25-34 Lukas 12:22-31-mut naleqqiukkaanni. Tamannali tupaallaatigisariaqanngilarput. Qularnanngitsumik Jesusip ajoqersuutit aalajangersimasut ataasiaannarani ajoqersuutigisarsimavai, ajoqersuutillu aalajangersimasup allatigut ajoqersuutigineqarneri Lukasip eqqaasarpai.

Jesusip qaqqami oqaluusaanik naleqangaalersitsisoq tassaannaanngilaq imarisaata anersaakkut itissusia, aammattaarli ajoqersuutit ilumoortut erseqqissumik paasiuminartumillu saqqummiunneqarnerat. Ulluinnarni misigisartakkat pissutsillu inuit ilisimalluagaat atorlugit, Jesusip eqqarsaatini Guutip maleruagassareqqusai naapertorlugit ajunnginnerusumik inoorusuttunut tamanut paasiuminarsartarpai. Lukas 6:12-20; Mattæus 5:1, 2. (wD 15/9 86)

◆ Jesus tusaamasaanerpaamik oqaluussigami sumiippa? Kikkut najuuppat, tamatumalu siuninnguani sumik pisoqarsimava?

◆ Oqaluutsimini eqqartugaasa ilaat Lukasip allagaani pisuni allani eqqartorneqartarmata sooq tupaallannanngila?

◆ Jesusip oqaluusaa sooq taama naleqartigaa?