Toqup kingorna inuuneq — Apeqqutit akineqanngitsut

„TOQUSOQ uummaqqissinnaanerpa?“ (Job 14:14) Upperluartup Jobip ukiut hundrelippassuit matuma siorna apeqqutigisimasaa tamanna inuit inuiannit tamaneersut isumaliutersuutigiuaannarsimavaat. Akissutissallu imaaginnavissimapput.

Grækeritoqqat oqartarsimapput toqusut tarnaat toqunatik inooqqittartut kuussuakkullu Styx-ikkut ikaarunneqarlutik naalagaaffimmut angisuumut nunap iluaniittumut, toqusut inaannik taaneqartumukaanneqartartut. Tassanilugooq tarnit eqqartuussisunit parnaarussivimmi portusuunik qarmalimmi anniarnissamut imaluunniit narsani alianaalluinnartuni pilluarluni inuunissamut eqqartuunneqartarput. Itsarsuaq inuusimasut allat isumaqarsimapput tarnit ullorianngortartut imaluunniit ullorianngortartut pamiullit. Allat isumaqarput tarnit imminit qaamasuusut qaammammullu pisinneqartarlutik, qaammallu imissigaangat seqinermut ingerlateqqinneqartarlutik.

’Inuunerup aappaaniittut’ pillugit ullumikkut isumaliutersuuterpassuaqarpoq. Hindut buddhasiortullu toqup kingornagut nutaamik timeqalertarnermik upperisaqarput. Muuamaakkut ajoqersuutigaat tarneq timip toqunerani annattartoq naggataamillu eqqartuussaanermi qilammut anniarfimmulluunniit aallartinneqartartoq. Naaggaartut amerlanersaat paasitinneqartarput tarneq toqup kingorna qilammi pilluarnermik angusissasoq imaluunniit anniarfiup innerani anniartitaassasoq. Katuullit ilagiissaasa aammattaaq ajoqersuutigaat limbuseqartoq eqqiarfeqarlunilu.

Nunat ilaanni tarnimik upperisaq najugarisami tassani ileqqorissanik kristumiussusermillu taaneqartumik akuleriissitaavoq eqqumiitsoq. Assersuutigalugu, Afrikap kitaani katuullit naaggaartullu amerlasuut ileqqoraat toqusoqaraangat tarrarsuutit ulittarlugit toqusimasup tarnaa takuneqaqqunagu. Ullut 40-t toqusoqarnerata kingorna qanigisaasut ikinngutillu tarnip qilaliarnera nalliuttorsiutigisarpaat. Kingornalu — juullip nalaani imaluunniit ukiortaami — qanigisaasut ilerfiartarput ilivermullu imigassamik kuisisarlutik. Allaat toqusimasoq oqaluffigisarpaat, ikioqqullutik ilaqutariinnilu qanoq pisoqarsimaneranik oqaluttuuttarlugu.

Toqup kingorna susoqartarnera pillugu upperisarsiornerit assigiinngitsut assigiinngivissunik ajoqersuuteqarput. Tamangajammilli ataaseq isumaqatigiissutigaat, tassa tarneq toqusuitsuusoq. Toqup kingorna inuunermik isumaliutersuutit amerlanersaat tamatuminnga tunngaveqarput.

Apeqqutissaqarporli akissutissarsisariaqakkatsinnik: Tarnip toqusuitsuuneranik eqqarsaat sumit piva? Bibelimi nassaassaava? Taamaappallu, sooq upperisarsiornerni kristumiuunngitsuni aamma nassaassaava? Apeqqutit tamakku ilaginnaannagassaanngillat. Qanorluunniit upperisaqaraluarutta toqu piviusuuvoq inuunerpullu sunniuteqarfigeqalugu. Taamaattumik kajumissaarpatsigit ammasumik isumaqarlutit apeqqut tamanna misisoqqullugu. (wD 1/9 90)