Ilimagisannit kingusinnerua?

ULLUT pingasut toqunissani sioqqullugu Jesusip Jerusalemimi ulloq ulapaarfiusoq misigaa, ulloq kristumiunut ullumikkut inuusunut pingaaruteqaqisoq. Naalaffimmi ajoqersuivoq juutillu pisortaasa nakutitseriaataasunik apeqqutigisaat akerlilerlugit oqaatsinik napitinniarmanni. Naggataatigut allakkanik ilisimasut farisiiarillu sualuttumik avoqqaarai takutillugulu ilumoortuusaartuusut pulateriaarsuullutillu toqunartullit Gehennamut pisussat. — Matîuse kapitali 22 23-lu.

Naalaffiup eqqaa qimakkiartoramiuk ajoqersugaasa ilaata oqarfigaa: ’Ajoqersuisoq, ata ujaqqat illorsualiaassusialu!’ Jesus tupigusutsinneqarnani akivoq: ’Illorsualiaassusia tamanna isigaajuk? Ujaqqat qaleriissuerullugit ingutserneqassapput.’ (Mákorse 13:1, 2) Taava Jesusip kingullerpaamik naalaffik qimappaa, Kedronip Qooruanut aterluni, akianilu Uuliap Qaqqaa majuarfigalugu.

Qaqqami ualikkut seqinnersumi issiammat qooqqup akiani naalaffik Morijap Qaqqaaniittoq isikkivigalugu, Peterip, Jakobip, Johannesip Andreasillu allanik najorteqanngisillutik ornippaat. Naalaffiup uppitinneqarnissaanik oqaasii puigorsinnaanagit aperipput: „Oqarfigitigut: Qaqugu tamakku taamaalissappat, sunalu najuunnissannut pissutsillu aaqqissuussaanerata naggatissaanut nalunaaqqutaassava?“ (Matîuse 24:3, [NV]; Mákorse 13:3, 4) Ualeq tamanna Uuliap Qaqqaani akissutaa ullumikkut uatsinnut pingaaruteqartorujussuuvoq. Tamanna eqqarsaatigalugu ’pissutsit aaqqissuussaanerata naggatissaanik’ eqqarsaat ilaginnarnianngilarput.

Apeqqutigisaat marlunnik immikkoortortaqarpoq. Siullermik naalaffik juutillu aaqqissuussaanerat pineqarput; aappassaanik Jesusip siunissami kunngiulluni najuunnissaa pissutsillu aaqqissuussaanerata taamanikkussaq atuuttussap naggatissaa pineqarput. Jesusip apeqqutit marluk taakku tamaasa akivai, akissutaalu Matîuse kapitali 24-mi 25-milu, Mákorse kapitali 13-imi taavalu Lúkarse kapitali 21-mi allassimapput. (Aamma takuuk sarĸúmersitat 6:1-8.) Silarsuup matuma imaluunniit ’pissutsit aaqqissuussaanerata’ naggatissaa eqqarsaatigalugu Jesusip ullut kingulliit atuunnerinut ataatsikkut nalunaaqqutaasutut katitersimasutut piumaartussat allaatigai. Nalunaaqqut katitersimasoq tamanna ullumikkut takuarput? Tamatuma takutinnerpaa  uagut ullut kingulliit Bibelimi eqqartorneqartut inuuffigigivut? Nalunaaqqutip tamatuma eqquunnerata takutinnerpaa ilimagisatsinnit kingusinnerusoq?

Nalunaaqqutip katitersimasup Jesusip eqqartugaata ilaa imaappoq: ’Inuiaammi pikitsitsiumaarput inuiaqatiminnut, naalagaaffillu naalagaaffeqatiminut.’ (Matîuse 24:7) 1914-imi sorsunnersuaq siulleq aallartippoq, taamaattumillu taamanikkut Jehovap nalunaajaasui eqiingangaalerput. 1879-imi decemberimi, tassa ukiut 35-t missaat 1914 sioqqullugu, Napasuliaq Alapernaarsuiffik-up tuluttuuani atuarneqarsinnaasimavoq Bibelimi ukiunik naatsorsuisarneq malillugu ukioq tamanna pingaaruteqarluinnassasoq. Sorsunneq tamanna, sorsunneq nunarsuarmut tamarmut tunngasoq siulleq, nunanit akiuuttunit 28-nit peqataaffigineqartoq inuillu 14 millionit toqutaaffigisaat, tassaasinnaanerpa nalunaaqqutip katitersimasup Jesusip eqqartugaata aallarniutaa? Nalunaaqqutip ilai allat kingusinnerusukkut takkukkumaarnerpat?

’Jesusip Kristusip saqqummersitaasigut’ sorsunnerup toqorarfiunersua aamma siulittuutigineqarpoq. Saqqummersitani tamatumani qimuttuarsuup aappaluttup taassumalu qimussersuata ’nunamiut eqqissivissaarutippaat.’ (sarĸúmersitat 1:1; 6:4) 1914-imiit 1918-ip tunngaanut tamanna ilumut pisimasoq qularisariaqanngilaq. Sorsunnersuarlu siulleq aallarniutaannaavoq. 1939-mi sorsunnersuaq kingulleq aallartippoq. Akiuunnersuarmi tamatumani nunat 59-it peqataapput inuillu 50 millionit missaat toqutaapput. Sorsunnersuup kingulliup kingorna ukiut 45-t ingerlaneranni 125-nik sorsunneqarsimavoq, inuit 20 millionit sinnerlugit toqutaanerannik kinguneqartumik.

Nalunaaqqutip ilaa alla imaappoq: ’Kaannersuaq nalliuttarumaarpoq.’ (Matîuse 24:7) Sorsunnersuup siulliup ingerlanerani kingornagullu kaannersuaqangaarpoq. Nalunaarusiaq ataaseq naapertorlugu 1914-imiilli kaannersuarmik ajunaarnersuit 60-it sinnerlugit atuussimapput, inuit millionilippassuit toqunerannik kinguneqartumik. Ullumikkut allaat ullut tamaasa meeqqat 40.000-t nerisassakilliorneq nappaatillu pinngitsoortinneqarsinnaagaluartut pissutigalugit toqusarput.

’Nuna tamatigut tamaana sajungaartarumaarpoq.’ (Lúkarse 21:11) Sorsunnersuit siullianiilli nunap sajuttarneri amerlasimaqaat. 1915-imi Italiami nunap sajunnerata kingunerisaanik inuit 32.610-t toqupput; 1920-mi Kinami 200.000-t ajunaarput; 1923-mi Japanimi 99.300-t toqupput; 1935-mi maannakkut Pakistanimik taaneqartumi inuit 25.000-t inuunertik annaavaat; 1939-mi Tyrkiami 32.700-t toqupput; 1970-imi Perumi 66.800-t toqutaapput; 1976-mi Kinami 240.000-t (ilaasa 800.000-iunerarpaat) toqupput; 1988-imi Armeniami inuit 25.000-t nunap sajunneragut inuunertik annaavaat. Ilumut 1914-imiilli nuna sajungaartarsimavoq!

’Toqorarneq nalliuttarumaarpoq.’ (Lúkarse 21:11) 1918-imi 1919-imilu inuit 1.000.000.000-t missaat nuallunnersuarmit nalaanneqarsimapput, 20.000.000-llu tamatuminnga toqupput. Tamannali aallarniutaannaavoq. Nunani siuarsarniakkani suli inuit hundredelinnik millionilikkuutaat malariamit, siuteqqumit qanimanartoqarnermit, kuussuarmit tappingernermit sakkortuumillu timminnermit innarluuteqalerput toqullutilluunniit. Saniatigullu inuit millionilikkuutaat uummaserinermit kræftimillu toqupput. Aamma nappaatinit kinguaassiuutitigut tunillaattartunit inuiaat naalliutsitaangaarput. Nappaatit amiilaarnartut ilaat tassaavoq AIDS, naatsorsuutigineqarporlu minuttit tamaasa nutaamik tunillatsisoqartartoq. Suli katsorsagaasinnaanngornissaq ilimanaateqanngilaq.

’Iluaatsuliornerit amerliumaarput.’ (Matîuse 24:12) 1914-imiilli pinerluttuliornerit amerliartuinnarput, ullumikkullu annilaarnartumik amerlassuseqarlutik. Inuarnerit, pinngitsaaliilluni arnerinerit, ujajaanerit inupiloqatigiillu imminnut sorsuunnerat pissutigalugit aviisini radiomi TV-milu qulequtaqartuartarpoq. Pissutissaqanngitsumik nakuuserneq noqissinnaanngivissumik siaruaappoq. USA-mi angut aallaammik eqqarasuartaammik hundrederiarluni igilluni atuartorpassuit aallaavai. Tallimat toqutaapput 29-llu ikilerneqarlutik. Tuluit-nunaanni angutip eqqarsartaatsimigut nappaatillip qoorortooq AK-47 sorsunnermi atortagaq atorlugu inuit 16-it aallaavai. Canadami angutip arnanik uumissuisup Montrealip universitetianukariarluni arnat 14-t toquppai. Inuit taamaattut amaqqutut, løvisut uumasutulluunniit allatut qaasuttutut ipput. Uumasutut siuneqanngitsutut piniagassaannaallutik aserugassaannaallutik erniupput. — Naleqqiuguk Hesekiel 22:27; Sefanja 3:3; 2 Pîtruse 2:12.

’Inuit ersinermit inuillu najugaannut piumaartussanik ilimasunnermit tumanngupput.’ (Lúkarse  21:26) Atomip nukinga atorlugu qaartartuliat siulliit qaartinneqarnerisa, kemiilerisoq atomilerisorlu Harold C. Urey oqarpoq: „Ersilluta nerisalissaagut, ersilluta sinittalissaagut, ersilluta inuulissaagut ersillutalu toqusalissaagut.“ Atomitortunik sorsuttoqalernissaata saniatigut pinerluttuliornerit, kaannersuit, aningaasatigut allanngorarnerit, ileqqussarititaasut ilaqutariinnerullu aseroriartornerat taavalu nunarsuarmi mingutsitsinerit ersissutigineqarput. Tassami pissutsit ajortut aviisitigut TV-kkullu ulluinnarni takusartakkatta sumiluunniit inuit annilaartittarpaat.

Apustili Paulusittaaq silap matuma aaqqissuussaanerata ulluni kingullerni pissuseqarnissaa allaatigaa. Oqaasii atuarutsigik allaanngilaq ullumikkut nutaarsiassanik atuarluni: ’Imaattorli ilisimassavat,’ allappoq, ’ullussani kingullerni ajornartunik nalliuttoqassammat, inuit inuujumaarmata imminnik asasut, aningaaserituut, usorsitsaapiluttut, anneruniartut, mitallersut, angajoqqaaminnut naalanngitsut, qujasuitsut, soqqusaatsut, asanniuitsut, saammajuitsut, mamarliisut, nunujuitsut, qiningasut, ajunngitsunik uumissuisut, killuussisut, isumaatsut, ilisimatuuniartut, Guuti kajumiginagu nuannaarutinut kajumittut, Guutimik mianerinninneq ileqqorisuusaarlugu, pissaaneqarfigiumanaguli, taamaattullu alisimaniakkit.’ — 2 Timûtiuse 3:1-5.

’Pinngortitat pileqqaarnerannit suut tamarmik taamaaginnarput’

Apustili Peterip ullut kingulliit pillugit ilisarnaat alla siulittuutigaa: ’Ullussani kingullerni tikiukkumaartut mittatilliillutik mitallersut illigutsannitik malillugit ingerlasut oqarlutillu ima: „Naammi-una tikiunnissamik unnersuut? Siuaasammi sinippaarmatali kingorna pinngortitat pileqqaarnerannit suut tamarmik taamaaginnarput.“’ — 2 Pîtruse 3:3, 4.

Ullumikkut inuppassuit Peterip oqaasii siulittuutaasut eqquutitittarpaat mittalliillutik oqartaramik: ’Tamakku tamarmik siornatigut pereersimapput. Pisimasut-uku uteqqiinnartut.’ Taamaattumik mianersoqqussutit tusaajumanagit itigartittarpaat ’illigutsannitik malillugit’ ingerlajuaannarlutik. Siulittuutit ersarissumik takutitaat ulluni kingullerni inuunerput ’illigutsannitik’ pissutigalugit itigartippaat. — 2 Pîtruse 3:4.

Nalunaaqqutip katitersimasup Jesusip siulittuutigisaata ilai assigiinngitsut aatsaat maanna piffissami taama sivikitsigisumi taama sualutsigisumik kingunertutigisumillu eqquupput. (Assersuutigalugu takukkit Matîuse 24:3-12; Mákorse 13:3-8; Lúkarse 21:10, 11, 25, 26.) Manna ullut kingulliit pillugit siulittuut malunnangaartoq alla sarĸúmersitat-ni allassimasoq uparuarniarparput.

sarĸúmersitat 11:18 atuariartigu. Tassani allassimavoq Kristus naalagaalerpat inuiaqatigiillu ’kamattunngorpata’ eqqartuussinissarlu nalliuppat, taava Jehovap ’nunamik aseruisut aserussavai’. Ullumikkut mingutsitsineq tassaannginnerpa pinngortitarsuarmik aserorterineq? Inuit nunarsuup pissarititaanik ingasaassillutik pissarsiortuartarsimagaluarput. Kisianni matuma siornagut nunarsuaq inuuffigineqarsinnaajun- naartissimanngisaannarpaat. Teknikkimut tunngasutigut 1914-imiilli ineriartorsimanerup kingunerisaanik ullumikkut inuit taamaaliorsinnaanngorsimapput, nunarsuarmilu inuunermut uumassutsimullu ajoqutaasumik piumatuullutik pisuussutsip noqqaassutiginerani nunamik aseruingaartarput pinngortitallu mingutsillugit.

Inuiaqatigiit piumatuut, nunallu piinik pingaartitsivallaartut sukkaqisumik taamaaliorput, ajunaarnersuarnik kinguneqartumik, soorlu sialuk seernartoq, nunarsuup silaannaata kissarnerulersitaanera, silaannaap ozonip qaleriissitaarnerani putoqalerneq, eqqagassaqarpallaarnermik ajornartorsiutit, toqunartulinnik eqqaavissuit, sullinernut nungusaatit navianartut, igitassat atomitallit, uuliamik maqisoornerit, imermik minguiagaanngitsumik kuutsitsinerit, uumasoqatigiinnik nungutitsinerit, tatsit uumassuseqanngitsut, nunap iluata ernganik mingutsitsinerit, orpipassuit toqorarnerat, issumik mingutsitsinerit, saanngummik neriuineq illoqarfissuarnilu pujorsuit orpiit, nunap inerititaasa inuillu peqqissusiannik ajoqusiisut.

Professori Barry Commoner oqarpoq: „Isumaqarpunga nunarsuarmik mingutsitsineq akornuserneqarani ingerlajuassappat, nunarsuarput naggataatigut inunnit najugarineqarsinnaajunnaassasoq. . . . Ilisimatuussutsikkut nalussuseq ajornartorsiutaanngilaq, kisianniliuna piaaraluni piumatussuseq ajornartorsiutaasoq.“ Atuakkami State of the World 1987-imi (Silarsuarmi 1987-imi pissutsit) qupperneq 5-imi allassimavoq: „Inuit suliarisaasa annertussusiata nunarsuaq najugarineqarsinnaajunnaarsikkiartorpaa.“  1990-mi Amerikami TV-mi nangeqattaartumi tamanna uppernarsarneqarpoq. Nangeqattaartoq taaguuteqarpoq: „Nunarsuaq annaanniarlugu tamaviaarneq.“

Inuit mingutsitsineq unitsissinnaanngisaannassavaat; Guutili nunamik aseruisut aserornerisigut taamaaliorsinnaavoq. Guuti taassumalu qilammiittunut naalagaa, Jesus Kristus, inuiaqatigiit nunap piinik pingaartitsivallaartut Harmagedonimi sorsunnermi naggataasussami eqqartuullugit taamaaliorumaarput. — sarĸúmersitat 16:14, 16; 19:11-21.

Maluginiartiguttaaq Jesusip ullut kingulliit pillugit siulittuutaata ilaa malunnartoq manna: ’Naalagaaffimmik iivangkiiliu tamanna oqaluussissutigineqassaaq inuit najugaanni tamarsuarmi.’ (Matîuse 24:14) Iivangkiiliu, imaluunniit tusagassaq nuannersoq, tassa imaappoq: Guutip naalagaaffia maanna qilammi naalagaavoq qanittukkullu akuliutissalluni pissutsit aaqqissuussaanerat manna ajortoq aserussallugu nunarsuarmilu paratiisi pilerseqqissallugu. Tusagassaq oqaluussissutigineqarsimagaluarpoq, siornatigulli inuit najugaanni tamarsuarmi oqaluussissutigineqarsimanngisaannarpoq. 1914-imiilli Jehovap nalunaajaasui taamaaliorput, naak soorlu Jesusip siulittuutigigaa malersorneqaraluarlutik, naalakkersuisunit inerterneqartaraluarlutik, inupalaanit saassussineqartaraluarlutik, parnaarussaasaraluarlutik, nalliutsitaasaraluarlutik toqutaasaraluarlutillu.

1919-imi Jehovap nalunaajaasui 4000-iupput tusagassamik tamatuminnga nuannersumik oqaluussisut. Taamanikkumiit amerliartuinnarsimapput, siornalu nunani 212-ini oqaatsit 200-t missaat atorlugit inuit 4.000.000-t sinnerlugit oqaluussipput. Bibelit, atuakkat atuagassiallu millionilikkuutaat agguaappaat, inuillu angerlarsimaffianni millionilikkuutaani Bibelimik ilinniaqqissaartitsillutik saniatigullu silarsuarmi tamarmi unammisarfissuarni ataatsimeersuartarlutik. Oqaluussineq annertooq tamanna 1914-ip siornagut pisinnaasimanngisaannarpoq. Suliasaq tamanna taama annertutigisumik naammassineqarsinnaaqqullugu maskiinat naqiteriviit sukkasuliat nutaaliallu, assartuutit, maskiinat qarasaasiat telefaxillu, nassiussivissuit attaveqaatillu pisariaqarput, tamakkulu tamarmik ullumikkut aatsaat atorneqarsinnaalersimapput.

Jeremiasip nalaani Jerusalemimiut aserugaanissamik mianersoqqunneqarput. Inuilli mianersoqqussut mitaatigiinnarpaat. Ilimagisaannilli kingusinneruvoq. Ullumikkut Harmagedonimi aserornissamik mianersoqqussut suli annerungaartoq tusarliunneqarpoq, sorsunnissallu tamatuma qanillineranik uppernarsaatissaqaqaaq. (sarĸúmersitat 14:6, 7, 17-20) Inuit millionilikkuutaat tusaajumanngillat. Piffissaarutilerpummi; ilimagisaannit kingusinneruvoq. Illittaaq ilimagisannit kingusinnerua? (wD 1/4 91)

[Qupp. 7-mi assiliartaq]

Jeremiasip nalaani inuit ilimagissaannit kingusinneruvoq