Ajunngitsup qaquguluunniit ajortoq ajugaaffigiumaarpa?

UKIUT 2000-ngajaat matuma siorna Jesus Kristus, angut pisuunngitsoq, toqumut eqqartuussaavoq. Angutit ajortut perlulioqatigiillutik pilersaarutigisimavaat toqunniarlugu sallusuissummik oqaluussimmat. Peqquserluttumik pikitsitsiniartutut unnerluutigaat, inuppassuillu nilliallutik toqutaanissaa piumasaraat. Nunap naalagaata, Romamiuusup, atorfeqarnermigut siuariartornissani sanasukulunnguup inuuneranit pingaartinnerugamiuk, Jesus naakkittaatsumik toqutaanissaanik eqqartuuppaa. Ajussuseq ajugaasimasorinarpoq.

Taamaattoq, unnuaq toqutaanissani sioqqullugu, Jesusip ajoqersukkani ima oqarfigai: ’Silarsuarmut ajugaavunga.’ (Juánase 16:33) Qanoq isumaqarpa? Ilaatigut isumaqarpoq silarsuarmi ajussutsip narratsissimanngikkaani imaluunniit akiniaarussutsatsissimanngikkaani. Inuit ajortut iliortarnerisut pissusilersorumanngilaq. (Naleqqiuguk Rûmamiut 12:2, Phillips.) Allaat toqulerami toqutsisini ima qinnuppai: ’Ataataq, isumakkeerfigikkit suliartik nalummassuk.’ — Lúkarse 23:34.

Toqunini tikivillugu Jesusip takutippaa ajussuseq ajugaaffigineqarsinnaasoq. Malinnitsini kajumissaarpai namminneq ajussuseq akioqqullugu. Qanoq ilillutik taamaaliorsinnaappat? Taamaaliorsinnaapput unnersuussutit Biibilimeersut makku maleruarlugit: ’Ajortumik iliortoq ajortumik akileqinasiuk’, taavalu Jesusitut ’ajortumut ajunngitsoq sakkugalugu ajugaaniarluni’. (Rûmamiut 12:17, 21) Taamaaliornerli ilumut atorsinnaava?

Dachauimi ajussutsimut akiuunneq

Elsep, arnap tyskiusup Dachauimi parnaarussaasimasup, niviarsiaraq russeq 14-inik ukiulik tunissummik naleqangaartumik tunisimavaa, tassa uppernerup neriuutillu tunissutaannik.

Dachauimi parnaarussivimmi naalliutsitsiviusumi tusaamasaanerluttumi inuit tuusintilikkuutaat toqunneqarsimapput, hundredelippassuillu, ilaatigut niviarsiaraq russeq taanna, nakorsaatinik amiilaarnartumik misileraatigineqarsimapput. Dachau tassaasimavoq ajussuseqarluinnarfiusoq. Kisianni allaat  nunami taama naggorlutsigisumi tamaani ajunngissuseq puttussinnaallunilu inerititaqarluarsinnaavoq.

Elsep niviarsiaraq inuusuttuaraq taanna assut naakkigaa, tassami pinngitsaalisaalluni isiginnaartinneqarsimavoq sakkutuut SS-it anaanani pinngitsaalillugu arneriffigigaat. Else, inuunini annaasinnaagaluarlugu, periarfissarsiorpoq niviarsiaraq ajunngitsoq ajortorlu Biibilimilu makinnissamik neriuut pillugit oqaluttuunniarlugu. Ikinngunni inuusuttoq ilinniartippaa asanneqqullugu uumissueqqunagulu. Elselu pisuulluni niviarsiaqqap russip Dachauimi amiilaarnartorpassuit naammagalugit anigorpai.

Else taamaaliorsimavoq Kristusip namminissarsiunngitsumik maligassiaa malikkusukkamiuk. Jehovamut nalunaajaasuugami ilinniarsimavaa ajortumik iliortoq ajortumik akineqassanngitsoq, uppernerminillu killinneqarluni allat taamaaliornissaannut ikiorumavai. Naak Dachauimi naalliuuteqaraluarluni ileqqussatigut naalakkisartitsipilunneq ajugaaffigisimavaa. Kisimilu taamaaliorsimanngilaq.

Atuakkiamini A History of Christianity-mi Paul Johnsonip eqqartorpaa „[Jehovap nalunaajaasuisa] nazistist naalagaaffiat suleqatigiumanngivikkaat, ajorluinnartutut assuarigamikku. . . . Taakkua 97 procentii assigiinngitsutigut malersorneqarsimapput.“ Akiuutilussinnarsimappat? Atuakkami Values and Violence in Auschwitz-imi innuttaaqatigiinnik ilisimatooq Polenimiu Anna Pawelczynska nalunaajaasut pillugit ima allassimavoq: „Parnaarussat ikittut taakku uppernikkut pissaaneqangaarput, nazistillu isumaannut sorsuullutik ajugaasimapput.“

Amerlanersattali ajussuseq avataaniittoq piinnarnagu ajussuseq ilutsinniittoq akiortariaqartarpaat. Tassa imminut akiorneq.

Ajussutsip ilutsinniittup ajugaaffigineqarnissaa

Apustili Paulusip akiuunneq tamanna ima allaatigaa: ’Piumasara ajunngitsoq suliarisarinngilara, kisianni piumanngisara ajortoq suliarisarpara.’ (Rûmamiut 7:19) Paulusip nalunngilluarpaa ajunngitsuliornissaq oqitsuinnaaneq ajortoq.

Eugeniop *, Spaniamiup inuusuttup, ukiuni marlorsuarni ajortulioriartarnini akiorsimavaa. „Imminut sukannerfigisariaqarsimavunga,“ taama nassuiaavoq. „Inuusuttuaraaninniilli kanngunartuliortarsimavunga. Inuusuttuaraagallarama kajumillunga ingasattumik anguteqatinnik atoqateqartarpunga, miserratigisinnaanagulu taamani inooriaaseq tamanna nuannaarutigalugu.“ Taava sooq kiisami allanngorusulersimava?

Guutip iluarisaanik iliorusulerpunga, Biibililu aqqutigalugu paasilerpara taassuma inooriaasera iluarinngikkaa,“ Eugenio taama oqarpoq. „Taamaattumik inuttut allanngussallunga aalajangerpunga, Guutillu najoqqutassiai malerualerlugit. Ullut tamaasa eqqarsaatit ajortut, minguttuut isumamiugisakka akiortariaqarpakka, kipisuitsumillu Guuti ikioqqullunga qinnuigisarlugu. Ukiut marluk tamatuma kingorna piuminarnerulerpoq, sulili imminut sukannerfigaanga. Akiuutilussinnarnerusimanngilarli. Maanna imminut ataqqilersimavunga, ajunngitsumik aappaqarlunga, pingaarnerusumillu Guutimut ajunngitsumik attaveqarlunga. Nammineq misilittakkakka naapertorlugit nalunngilara eqqarsaatit ajortut kinguneqannginneranni tunuartinneqarsinnaasut, ilungersorluni iliuuseqartuaraanni.“

Eqqarsaat ajortoq tunuartinneqaraangat, ajortumik iliortoq ajortumik akineqanngikkaangat, ajunngitsup ajussuseq ajugaaffigisarpaa. Kisianni ajugaanerit tamakkua pingaaruteqaraluaqisut ajussutsip pilerfii marluk pingaartut piiarsinnaanngilaat. Qanorluunniit tamaviaaraluarutta sanngiissutsivut kingornussavut ajugaaffigilluinnarsinnaanngilavut — Satanillu suli inuiaat ajortumik sunnertarpai. Tamanna qaquguluunniit allanngortinneqassanerpa?

 Diaavulu piiarneqassaaq

Jesus toqunini tikillugu aalajaassimammat Satan ajorsarsimaqaaq. Diaavulu Jesusip assuarnaakkunnaarsinniaraluarnerani artorsarsimavoq, artorsarneralu tamanna ajorsarluinnarnissaanut aallarniutaavoq. Soorlu Biibilimi nassuiarneqartoq Jesus ’toqunermigut Diaavulu sapersisissavaa’. (Eprîarit 2:14) Makitinneqareerami Jesusip ajoqersukkani ima oqarfigai: ’Qilammi nunamilu piginnaaneq tamarmi uannut tunniussaavoq.’ (Matîuse 28:18) Piginnaaneq tamanna atorlugu Satan piiassavaa.

sarĸúmersitat-ni siumut eqqartorneqarpoq ullussaq Satanip Jesusimit qilammit igitaaffissaa. Ajortuliortorsuaq taanna inngilipiluni ilagalugit nunarsuup eqqaanut killilerneqarsimavoq. Biibilimi mianersoqqusilluni allassimavoq tamanna pissutaalluni nunarsuarmi ajussuseq sualukkiartulissasoq: ’Eqqanaq nuna immarlu, Diaavulu ilissinnut aqqarmat kamattorsuulluni, piffissakissutsi nalunnginnamiuk.’ — sarĸúmersitat 12:7-9, 12.

Biibilimi siulittuutit takutippaat oqaluttuarisaanermi pisussaq tamanna pereersimasoq — sorsunnersuup siulliup nalaani. * Taamaattumik paasinarsivoq sooq ullutsinni ajussuseq malunnartumik alliartuinnarsimasoq. Erniinnarlu Satan ajugaaffigineqarluinnassaaq inunnik sunniisinnaajunnaarsilluinnarlugu. — Naleqqiuguk sarĸúmersitat 20:1-3.

Tamanna inuiannut qanoq kinguneqassava?

’Ajortumik iliortoqassanngilaq’

Guutip naalagaaffiani kunngitut Jesusip erniinnaq ’nunarsuarmut piginnaanini’ atorlugu anersaakkut ilinniartitsineq pilersissavaa. Jesaja 26:9-mi allassimavoq ’inuit najugaanni nunallit iluartuliornissaq ilikkassagaat’. Kinguneri tamarmik misigissavaat. Biibilimi ima neriorsoqqissaarneqarpugut: „Ajortumik iliortoqarnanilu ajoqusiisoqassanngilaq . . . [Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“ — Jesaja 11:9.

Maannangaaq ajortumik ilioqqajaasarnitta ilarpassui ajugaaffigisinnaavavut. Inngilipiluillu sunniinerat atorunnaarsinneqarpat ’ajortoq nigorlugu ajunngitsuliornissaq’ piuminarnerulissaqaaq. — 1 Pîtruse 3:11.

Pissutissaqarluarpugut tatigissallugu ajunngitsup ajussuseq ajugaaffigiumaaraa, Guuti ajunngitsuummat, taassumalu ikiuineratigut ajunngitsuliorusuttut ajussuseq ajugaaffigisinnaavaat, soorlu Jesusip nammineq takutissimagaa. (Tussiaat 119:68) Ajussuseq akiorniarutsigu ilimagisinnaavarput nunarsuassami minguiarsimasumi Guutip naalagaaffianit naalakkersorneqarfiusumi inuunissarput, naalagaaffiup tamatuma ajussuseq soraajuitsumik nungutissammagu. Tussiaasiortup inernera ima allaatigaa: „Nallittuineq ilumoornerlu naapeqatigiissapput, iluarnerlu eqqissinerlu imminnut kunissapput. Nunamit naalerumaarpoq sallusuissut, iluarnerlu qilammit nunamut isigissaaq.“ — Tussiaat 85:11, 12. (wD 1/2 93)

[Quppernerup ataani ilanngussat]