Sooq upperisarsiorneq ilumoorutissava?

’TIMIUSAANNAQ inuup inuussutiginngilaa.’ (Matîuse 4:4) Oqaatsip tamatuma issuarneqakulasup tikkuarpaa inuup pisariaqartitaa ullumikkut inuppassuarnit arajutsineqartoq. Kinaassuserput isumassorneqarnissaminik pisariaqartitsisumik anersaamuttaaq tunngasortaqartoq ersersippaa. Jesus Kristus, qulaani issuarneqartunik oqaaseqarsimasoq, oqarsimavortaaq: „Pilluaqqusaapput Guutimik pisariaqartitsinerminnik ilisimannittut.“ — Matîuse 5:3, NEB.

Taamaallaat upperisarsiornikkut ’Guutimik pisariaqartitsinerput’ matussutississinnaavarput. Taamaallaat upperisarsiornerup apeqqutit tunngaviusut inuunerup pilerfianut tunngasut inuunerullu siunertaanut tunngasut akissutissarsisinnaavai, taamaallaallu upperisarsiornerup inuuneq siunertaqalersillugulu imaqalersissinnaavaa. Imaanngilarli upperisarsiornerup suugaluartulluunniit tamanna naammassisinnaagaa. Arnamut Samariamiumut Jesus oqarsimavoq: ’Pallorfiginnittut ilumoortut ataataq pallorfigissavaat anersaakkut ittumik ilumoortumillu.’ (Juánase 4:23) ’Ilumoortumik’ pallorfiginninneq ileqqutoqqanik ileqqulersuutitoqqanillu, amerlanertigut iluarusunnermik sivikitsuinnarmik misigititsisartunik anersaakkulli inuussutissartaqanngitsunik, malinninnermit nassataqarnerungaarpoq.

Assersuutigalugu, Amerikamut Japanimi aallartitaasimasoq, Edwin O. Reischauer, oqarsimavoq: „Inuit amerlanerit shintosiorneq buddhasiornerlu ileqqulersuutaannartut isigiartuinnarpaat upperisarsiornertut imaqarluartutut isiginnginnerullugu.“ Pissutsit taamaannerat Japanimiorpassuit iluariinnartarpaat. Taamaakkaluartorli Japanimi „upperisarsiorniaqatigiit nutaat“ amerliartuinnarnerat  upperisarsiornikkut ileqqutoqqanik naammaginninnginnermik ersersitsivoq.

’Upperisarsiorniaqatigiilli nutaat’ siulersortitik killinnartuliortartut Guutimit pingaartinnerusarpaat. Upperisarsiornikkut siulersortaasorpassuit oqartarput Guutimit isumassarsisitaallutik. Oqaluussissutigisaalli annerusutigut tassaasarput buddhasiortut, shintosiortut upperisarsiortullu allat ajoqersuutaannik akuleriissitat, namminneq isumaliutersuutaannik ilarujussuallit. Ussagarfigineqarnerannut amerlanertigut pissutaasarpoq inuunermik pitsaanerusumik neriorsuutaat eqqumiitsumillu ajorunnaarsitsisinnaassuseqarnerarnerat. Upperisarsiorniaqatigiilli tamakkua malinnitsitik ’anersaakkut ittumik ilumoortumillu’ pallorfiginninnissaannik ilinniartissinnaanerpaat? Naamik. Tamatumunnga pissutaavoq upperisarsiorniaqatigiit tamakku sullinertut inuunikitsutut innerat. Qarsupittuummata ilumoorunnissaannut pissutissaqarpallaanngilaq.

Upperisarsiorneq ilumooruttariaqagaq

Upperisarsiorneqarporli allanit tamanit pisoqaanerpaasumik. Tassaavoq upperisarsiorneq Bibelimi ilinniagarput. Bibelimik allanneq ukiut 3500-t missaanniittut sioqqullugit aallartinneqarsimavoq, kapitalinilu siullerni oqaluttuarineqartut ukiut tuusintit sinnerlugit pisoqaassuseqarput. * Upperisarsiornerup pilernera pillugu oqaluttuanik pisoqaanerpaanik imaqarpoq. Upperisarsiornerup Bibelimi ajoqersuutigineqartup isumaliutigeqqissaarnissaanut tamakkuinnaat pissutissiisinnaapput.

Qinerlerfissiami The Encyclopedia Americana-mi Bibeli ima oqaatigineqarpoq: „Qaamarna ’silarsuarmut tamarmut anngussimavoq’. Ileqqussatigut upperisarsiornikkullu erlinnartutut silarsuarlu tamakkerlugu atugartuunngorsaanissamik neriuut alliartortillugu erlinnarsiartuinnartumik nungussaanngitsumik ajoqersuutigisaqartutut maanna isigineqarpoq.“ Atuagarli aalajangersimasoq guutisiornermi ilumoortumi uppernartumik unnersuussisuiussappat, ilimagisariaqassannginnerpa sapinngisamik siaruarlunilu inunnut sallusuissummik ujarlersunut paasineqarsinnaanissaa?

Bibelilumi taamaappoq. Tamarmi ilaannaaluunniit oqaatsinut 1928-nut nutserneqarsimavoq oqaluttuarisaanermilu atuakkat siaruarsimanerpaartaraat. Paasinarsisimavortaaq oqaluttuarisaanermut ilisimatuussutsimullu naapertuuttuusoq. Itsarnisarsiuut oqaluttuarisaanerullu uppernarsarpaat Bibelimi siulittuutit eqqorluartumik eqquuttarsimasut. Anersaarsiornermut, eqqumiitsorsiornermut angakkuarninnermullu Bibeli atanngilluinnarpoq. Tamakku tamarmik Bibelip Guutimit isumassarsiarititaanerarneranut naapertuupput. — 2 Timûtiuse 3:16.

Upperisarsiornerup ilumoortup „inerititai“

Ilumoorporli ilaa upperisarsioqatigiippassuit Bibelimik malinninneraammata? Aamma ilaa kristumiuunerartut ilarpassuisa akornanni assortuuttoqartaqalunilu, uumissuineqarlunilu ilumoortuusaarniartoqaqaaq? Aap, taamaappoq. Tamakkuli pissutigiinnarlugit Bibeli tunuartittariaqanngilarput. Jesus Kristusip nammineq eqqaasitsissutigisimavaa kristumiutut taasut amerlanersaat Guutimit ajattugaajumaartut. (Takuuk Matîuse 7:13, 14, 21-23.) Taavali qanoq ililluni paasineqarsinnaava upperisarsiorneq ilumoortoq Bibelimiittoq kikkut malikkaat? Jesus akivoq: ’Inerititaannit ilisarissavasi. Kakillarnaqutinit viinnissanik katersuisinnaanerpat, fiiginilluunniit orpikkanit kiinnarissulinnit? Taama orpik ajunngitsoq nungullugit ajunngitsunik inerititaqartarpoq, orpilli ajortoq ajortunik inerititaqartarpoq. Taamaattumik inerititaannit ilisarissavasi.’ — Matîuse 7:16, 17, 20.

Aap, upperisarsiorneq ilumoortoq ajunngitsunik siuarsaasuusariaqarpoq malitsiminullu iluaqutaasumik sunniuteqartariaqarluni. Assersuutigalugu taariartigu Akinori, angut Japanimiu, nammineq oqaasii naapertorlugit ’tassaalersimasoq anersaaq unammillertartoq timiligaq’. Taanna iluatsitsilluarsimavoq angorusutanilu angusimallugu, tassa ilisimatusarfimmi nuimasumi soraarummeersimavoq suliffeqarfissuarmilu ataqqisaasumi suliffittaarsimalluni. Isumaqarpoq upperisarsiornerup tungaatigut suliaqarnissaminut pissutissaqarani.  ’Upperisarsiorneq taamaallaat inuit sanngiitsut ajaappissamik pisariaqartitsisut pisariaqartippaat,’ eqqarsarsimavoq.

Suut tamarmik ingerlalluarput, uisakajaarnerup qasunerullu kingunerisaanik Akinorip perululluni napparsimalernissaa tikillugu. Qungasia sanimut uerpoq uluaalu saamerleq tuianut nakkarluni. Suliffeqarfissuarmili ’ikinngutai’ Akinorimik tuppallersaavallaanngillat. (Naleqqiuguk Ussatit 17:17.) Taamaattumik imigassamut nakkaalluinnarpoq allaallu imminornialersaalerluni.

Akinorip nuliata Jehovap Nalunaajaasui ilagalugit Bibeli atuaqqissaalerpaa. Ullut ilaanni Akinori oqaloqatigitillugu Galâsiamiunut agdlagkat 6:7 issuarpaa, ima allassimasoq: ’Inuk siaruartikkani naapertorlugit katersuiumaarpoq.’ Akinorip tamanna tupaallaatigingaaramiuk nuliani ilagalugu atuaqqissaarnermut peqataasalerpoq. Inuunermik isiginnittaasia allanngorluinnarpoq. Isumagissiartorninilu ilutigalugu Akinorip nappaataa uisakajaarnermik pissuteqartoq qaangiukkiartulerpoq! Soorlu Bibelimi ima ussateqartoq: „Uippalliaanneq timip inuummarississutigisarpaa.“ (Ussatit 14:30) Aap, upperisarsiorneq ilumoortoq ajunngitsunik inerititaqarnarpoq!

Toshiro aamma tassaavoq Japanimiu upperisap ilumoortup ajunngitsunik siuarsaasarneranik paasinnissimasoq. Naak isumaqaraluarluni upperisarsiornermik sammisaqarneq eriaginartunik nassataqarsinnaasoq, qanoq iliuuseqarsimanngilaq. Nammineq illutaarnissani kisiat sammisimavaa. Anguniakkanili angugamiuk nalerisimaarneq takorloorsimasani misiginngilaa. Suliffimminilu sulisut akornanni unneqqaserlunneq pissutsillu ajortut tamatuma pilersitai Toshirop maajugeqai.

Ullut ilaanni Toshiro nuliata Jehovap Nalunaajaasuisa ilagiissaanni najukkaminniittumi utoqqaanertat ilaat imminnut qaaqqusimavaa. Toshirop erniinnaq malugaa angut taanna nammineq suleqatiminit allaanerusoq. Sunaana pissutaasoq? Aap, Bibelip najoqqutassiai inuunermini ilumoorluni ilungersuullugit malinniarsarai. Toshirop tamanna maluginiartorujussuuaa, Bibelimillu atuaqqissaaqatigineqarnissaminik neqeroorfigineqarnini ilassillugu upperisarsiornerlu Bibelip ajoqersuutigisaa inuunermini malerualerlugu.

Illittaaq kajumissaarumavatisigit Jehovap Nalunaajaasui ilisarisimanerulerniaqqullugit. Taakku ’inerititaasigut’ erserpoq Guuti ’anersaakkut ittumik ilumoortumillu’ pallorfigigaat. Ilungersorlutik Bibelip ajoqersuutai inuunerminni maleruarniarpaat. Naallu inuttut ataasiakkaatut nammalluinnartuunngilluinnaraluarlutik ataatsimut isigalugit ileqqui upperisarsiornerup ilumoortup qanoq ajunngitsigisumik sunniuteqarsinnaaneranut takussutissaalluarput.

Jehovap Nalunaajaasuisa ilaat tuusintilikkuutaat nalunaajaasunngunngikkallaramik pilluaassutigisaminnik inuuneqarsimagaluarput. Bibelilli najoqqutassiaanik maleruaalernermikkut ilarpassuisa inuunertik tupinnaannartumik allanngortissimavaat. Inuttulli pilluarnermut aqqut nanisimavaat Bibelimi ’anersaap inerititaanik’ taaneqartunik, tassa asanninnermik, nuannaarnermik, eqqissinermik, kamaginninnermik, inussiarnernermik, ajunnginnermik, uppernermik, saamanermik imminullu naalakkersinnaanermik, pissuseqalerniarnermikkut. — Galâsiamiut 5:22, 23.

Upperisarsiornermik ilumoortumik maleruaanikkut pilluaqqusaanerit naassaanngitsut

Upperisarsiornerli ilumoortoq inuit pissusiinik allanngortitsisinnaaginnarani imaluunniit inuttut ajornartorsiutiminnik aaqqiiniarneranni ikiuisinnaaginnarani annerusumik siunertaqartariaqarpoq. Nunarsuaq tamakkerlugu ajornartorsiutaasut soorlu mingutsitsineq, atomip nukinga atorlugu sorsunnissamik navianartorsiortitsineq nunarsuullu tunniussinnaasaanik ingasaassilluni pissarsiorfiginninneq nunarsuup matuma alianaatsup aserornissaanik aarlerinartorsiortitsipput. Aningaasaqarnikkut ajornartorsiutit inuppassuit inuunerminnik nuannaarutiginninnissaraluannik akornusiipput. Upperisarsiorneq sunaluunniit nunarsuaq tamakkerlugu ajornartorsiutinik taama ittunik aaqqiinissamik neriuummik ajoqersuuteqanngikkuni ilumoorunneqarnavianngilaq.

Upperisarsiornerli Bibelip ajoqersuutigisaa neriuummik taama ittorpiamik ajoqersuutigisaqarpoq. Guuti neriorsuisimavoq silarsuaq  nutaaq naapertuilluassuseqarfiusoq nammineq naalakkersuisoqarfimminit, tassa Guutip naalagaaffianit, aqunneqartoq pilersikkumaarlugu. (Matîuse 6:9, 10; 2 Pîtruse 3:13; sarĸúmersitat 21:3, 4) Naalagaaffik tamanna silarsuaq tamakkerlugu inuiaat ajornartorsiutaannik aaqqiissutissaavoq. Silarsuaq tamakkerlugu pilluaqqussutissat taama ittut sivisussusissaat eqqarsaatigalugu, Bibelimi neriorsoqqissaarneqarpugut: ’Silarsuaq pilerinartuilu nungujartorput; Guutilli piumasaanik naammassinnittoq naassaanngitsumik atassavoq.’ Aap, pilluarluni naassaanngitsumik inuunissaq kristumiut ilumoortut tamarmik neriugisaraat. (1 Juánase 2:17) Upperisarsiornermilli ilumoortumik ilumoorussillutillu maleruaasut kisimik Guutip naalagaaffiata aqutsinerani pilluaqqussutissanik misigisaqarumaarput. Taamaattumik ilungersortumik kajumissaarniarpatsigit Bibeli atuaqqissaaleqqullugu. * (Juánase 17:3) Qaamaneq Guutip oqaasianeersoq inuuninni qaamatilerukku ’Guutimik pisariaqartitsinerit’ matuneqariartortillugu pilluarneq angisooq misigilissavat. Taava pilluaqqussutissanik naassaanngitsunik neriugisaqalissaatit upperisarsiorneq — upperisarsiorneq ilumoortoq — ilumoorukkakku. (wD 1/2 91)

[Quppernerup ataani ilanngussat]

[Qupp. 7-mi assiliartaq]

Upperisarsiorneq Bibelip ajoqersuutigisaa silarsuarmik eqqissiffiusumik naalakkersuisoqarfimmit qilammiittumit aqunneqartumik neriuummik ajoqersuutigisaqarpoq