Asanninnerup aqqutaa ajunnginnerungaartoq atuaruk

JEHOVA GUUTI asassutaavoq. (1 Juánase 4:8) Taassuma ernera, Jesus Kristus, oqarsimavoq Guuti tullerpullu asassagivut. (Matîuse 22:37-40) Guutip pinngortitarsuani avataarsualu tamaat asanninnermik aquppai! Taamaattumik qilammi nunamiluunniit naassaanngitsumik inuusussaagaluarutta asanninnerup aqqutaa atuartariaqarparput.

Guutip inuiaqatigiit Israelikkut asanningaarnermik ersersitsivigisarsimavai, kingornali ilumuunnginnerat pissutigalugu peqatigiissortariunnaarpai, ilagiillu Jesusip ajoqersugaanik inuttallit peqatigiissortartaamisut toqqarlugit. Qanoq ililluni? Oqqanik pruffiitisullu oqalussinnaalissutigisaannik anersaamik illernartumik kuisiffigineratigut. Ukiumi 33-mi piinsip ulluani juutit juutinullu ilasiaasut 3000-it uppertunngorput peqatigiissortatoqqallu qimallugit nutaanut ilanngullutik. (apustilit suliait 2:1-41) Anersaap tunissutai tamakku Jesusip apustiliisigut ajoqersukkanut nutaanut taakkununnga ingerlatinneqarsimapput, apustilillu toqummata taamaattumik atorunnaarput. (apustilit suliait 8:5-18; 19:1-6) Taamanikkulli uppernarsisinneqarsimavoq Guutip iluarisai tassaalersut anersaakkut Israelikkut. — Galâsiamiut 6:16.

Anersaap tunissutaasigut tupinnartuliarineqartut assut iluaqutaasimapput. Anersaalli tunissutaanik tamakkuninnga pigisaqarnermit inunnut allanut asanninnermik namminissarsiunngitsumillu soqutiginninnermik ersersitsinissaq pingaarneruvoq. Tamanna apustili Paulusip Korinthimiunut allakkamini siullerni (ukiup 55-ip missaani) ersersippaa. Tassani asanninneq taasimavaa ’aqqummik aatsaat aqqutaalluartumik’, imaluunniit aqqummik ajunnginnerungaartumik. (1 Korintumiut 12:31) Aqqut tamanna Korintumiunut agdlagkat sujugdlît, kapitali 13-imi, eqqartorneqarpoq.

Asannissuseqanngikkutta suunngilagut

Paulus ima allappoq: ’Inuit inngilillu oqaasiinik oqaluttaraluaruma asannissuseqarnangali, kanngussak sianaartoq avilortunnguarluunniit sianaalasoq taava assigeqqajaqaakka.’ (1 Korintumiut 13:1) Anersaap ikiuineratigut nunami oqaatsinik immikkut ittunik oqalussinnaagaluaraanniluunniit imaluunniit oqaatsinik qilammiorpaluttunik inngilit atugaannik atuisinnaagaluaraanniluunniit asannissuseqanngikkaanni iluaqutaanavianngilaq. Paulus oqaatsinik inuit paasisinnaanngisaannik ti tuusintinik oqalunnissaminngarnit oqaatsinik tallimanik kajumissinartunik oqaaseqarusunnerusarsimavoq. (1 Korintumiut 14:19) Inuup asannissuseqanngitsup ’kanngussak sianaartoq’ assigissavaa — gonggongi qoqianngunartumik avilortoq imaluunniit ’avilortunnguaq sianaalasoq’ tusarniitsoq assigalugu. Asannissuseqarani oqqanik oqalunneq Guutimik unnersiutiginnissutissatut innuttaanillu ikiuissutissatut atorsinnaananilu anersaakkut kajumissinanngilaq. Ullumikkut kristumiutut kiffartornitsinni  oqaatsinik paasinartunik oqaluttarnitsigut asaninnermik ersersitsisarpugut.

Apustili taava nangippoq: ’Pruffiitisullu oqalussinnaagaluarumaluunniit, anngigisallu tamaasa ilisarsissutillu tamaasa ilisimagaluarukkit, uppernerlu tamaat pigigaluarukku qaqqarsuit nutsersinnaagaluarlugit allaat, asannissuseqarnangali, taava suunngeqqajaanga.’ (1 Korintumiut 13:2) Tupinnartuliornikkut pruffiititigut tunissutit, anngigisanik illernartunik immikkut ilisimasaqarneq ilisimasaqassuserlu anersaakkut tunniussaasoq allanut iluaqutaasinnaagaluarput, tamakkuninngali pigisaqartut asannissuseqanngikkunik namminneq iluaqutiginavianngilaat. Paulus inunnik allanik ikiuiniarnermini atorsinnaasaminik anngigisanut illernartunut immikkut ilisimasaqarsimavoq. Ilaanni ilisimassut tunissutaasoq immikkut ittoq ikiortigalugu siulittuisimavoq umiarsuup umiiarnerani annattoqarumaartoq. (apustilit suliait 27:20-44; 1 Korintumiut 4:1, 2) Naalli ’ilisimassut uppernerlu tamaat’ pigigaluarlugit asannissuseqanngikkuni Jehovap isaani suunavianngikkaluarpoq.

Ullumikkut Jehovap anersaava ikiortigalugu Biibilimi siulittuutit anngigisallu illernartut taassuma nalunaajaasuisa paasisinnaavaat, anersaarlu tamanna ikiortigalugu ilisimasatik inunnut allanut ingerlateqqittarpaat. (Joel 2:28, 29) Aamma anersaaq uppernermik, akornutissanik qaqqatut ittunik qaangiiniarnermi pisariaqartumik, pilersitsisinnaavoq. (Matîuse 17:20) Tamakku tamarmik anersaaq ikiortigalugu pisarmata inuttut ataqqinaatiginiassallugit kukkunerussaaq. Guutimut ataqqinaatissamik taassuminngalu inoqatitisinnillu asannilluta sulinngikkutta suunavianngilagut. — Galâsiamiut 5:6.

Asannissuseqarani pilliutigisaq naleqanngilaq

Paulus allassimavoq: ’Pikkalu tamaasa tunniukkaluarukkit, timigalu ikikkartikkaluarukku, asannissuseqarnangali, taava iluaqutiginngeqqajaqaara.’ (1 Korintumiut 13:3) Paulus asannissuseqarani piminik tamanik inunnik allanik nerisitsigaluaruni iluaqutiginavianngilaa. Tunisinitsinni asannissuserput pillugu, tunissutitta timikkut nalii pinnagit, Guutip akilertarpaatigut. Aamma Ananiasitut Safiratullu tunisiumatussutsitsigut ataqqisaaniarsarigaluarutta iluaqutiginavianngilarput. (apustilit suliait 5:1-11) Paulus maligassiuilluarsimavoq Judeami qatanngutinik ajornartoortunik ikiuiniarnermut atatillugu asannissutsimigut imminit tunissuteqarsimagami. — 1 Korintumiut 16:1-4; 2 Korintumiut 8:1-24; 9-7.

Sallusuissummik nalunaajaassutiginninneq pissutigalugu marteerisut toqutaagaluaraanniluuniit, asannissuseqanngikkaanni Guutimut naleqanngilaq. (Ussatit 25:27) Jesusip pilliutini eqqartortarsimavaa, pingaakujunniutigisarsimanaguli. Pingaakujunniarnermut taarsiullugu imminut tunniuppoq, asannissutsiminit killinneqarluni. (Mákorse 10:45; Evfisumiut 5:2; Eprîarit 10:5-10) Taassuma anersaakkut qatanngutaasa Guutimut kiffartornermut ’timitik pilliutitut uumasutut tunniussimavaat’, imminut unnersiutiginiarluni naalliutsinnikkuunngitsoq, takoqqusaaratilli Guutimik unnersiutiginninnermikkut taassumunngalu asanninnerminnik ersersitsinermikkut. — Rûmamiut 12:1, 2.

Asanninnerup qanoq iliuuseqartissagaatigut

Paulus ima allassimavoq: ’Asannittoq kamajuillunilu inussiarneraraaq.’ (1 Korintumiut 13:4a) Guutip kamajuissusiata,  imaluunniit kamagittassusiata, Adamip ajortuliornerata kingornali amerlasuut annannissamut isumataarnissaannik periarfississimavai. (2 Pîtruse 3:9, 15) Asannissuseqarutta naammagittarluta inuit allat sallusuissummik ilinniartikkumassavavut. Kamaleriataartarnavianngilagut isumassuisuullutali isumakkeerfiginnissinnaassalluta. (Matîuse 18:21, 22) Asannittoq aamma inussiarnersuuvoq. Guuti inussiarnernera pissutigalugu kajungerfigisarparput. Inussiarnerneq Guutip anersaavata inerititaasa ilagaat, inussiarnersuuguttalu inuit allat uagutsinnut piumaffiginninnerannit annerusumik piumaffiginavianngilavut. (Evfisumiut 4:32) Aamma asanninnerup inunnut qujasuitsunut inussiarnernissatsinnut kaammattortarpaatigut. — Lúkarse 6:35.

Paulus nangippoq: ’Asannittoq sinngasarinngilaq; asannittoq usorsitsaartuunanilu annerujumatuusarinngilaq.’ (1 Korintumiut 14:4b) Sinnganeq uinngup suliaanut ilaavoq Guutillu naalagaaffianut isernissamut akornusiisinnaalluni. (Galâsiamiut 5:19-21) Asannissuseqarutta allat pigisaat pitsaanerusunillu atugaqarnerat pissutigalugit sinngaginavianngilavut. Alla immikkut pisinnaatitaaffiusumik angorusutatsinnik kiffartortunngortinneqarpat asannissuseqarutta nuannaaqatigissavarput, tamakkiisumik tapersersorlugu, Guutilu qutsavigalugu ilagiinni atorsinnaammagu.

Asannittoq ’usorsitsaartuunngilaq’. Taamaattumik Guutip imminut kiffartornitsinni uagutsinnut naammassisitai pingaarniakujuutigisussaanngilavut. Korinthimiut ilaat anersaap tunissutaanut pilerfiusutullusooq pingaarniakujussimapput. Anersaalli tunissutai Guutimeersuupput, taamatuttaaq ullumikkut peqatigiissortaasa akornanni immikkut pisinnaatitaaffiit ilatsinnit nuannaarutigineqarlutik suliarineqartut Guutimeersuupput. Guutip peqatigiissortaani uagutsinnut suliassiissutigineqarsimasumik pingaarniakujuutiginninnissamut taarsiullugu mianersuinnartariaqarpugut ajortimut nakkaannarumata. (1 Korintumiut 1:31; 4:7; 10:12) Asannittoq ’annerujumatuusarinngilaq’. Inuit asanninngitsut imminnut sorsuartut isigilersinnaasarput, inuilli asannittut allanit annerusutut misigineq ajorput. — 1 Korintumiut 4:18, 19; Galâsiamiut 6:3.

Ippinnartuliortanngilaq, namminissarsiortuunngilaq peqqissaarussisuullunili

Asannittoq ’ippinnartumik iliortarinngilaq; namminissaminik piniartarinngilaq, narrutsattarinngilaq’. (1 Korintumiut 13:5a) Asanninneq ileqqorissaartunngornissamut, Guutimik mianerinnittumik ileqqoqarnissamut, oqartussaassusilinnut ataqqinninnissamut kristumiullu ataatsimiinnerini pissuserissaarnissamut iluaqutaasarpoq. (Evfisumiut 5:3-5; 1 Korintumiut 11:17-34; 14:40; naleqqiuguk Judas 4, 8-10.) Asannittoq misigisarmat atorfissaqartinneqarluni, soorlumi timip pisatai tamarmik atorfissaqartinneqartartut, taamaammat ilagiit asannittut qimaaffissaapput eqqissineqarfiusut. (1 Korintumiut 12:22-25) ’Namminissamik piniarnissamut’ taarsiullugu asanninnerup ilaannikkut pisinnaatitaaffitsinnik tunullinngortitsiinnarallartittarpaatigut allanik soqutiginninnermik iluarusutsitsinissamillu sallinngortitsisilluta. (Filípimiut 2:1-4) Asanninnerup kiffartornerput aqqutigalugu ’allat annaakkumallugit tamanut tamalaasutut innissatsinnut’ kaammattortarpaatigut. — 1 Korintumiut 9:22, 23.

Asannittoq ’narrutsattarinngilaq’. Kamattorsuanngoriataartarneq uinngup  nakkaannikup suliaanut ilaavoq, asanninnerulli ’kamakkumaarnertuunngortittarpaatigut’. (Jâko 1:19; Galâsiamiut 5:19, 20) Uumitsannissatsinnut pissutissaqarsinnaasarpugut, asanninnerulli kamaqqajuaannarnissaraluarput taamaalillutalu Diaavulumut nakkaannarnissaraluarput akornusertarpaa. (Evfisumiut 4:26, 27) Ingammik utoqqaanertat uppeqatimik unnersuunneqarnertik malinngippassuk kamannaveersaartariaqarput.

Asannittoq pillugu Paulus aamma ima allappoq: „Eqqunngitsuliorfigisaanernik tamanik naatsorsuutiginnittarinngilaq.“ (1 Korintumiut 13:5b, NV) Asannittup kukkuluttornerit tamannguisa atuakkami naatsorsuutinut allattuiffimmut allattoqqissaarneqartussatut naatsorsoqqissaarneq ajorpai. Uppeqatimi ajunngitsortai isiginiarnerusarpai ajuallatsinneqarninilu imaluunniit paatsuuinikkut ajuallannini akisarnagit. (Ussatit 20:22; 24:29; 25:21, 22) Asanninnerup ’eqqissinartunik’ ujartuinissatsinnut ikiortarpaatigut. (Rûmamiut 14:19) Paulus Barnabasilu isumaqatigiinngillutik oqqatereerlutik oqaluusseqatigiikkunnaarsimapput, asanninnerulli aporaannerat aaqqissimavaa puttarsisaqannginnissaannillu ikiorsimallugit. — 3 Moses 19:17, 18; apustilit suliait 15:36-41.

Naapertuilluarneq ilumoornerlu ujartortarpai

Asanninneq pillugu Paulus nangilluni oqarpoq: ’Iluannginneq tipaatsuutigisarinngilaa, sallusuissulli tipaatsuutigisaraa.’ (1 Korintumiut 13:6) Inuit ilaat naapertuilluanngitsunik ima nuannarisaqartigipput allaat ’orlutitaqarsimanngikkaangamik sinissaaruttarlutik’. (Ussatit 4:16) Guutilli peqatigiissortaani saqitsaateqatigiinneq ajorpugut ajortuliortoqaraangallu nuannaarutigineq ajorlugu. (Ussatit 17:5; 24:17, 18) Ilagiinni Korinthimiittuni Guutimut naapertuilluassutsimullu asanninneq piviusoq atuussimagaluarpat kanngunartuliorneq akueriinnarneqarsimanavianngikkaluarpoq. (1 Korintumiut 5:1-13) Naapertuilluassutsimut asanninnitta ilaatigut tv-kkut, filmitigut isiginnaartitsissutikkulluunniit isiginnaagassianik iluaatsunik ulikkaartunik isiginnaarnissatsinnut nangarsimasarpaatigut.

Asannittup ’sallusuissut tipaatsuutigisarpaa’. Tassani sallusuissut naapertuilluanngissutsip akerliatut taaneqarpoq. Pissutaasoq tassaagunarpoq sallusuissutip inunnut iluartumik sunniuttarneranik asanninnerup tipaatsuutiginnitsittarmatigut. Ineriartornartut aammalu sallusuissummut naapertuilluassutsimullu iluaqutaasut nuannaarutigisarpavut. Asanninnerup sallunaveersittarpaatigut, nuannaartarpugullu eqqortuliorusuttoq pisuunngitsoq paasigaangatsigu, sallusuissummi ajugaagaangat nuannaartaratta. — Tussiaat 45:5.

Asannittoq kamaginnittuuvoq ilalaartuullunilu

Paulusip asanninnermik nassuiaanini nangippaa ima allalluni: ’Tamatigut kamaginnittaraaq, tamatigut upperaraaq, tamatigut neriuttaraaq, tamatigut ilalaararaaq.’ (1 Korintumiut 13:7) Asannittoq ’kamaginnittaraaq’, tassa isumatta piumanngisatsinnik iserfigineqannginnissaa isumagisarpaa, soorlu qaliaq ussissoq sialummit pitarneqarsinnaanngitsoq. Arlaata ajuallatsippatigut isumakkeerfigeqqullunili, asanninnerup ikiortarpaatigut pisimasup siaruarternissaanut taarsiullugu naapertuilluanngitsuliorfigineqarnitsinnik naammagalugu atuinissatsinnut isumakkeerfiginninnissatsinnullu. Asanninnitsigut qatannguterput ’utertinniarsarisarparput’.  — Matîuse 18:15-17; Kulorsamiut 3:13.

Asannittoq Guutip oqaasiinut ’tamatigut upperaraaq’, anersaakkullu inuussutissanik „inussiaq aalajaallunilu silatooq“ aqqutigalugu pisartakkatsinnik asanninnitta qujamasutsittarpaatigut. (Matîuse 24:45-47, NV) Soorunami uppiasuunngilagut, asanninnerulli pasinnikkajuttumik uummateqannginnissatsinnut uppeqatittalu iliuutsiminnut pissutaannik ajortuusorinninnginnissatsinnut ikiortarpaatigut. (Nalunaajaasup oqaasii 7:21, 22) Asannittoq Biibilimi allassimasunik ’tamatigut neriuttaraaq’, soorlu Guutip naalagaaffia pillugu ajoqersuutinik ilumoortunik. Asanninnermit kajumissisinneqarluta neriuutigaarput qinnutigisarlugulu misilinneqarnivut ajunnginnerpaamik qaangerumaarivut. Aamma asanninnerup neriuutitsinnik allanut ingerlatitseqqinnissatsinnut killittarpaatigut. (1 Pîtruse 3:15) Oqaatigineqarsinnaavortaaq asannittoq ’tamatigut ilalaartuusoq’, soorlu ajortuliorfigineqarnermini. (Ussatit 10:12) Guutimut asanninnitta malersorneqarnitsinni allatullu annikilliornitsinni naammagittarnissatsinnut ikiortarpaatigut.

Paulus nangippoq: ’Asanninneq soraarnavianngilaq.’ (1 Korintumiut 13:8a) Soorlu Jehovap uagutsinnik isumassuinera soraarnavianngitsoq asanninneq soraarnavianngilaq. Guuterput naassaanngitsoq asassutaammat, pissuseq tamanna atorunnaanngisaannassaaq. (1 Timûtiuse 1:17; 1 Juánase 4:16) Guuti asanninnermigut aqutsiuaannassaaq. Taamaattumik Guuti qinnuiginiartigu namminissarsioriartarnitta ajugaaffiginissaanut anersaamilu inerititaanik pakatsisitsineq ajortumik tamatuminnga ersersitsinissatsinnut ikioqqulluta. — Lúkarse 11:13.

Atorunnaartussat

Siunissaq eqqarsaatigalugu Paulus ima allappoq: ’Pruffiitisulluunniit oqaluttarnerit atorunnaassapput, oqaatsilluunniit allanertat soraassapput, ilisarsinerluunniit atorunnaassavoq.’ (1 Korintumiut 13:8b) ’Pruffiitisut oqaluttarnernernik’ tunissut inunnik nutaanik siulittuisinnaatitsisarsimapput. Ilagiit kristumiut Guutip peqatigiissortaasut aalajaallisinneqareermata taamaaliorsinnaatitsineq atorunnaarsimavoq, Guutilli siulittuisinnaassusia atorunnaanngisaannaassaaq, oqaasiilu siulittuutinik ullumikkut pisariaqartitatsinnik tamanik imaqarput. Aamma anersaap ikiuineratigut oqqanik oqalussinnaaneq ’atorunnaarsimavoq’, taamatuttaarlu aamma ilisimassut immikkut ittoq. Jehovammi oqaasii tamakkiilluinnartuupput annannissatsinnullu pisariaqartitatsinnik tamanik imaqarlutik. (Rûmamiut 10:8-10) Aammalu Guutip innuttai taassuma anersaavanik ulikkaarput anersaallu inerititaanik inerititaqarlutik.

Paulus nangippoq: ’Ilisarsinivut ilaannaammata pruffiitisullu oqaluttarnivut ilaannaammata; kisianni tamarmiusoq nalliuppat ilaannaasut atorunnaassapput.’ (1 Korintumiut 13:9, 10) Ilisimassummik immikkut ittumik pruffiitisullu oqalussinnaassutsimik tunissutit tamakkiisuusimanngillat. Siulittuutaasarsimasut annikitsualuttaat ilanngunnatik eqquuttarsimagunarput, pruffiitillu tamarmik immikkut siulittuutiminnik tamakkiisumik paasinnissinnaannginnertik pissutigalugu siunissaq ilaannakortumiinnaq saqqummersittarsimavaat. Siulittuutinilli paasinninneq ilaannakuujunnaariartuaarsimavoq. Soorlu assersuutigalugu pisimasut uppernarsarpaat Jesusip inuiannut kunngiussuseqalersitaanissaanik siulittuut 1914-imi eqquussimasoq. Taamanimiilli  ’naggatissap nalaani’ inuulersimavugut anersaakkullu paasisimasavut Biibilimilu siulittuutinik paasinninnerput annertusiartuinnarsimapput. (Daniel 12:4) Taamaattumik ilisimassuterput ’tamakkiisunngulerpoq’.

Pissuseq pingaarnerpaaq ataannassaaq

Ilagiit anersaakkut ineriartornerat eqqarsaatigalugu Paulus allappoq: ’Meeraagallarama meeqqatut oqaluttarpunga meeqqatullu isumaliorlunga meeqqatullu eqqarsarlunga, meeraajunnaaramali meerarpaluttut atorunnaarpakka.’ (1 Korintumiut 13:11) Meeraq killilimmik ilisimasaqarnini killilimmillu timikkut inerissimanini tunuliaqutaralugit iliuuseqartarami, illuatungaanit illuatungaanillu sunnertiasuusarpoq, soorlumi tassa naalungiarsuk siniffimmini uaatinneqartoq. Inersimasorli timikkut inerissimaneroqisoq ilisimasaqarneruvoq, taamaattumillu tammartinneqajasuunani. Meeqqatut eqqarsariaatsini ilioriaatsinilu atorunnaarsimavai. Taamatuttaaq Guutip nunami peqatigiissortai meeraajunnaarsimasutut oqaatigineqarsinnaapput. Taamaattumik Guutip siulittuisinnaassutsimik, oqqanik oqalussinnaassutsimik immikkullu ilisimassummik peqatigiissortamini atuutititsinissaq pisariaaruttutut isigaa. Naak ilagiinnut ’inersimasunut’ ullumikkut ilaasut tunissutinik tamakkuninnga pisariaqartitsisutut misiginngikkaluarlutik, taamaattoq Guutip anersaavanit siulersorneqarlutik taassumunnga kiffartornertik nuannaarutigaat.

Paulus nangippoq: ’Maannakkut tarrarsuutikkut isigisaqarpugut, nalunartukkut, taavali kiinarsillugu isigisaqarumaarpugut; maannakkut ilaannaasumik ilisarisaqarpunga, taavali ilisarsilluarumaarpunga soorlu uanga ilisarilluarneqarsimasunga.’ (1 Korintumiut 13:12) Ilagiit meeraagallarmata Guutip tamanik saqqummersitsinissaanut piffissanngorsimanngilaq. Taamaattumik ersarissumik takusaqarsinnaasimanngillat, soorlu saviminermut qillarluttumut tarrarsorfigiuminaatsumut tarrarsortut. (apustilit suliait 1:6, 7) Ullumikkulli pissutsit erseqqarluttumik isiginngilavut. Siulittuutit siumullu assersuutit eqquussorput, piffissamimi Guutip anngigisanik saqqummersitsiviani inuuvugut. (Tussiaat 97:11; Daniel 2:28) Naak Paulusip Guuti nalusimanngikkaluarlugu aatsaat qilammi makitinneqaruni kristumiutullu inuunerminut tamakkiisumik akissarsiassani tiguguniuk tamakkiisumik Jehova ilisimarisimalersussaasimavaa tamakkiisumillu attaveqarfigilerlugu.

Paulusip asanninnermik immikkut pissusersiuinini ima naggaserpaa: ’Maannali uku pingasut atapput: upperneq neriunnerlu asanninnerlu; asanninnerli taakkua annersaraat.’ (1 Korintumiut 13:13) Naak ilagiit anersaap tupinnartuliorsinnaatitsinera piginngikkaluarlugu tamakkiinerusumik ilisimasaqarput aamma uppernerminnut, neriunnerminnut asanninnerminnullu annerusumik tunngavissaqarlutik. Guutip neriorsuutigisimasaanut tamanut uppissuseqarput, eqquutereersimasutullusooq isigalugit. (Eprîarit 11:1) Guutip oqaasiini siulittuutigineqarsimasut eqquuppata uppernerup ilaa aalajangersimasoq atorunnaassaaq. Neriuut eqquutinneqarpat neriunnerup ilaa peerutissaaq. Asanninnerli ataannassaaq. Taamaattumik qanortoq Jehovap nalunaajaasui tamarmik asanninnerup aqqutaatigut ajunnginnerungaartukkut ingerlajuaannarlik. (wD 15/7 92)