Ilimagisaannit kingusinneruvoq!

UKIOQ tassaavoq 609 u.n.a.s. Sumiiffik tassaavoq Jerusalem. Oqaluttoq tassaavoq Jeremias. Pruffiitip taassuma illoqarfiup illernartup asasami, Jerusalemip, aserornissaa siulittuutigaa. Pissutaasoq: Juutit Jehova tunummassuk guutipilussiorlutillu. Qattunerni pilliiffissani juutit kinguaassiutitigut atoqatigiinnermik aallussineq kangunarsaataasoq peqataaffigisarpaat, Guutimik nalusut guutiliaannut viinnimik pilliillutik seqinerlu, qaammat ullorissallu pallorfigalugit, Ba’al pillugu tipigissaatilliisarlutik meeqqatillu Molekimut pilliutigalugit. — 1 Kunnginik allakkat 14:23, 24; Jeremia 6:15; 7:31; 8:2; 32:29, 34, 35; Hesekiel 8:7-17.

Taakkua isaanni Jeremias tassaavoq ajunaarnissamik siulittuisoq, ingasaassisoq, pikitsitsinermik aallarniisoq sunik tamanik naammagittaalliortoq. Ukiuni 38-ni Jeremiasip mianersoqqusarsimavai, ukiunilu 38-ni taakkunani tamani Jerusalemimiut mitaatigisarsimavaat. Taamani tamanna tikillugu inuit Jehova itigartippaat oqarlutik pissaanera naatsorsuutigineqartariaqanngitsoq. Oqarput: „Pilluarnartumik perluutaasumilluunniit [Jehova] iliornavianngilaq!“ aamma, „[Jehovap] isiginngilaatigut nuna qimakkamiuk.“ — Sefanja 1:12; Hesekiel 9:9.

Pruffiitit Jeremiasip Ezekielillu Jerusalemip aserornissaa oqaluussissutigisimavaat, pisoqarsimanngilarli. Taamaattumik Israelikkut takorluuinerit tamakkua naliminni eqquunissaat ilimaginngilaat, oqarlutilli: „Qangarsuarli takorluuisaraluarputit sulilu ataatsimilluunniit eqquuttoqanngilaq.“ Jehovalli akissutaa imaappoq: „Ullussaq takorluukkat tamarmik eqquuffissaat qanillivoq . . . Uanga [Jehova] oqalussaanga, oqaatigisassakkalu eqquutissapput piumaataarunneqaratik. Ilissi eqqarleriit naalasseriitsut inuutillusi siulittuutiga eqquutitissavara.“ — Hesekiel 12:22-25.

Ukiumi 609-mi u.n.a.s. Jehovap oqaasiisa eqquutitsinissaanut piffissanngorpoq. Jeremiasip ukiuni 40-ngajanni mianersoqqusisareersimammat, illoqarfik Jerusalem Babylonimiut sakkortorpassuinit unguneqarpoq. Qaammatit 18-it tamatuma kingorna qarmarsui qartorarneqarput, naalaffik ikuallanneqarpoq illoqarfimmiullu amerlanersaat tigusarineqarlutik Babylonimut aallarunneqarput. Soorlu siulittuutigineqartoq panamit, kaannersuarmit nappaatinillu toqorarnartunit illoqarfik aserorneqarpoq. — 2 Kunnginik allakkat 25:7-17; 2 Israelikkut kinguaariit oqaluttuarisaanerat 36:17-20; Jeremia 32:36; 52:12-20.

Jeremias ilumoorpoq. Inuit kukkupput. Ilimagisaannit kingusinneruvoq! Siunissaq ungasittoq siulittuutigineqanngilaq. Taakkua nalaat siulittuutigineqarpoq.

Tamanna oqaluttuarisaanermut tunngassuteqaannanngilaq. Jerusalemimik  pisimasoq siulittuutaasutut pingaaruteqarpoq. Piumaartussamut assersuutaavoq. Ullumikkut kristumiuuneraqatigiit Kristusip aqqa atorlugu Guutimik angerfigeqatiginnissimanerarput, taamaattorli qangarsuaq Jerusalemimiut malillugit inuullutik. Kristumiuuneraqatigiit ilagiissaasa amerlanersaasa Guutimik nalusut ajoqersuutaat siuarsarpaat, kinguaassiuutitigut kangunartuliornikkut imminnik mingutsillutik, politikkikkut aaqqissuussinerit illersorlugit, silamiut sorsunneri tapersersorlugit, pinngoriartorsimanermik eqqarsaat pigiliullugu Guutilu Pinngortitsisuusutut itigartillugu, ilumiullu millionilippassuit ilorrisimaarnerunissaq pissutigalugu naartuersinikkut peerneqartarnerat akuerisarlugu, inuit eqqarsaatersuutaat ilassillugit Bibelili ajattorlugu oqaluttuliaaannartut oqaluttuatoqqaannartullu isigalugu.

Soorlu Jerusalemimiut Jeremias mitaatigisimagaat, kristumiuuneraqatigiit ullumikkut Jehovap nalunaajaasui mitaatigisarpaat. Jehovap nalunaajaasuisa Harmagedonimi aserugaanissaq pillugu mianersoqqussutaat itigartillugu asuli oqalunnertut isigineqaannartarpoq. ’Guutip nunarsuaq soqutiginngilaa,’ oqartarput. ’Qilak isumagiliuk, taava uagut nunarsuaq isumagissavarput. Harmagedon nalliussagaluarpat inuutilluta nalliunnavianngilaq. Tamakku tamaasa tusareernikuuavut. Salloqittarneqarsinnaanngilagut!’

Pisimasut uteqqissappat? Inuit millionilikkuutaat kingumut paaseqqissavaat ilimagisaminnit kingusinnerusoq? (wD 1/4 91)