Aappariinnermi ’inuttaaq atiartoruk’

’Nutaanngortissasusi anersaassigut isumaqaatissigut, inuttaarlu Guuti assilillugu pinngortitaq atissagissi.’ — EVFISUMIUT 4:23, 24.

1. Sooq aappaqalertinnani eqqarsarluaqqaartariaqarpa?

APPARIINNEQ inuunermi aalajangernerit pingaarnerpaat ilagaat, taamaattumillu asuliigassatut isigineqanngisaannartariaqarpoq. Sooq? Inuuneq tamaat inummut allamut attaveqarnerusussaagami. Inuk katitat inuuninni sutigut tamatigut aveqatigisussanngorpat. Attaveqarneq tamanna pitsaasumik ingerlassappat inersimarpaluttumik naliliisinnaassuseq pisariaqarpoq. Aamma ’isumakkut nutaanngornissaq inuttaallu atinissaa’ pisariaqarput. — Evfisumiut 4:23, 24; naleqqiuguk Mosesimik allakkat siulliit 24:10-58; Matîuse 19:5, 6.

2, 3. (a) Qanoq ililluni silatusaarluni aappassarsiortoqarsinnaava? (b) Katissimalluni aappariinnerup suut nassatarai?

² Tuaviupiluttumik, timikkut pilerissutsinit aqutsiinnarluni, katinnginnissamut pissutissaqarluarpoq. Inuttut inersimasunngornissamut inuttullu pissutsinik ineriartortitsinissamut piffissaq pisariaqarpoq. Piffissap ingerlanerani misilittakkat ilisimalikkallu pitsaasumik naliliisinnaassuseqalernissamut aamma tunngavissaalluartarput. Taamaappallu eqqortumik aappassamik nassaarnissaq ilimanaateqarnerussaaq. Spaniamiut ima toqqaannartumik ussateqarput: „Kisimiittuuneq kukkusumik aappaninnermit pitsaaneruvoq.“ — Ussatit 21:9; Nalunaajaasup oqaasii 5:2.

³ Eqqortumik aappassarsineq ingerlalluarluni aappariinnissamut tunngaviunerpaavoq. Taamaattumik kristumiut Biibilimi najoqqutassiat najoqqutariniartariaqarpaat, timikkut pilerissutsimik misigissutsinilluunniit aqunneqaannarluni kissalaarfigisaqarnermit aqutsinnaveersaarlutik. Aappariinneq tassaannaanngilaq timikkut najortigiinneq. Aammali tassaavoq inuit marluk tamarmik immikkut pissusillit, ilaqutariinnik ilinniagaqarnikkullu assigiinngitsunik tunuliaqutallit, immaqalu assigiinngitsunik kulturillit assigiinngitsunillu oqaasillit, najortigiinnerat. Aappariinnermi oqaq eqqortumik atortariaqarpoq; oqaatsimmi pissaanerat atorlugu isaterisarpugut imaluunniit sanasarpugut. Tamakku tamaasa eqqarsaatigalugit aamma Paulusip ’taamaallaat Naalakkami katinnissamik’, tassa uppeqammik katinnissamik, unnersuussutaata silatussusia takusinnaavarput. — 1 Korintumiut 7:39; 1 Moses 24:1-4; Ussatit 12:18; 16:24.

Aappariit ajornartorsiutaat qanoq anigorneqarsinnaasut

4. Sooq aappariit ilaannikkut isumaqatigiinngissinnaasarpat?

⁴ Naak pitsaasumik tunngaveqaraluarluni atoruminaatsut tatineqarnerillu naapitassaasarput. Inuit tamarmik aappaqaraluarunik aappaqanngikkaluarunilluunniit tamakku naapitassarisarpaat. Aningaasatigut ajornartorsiutit peqqiilliornerlu qanorluunniit atugaqaraluaraanni naapitassaasarput. Misigissutsikkut allanngorarnerit  allaat aappariit ingerlalluarnerpaagaluit aporaassutigisinnaasarpaat. Taasarialik alla tassa kialuunniit oqqani kukkuneqanngilluinnartumik aqussinnaanngilaa, soorlu Jakob oqarsimasoq: ’Tamattami qassiinik naakkiuttarpugut; oqalunnikkut naakkiunnaveersoqarpat, taanna angutaavoq iluarluinnartoq timini iluunngarlugu allaat naalakkersorsinnaallugu. . . . Taamattaaq inuup oqaa mikisunnguugaluarluni oqallortoqaaq; ata, inninnguup orpiit qanoq amerlatigisut ikuallatsittarpai.’ — Jâko 3:2, 5.

5, 6. (a) Paatsooqatigiinneqaraangat qanoq iliortariaqarpa? (b) Isumaqatigiinnginneq aaqqinniarlugu qanoq iliuuseqartoqarsinnaava?

⁵ Aappariinnermi atoruminaatsorsiuleraangatta qanoq iliorsinnaavugut? Paatsooqatigiinnerup oqqannersuannguutinnginnissaa oqqannerullu aappariinnermik aseruutaannginnissaa qanoq ililluta pinngitsoortissinnaavarput? ’Anersaakkut isumaqaatikkut nutaanngornissaq’ tassani pisariaqarpoq. ’Anersaarput isumaqaaterput’ tamanna ajunngitsuusinnaavoq imaluunniit ajortuusinnaavoq, ineriartornarluni anersaakkullu pingaartitsilluni imaluunniit aserorsaasarluni, timikkut kajumissutsinik aqunneqarluni. Ineriartornartuusimappat, aappariit aaqqiagiinnginnertik aaqqinniarlugu iliuuseqassapput, aappariinnertik atatiinnarniarlugu. Isummat aalajangiussat isumaqatigiinnginnerluunniit pissutigiinnarlugit aappariinneq kipitinneqartariaqanngilaq. Biibilimi unnersuussutit atornerisigut silaannaq aaqqinneqarsinnaavoq aammalu ataqqeqatigiinneq paaseqatigiinnerlu  pilerseqqinneqarsinnaallutik. — Rûmamiut 14:19; Evfisumiut 4:23, 26, 27.

⁶ Pissutsinut tamakkununnga Paulusip oqaasii naleqquttorujussuupput: ’Taava Guutip qinigaasut iluartutut asanartutut atiniarsigik imaattut: nallittuingaarneq avaaginninnerlu nikanartinnerlu qanilaarnerlu kamajuinnerlu; immissinnut unnerluutissaqaraluarussi kamageqatigiillusilu isumakkeerfigeqatigiigitsi; soorlu Kristusip isumakkeerfigigaasi, taamattaaq ilissi pigitsi. Tamakkuali tamarmik qaasigut atiniarsiuk asanninneq; tamanna iluarluinnassutsip nimeraa.’ — Kulorsamiut 3:12-14.

7. Aappariit ilaat immaqa sumik ajornartorsiuteqarpat?

⁷ Tamanna atuassallugu oqitsunnguuvoq, ulluinnarnili tatineqarsinnaanivut pissutaallutik maleruarnissaa oqitsuinnaanngilaq. Ajornartorsiutit sumik pissuteqavissinnaappat? Ilaatigut kristumiu nassuerutigiumanngisaminik marloqiusamik pissuseqarsinnaavoq. Rigssalimi, anersaakkut qatanngitimi akornanni, inussiarnersuullunilu isumassuisuulluni, angerlarsimaffimminili, ulluinnarni, anersaakkut eqqarsarnissani puiortarlugu. Tassanimi marluinnaapput, uia nulialu; immaqalu tatineqarnermini rigssalimi oqaatiginavianngisaminik aapparminut oqaaseqartarsinnaalluni. Sooruna? Kristumiutut pissutsini peertarpaa. Guutip kiffaata puiorpaa aappani aamma angerlarsimaffimminni anersaakkut qatanngutigigamiuk. ’Anersaava isumaqaataa’ ajunngitsumut pinnani ajortumut saassimavoq. — Jâko 1:22-25.

8. ’Anersaaq isumaqaataasoq’ pitsaanngippat qanoq kinguneqarsinnaava?

⁸ Qanoq kinguneqassava? Immaqa uiusup ’nuliani silalimmik inooqatigiunnaarsimavaa pisattatullu qajannarnerusutut iliorunnaarsimallugu’. Immaqa nuliaasup uini ataqqiunnaarsimavaa — ’anersaaq piuaatsoq sallaatsoq’ katassimallugu. ’Anersaava isumaqaataa’ anersaakkut pingaartitsisuujunnaarluni timikkut pingaartitsisunngorsimavoq. ’Uinikkut isumaata’ artorsartippaa. Qanoq ililluni ’anersaap isumaqaataasup’ pitsaasuullunilu anersaakkut pingaartitsisuunissaa qulakkeerneqarsinnaava? Anersaakkut nukittorsartariaqarpoq. — 1 Pîtruse 3:1-4, 7; Kulorsamiut 2:18.

’Anersaakkut isumaqaatit’ nukittorsaruk

9. Ullut tamaasa sunik qinigassaqarpugut?

⁹ ’Anersaakkut isumaqaaterput’ tassaavoq arlaannik aalajangiiniarnitsinni qinersiniarnitsinnilu isummeriataartarnerput tunngaviusoq. Inuunitsinni qinigassarpassuaqarpugut — iliuutsit ajunngitsut ajortullu, namminissarsiortut namminissarsiunngitsullu, ileqqorissut ileqqorluttullu akornanni. Eqqortumik aalajangiinissatsinnut suna iluaqutigisinnaavarput? ’Anersaakkut isumaqaaterput’ Jehovap piumasaanik iliornissamik siunniussisimasuusariaqarpoq. Tussiaasiortoq ima qinusimavoq: „[Jehova], takutinnga ileqqoreqqusavit aqqutaanik, taava atuaqqissaassavara.“ — Tussiaat 119:33; Hesekiel 18:31; Rûmamiut 12:2.

10. Qanoq ililluta ’anersaaq isumaqaaterput’ ajunngitsup tungaanut nukittorsarsinnaavarput?

¹⁰ Jehovamut qanimut attaveqarutta taassuma kissaatigisaanik iliornissatsinnut iluaqutigissavarput, ajortorlu, ilaatigut allasiorneq, ingalassallugu. Israelikkut kajumissaarneqarsimapput ’Jehova Guutimik iluarisaanik eqqortuutitaanillu iliornissaminnut’. Guutili aamma ima oqarsimavoq: ’Jehovamik asannittusi-aa, ajortoq uumigisiuk.’ Israelikkut inatsisit qulit arfineq-aappassaat naapertorlugu allasiorneq uumigisussaasimavaat: „Allasiussanngilatit.“ Inassutikkut tassuunakkut takuneqarsinnaavoq  Guutip aappariinnermi ilumoorfigeqatigiinnissaq piumasarigaa. — 5 Moses 12:28; tugsiaut 97:10; 2 Moses 20:14; 3 Moses 20:10.

11. Aamma qanoq ililluta ’anersaarput isumaqaaterput’ nukittorsarsinnaavarput?

¹¹ Qanoq ililluta aamma ’anersaarput isumaqaaterput’ nukittorsarsinnaavarput? Iliuutsinik anersaakkut nalilinnik assut pingaartitsinitsigut. Tassa Guutip oqaasiinik atuaqqissaartarnitsigut pisariaqartitavut matussutissittarlugit, Jehovallu eqqarsaataanik unnersuussutaanillu oqalliseqarnerup nuannaarutissarsiffiginissaa ilinniarlugu. Qamuuna misigissutsivut tussiaasiortup misigineratut ittariaqarput: „Uummatikkut iluunngarlunga ujarpakkit, peqqussutitit qimallugit tammarnaveerilanga. Oqaatsisit uummatinni toqqortaraakka ilinnut ajortulioqqunanga. [Jehova], takutinnga ileqqoreqqusavit aqqutaanik, taava atuaqqissaassavara. Siuneqassusermik tuninnga unioqquteqqunagit inatsisitit, maleruaqqullugillu uummatikkut iluunngarlunga.“ — Tussiaat 119:10, 11, 33, 34.

12. Suut marluk iluaqutigalugit Kristusip isumaa atisinnaavarput?

¹² Jehovap najoqqutassiaanik naapertuilluartunik pingaartitsineq taama ittoq atatinneqartarpoq Biibilimi atuaqqissaarnikkuinnaanngitsoq aammali kristumiut ataatsimiinnerinut tamatigut najuunniartarnikkut kristumiutullu kiffartornermut peqataasarnikkut. Taakku marluk ’anersaakkut isumaqaatitsinnik’ nukittorsaajuarsinnaapput, taamaalillutalu namminissarsiunngitsumik inooriaaserput Kristusip isumaanut assingujuaannartissinnaavarput. — Rûmamiut 15:5; 1 Korintumiut 2:16.

13. (a) ’Anersaap isumaqaataasup’ nukittorsarniarnerani sooq qinuneq pingaaruteqarpa? (b) Tamatumuunakkut Jesus qanoq maligassiuisimava?

¹³ Paulusip Efesusimiunut allakkamini aamma alla taavaa, kajumissaarluta ’torlulasaraangatta qinusaraangattalu tamatigut anersaakkut qinusaqqulluta’. (Evfisumiut 6:18) Uiusut nuliaasullu ataatsimoorlutik qinusarnissartik pisariaqartippaat. Taamatut qinusarnerit uummammik ammaasarput akimmittoorfinni suniluunniit unneqqarissumik oqaloqatigiinnissamut tunngavissaasarlutik. Misilinneqarnitsinni ussernartorsiornitsinnilu qinunikkut Guutimut saaffiginnittariaqarpugut ikioqqulluta anersaakkullu nakussatseqqulluta Kristusip isumaanut naapertuuttumik iliuuseqarsinnaaqqulluta. Allaat Jesus naammalluinnartoq arlalippassuartigut Ataataminut nakussatseqqulluni qinusarsimavoq. Qamuuna ilumoorluni qinusarsimavoq. Ullumikkuttaaq ussernartorsiornitsinni uinimmut nakkaannaqqunata katinnermilu neriorsuutitsinnik unioqqutitseqqunata Jehovap qinnuigineratigut nakussatsinneqarsinnaavugut eqqortumik aalajangerluta. — Tussiaat 119:101, 102.

Maligassaalluartut maligassiuinerluttullu

14, 15. (a) Josef ussernartorsiortinneqarami qanoq qisuariarpa? (b) Usserniarneqarnerminut akiuunnissaminut Josefip suna iluaqutigaa?

¹⁴ Ussernartut qanoq ililluta akiorsinnaavavut? Josefip Davidillu iliuuseqarsimaneri assigiinngeqaat. Potifarip nuliata Josef, pinnersoq taamanikkullu katissimanngitsoq, anguseriniarfigiuartuarsimavaa. Josefilli akisimavaa: „Illumi matumani uannit oqartussaanerunngilaq. [Uivit] sumilluunniit erliguutinngilaanga; taamaallaat illit attoqqunngilaatit nuliarigamisit. Qanoq taama kanngunartigisumik iliussaanga Guutimut ajortuliorlunga?“ — 1 Moses 39:6-9.

¹⁵ Naak nakkaannarnissaq oqissinnaagaluaqisoq Josefip eqqortumik iliornissaminut suna iluaqutigaa? ’Anersaaq isumaqaataa’  nukittuujusimavoq. Jehovamut attaveqarnini sianigilluartorujussuuaa. Nalunngilaa arnamik anguseriniartumik taassuminnga kanngunartulioqateqaraluaruni uianuinnaanngitsoq aammali ajornerpaamik, Guutimut, ajortuliussalluni. — 1 Moses 39:12.

16. David ussernartorsiornerminut qanoq qisuariarpa?

¹⁶ Davidimi qanoq piva? Taanna katinnikuuvoq Inatsisinilu akuerisaasutut arlalinnik nuliaqarluni. Unnuit ilaanni illussaarsuarminit takulerpaa arnaq uffartoq. Tassa Batseba pinnersoq, Uriasip nulia. David qinigassaqalerpoq — isiginnaaginnarsinnaavaa pilerissutsini alliartuinnartillugu, imaluunniit alaannarsinnaavaa ussernartorsiorninilu tunuartillugu. Qanoq iliornissani qinerpaa? Arnaq illussaarsuarminukartippaa kanngunartulioqatigalugulu. Ajornerusumillu, uia toqutaatippaa. — 2 Samuel 11:2-4, 12-27.

17. David anersaakkut qanoq inissisimaffeqarsimassava?

¹⁷ Davidimuna suna ajornartorsiutigigaa? Tussiaat 51-imi peqqissimilluni anngiiaataatigut tamanna takusinnaavarput. Tassani oqarpoq: „Uummammik minguitsumik pinngortitsiviginnga, Guuti, anersaamik nutaamik ataavartussamillu tuninnga.“ Ersarippoq ussernartorsiornermini minguitsumik uummateqarsimananilu ataavartumik anersaaqarsimanngitsoq. Immaqa Jehovap inatsisaanik atuarnissani sumiginnarsimavaa, anersaakkut peqqigunnaarnermik kinguneqartumik. Immaqaluunniit kunngitut pissaanini atorfinilu eqqarsariartaatsiminik mingutsissutigisimavai, pilerissutsimut nakkariaannanngortilluni. Aap, ’anersaava isumaqaataa’ taamanikkut ajortilippalaarlunilu namminissarsiortuusimavoq. Taamaattumik „anersaamik nutaamik ataavartussamillu“ pisariaqartitsinini nassuerutigisariaqarsimavaa. — Tussiaat 51:12; 5 Moses 17:18-20.

18. Allasiorneq pillugu Jesus qanoq unnersuussiva?

¹⁸ Kristumiut aappariit ilaat aserorsimapput aappaasup aappaa marluullutilluunniit Daviditut anersaakkut sanngiillisimagamik. Davidip kukkuluttorsimanera mianersulissutigisariaqarparput arnamik angummilluunniit ajuutiginnilluta isiginnittuaannannginnissatsinnut, allasiornermimmi kinguneqarsinnaammat. Tamanna eqqarsaatigalugu inuit misigissusiinik Jesusip paasinninnini ersersippaa ima oqarluni: ’Tusarpusi siulliit ima oqarfigineqarmata: „Arnaaneqassanngilatit.“ Uangali oqarfigaassi: „Pileritsaallugu arnamut isigisup uummammigut arnaanerereerpaa.“’ Taamatut pisoqartillugu ’anersaaq isumaqaataasoq’ namminissarsiortuusarpoq timikkullu, anersaakkuunngitsoq, pingaartitsisuulluni. Kristumiulli qanoq ilillutik allasiorneq ingalassinnaavaat pilluarlunilu aappariinneq attatiinnarlugu? — Matîuse 5:2, 28.

Aappariinnerup nimia nukittorsarli

19. Aappariinneq qanoq nukittorsarneqarsinnaava?

¹⁹ Kunngi Salomon oqarsimavoq: „Angut kisimiittoq saassunneqaruni ajornanngitsumik artorsartinneqarsinnaavoq; marluusulli artorsartitaanatik akiuussinnaapput. Allunaasaq pingasulik kittorajaatsuuvoq.“ Marluk aappariinnermi oqimaaqatigiissumi suleqatigiilluinnartut atoruminaatsunut kisimiittumit akiuulluarnerusinnaapput. Aappariinneralli allunaasatut pingasulittut illuni Guuti ilaatinneqarpat nukittunerujussuussaaq. Qanoq ililluni Guuti aappariinnermi ilaatinneqarsinnaagami? Aappariit marluullutik taassuma aapperiinnermut najoqqutassiai unnersuussutaalu maleruarpatigik.  — Nalunaajaasup oqaasii 4:12.

20. Biibilimi unnersuussutit uiusup qanoq iluaqutigisinnaavai?

²⁰ Allassimaffinni tulliuttuni unnersuussutit uiusup maleruarpagit pilluarluni aappariinnissamut tunngavissat pitsaanerujussuussapput:

 ’Taamattaaq angutaasusi nuliasi silalimmik inooqatigisigik, pisattatut qajannarnerusutut iliorlugit, ataqqisigillu saammaannermik inuunerup pianik kingornusseqataasutut itillugit, qinusarnisi akornuseqqunagit.’ — 1 Pîtruse 3:7.

’Ilissi angutit, nuliasi asaniarsigik, soorluttaaq Kristusip ilagiit asagai imminillu tunniulluni taakku pissutigalugit. Taama angutit nuliatik asasariaqarpaat soorlu timitik. Nuliaminik asannittoq imminik asasaraaq.’ — Evfisumiut 5:25, 28.

„Uiata nersualaartarpaa ima oqarluni: ’Arnarpassuaqaraluarpoq pikkorissunik, illilli tamakkunannga tamanit nallernissaqanngilatit.’“ — Ussatit 31:28, 29.

„Kialuunniit aamat tullaarisinnaanerpai isikkani uutinngitsoorlugit? Taamatut ajunaartinneqassaaq inoqammi nulianik atuisoq. Isumaatsutut iliorpoq allap nulianik atuisoq, taamaaliortoq imminut aseruutissiuinnarpoq.“ — Ussatit 6:28, 29, 32.

21. Biibilimi unnersuussutit nuliaasup qanoq iluaqutigisinnaavai?

²¹ Nuliaasup Biibilimi najoqqutassiat makku eqqumaffigippagit aappariinnerup ataannarnissaanut iluaqutaassaaq:

 ’Taamattaaq nuliaasusi uissinnut naalattuugitsi, oqaatsimut naalasseriitsoqarpat taakku oqaaseqanngitsukkut nuliamik saqineratigut ilataarineqaqqullugit, mianerinnillusi piitaajuitsumik saqinersi isigisaranngamikku.’ — 1 Pîtruse 3:1-4.

’Angutip nulii [kinguaassiuutitigut] ileqqussamisut ilassiliuk; taamattaaq nuliaasup uini. . . . Erliguuteqatigiinnasi pigitsi, kisianni piumaqatigiikkaangassi pisarlusi.’ — 1 Korintumiut 7:3-5.

22. (a) Suut allat aamma aappariinnermut ajunngitsumik sunniuteqartarpat? (b) Jehovap avinneq qanoq isigaa?

²² Biibilimi aamma ersersinneqarpoq asanninneq, inussiarnerneq, naakkinninneq, naammagittarneq, paasinninneq, qiimmassaaneq nersuisarnerlu aappariinnerup nakuussusiata pingaartut ilagigaat. Aappariineq tamakkuninnga amigaateqartoq soorlu tassa naasoq imerterneqarneq seqinnerfigineqarnerlu ajortoq — naasoq qaqutiguinnaq sikkertartoq. Taamaattumik ’anersaarput isumaqaaterput’ kajumississutigalugu aappariinnermi qiimmassaqatigiillutalu nutaanngorsaqatigiittarniarta. Eqqaamajuk Jehovap ’avinneq uumigimmagu’. Aappariinnermi kristumiutut ilumoortumik asaqatigiinneqarpat allasiorneq avinnerlu pinngitsuussapput. Sooq? ’Asanninneq soraanngisaannarmat.’ — Malaki 2:16, (NV); 1 Korintumiut 13:4-8; Evfisumiut 5:3-5. (wD 15/2 93)

Nassuiarsinnaviuk?

□ Aappariinnerup pilluarnartuunissaanut suna aalajangiisuua?

□ ’Anersaaq isumaqaat’ aappariinnermi qanoq pingaaruteqarsinnaava?

□ ’Anersaaq isumaqaaterput’ qanoq ililluta nukittorsarsinnaavarput?

□ Josef Davidilu ussernartorsiortinneqarnerminni qanoq qisuariarpat?

□ Biibilimi unnersuussutit suut iluaqutigalugit uiusut nuliaasullu aappariinnermi nimertik nukittorsarsinnaavaat?

[Atuaqqissaarnermi apeqqutit]

[Qupp. 15-mi assiliartat]

Ilaannikkut marloqiusamik pissuseqartarnerpugut — ilagiinni inussiarnerluta angerlarsimaffimmillu peqqarniilluta?