Jesusip inuunera ajoqersuineralu

Kikkut pilluavippat?

TAMATTA pilluarluta inoorusuppugut. Tamanna eqqarsaatigalugu kikkut pilluavissunik taaneqarsinnaanersut oqaluttuaralugu Jesusip qaqqami oqaluutsi aallartippaa. Taamaalilluni tassuuguinnaq tusarnaartorpassuit naalaarlualersippai. Aallarniutaasumilli oqaasii imminnut assortuuttutut amerlasuut isumaqarfigisimassavaat.

Ajoqersukkani saaffigalugit Jesus oqarpoq: „Pilluarpusi piitsusi, Guutip naalagaaffia pigigassiuk. Pilluarpusi maanna kaattusi, qaarsillarumaarassi. Pilluarpusi maanna qiasusi, illarumaarassi. Pilluarpusi inuit . . . uumissorpasi. . . . Tipaatsullusilu qiimasugitsi taamaalippat, ata, akissarsiassarsi angeqimmat Qilammi.“

Jesusip qaqqami oqaluusaata aallarniutaa Lukasip taama issuarpaa. Mattæusili naapertussagaanni Jesusip aamma qanilaartut, nallittuisut, minguitsumik uummatillit eqqissisitsisullu pilluartutut taavai. Jesusip eqqartorpaa pilluartuusut nuna kingornutissagamikku, nallittorneqassagamik, Guuti takussagamikku Guutillu qitornaanik taaneqassagamik.

Pilluarneq Jesusip qiimanerinnarmut illarnerinnarmullu attuumassuteqarneranngilaa. Pilluarneq piviusoq itinerusumik pissuteqarpoq naammaginninnermut, nalerisimaarnartumillu imaqarluartumillu inuunermut attuumassuteqarluni.

Taamaattumik Jesusip takutippaa inuit pilluavissut tassaasut inuit anersaakkut pisariaqartitaminnik misiutiginninngitsut, ajortiliunerminnik ajorusuutiginnittut, Guutimilli ilisarsisut kiffartorfigilerlugulu. Naak Guutip piumasaanik iliornertik pissutigalugu uumissorneqaraluarlutik malersorneqaraluarlutilluunniit, nalunnginnamikku Guutip iluarisaanik iliorlutik taassumanngalu inuunermik naassaanngitsumik tunineqarumaarlutik, pilluartuupput.

Jesusip tusarnaartaasa ilarpassui isumaqarput, soorlu ullumikkut amerlasuut isumaqartut, iluatsitsingaarneq inuunermilu ajunngequterpassuarnik inuulluataarutiginnissinnaaneq inuup pilluarnissaanut aalajangiisuusut. Taamaanngitsorli Jesusip nalunngilaa. Akerlia tusarnaartaasa  ilarpassuisa tupaallaatigisaat eqqartorpaa, oqarluni:

„Eqqanaq ilissi pisuususi, tuppalliutissaraluarsi pereerassiuk. Eqqanaq ilissi qaarsillartusi, kaalerumaarassi. Eqqanaq ilissi maanna illartusi, aliasullusilu qiajumaarassi. Eqqanaq ilissi inuit tamarmik nersorpasi; taamattaaq siuaasaasa pruffiitioqqusersut iliorfigaat.“

Jesusip sunaana pigaa? Sooq pisuut inuunermilu nuannaarutigisaqarlutillu nersorneqartut assuarai? Taamaaliorpoq inuk tamakkuninnga tamanik peqartoq tamakkuninngalu ilungersuutiginnittoq, inuunermini Guutimut kiffartuussinissaminut — kiffartuussinermut pilluarnermik piviusumik kinguneqartumut — piffissaqarnavianngimmat. Akerlianilli Jesus isumaqanngilaq piitsuussutsip, kaannerup aliasunnerullu imminni inuk pillualersittaraat. Taamali pissutsinik iluanaarnanngitsigisunik atugaqartut Jesusip ajoqersuineranik ilassinnikkajuttarput, pilluarnermik piviusumik pilluaqqusaanermik kingunilimmik.

Nangilluni Jesusip ajoqersukkani oqarfigai: „Nunap tarajoraasi.“ Soorunami tarajuiuneranngilai. Tarajorli aserutsaaliisarpoq. Jehovap naalaffiani tunisiviup eqqaani tarajoqaqaaq, palasillu pilliutit tamatuminnga tarajulertarpaat.

Jesusip ajoqersugai „nunap tarajorai“ oqaluussisarnerat allanut ataavassutaassammat. Tusagassamimmi oqaluussissutigisaannik ilassinnittut tamarmik inuuneq pigiualissavaat! Inuit taakkua aamma allanngujaassuseq, ilumuussuseq aalajaassuserlu, anersaakkut ajortunngornissamut ileqqupiloqalernissamullu sernissuutaasut, pissuserilissavaat.

„Silarsuup qaamasoraasi,“ Jesusip ajoqersukkani oqarfigai. „Naneruut ikittarinngilaat nappartap ataanut ilillugu, kisianni naneruuserfimmut.“ Taamaattumik Jesus nangippoq: „Taamattaaq qaamasorsi qaamali inunnut.“ Jesusip ajoqersugai taamaaliorput tamanut oqaluussinermikkut Bibelimilu najoqqutassianut naapertuuttumik pissuseqarlutik qaamasumik maligassaanermikkut. Lukas 6:20-26; Mattæus 5:3-16. (wD 1/10 86)

◆ Kikkut pilluavippat, sunalu pissutigalugu?

◆ Kikkut Jesusip eqqanaartorfigai, sunalu pissutigalugu?

◆ Jesusip ajoqersugai „nunap tarajorai“ aamma „silarsuup qaamasorai“ qanoq paasisariaqarpa?