Pinngortitsisersuarput tipaatsuutigisigu
Pinngortitsisersuarput tipaatsuutigisigu
„Israelikkut tipaatsuutigissavaat pinngortitsisertik, Sionip ernerisa qiimmattaatigissavaat Guuti kunngertik.“ — TUSSIAAT 149:2.
1. Naak Europap kangiani allanngorneqarsimagaluartoq pissusiviit inuiaat atugaat qanoq ittuuppat?
ULLUMIKKUT silarsuaq ’eqqanaarnartunik’ naalliuffiuvoq. Oqaaseq taanna Jesusip atorsimavaa ’silarsuup matuma naggatissaa’, ukiut erloqinartut 1914-imi nunarsuaq tamakkerlugu sorsunnersuarmik aallartittut, siulittuutigigamiuk. (Matîuse 24:3-8) Siunissaq politikererpassuarnut taartuinnartut ippoq. Naak Europap kangiani ’naggataatigut kiffaanngissutsimik’ angusinissamik suaartaatiginnittoqaraluaqisoq tamaani præsidentit ilaata pissutsit eqikkarlugit ima oqaatigisimavai: „Nunarsuarmi inuit amerliartupiloornerat, nunarsuup kissarnermik ajatsisinnaajunnaariartornera, ozonip putoorneqarnera AIDS, atomip nukinganik sakkussiarsuarnik qunusaarineq, avannaata pisuup kujataatalu piitsup aarlerinartumik imminnut ungasilliartuinnarnerat, kaannersuaqartarnera, nunarsuup inuuffigineqarsinnaassusianik pisuussusiinillu nungusaapilunneq, tv-p aningaasannanniutaajartuinnarnera sumiiffinnilu ataasiakkaani sorsuunnerit ulorianartorsiutaagaluttuinnarnerat — tamakkorpassuit allarpassuillu inuiannik tamanik ulorianartorsiortitsipput.“ Nunarsuarmi inuuginnarsinnaanissamik ulorianartorsiortitsisunik tamakkuninnga peersitsisinnaasumik inuit pissaaneqanngillat. — Jeremia 10:23.
2. Inuiaat ajornartorsiutaannik kina ataavartumik aaqqiissutissaqarpa, qanorlu iliuuseqareersimava?
2 Uagulli nuannaarutigisinnaavarput Pinngortitsisersuarput ataavartussamik aaqqiissutissaqarmat. ’Silarsuup matuma naggatissaanik’ Jesusip siulittuutaa taassuma takussaanngitsumik „najuunnissaanut“ atavoq. (Matîuse 24:3, 37-39, NV) ’Qilassanik nutaanik’ pilersitsiniarluni Jehovap Jesus Messiasitut kunngiusutut issiavissaarsuanut ivertissimavaa, siulittuutillu uppernarsarpaat oqaluttuarisaanikkut pisoq tamanna 1914-imi qilammi pisimasoq. (2 Pîtruse 3:13) Naalakkersuisutut qilammi nunamilu kisimi oqartussaasumik Jehovamik suleqateqartutut Jesus suliassinneqarsimavoq inuiaat eqqartuuteqqullugit inuillu qanilaartut savatut ittut inunnit naalasseriitsunit savaasatut ittunit immikkoortiteqqullugit. ’Savaasat’ guutiitsut naassaanngitsumik suujunnaarsitaasussanngorsimapput ’savallu’ Naalagaaffiup ataani nunarsuarmi naassaanngitsumik inuusussaatitaassallutik. — Matîuse 25:31-34, 46.
3. Sooq kristumiut ilumoortut tipaatsunnissaminnut pissutissaqarpat?
3 Anersaakkut Israelikkut nunarsuarmi sinneri ’savanit’ naalattunit amerlangaartunit ingerlaqatigineqalersimasut pissutissaqarluarput Jehovamik, naassaanngitsumik kunngiusumik, tipaatsuutiginninnissaminnut, siunertanimi nuanningaartoq ernini kunngi aqqutigalugu piviusunngortissavaa. Taakku ima oqarsinnaapput: „Uanga [Jehova] tipaatsuutigingaarpara, Guutiga qiimmattaatigaara annassut uannut atisaritimmagu . . . Soorlu naasussaq nunamit naasartoq siaruartikkallu naatsiivimmi puttuttartut, taama Guutip Naalagaasup naalersissavai iluarneq erinalimmillu unnersiutiginninneq inuiaat tamarmik takkuanni.“ (Jesaja 61:10, 11) ’Naalersitsineq’ tamanna inuit millionilikkuutaat Jehovamik unnersiutiginnittussatut katersorneqarneratigut eqquuppoq.
’Pilertortippaa’
4, 5. (a) Guutip innuttaanik katersuinissaq qanoq siulittuutigineqarsimava? (b) Ukiumi kiffartorfiusumi 1992-imi qanoq maluginiarnartumik siumukartoqarsimava?
4 Satanip aaqqissuussaanerata naggatissaa qanilliartortillugu katersuineq tuaviuunneqariartorpoq. Pinngortitsisersuarput ima nalunaarpoq: „Inutit tamarmik iluartuutinneqassapput . . . Tassaassapput naalernerit uanga nammineq ikkussimasakka, assamma uanga naalannaatissaannik pinngortitai. Minnersaat tusindilinngussaaq nukarlersaallu inuiassuanngussalluni. Uanga tassa [Jehova]; piffissanngorpat pilertortumik tamanna naammassissavara.“ (Jesaja 60:21, 22) Pilertortitsineq tamanna tupinnaannartumik takuneqarsinnaavoq Jehovap Nalunaajaasuisa nunarsuaq tamakkerlugu 1992-imi kiffartornerannik nalunaarusiami atuagassiami matumani quppernerni 10-miit 13-imut naqinneqarsimasumi.
5 Nalunaarusiami tassani maluginiarnartoq tassaavoq Naalagaaffimmik oqaluussissutiginnittartut amerlanerpaaffitsik qaangeqqillugu 4.472.787-ulersimanerat, 193.967-inik amerlisimallutik — siornarnit 4,5 procentimik amerlisimallutik. 1992-ip ingerlanerani kuisittut 301.002-iullutik aatsaat taama amerlatiginerata ersersippaa inuit amerlasuut Biibilimi upperisaq akuerigaat. Nuannaarutigeqaarput ’ulluni taartuni taggarissuni’ makkunani nassaassaqarmat ’inuiannik amerlasuunik’ pillertarpassuartut illutik Guutip naalagaaffianik tusarliussamik ’nunap isuinut allaat’ siaruarterisunik. (Jûîtdle 2:2, 25; apustilit suliait 1:8) Alaskamit isseqisumit — Napasuliaq Alapernaarsuiffiup Peqatigiiffiata timmisartuinit 50-it sinnerlugit angalaarfigineqarsimasumit — puilasuitsut kiaqisut Mali Burkina Faso-lu Mekronesiallu qeqertai siamaseqisut tikillugit Jehovap kiffai qaammarsaapput ’Guutimik nalusunut qaammaqqutitut annaassinera nunarsuup isuinut annguteqqullugu’. — Jesaja 49:6.
6, 7. Pissutsit ukiuni kingulliunerusuni qanoq allanngorsimappat, Jehovallu kiffai tamatumunnga qanoq qisuariarsimappat?
6 Jehovap innuttani pallittaalisatut napasuliatullu qajannaatsutut sernissorlugillu isumassortuarsimavai. Nunarsuarmi sumi tamaani Jehovap Nalunaajaasui peqqarniitsumik naqisimaneqarlutillu malersorneqartarsimapput. (Tussiaat 37:39, 40; 61:4, 5) Qanittukkulli tupinnaannartumik nunat ilaanni 21-ni killilersugaanerat inerteqqutaanerallu atorunnaarsinneqarsimapput, taamaalillutik Guutip innuttaasa naqisimaneqaratik Pinngortitsisersuatta Kristusimik nunarsuarmut tamarmut kunnginngortitsisimanera oqaluussissutigisinnaalersimavaat. — Tussiaat 2:6-12.
7 Jehovap innuttaasa kiffaanngissuseqalersitaanertik atorluarsimavaat? Nalunaarusiami siuariarnerit malugeriakkit, Europap kangiani Bulgariami, Romaniami, Sovjet Unioniusimasumi, Afrikamilu Angolami, Beninimi Moçambiquemilu. Aamma Zairemi, suli ajornartorsiorfioqisumi, siumukarsimaneq annertoorujussuuvoq. Qatanngutivut kiffaanngissuseqartitaalersut uummatimikkut iluunngarlutik tipaatsullutik kajumissaarut manna malippaat: „Qutsavigisiuk [Jehova] avaaginnittuummat . . . Taanna kisimi angingaartunik tupinnartuliortarpoq, nallittuinera atavoq naassaanngitsumut.“ (Tussiaat 136:1, 4) Taamatut qujaniarneq ersersinneqarpoq inunnik savatut ittunik Naalagaaffiup ataanut katersortitsilluni eqiasuilluni kiffartornikkut.
8. Jehovamik unnersiutiginnittut nutaat qanoq ilillutik ’nuissatut ingerlaarsimappat’? Europap kangiani? Afrikami?
8 Europami siorna aasap ingerlanerani nunani kommunistiusimagaluartuni Jehovap Nalunaajaasuisa ataatsimeersuarneri tupinnaannartumik amerlasuunit najuuffigineqarsimapput. Suli tupinnarneruvoq nalunaarusiami takutinneqartutut nunani tamakkunani kuisittut amerlassusiat. Togomi Afrikamiittumi inerteqquteqarneq decemberimi 1991-imi atorunnaarsinneqarsimavoq. Qaammat ataaseq qaangiummat nunamut tamarmut ataatsimeersuarneqarpoq. Oqaluussisartut qaammammut agguaqatigiissillugu amerlassusiannut 6443-nut sanilliutissagaanni najuuttut amerlanipilussuupput, tassa najuuttut 25.467-iusimagamik 556-illu kuisillutik — taamaalinerani oqaluussisartut amerlassusiata 8,6 procentii. Jesaja 60:8-mi oqaatigineqartutut Jehovamik unnersiutiginnittut nutaat ’nuissatut ingerlaarput, tuitullu timmillutik iniminnut iseriartorput’, Jehovap innuttaasa ilagiissaannut.
9. Kristumiut qanittukkut kiffaanngissuseqartitaalersut ’nerillutillu qaarsillarsinnaaqqullugit’ sunik aaqqissuussisoqarsimava?
9 Europap kangiani Afrikamilu anersaakkut kaattut pilersorneqartarput. Tysklandimi, Italiami Afrikamilu kujallermi Napasuliap Alapernaarsuiffiup Peqatigiiffiata naqiterivissui atuagassiarpassuarnik oqaatsinut assigiinngitsorpassuarnut naqitikkanik nunanut anersaakkut kaannersuaqarfiusunut nassiussuisimapput. Siornatigut Jehovap Nalunaajaasuisa atuagassiaatituannguatik imminnut atukkiuteqattaattarsimavaat, maannakkulli anersaakkut inuussutissanik sinnilissuarnik pilersorneqarput. Siulittuutip matuma eqquunneranut ilaanertik tipaatsuutigaat: „Naammattumik nerissaasi qaarsillarlusilu, [Jehovallu] Guutissi aqqa unnersiutigissavarsi, tupinnangaartuliorfigippasi.“ — Joel 2:26.
Siuariartoqqinnissamut piareersarneq
10. Eqqaaniaanermut najuussimasut amerlangaassusiat eqqarsaatigalugu soqutiginnittunut tamanut qanoq kajumissaarisariaqarpugut?
10 Ilumullu nuannersuuvoq Jesusip toquanik eqqaaniaanermut nunarsuaq tamakkerlugu najuuttut amerlassusiat, 11.431.171-it, siorna najuuttunut 781.013-inut sanilliullugit 7,3 procentimik amerleriarsimallutik. Najuussimasut nutaat tamassi, tikilluaritsi! Qanorli nuannertigissagaluarpa soqutiginnittut nutaat tamakku tamarmik Jehovap Nalunaajaasui ilagalugit angerlarsimaffimmi Biibilimik atuaqqissaarnermik iluaqutiginnilersinnaasuuppata! (Takuuk Jesaja 48:17.) Ukiumut nalunaarusiami erserpoq taamatut atuaqqissaaqatigiinnerit qaammatit tamaasa 4.278.127-t ingerlanneqartarsimasut, 8,4 procentimik siuariarneq kusanartoq. Amerlaneroqisulli Biibilimik atuaqqissaaqatigiinnermik iluaqutiginnissinnaagaluarput. Jehovap Nalunaajaasuisa nuannaarutigaat soqutiginnittunut angerlarsimaffianni akeqanngitsumik Biibilimik atuaqqissaaqatiginiarlugit pulaartarnertik, ikiorlugit inuunermik naassaanngitsumik angusiniarlutik ingerlalernissaannik. (Juánase 3:16, 36) Illit taamatut atuaqqissaaqatigineqartalernissat qinnutiginiaruk. Eqqaamajullu, Jehovap Nalunaajaasuisa ilagiivisa ataatsimiittarfiannut tikilluaqqusaajuaannaravit! — Tussiaat 122:1; Rûmamiut 15:7.
11, 12. (a) Nunat ilaanni suut ajornartorsiutaappat? (b) Nunat pisuut piitsullu akornanni qanoq ililluni ’naligiissaarisoqarpa’?
11 Ilagiit tamakku pitsaasunik ataatsimiittarfillit annertuumik immikkut pisinnaatitaaffeqarput. Nunanili Jehovap Nalunaajaasuisa ukiorpassuarni inerteqqutaaffigisaanni pissutsit allaapput isertortumik ikittunnguakkuutaarlutillu ataatsimiittaramik. Nunat tamakku ilaanni inerteqquteqarneq maannakkut atorunnaarsinneqarsimavoq, ataatsimiittarfiillu ikittuararsuupput. Assersuutigalugu, nunami Afrikamiittumi 93-inik ilagiilimmi pingasuinnarnik ataatsimiittarfeqarpoq. Taamaattumik ataatsimiinnerit ilarpassui silaannarmi ingerlanneqartarput. Ilagiit ataatsit 150-inik ilaasortaqartut ataatsimiileraangata 450-it aalajangersimasumik aggertarput.
12 Europap kangiani illuliorfissamik pisinissaq illuliornissarluunniit amerlasuutigut ajornakusoortuuvoq, siumukarneqarporli. Polenimi immikkoortortaqarfittaap atoqqaartinneqarnissaata 1992-imi novemberimi pinissaa aalajngiunneqarsimavoq. Jehovap Nalunaajaasuisa nunarsuaq tamakkerlugu sulinerannut tukkortumik tunissutit inersualiortiternermut allanillu sanaartornermut atorneqartarput. Taamaalilluni ’naligiissaarisoqartarpoq’, ima paasillugu qatanngutit tukkorlutik pigisatigut ’peqangaarsutsiminnik’ tunissuteqartarnerat ilagiit nunani pigissaannginnerusuniittut anersaakkut pisariaqartitaannik matussutisseeqataasarpoq. — 2 Korintumiut 8:13, 14.
Nalunaaquttap-akunneri milliardit!
13. Nalunaaquttap-akunneri qassit oqaluussinermut 1992-imi atorneqarsimappat, kisitsimmilu tassani aamma kikkut suliniarsimanerat ilaava?
13 Nalunaaquttap-akunneri milliardit qanoq atorumassagaluarpigit? Naassaanngitsumik inuulerumaartussat tamarmik nalunaaquttap-akunneri taama amerlatigisut, allaallu amerlanerusut, iluaqutaasumik nalerisimaarnartumillu Jehovamut kiffartornermut atornissaannut periarfissaqassapput. Takorlooriarulli nalunaaquttap-akunneri taakku tamarmik ukiumi ataasiinnarmi atorneqartut! Tassa Jehovap kiffai 1992-imi taamaaliorsimapput! Oqaluussisartut ataasiakkaat nalunaarusiaat ataatsimut katinneqarmata paasinarsivoq nalunaaquttap-akunneri 1.024.910.434-t rekordiliillutik, piffissaajarfigissallugu pitsaanerpaamut — tassa Pinngortitsisumik unnersiutiginninnermut, ’illumiit illumut ilinniartitsinermut’ — atorsimagaat. (apustilit suliait 20:20) Oqaluussisartut qaammammut agguaqatigiissillugit 4.289.737-t nalunaarsimapput. Oqaluussisartut tamakku inuiaqatigiinni inissisimaffinnit tamaneersuupput. Ilaasa piffissaq annikitsuinnaq Naalagaaffimmut kiffartuuteqarnermut atorsinnaavaat. Tamakku ilaat ilaqutariinnik pilersuisuupput, utoqqaallutik ilarpassuilu peqqiilliortuullutik, kiisalu inuusuttut meeqqallu atuartut. Tamarmilli immikkut nalunaarusianik tunniussisarnermikkut Jehovamut asanninnertik ersersippaat. — Naleqqiuguk Lúkarse 21:2-4.
14. Inuusuttut qanoq ilillutik ’Pinngortitsisertik eqqarsaatigisimavaat’?
14 Kinguaariit nutaat Jehovamut kiffartornermi inersimasunngoriartulerput, qujanartumillu amerlanersaasa Nalunaajaasup oqaasii 12:1-imi Salomonip oqaasii maleruarpaat: „Pinngortitsisit eqqarsaatiginiaruk inuusuttuunerpit ulluini.“ Atuarfimmi eqiasuitsuupput angajoqqaaminnillu anersaakkut ilinniartinneqarlutik. Nuanneqaaq takullugit inuusuttuararpassuit ataatsimeersuarnerni kuisinnissamut sassarlutik nikuiasut. Aammalu amerlasuut pionerinngornissaminnut piareersaatitut piginnaanernik assigiinngitsunik ilinniagaqartut paasillugu nuannerpoq. Taamaalillutik imminnut pilersorsinnaalissapput, soorlu apustili Paulus tupiliortuunermigut taamaaliortarsimasoq. — apustilit suliait 18:1-4.
15, 16. Pionerit piffissarlu tamaat atorlugu kiffartortut allat qanoq ilillutik Naalagaaffiup sulinerata siumukarneranut tapersersuisimappat, ilaallu qanoq pilluaqqusaasimappat?
15 Pionerit piffissarlu tamaat atorlugu kiffartortut allat Naalagaaffiup sulinerata siumukarneranut annertoorujussuarmik peqataapput! Ukiut qaangiuttut ingerlaneranni pionerit amerliartorsimapput 931.521-nngorlutik. Pionerit ullut tamaasa illumiit illumut angalaartarnertik Biibilimillu atuaqqissaaqateqartarnertik Biibilip tusarliussassaanik saqqummiussinissaminnut pikkorississutigisaqaat. Aammalu ilarpassui pionerit sapaatip-akunnerini marlunni pikkorissartinneqarnerannut peqataasimapput, tamannalu iluaqutigalugu suli piginnaaneqarnerulersimapput Guutimullu kiffartornerminni nuannaarnerulersimallutik.
16 Pionerit aalajaatsut tamakku tamavimmik Isaia 50:4-mi allassimasumut isumaqataapput: ’Naalakkap Jehovaasup tunivaanga ajoqersukkap oqaanik, qasusumut tuppallernartumik oqalunneq ilisimaqqullunga.’ Ullumikkut inuppassuit silarsuaq avatangiiserisartik ajortunngorsimasoq qatsulluinnarpaat, pionerertattali aalajaatsut oqaluttuaat qiimmaallaatigisarlugit. — Naleqqiuguk Ussatit 15:23; Hesekiel 9:4.
Sanaartornersuaq
17. Anersaakkut sanaartornerup saniatigut sanaartorneq suna ukiuni kingulliunerusuni pisimava?
17 Jehovap Nalunaajaasuisa nunarsuaq tamakkerlugu anersaakkut siumukariartuinnarnerat pissutaalluni aamma atortussatigut siumukarnissaq pisariaqalersimavoq. Naqiteriviit, allaffiit Betelillu allilerneqartariaqarput, kiisalu ataatsimiittarfiit ataatsimeersuartarfiillu sanaartorneqartariaqarlutik. Taamaattumik Jehovap Nalunaajaasui kajumissaarneqarput sanaartornermik suliaqartunngoqqullugit. Taamatut sanaartorneq Salomonip nalaani aamma pisimavoq. Salomonip naalaffik Jehovamut pallorfiginninnermut atugassaq nappartissimavaa ’pilersaarusiaq isumassarsiarititsinikkut pisimasani’ malillugu, tassa ataataminut, kunngi Davidimut, Jehovap tunniussimasaa. (1 Israelikkut 28:11, 12, NV) Salomonip tusarnaartini oqaatsinik ilisimatuunik nalilinnik qiimmassaannartarsimanngilai, aammali naalaffissuarmik kusanarluinnartumik silamiut sanasuisa sanasimasaannit nallerneqarsimanngisaannartumik qiimmassaatissarsisimallugit. — 1 Kunngit 6:1; 9:15,17-19.
18, 19. (a) Sanaartornerit siumukarluartut suut Jehovap peqatigiissortaasa massakkut ingerlappaat? (b) Timikkut anersaakkullu sanaartornermi Jehovap anersaavata siulersuinera qanoq ililluni takuneqarsinnaasimava?
18 Ullumikkut Jehovap Nalunaajaasuisa illuliassat titartarneri Guutimit isumassarsiarititaasut pineq ajorpaat, Guutilli anersaava pigaat. Israelikkulli nalaanni pisoqartarsimaneratut silarsuarmi inunnit tupigusutsitsisumik sanariartaaseqarput. (Sakarja 4:6) Piffissaq sivikeqaaq. Ataatsimiittarfiit allallu sukkanerpaamik sananeqartariaqarput. Nunat ilaanni sanagasuakkanik ataatsimiittarfiliornerit ulluinnarni pisartunut ilaapput. Assersuutigalugu, ukiuni qulini kingullerni Canadami inersuit 306-it sanaartorneqarsimapput, ilaat ullunit marlunnit sivikinnerusumi. Jehovamut kiffartornerup nunarsuaq tamakkerlugu siumukariartupallannera pissutigalugu immikkoortortaqarfiit 43-t ulluni makkunani pilersaarusiorfigineqarput imaluunniit allilerneqarlutik nutaanilluunniit sanaartorneqarluni. Aammalu illorsuaq 30-nik quleriilik Betelimi suleqataasunut tuusintingajannut inissiartalik Brooklynimi inerneqangajalerpoq; Pattersonimilu naalagaaffimmi New Yorkimiittumi ilinniarfeqarfimmik, pilersaarusiamik Vagttårnip peqatigiiffianit suliarineqartumik aatsaat taama annertutigisumik sananeq, pilersaarutigisamit sukkaneroqisumik ingerlanneqarpoq.
19 Sanaartukkat tamakku silarsuarmi sanaartortitsisartut misilittagartuut tupigusuutigisaannik pitsaasumik ingerlanneqartarput. Sukkut tupigusuttaramik? Jehovap Nalunaajaasui imminnut pilliutigeriaannaasut sinnilissuarmik tapersersuinerat pissutigalugu. Guutip anersaavanit killinneqarlutik atortussatigut tunissuteqaannaratik uummammik tamakkiisumik piffissaminnik nukimminnillu tunisisarput. Sanaartorfiusuni sulisunik misilittagaqarluartunik eqiasuitsunillu ulikkaarpoq. Suliumajunnaartoqarneq ajorpoq, napaannartoqaranilu. Jehovap anersaavata pisariaqartumik kajumissuseqalersittarpai, soorlu Mosesip nalaani illernartuutiliornermi suleqataasut Salomonillu nalaani naalaffilioqataasut Guutip anersaavanit kajumissisinneqartarsimasut. Sanaartoqataasut anersaakkut ittunik pingaartitsilluinnarnissaat piumasaqaataavoq pingaarnerpaaq. — Naleqqiuguk Mosesimik allakkat aappaat 35:30-35; 36:1-3; 39:42, 43; Kunnginik allakkat siulliit 6:11-14.
20. (a) Nutaarsiassamik nuannersumik oqaluussissutiginninneq qanoq annertutigilissava? (b) Jehovap innuttai qanoq pilluaqqusaanartumik siunissaqarpat?
20 Salomonip naalaffiliornini inereeraluarlugu sanaartornini ingerlatiinnarsimavaa. (2 Israelikkut 8:1-6) Nalitsinni oqaluussinerup — taamatuttaarlu ataatsimiittarfinnik, ataatsimeersuartarfinnik allanillu sanaartornerup — qanoq annertussuseqalernissaat naluarput. Nalunngilarpulli Naalagaaffimmik nutaarsiassaq nuannersoq Jehovap kissaatigisaatut annertussusilimmik oqaluussissutigineqareerpat naggatissaq, ’annikilliornartussarsuaq’, nalliukkumaartoq. (Matîuse 24:14, 21) Nalissaqanngitsumik inuiannut pilluaqqussutitut Jehova ’qilammik nunamillu nutaanik’ pilersitsissaaq — nunamik inunnit piumatuunit aserorterneqartussaanngitsumik. Taamaattumik ’Guutip pinngortitai soraajuitsumik tipaatsuutigalugillu qiimmattaatiginiartigik’ ataqqinaat tamaat taassumunnga tunniullugu! — Jesaja 65:17-19, 21, 25. (wD 1/1 93)
Nassuiarsinnaaviuk?
□ Pinngortitsisersuatsinnik nuannaarutiginninnissatsinnut sunik pissutissaqarpugut?
□ Ukiumi oqaluussiffiusumi 1992-imi nalunaarusiaq naapertussagaanni qanoq siumukarneqarsimava?
□ Nunani suliatta inerteqqutaaffigisimasaani pilluaqqusaanerit suut migineqartarpat?
□ Inuusuttut pionerillu Jehovap peqatigiissortaasa siumukarnerannut qanoq ilillutik tapersersuisimappat?
□ Jehovap innuttai qanoq ilillutik atortussatigut timikkullu sanaartornermi ulapputeqarsimappat?
[Atuaqqissaarnermi apeqqutit]
[Qupp. 16-mi ungalusaq]
Siorna nalunaaquttap-akunneri milliardinit ataatsinit amerlanerusut oqaluussinermut ajoqersuinermullu atorneqarsimapput
[Qupp. 12-15-mi nalunaarsugaq]
UKIUMI OQALUUSSUFFIUSUMI 1992-IMI JEHOVAP NALUNAAJAASUISA SILARSUARMI TAMARMI SULINERANNIK NALUNAARUSIAQ
(Allassimasut qanoq inissisimanersut naqitami takuneqarsinnaavoq)
[Qupp. 9-mi assiliartaq]
Siorna kuisittut hundredetusindilikkuutaat Jehovap oqaluussinermik ajoqersuinermillu pilluaqqusineranut takussutissaapput
[Qupp. 11-mi assiliartaq]
Inuusuttorpassuit ’Pinngortitsisertik eqqarsaatigaat’