Uppernini pillugu tamaviaarsimavoq

UKIUT PINGASUT matuma siorna Caridad Bazán Listánip, Jehovap Nalunaajaasuisa ilaata Cádizimi Spaniamiittumi najugallip, pilanneqarnissaa pisariaqarluinnalersimavoq. Sunngamigut ujarattaqalersimanerata kissarneqartippaa aamigullu toqunartoqalersissimallugu. Napparsimmavimmut unikkami aalersortikkumannginnini Biibilimik tunngaveqartoq nassuiaatigaa. Aak atornagu pilannissaa nakorsat akuersissutigaat. Pilattaasarfimmukaatinnginneranili allagartamik atsioqquaat. Tassani ersersinneqarpoq aalersortikkumannginnera ataqqigitsik, pisariaqalissagaluarpalli passuseriaatsimik sumilluunniit atuinissaminnut akuersinissaa piumasarigitsik.

Allagartamik taama ittumik atsiornerup kingunerisassai pillugit ilagiinni utoqqaanertap napparsimmavimmi najuuttup Caridadillu ernerata aamma Nalunajaasuusup Caridad nassuiaappaat. Atsioraluaruni nakorsat pisinnaatissagaluarpai pisariaqalissagaluarpat aalersuinissaannik. Nakorsat pilattaasarfimmukaammanni atsiorniannginnerminik nassuiaappai. Ingerlaannaq inaanut utertinneqarpoq isumaanillu allanngortitsisinniarsuataarneqalerluni.

Oqaloqatigeqattaareeraluarlugu aalajangerput inatsisilerituumik aggeqqusiniarlutik paasitinniassammagu, iluaqutaanngitsumilli. Caridadip nassuiaappai aalersornissaminik akuerigaluarunigit Guutimit pisuutitassaasutut misigisimassalluni. Tikkuarpaa Mosesip inatsisaasa atuunnerata nalaani arnaq pinngitsaalisaalluni atoqatiginiarneqarnermini ikiortissarsiorluni nilliasimaguni pinngitsuutitaasarsimasoq. (5 Moses 22:23-27) „Kissaatigisakka nakorsat sumiginnarpaat aalajangiusimanninneralu aserorniarsaralugu,“ Caridad oqarpoq, „taamaattumik pinngitsaalillunga atoqatiginiarsarisuuppannga pinaannissaraluattut ilillunga pinaasertariaqarpunga.“

Nalunaaquttap akunnialui qaangiuttut kiisami aalersuinertaqanngitsumik suliarinissaanut nakorsat akuersipput. Pilaattaasarfimmi Caridad Jehovamut qinusinnaanerluni aperivoq. Akuerineqarami qinuvoq, iluatsittumillu suliarineqarpoq.

Caridadili ajorseqqimmat nakorsat aalajangerput kissaatigisaa sumiginnarlugu pinngitsaalillugu aalersorniarlugu. Taava nakorsaq napparsimasunillu paarsisoq aalersornissaanut piareersalerput. Naak sanngiikkaluaqaluni nukini tamaasa atorlugit Caridad pinaaserpoq. Allaat sullulik aalersuut kiiniarsaraa. Qanoq iliornertik kanngutsissutigilerlugu nakorsaq taamaatitseqqusiinnarpoq. „Ingerlaqqissinnaanngilanga. Taamaatippunga!“ oqarpoq.

Caridadip tamanna anigorpaa ajornerusunillu naapitaqarnani peqqisseqqilluni. Uppissusia sapiissusialu nakorsat marluk tamarmik napparsimasunillu paarsisut maluginngitsoorsinnaanngilaat. Tamakku tamarmik pisimapput Caridad 94-inik ukioqartoq. (wD 15/6 93)