Ataatsimeersuarneq „Guutimit ajoqersorneqartut“

JEHOVAMIT ajoqersorneqarusuttut tamarmik ataatsimeersuarnissaq „Guutimit ajoqersorneqartut“ pissangallutik qilanaaraat. Ulluni sisamani ataatsimeersuarnerni Biibilimi najoqqutassiat pingaartut kristumiut silarsuarmi perulluliorfiusumi ajornartorsiorfiugaluttuinnartumilu inuunerminni illersuutigisinnaasaat erseqqissaatigineqassapput. ’Ajoqersuummut peqqissinartumut akerartortunut’ akiuussinnaanissaminnut Guutillu oqaasiinik ilinniartitsinermut pikkorissinerunissaminnut ataatsimeersuarnermi ikiorneqassapput. — 1 Timûtiuse 1:10.

Maligassaalluartunik maligassaqarpugut! Jehova Guuti nammineq tassaavoq Ajoqersuisoq annerpaaq. Elihu ilumoorpoq Jobimut oqarami Jehova „narsap nersutaasa ilisimasaannit annerusumik uatsinnik ilisimasaqalersitsisoq timmissanillu qilaap ataaniittunit uatsinnik silatunerulersitsisoq“. Elihu aamma Jehova pillugu aperisimavoq: „Kina taassumatut ajoqersuisinnaassuseqarpa?“ (Job 35:11; 36:22) Jehova aamma Jesaja 30:20-mi ’ajoqersortitut’ taaneqarpoq.

Jehova Guutimut tullersortaalluni Jesus Kristus ajoqersuisorsuuvoq. Taamatummi — ’Ajoqersuisutut’, ilinniartitsisartutut — ilisimaneqarsimavoq, iivangkiiliulersaarutinilu 50-it missaanni taamatut eqqartorneqarsimavoq. Jesusip inuppassuit ajorunnaarsissimavai amerlasuunillu tupinnartuliorsimalluni; taamaakkaluartorli ’Nakorsatut’ pinnani kisianni ’Ajoqersuisutut’ ilisimaneqarsimavoq. — Matîuse 8:19; Lúkarse 5:5; Juánase 13:13.

Taamaattumik aamma naleqqussimavoq Jesusip ajoqersukkani apustilinilu immisut ajoqersuisunngornissaannik ilinniartissimammagit. Matîuse 10:5-imiit 11:1-imut aamma Lúkarse 10:1-11-mi ersersinneqarpoq taamatut ilinniartissimagai. Jesusip qilaliarnissani sioqqutitsiarlugu ajoqersukkani ajoqersuiartoqqusissummik ilisimaneqarluartumik, Matîuse 28:19, 20-mi atuarsinnaasatsinnik, peqqussuteqarfigisimavai. apustilit suliáinik agdlagkat-ni aamma Kristumiut Allagaataat Griikerisuut-ni ersersinneqarpoq Jesusip ajoqersugai siulliit peqqussummik tamatuminnga maleruaanerminnut atatillugu qanoq ilungersuussilluartigalutillu peqqissaartigalutillu aalajaassimatigisut.

Ajoqersuinermik, imaluunniit ilinniartitsinermik, suliassaq tamanna ullumikkut aatsaat taama pingaaruteqartigilersimavoq. Pissutsit aaqqissuussaanerata matuma naggatissaani inuuvugut, taamaattumillu inuit inuuneri navianartorsiorput. Inuit ilinniartinneqarnissaat Babylonimillu Angisuumit aninissaannik ikiornissaat pisariaqarluinnarpoq; Babylonip ajortuliorneranut peqataassanngikkunik perlussiortitaaneranillu eqqugaaqataassanngikkunik Jehova naalagaaffialu aalajangerfigisariaqarpaat. — sarĸúmersitat 18:4.

Ajoqersuiartoqqusissummik maleruaaniarlutik ilungersuussineranni kiffani tamaasa ikiorniarlugit Jehovap peqatigiissortani aqqutigalugit ataatsimeersuarnissaq „Guutimit ajoqersorneqartut“ aaqqissuussimavaa. Ulluni sisamani ataatsimeersuarnissat tamakku nunarsuup affaani avannarlermi aasalernerani aallartissapput. Qanortoq Jehovap kiffaasa tunniulluinnarsimasut tamarmik ataatsimeersuarnerit tamakku ilaat minnerpaamik ataaseq najuuffigigilissuk, qanortorlu tamatta sisamanngornermi ualikkut aallarniummik erinarsorlunilu qinunermit sapaammi ualikkut naggasiilluni qinuneq tikillugu najuunnissarput malinnaalluarnissarpullu siunniussimatigik. (wD 15/2 93)