Pallorfiginnittarfik ataqqiviuk?

„Iivangkiiliup aallartinneraniilli kristumiut ininik Guutimik pallorfiginnittarfigisaminnik peqartarsimapput.“ — „Primitive Christianity“ William Cavemit.

GUUTIP innuttaasa Taassuminnga pallorfiginnillutik katersuuttarnitik nuannaarutigiuaannarsinnaasimavaat. Ukiuni hundredelinni siullerni taamaassimavoq, aamma ullumikkut taamaappoq. Itsaq atuakkiortut teologillu soorlu Lukianip, Clemensip, Justinus Martyrip Tertullianillu tamarmik eqqaasimavaat kristumiut pallorfiginninnerminni immikkut katersuuttarfeqartarsimasut.

Aamma Biibilimi ersersinneqartuartarpoq kristumiut eqimattat aalajangersimasumik ataatsimiittarsimasut. Eqimattat tamakku eqqortumik taaneqarsimapput ilagiinnik, oqaaseq Biibilimi atorneqartoq „ilagiit“ isumaqavimmat inuit eqimattat immikkut siunertaqarlutik imaluunniit aalajangersimasumik suliassaqarlutik katersuussimasut.

Kristumiut pallorfiginnittarfii siulliit

Kristumiut siulliit ukiuni hundredelinni siullerni katersuukkaangamik sulerisarsimappat? Ataatsimiinnerit arlallit Biibilimi eqqartorneqarput, ersersinneqarporlu katerisimaarnerni taamaattuni ilinniartitsineq pingaarnerpaatinneqartarsimasoq. (apustilit suliait 2:42; 11:26; 1 Korintumiut 14:19, 26) Ilinniartitsinermik pilersaarusiamut ilaasarsimapput oqalugiarnerit, misigisalikkersaarnerit qiimmannartut kiisalu Jerusalemimi siulersuisoqatigiinnit apustilimilluunniit allagarsianik samminninneq.

Soorlu apustilit suliáinik agdlagkat 15:22-35-mi ersertoq allakkat taamaattut Antiochiami kristumiunut eqimattanut atuffassissutigineqarsimapput, kingornalu Judasip Silasillu ’qatanngutigiit oqaatsinik amerlasuunik kajumissaarsimavaat nakussatsillugillu’. Allami oqaluttuarineqarpoq Paulus Barnabasilu Antiochiamut tikikkamik ’ilagiit katersortissimagaat nalunaarlugillu Guutip ilagalutik qanoq atsigisumik iliorsimaneri’. Aamma Jehovamut qinuneq kristumiut ataatsimiittarnerini pingaartunut ilaasimavoq. — apustilit suliait 14:27.

Ukiuni hundredelinni siullerni ilagiit ullumikkut kristumiuuneraqatigiit pisarnerattut illorsuarni oqaluffissuarnilu angisuuni alutornarsagaasuni katersuuttarsimanngillat. Kristumiut siulliit angerlarsimaffinni ataatsimiittarsimapput. (Rûmamiut 16:5; 1 Korintumiut 16:19; Kulorsamiut 4:15; Fîlimût 2) Amerlasuutigut angerlarsimaffiit qaliaanni katersuuttarsimapput. Naalakkap unnukkorsiortitsinera inimi qalianiittumi ingerlanneqarsimavoq, inimilu allami taamaattumi ajoqersukkat 120-t Piinsip ulluani anersaamik illernartumik taninneqarsimapput. — Lúkarse 22:11, 12, 19, 20; apustilit suliait 1:13, 14; 2:1-4; 20:7, 9.

Ullumikkut Jehovap nalunaajaasuisa apustilit maligassiaat malippaat, ataatsimiittarfitillu „naalagaaffiup inersua“-nik taasarpaat. Tamakkunani Guutip naalagaaffia pillugu nutaarsiassamik nuannersumik oqaluussisartutut ilinniartinneqartarput. (Matîuse 24:14) Ataatsimiittarfimminni aamma Biibilimik atuaqqissaartarput, imminnut  qiimmassartarlutik qinoqatigiittarlutillu. Tamanna Biibilimi oqaassummut Eprîarinut agdlagkat 10:24, 25-miittumut naapertuulluinnarpoq: ’Misissoqatigiinniarta asanninnermut ajunngitsuliornermullu kajumissaaqatigiilluta, katisimasarfippullu qimannaveertigu, ilaat taamaattarmata; kisianni oqaaqqissaaqatigiilluta pisa; annerusumilli taamaassaagut ullussaq qanillilersoq malugilerassiuk.’

Pallorfiginnittarfitsinnik eqqortumik atuineq

Immaqa apustilip Paulusip oqaasii uku eqqaamavatit: ’Guuti ularussinermut Guutiunngilaq, eqqissinermulli,’ aamma: ’Tamatigut ippinnanngitsumik nalinginnanngitsumillu ilioritsi.’ Allassimaffiit ataqatigisaasa ersersippaat Paulusip tassani eqqartoraa kristumiut ataatsimiinneri qanoq ingerlanneqartassasut. Apustilit nalaannisut ullumikkut kristumiut qularnaartariaqarpaat ataatsimiittarnimik eqqissisimasumik torerluartumillu ingerlanneqartarnissaat. — 1 Korintumiut 14:26-40.

Vagttårnet-imi 15. apriili 1970-imeersumi ima allassimasoqarpoq: „Pissusilersorneq ataatsimiittarfitsinni malunnarnerpaasartoq pisuusaarnerunanilu pissusissamisoortuuvoq, pallorfiginninnermimmi ilumoortumik Biibilimillu ilinniartitsinermik soqutiginninnermit ilumoortumit pilersitaagami. Ataatsimiittarfimmi najuuttut avatangiisinit qaamasunit inussiarnersunillu nuannaalersinneqarlutillu ammasunngortinneqartarput, pingaartorsiortuusaarnermit eqqumiitsumit matoqqatinneqaratik.“ Soorunami aamma ataatsimiittarfiup ataqqinnippaluttumik pingaartitserpaluttumillu atorneqarnissaa eqqumaffigineqartarpoq.

Tamatumuuna kristumiuuneraqatigiit annertuumik ataqqinninnermik amigaateqarnertik ersersissimavaat. Upperisarsioqatigiit ilaasa pallorfiginnittarfitik aliikkusersuiffittut atortarpaat. Upperisarsiorpalaartumik rockimik tusarnaartitsisitsisarput, nukkassassartarfeqarlutik, billiardertarfeqarlutik, meeqqanik paaqqinnittarfittaqarlutik filminillu isiginnaartitsisarlutik. Ilami ilagiit ataatsit paasunik isiginnaartitsisitsisimapput. Tamanna apustilit maligassiaannut naapertuutinngeqaaq.

Ukiuni hundredelinni siullerni ilagiinni ippinnartumik iliortoqaraangat unnersuussinissaq pissusissamisoortuusimavoq. Assersuutigalugu, Korinthimi ilagiit kristumiut Naalakkap unnukkorsiortitsinera nerersuarfissatut ernguffissatullu atorsimavaat. Ataatsimiigiaramik unnukkorsiutissatik nassarsimavaat ataatsimiinnerullu aallartinnginnerani imaluunniit ataatsimiinnerup nalaani nerillugit, ilaallu allaat nerivallaarlutillu imerpallaarsimapput. Tamanna ippinnartuliornerulluinnarpoq. Apustilip Paulusip ima allaffigisimavai: ’Neriffissassinnik imerfissassinnillu illoqanngilasi?’ — 1 Korintumiut 11:20-29.

Paulusip unnersuussutaanut naapertuuttumik iliorlutik Jehovap nalunaajaasuisa namminneq inuttut pisassatik angerlarsimaffimminni allamiluunniit, ataatsimiittarfimminniunngitsoq, isumaginiartarpaat. Ilumoorpoq ataatsimiittarnivut ikinnguterpassuatsinnik ilassiuiffissaalluartarput, eqqaamajuartariaqarparpulli ataatsimiittarfipput Jehovamut pigititaammat taamaattumillu taamaallaat taassuminnga pallorfiginninnermut atatillugu atorneqartussaalluni. Ataatsimiittarfimmi najuunnerput niueqatigiinnermut imaluunniit inuttut aningaasatigut isumaqatigiinniarfissatut atorumanngilavut.

Aamma ilagiit ataatsimiittarfitik aliikkusersornermut, katersuiniarnernut assigiinngitsunut imaluunniit inunnik suliaqarfittut, soorlu meeqqanik paaqqinniffittut, atorumanngilaat. Inuttut pisassat niuernerillu taamaattut allami suliarineqarsinnaapput.

Ataatsimiittarfiit ilaanni utoqqaanertat malugisimavaat ilagiinnut ilaasut ataatsimiinnerni pinik atukkiussassaminnik utertitassaminnillu  tunniusseqattaartartut. Aamma videobåndiutitik ataatsimiittarfimmi paarlaateqatigiittarsimavaat. Naak taamaaliornerit niuernerunngikkaluartut utoqqaanertanit paasitinneqarlutik takusinnaalerpaat tamakku angerlarsimafimmi isumaginissaat silatusaarnerusoq.

Pisut ippinnarsinnaasut pinngitsoorniarlugit, ataatsimiittarfittalu siunertaq naapertorlugu atorneqarnissaa qulakkeerniarlugu, tamatta immikkut imminut ima aperisariaqarpugut: ’Inuttut isumagisassannik angerlarsimaffinni naammassilluarsinnaasaraluannik ataatsimiittarfimmi naammassinnittarneq ileqquliussimavara?’ Assersuutigalugu, asiartitsiniaraanni imaluunniit katerisimaartitsiniaraanni pitsaanerussannginnerpa ataatsimiittarfimmi pinnani angerlarsimaffimmili pilersaarusioraanni? Qaaqqujumasavut sianerfigiinnarsinnaanngilavut imaluunniit ornillugit oqarfigiartuinnarsinnaanngilavut? Paulusip oqaasii eqqarsaatigalugit ima oqarsinnaavugut: ’Tamakkuninnga aaqqissuussiffissatsinnik angerlarsimaffeqanngilagut?’

Jehovamik pallorfiginninnermut piffissaq sumiiffillu aalajangersimasut

Nalunaajaasup oqaasii 3:1-imi ima allassimavoq: „Qilaap ataani pisartut suut tamarmik aalajangersimasumik piffissaligaapput.“ Ataatsimiikkaangatta kristumiutut kiffartornermut attuumassuteqartut suulluunniit sukumiisumik sammisinnaavavut. Ataatsimiittarnerit tassaapput piffissat Jehovamik pallorfiginniffissatut aalajangersagaasut.

Jesusip affarmik qatanngutaata Jakobip ilagiit kristumiut iluanni nakerisarsiorneq mianersoqqussutigisimavaa. (Jâko 2:1-9) Unnersuussut tamanna ullumikkut ataatsimiittarfitsinni qanoq ililluta maleruarsinnaavarput? Aap, allagartanik qaaqqusissutinik ataatsimiittarfimmi agguaassineq nakerisarsiornertut paasineqaratarsinnaavoq. Ilagiinni ataatsini qaaqqusissutit taamaattut qaaqqusat pooqattaannut biibiliinulluunniit ikineqartarsimapput. Taamaaliorneq qaaqqusissutinik allakkerisarfikkut nassiussinermit imaluunniit qaaqqusaq ornillugu tunniussinermit pisariinnerugaluaqaaq. Kisianni qaaqqusissummik tunineqanngitsummita qanoq misigissappat? Nakerisarsiornertut tigussannginnerpaat?

Soorunami ataatsimiittarfimmi inuttut paasissutisseeqatigiinnissamik imaluunniit poortukkamik tunniussinissamik inerteqqutiginnittunik sukannikujuttunik maleruagassalersortariaqanngilaq. Aamma kukkusuunngilaq ullup ingerlanerani sulerisimaneq qanorlu misigisaqarsimaneq oqaluuserissallugit, qaaqqusissaluni imaluunniit sukisaarsaatinut arlaannut ilaarusuttunik apersuissalluni. Tamakkuninngali oqalliseqarneq ataatsimiittarfimmi ilaannikkuinnaq nipituuliuutaanngitsumillu pisariaqarpoq. Inuttut pilersaarutit ataatsimiittarfimmi katersuunnitsinnut siunertaviusumik, tassa anersaakkut nakussatsinneqarnissamik, inangiitinngisaannartariaqarpavut. — Matîuse 6:33; Filípimiut 1:10.

Angutit maligassiuisut

Utoqqaanertat ilagiinnilu kiffartortut ataatsimiittarfimmik ataqqinninnissakkut maligassiuisarput. Amerlanertigut utoqqaanertat ataaseq marlulluunniit ilagiinnilu kiffartortut ataatsimiittarfinnik aserfallannarveersaartitsilluni sulinermik ataqatigiissitsisuusarput. Ilagiit ataasiinnaanngitsut ataatsimiittarfik atortarpassuk utoqqaanertanik ataatsimiititap suliaq tamanna nakkutigisarpaa.

Utoqqaanertat ilagiinnilu kiffartortut tamarmik, qinnuigineqarsimasuinnaanngitsut, ataatsimiittarfimmut ilumoortumik soqutiginnittuusariaqarput. Ataatsimiittarfiup Jehovamut pigititaanera taassuminngalu pallorfiginninnermut atortussaanera akueraat.

 Utoqqaanertat ataatsimiittarfimmi iluarsaassassanik pisariaqartunik suliaqarnissaminnut tunuarsimaartuussanngillat. (2 Israelikkut 24:5, 13; 29:3; 34:8; Nehemja 10:39; 13:11) Ilagiit ilaanni ataatsimiittarfik akuttoqatigiissumik misissorneqartarpoq iluarsaanneqartariaqartullu sapinngisamik erniinnaq suliarineqartarlutik. Atortut tigusariaannaatinnissaat isumagineqartarpoq atortussanillu pisariaqartunik amigaateqalinnginniassammat allattuisoqartarluni. Atortussanut, sannatinut eqqiaassutinullu peqqumaasiveqarpat utoqqaanertat ilagiinnilu kiffartortut torersuutinnissaa atortullu atorsinnaasuutinnissaat ilumoorlutik soqutigisariaqarpaat. Atuagaasivimmiittut atuagassiaasivimmiittullu karsit imaqanngitsut ataatsimiittarfimmi sakaluulinnginniassammata erniinnaq igittarnerisigut isumassuinertik ersersissinnaavaat.

Utoqqaanertat ilagiinnilu kiffartortut ataatsimiittarfimmut ilumoortumik soqutiginninnermikkut ilagiit sinnerinut maligassiuilluarsinnaapput. (Eprîarit 13:7) Ataatsimiittarfimmik eqqiaaqataasarnitsigut, aserfallannaveersaartitsinitsigut torersuutitsinitsigullu tamatta ataqqinninnermik eqqortumik ersersitsisinnaavugut.

Matîuse 18:20 naapertorlugu Jesus ima oqarsimavoq: ’Marluk pingasulluunniit atera tunaaralugu katisimasaraangata akornanniittaraanga.’ Aap, Jehovamik pallorfiginninnermut katersuukkaangatta sulerisarnersugut Jesusip soqutigaa, angerlarsimaffimmi imaluunniit ataatsimeersuaararnermi ataatsimeersuarnermiluunniit katersuukkaluarutta.

Jehovap nalunaajaasuinut millionilikkuutaanut ataatsimiittarfik allanit tamanit unganarnerpaavoq. Tassani aalajangersimasumik katersuuttarput, pallorfiginnittarfitsillu tamanna ataqqinninnermik eqqortumik ersersitsivisarpaat. Ataatsimiittarfitsik kajumillutik isumagisarpaat, eqqortumillu atornissaa ilungersuutigiuaannarpaat. Qanortoq tamatta Jehovap oqaassutaa manna eqqarsaatigiuaannartigu: ’Isikkannut misissorit Guutip illuanut ingerlasaraangavit.’ — akugdlîssup oĸausê 5:1. (wD 15/6 93)