Inoqajuitsumi parnaarussivimmi Jehovap napatippaanga

OQALUTTUARTOQ: ISAIAH MNWE

Eqqartuussineqanngilaq, aamma pinerluttuliorsimanngilanga. Taamaakkaluartoq parnaarussat inaanni inoqajuitsumi Saharami Afrikamiittumi suleruloortitassatut eqqartuunneqarpunga. Ajornerpaamillu, ikinngutima tamarmik sumiittungaluunniit naluaat. Tamakku tamarmik ukiut arfineq-pingasut matuma siorna pisimapput — 1984-imi aasakkut. Qanoq ililluni taamatut pisoqarsimanersoq nassuiaatilaarlakkit.

ANGAJORA 1958-imi aqqaneq-marlunnik ukioqartunga Jehovamut nalunaajaasunngorpoq. Angajoqqaakkali Abia Statemi Nigeriamiittumi najukkatsinni naggueqatigiit guutiinik pallorfiginnittuujuarsinnarput.

1968-imi Biafrap sakkutuuinut ilannguppunga. Kingorna assakkami akiuuffissiamiitillunga eqqarsaatigilerpara Jehovap nalunaajaasui arlaannaannulluunniit atasuunngitsut, Guutilu ikioqqullunga qinnuigaara. Neriorsorpara sorsunnermi aniguisippanga taassumunnga nalunaajaasunngorumaarlunga.

Sorsunneq qaangiummata neriorsuutiga erniinnaq eqqortippara. 1970-imi juulimi kuisippunga erniinnarlu pioneritut piffissara tamaat oqaluussisartunngorlunga. Kingorna ilagiinni kristumiutut utoqqaanertatut toqqarneqarpunga. Kingunitsianngua Nigeriami immikkoortortaqarfimmit nunami sanilitsinni, Jehovap Nalunaajaasuisa suliaata inatsisitigut suli akuerisaaffiginngisaani, ajoqersuiartortitatut kiffartornissannik qaaqquneqarpunga. Suliassiissut ilassivara, 1975-imilu januaarimi kiffartorfissama nutaap tungaanut aallarpunga.

Tigusaaneq

1978-imi Jehovap nalunaajaasuinut nunami tamaaniittunut takusaajartoqattaartussanngortitaavunga. Ikittunnguakkuutaarmata angalasaqaanga illoqarfiit ilageeqarfiusut soqutiginnittoqarfiusullu tikeraaqattaarlugit. Politiit nakkutilliiffiini killisiorneqakulasaqaanga. Marloriarlunga parnaarussaavunga suliarpullu pillugu ulluni sisamani killisiorneqaqattaarlunga.

1984-imi juunimi sapaataagaa oqaluussiartorniarluta piareersartilluta naalagaaffimmi  atorfillip inussiarnisaartup nalunaarfigaatigut politiit Jehovap nalunaajaasui tamaasa tigusarinialersaaraat. Sapaatip-akunnera ataaseq qaangiuttoq Djagli Koffivi Togomeersoq aapparalugu tigusaavunga. Politiit qullersaqarfiannukaanneqarpugut qinnuigineqarlutalu illoqarfimmi Jehovap nalunaajaasuisa aqqi tamaasa nalunaarutigissagivut. „Aqqi nalunaarutiginngikkussigik,“ oqarfigaatigut, „iperagaanavianngilasi.“

„Ilissi politiiuvusi,“ akivakka. „Ilissi suliassaraarsi inuit tigorusarerusutasi nammineq nassaarissallugit. Ilissinnut aallartitaanngilanga.“ Nalunaaquttap-akunnerata affaani oqaloqatigiippugut, politiillu unatarnissatsinnik sioorasaarpaatigut. Qatanngutittali kristumiut aqqi nalunaarutiginngilavut. Taava politiit aalajangerput atuakkat qinerlerfissiat Biibilimut tunngasut arsaarinnissutigigallarniarlugit.

Nakkutigineqartussatut parnaarussaaneq

Atuagaatikka politeeqarfimmut apuukkatsigik Djaglilu biilimit niooralerpavut. Taamaalluni pappialamineq Biibilinnit nakkarpoq. Tassaana ataatsimeersuarnermi programmi nunami utoqqaanertat tamarmik aqqinik allattuiffigineqarsimasoq. Tigupallappara eqiterlugulu kaasarfinnut mangupallallugu. Politiilli ilaata malugaanga tunniuteqqullugulu. Soorunami annilaaqaanga.

Pappiala inimi Djaglilu atuakkanik eqqussiffitsinni nerriviup qaanut qaqineqarpoq. Atuakkanik eqqusseqqikkama pappiala tigupallappara kaasarfimmiuliullugulu. Taava anartarfiliarumavunga. Politiip anartarfimmut ingerlaqatigaanga. Anartarfimmut iserama matuma parnaarpara, pappialalu alittoriarlugu anartarfimmut kuutsillugu.

Politiit susoqarsimasoq paasigamikku kamaqaat. Qanorli iliuuseqaqqinnissartik orniginngilaat, nakkutilliinerluttutut qullersaminnit pisuutinneqarnissartik annilaangagigamikku. Ulluni 17-ini nakkutigineqarluta parnaarussaaqqareersugut politiip pigisatsinnik poortueqquaatigut, allamunngooq nuutsinneqassagatta. Atisavut puussiamut plasticimut immiuppavut, naqqanullu biibiliaraq pulaartutta ilaata isertorluni nassarsimasaa ilivara.

Qujanartumik oqaluussisartoqativut allat nuutsitaanissatsinnik nalunaarfigaavut, nalulluguli sumut nuutsitaassanerluta. Aqaguani ullaannguaq, 4. juuli 1984-imi, politiip itersarpaatigut. Timivut misissuiffigai, atisat puussiamit tulleriiaarlugit amooraqqullugit. Ilullerli ataaseq kiserngoruttorlu oqarfigaanga atisat puussiamut immiuteqqiinnaqqullugit, taamaattumillu Biibili takuneqanngitsoorpoq.

Inoqajuitsumi parnaarussivik

Politiit timmisartoqarfiliaappaatigut, sakkutuullu timmisartuannut ikitinneqarpugut. Nalunaaquttap-akunneri arlalialuit qaangiuttut illoqarfeeqqamut 2000-it missaanni inulimmut parnaarussivilimmullu nunnippugut. Illoqarfik qaninneq kilometerisut 650-isut ungasitsigisumiippoq. Parnaarussivimmukaanneqarpugut parnaarussiviullu inspektørianukaanneqarluta. Ilaquttatta ikinngutittaluunniit sumiinnerput ilisimanngilaat.

Illoqarfeeraq Saharami naggorinnersartamiippoq. Orpigaqarpoq, orpimineqarluni kiisalu marrarmik katitikkanik illoqarluni. Nunamut taamaallaat meterip aappaata affaanik assaalluni imermik pissarsisoqarsinnaavoq. Tamaanili najugaqartut ilaata 31-nik ukiullip oqaluttuuppaatigut inuunermini ataasiaannarluni siallersumik takusimalluni! Kiattupilussuuvoq. Parnaarussat ilaata oqaluttuuppaatigut parnaarussat isersimaartarfianni kiassiutip ilaanni 60 gradit angusimagai! Sakkortuumik anorlertuaannarpoq, sioqqanillu anorlertarpoq amermut qasileqisumik issinnaqisumillu.

Tamaanga pisut erniinnaq paasisarpaat tassaasoq nunap parnaarussiviisa ajornersaat. Qarmarsuit parnaarussiviup ungalorisai portugaluaqalutik seqinermut anorimullu illersuutaanngillat. Iluamilli oqaatigissagaanni qarmarsuit pisariaqanngikkaluarput, qimaaffissaqanngilarmi. Naggorinnertap avataani orpeqanngilaq sunnguamillu parnaarussamut qimaasumut toqqorfissaqarani.

 Inissinneqannginnitsinni parnaarussiviup inspektøriata misissorpaatigut. Qinnuigaatigut puussiap iluaniittut tamaasa amooraqqullugit. Ilullivut ataasiakkaarlugit amooralerpakka. Ilulleq Biibilimik matuseqqasoq kiserngorummat puussiaq nittarpara takutinniarlugu, oqarlungalu: „Nassarsinnaatitaasut tassa kisimik.“ Naammagaa kaajaluisamullu aneqqulluta. Allamik atuagassiaateqanngilagut Biibili kisiat.

Parnaarussivimmi inuuneq

Parnaarussat katillugit 34-upput. Tassaapput nunap pinerluttortaasa navianarnersaralugillu tusaamasaanerlunnerpaartaat. Ilarpassui toqutsisuupput iluarsivissaqanngitsutullu isigineqarlutik. Inini angisuuni marlunni anartarfimmik ammaannartumik akunnequsikkani tamatta sinittarpugut. Anartarfittut atorparput nappartaq matoqanngitsoq. Naak ullaat tamaasa parnaarussanit aninneqartaraluartoq soorluli tassa inoqajuitsup niviugai tamarmik nillataarniarlutik imaanillu mamarsarniarlutik tassunga katersuuttartut.

Nerisatuaraavut sorghuminik taaneqartartut. * Parnaarussamit aserorterneqartarput, iganeqarlutik puuguttanullu kuerarneqariarlutik parnaarussat allequtaannut siniffigisartagaannut iliorarneqartarlutik. Nerisassat matuneqarneq ajorput. Sulereerluta angerlaraangatta puugutaq sorghumitugassatsinnik imalik niviukkanik ulikkaartarpoq. Puugutaq tigugaangatsigu eqqarput niviukkanik aalaaluttuinnaasarpoq. Ullut siulliit marluk nerinngilagut. Ullulli pingajussaanni neriniapajuttalerpugut — soorunami niviukkat qimaateriarlugit nerisassattalu qaava issorsimasoq peeriarlugu. Jehova qinnuigisarparput peqqissuserput sernissoqqullugu.

Seqernup uunaannavissup ataani sulisarpugut. Parnaarussivitoqqap kaajaluisaani qarmat ingutserpavut nutaamillu qarmaliorluta. Suleruloornaqaaq. Ullaakkut arfinerniit ulloqeqqata tungaanut unikkallarfeqarata sulisarpugut, nerilaariarlutalu unnukkut arfernup tungaanut suleqqittarluta. Sulinngiffeqanngilagut. Kiassuaq naalliuutigiinnanngilarput, aammali ukiukkut qiiasaqaagut. Pigaartullu uagutsinnut peqqarneeqaat.

Anersaakkut nukittujuaannarpugut

Djaglilu Biibili isertortumik atuartarparput, ilikkakkavullu oqaloqatigiissutigisarpavut. Isertorata atuarsinnaanngilagut, Biibilimi tiguneqassaaq pillarneqassallutalu. Parnaarussat ilaat Biibilimik atuaqqissaaqatigisaligara petroliutortumik qulleqarpoq uannut atortittakkaminik. Akuttunngitsumik unnuakkut ataatsip marlulluunniit missaanni itertarpunga tallimallu tungaanut atuartarlunga. Taamaalillunga Biibili tamaat atuarsinnaasimavara.

Parnaarussaqativut oqaluussiffigarpavut, ilaatali ataatsip pigaartut naalagaannut tamanna oqaatigisimavaa. Oqaatiginnittup ilimaginngilluinnagaanik pigaartup Iteritsi!-p normuanik ataatsimik pigisaminik tunisimavaa, tunisittullu uagutsinnut ingerlateqqippaa. Atuaqattaartuarpara. Atuartarnitta oqaluussisarnittalu anersaakkut nukittujuarnissatsinnik ikiorpaatigut.

Ikinngutivut attaveqarfigaavut

Allaqqusaanngilagut allakkanilluunniit nassiusseqqusaanata. Uagutsinnilli akuersaartup ikiorumavaanga. Aggustip 20-ani, tikinnitsinnit sapaatit-akunneri arfinillit missaat qaangiuttut, isertortumik marlunnik allagaqarpunga, Nigeriami aallartitaqarfimmut ikinngutitsinnullu. Sioqqanut assaappakka ujararujussuarmillu nalunaaqutserlugit. Kingorna ikinngutima aavai.

Sapaatip-akunneri arlallit ingerlapput, tusagaqanngilangalu. Allakkat apuuffissaminnut apuussimanissaat ilimagiunnaariartuinnarpara. Apuussimappulli, ikinngutittalu iperagaatinnissarput sorsuutigilerpaat. Nigeriami nunanut allanut ministereqarfimmit suliaq tamanna aamma soqutigineqalerpoq, nunamilu parnaarussaaffigisanni naalakkersuisunut saaffiginnipput paasiniarlugu sooq taama ittumi parnaarussaaqqanersunga.

 Novembarip 15-iani 1984-imi ajattaasaannavinneqarluta ipertaajaajartortinneqarpugut. Pigaartut atuarfimmukaappaatigut. Anartarfia milissimagaluarluni sapaatit-akunnerpassuini atorneqaannarsimavoq. Annanik ulikkaavippoq. Pigaartut uannut asaqquaat. Allanik atortussaqanngilanga taamaallaat assakka. Suliassaq maajunnartoq tamanna qanoq ilillunga naammassiniassallugu isumaliutigileruttoriga pigaartut naalagaat takkuppoq oqarfigalungalu sakkutuut immikkoortut naalagaanerata takorusukkaanga.

Apuukkama naalagaanerup oqaluttuuppaanga qanittukkut nunap præsidentia, uannut tunngasunik tusagaqarsimasoq, oqaloqatigisimallugu. Præsidenti oqarsimavoq nunami tamaani Jehovap nalunaajaasuisa aqqi nalunaarutigisuugukkit ingerlaannaq iperagaassagaluartunga timmisartumullu aallartussamut tullermut ilaallunga aallarsinnaassallunga. Tamatumuuna aamma akivunga Jehovap nalunaajaasui pissarsiarerusukkunikkik namminneq nassaarisariaqaraat. Naalagaanerup oqarfigaanga neqeroorutertik ilungersortumik eqqarsaatigisariaqariga. Ulluni sisamani-tallimani eqqarsarfissalerumavaanga. Taava inuulluaqquaanga, pigaartullu parnaarussivimmut oqquppaannga — qujanartumik atuarfiup anartarfianut oqqunnanga!

Ullut tallimat qaangiummata naalagaanerup qaaqquaanga aperalungalu qanoq aalajangersimanersunga. Oqarfigaara parnaarussivimmiinninnut pissutituaasoq tassaasoq Guutimut ilumoortutuamut nalunaajaasimanera, ajortuliorsimanngitsungalu. Nassuiaappara atortuusumik passeqarlunga nunamilu maani najugaqarsinnaatitaallunga. Pappialaatikka tamarmik ajunngillat, illoqarfimmiillu illoqarfimmut angalagaangama tamatigut politiinukartarpunga suut tamarmik pissusissamisoortut qulakkeerumallugu. Pinerluttuliorsimannginnama aperivunga: „Sooruna pillarneqartunga? Nunami maaneeqqusaanngikkuma sooq anisinneqaannarnianngilanga? Sooruna maaniittussatut eqqartuuneqarsimasunga?“

Minuttit kuartit missaanni oqaluppunga. Nipangerama qinnuigineqarpunga oqaasereriikkakka allaqqullugit præsidentimut nassiunneqassammata. Allaffissannik tunivaannga, quppernerillu sisamat allaffigaakka.

Kiisami iperagaavunga!

Januaarimi 1985-imi aatsaat tusagaqaqqippunga, qaammatini arfineq-marlunni parnaarussaaqqareerlunga. Pigaartut naalagaat iserpoq aperalungalu Nigeriami aallartitaqarfimmut allagaqarsimanersunga. „Aap,“ akivunga.

„Sooq allakkavit? Sooq ilisimatinnginnamma?“ aperaaq.

Oqarfigaara tamanna susassarinngikkaa, uppernarsaaffigaluguli ajortumik eqqartorsimanngikkiga, parnaarussaaninnut pisuunngimmat. „Anaanamaluunniit maaniinnera naluaa,“ oqarpunga. Allakkat qanoq ilillunga nassiussimanerikka paaserusummagu akiumanngilara.

Aqaguani pigaartut piareersalerput oqarlutillu Djaglilu nuutsitaassasugut. Parnaarussiviup silataanukaanneqarpugut, tamataarulluta atisaajarneqarluta misissuiffigineqarlutalu. Siusinnerusukkut biibiliutiga parnaarussat ilaannut tunniussimavara, nalunnginnakku pigaartut uanniittoq nanigunikku arsaassagaannga. Angut atuaqqissaaqatigisartagara oqarpoq iperagaaguni Jehovamut nalunaajaasunngorumaarluni. Qinnupparput taamaaliumaartoq.

Kinguninnguatigut Nigeriamut anisitaavunga, februaarimilu 1985-imi nunami tassani angalallunga nakkutilliisutut kiffartornera nangeqqippara. 1990-imiilli Nigeriami nakkutilliisutut angalasartutut kiffartulerpunga. Maanna Djagli Elfenbenskystimi aalajaalluni kiffartorpoq.

Misigisakkut tamatumuunakkut ilikkarpara Jehova Guutip misilinneqarnitsinni ajornerpaaniluunniit napatissinnaagaatigut. Sernissuinera parnaarussivimmi misigiuartarsimavarput. Iperarneqarnitta takutippaanga Jehovap nalunngikkaa kiffani sumiittut sunillu atugaqartinneqartut, aammali annikilliornerannit aniguisissinnaagai. — 2 Pîtruse 2:9. (wD 1/3 93)

[Quppernerup ataani ilanngussaq]