Sooq Jehova kiffartorfigisariaqarpa?

„JEHOVAP ullussaa qanillivoq! ’Annikkilliornartorsuaq’ nalliutingajalerpoq, Guutilu kiffartorfiginngikkukku aniguisinnaanaviannngilatit.“ Taama oqaluttuunneqaraluaruit qanoq qisuariassagaluarpit? — Sefanja 2:2, 3; Matîuse 24:21.

Ilumoorpoq Jehovap ullussaa eqqarsaatigisariaqaratsigu aammalu anigusinnaajumalluta Guuti aalajaalluta kiffartorfigisariaqaratsigu. Tamannali Jehova Guutip iluartumik kiffartorfiginissaanut pissutigisat pingaarnersarisariaqarpaat? Illit sooq Jehova kiffartorfigaajuk?

Pissutigisap ilumoortuunissaa pisariaqarpoq

Ilumoortumik pissutigisaqarluni Guuti kiffartorfiginngikkaanni imaassinnaavoq piffissap aalajangersimasup iluani ilimagisat eqquutinngippata taamaatiinnartoqartoq. Assersuutigalugu inuit ilaasa Jesusip 1843-mi imaluunniit ’44-mi tikiuteqqinnissaa ilimagisimagaluarpaat; ilimasunnerigalualli eqquutitinneqanngilaq. Tassunga atatillugu George Storrsip allagarisimasai atuassallugit soqutiginarput. Atuagassiaq Bible Examiner (Biibilimik misissueqqissaartoq) saqqummersippaa kingusinnerusukkullu Napasuliaq Alapernaarsuiffiup peqatigiiffiata præsidentia siulleq Charles Taze Russel ilisarisimasarilerlugu. Septemberimi 1846-mi Bible Examiner-imi ima allassimasoqarpoq:

„Guutip kiffartorfiginissaanut pisussaatitaaneq ullussap qanillisimaneranik pissuteqarnissamit pingaarnerungaarpoq. . . . Tikiuteqqiffissaq 1846-mi imaluunniit ’47-mi pinngippat, taamaattoqarsinnaavorlumi, qisuariarneq aliarnarluinnartuussaaq. Tamanna misilittakkat takutippaat. Tassani 1843-mi aamma ’44-mi pisimasut eqqarsaatigaakka. Naak ’Guutimik kiffartulernissamut itertinneqarsimagunartut’ amerlanerpaartaat, Naalakkap tikiuffissaata qanillineranik suaarut tusaramikku taama qisuariartariaqaraluartut? Uterpara — NAAK??? Inuit quliugaangata ataaserluunniit kristumiutut suliassaminut naapertuuttumik ingerlasarunanngilaq. Sooq? Tunngavigisanit eqqunngitsunit aqunneqarsimagamik. Pingaarnerutillugu namminissarsioriaasiat saaffigineqarsimavoq taakkuninngalu tulluutsitsisuusimalluni. Ajortuliortutut napparsimasutut innanngavimminni nalasutut imaluunniit imaani mallingaartumiittutut toqulersorisutut ittuusimapput. Toqusussaanini pissutigalugu kristumioorusuppoq. Navianartorsiunnginnini ilisimaguniuk siornatigutut soqutiginninngitsigissagaluarpoq.“

Eqqortunik pissutigisaqarlutit Guuti kiffartorfigiuk

Namminissarsiorneq nungutitaanissamillu siooraneq inuit ilaannut Jehovap piumasaa qalliinnarsiortumik malillugu inuulersitsisinnaasarput. Inuit ilaat Paratiisimi inuulerumaarnissamik neriuummit ima sunnerneqartigisarput tamannaannaq pillugu Guuti kiffartorfigilersarlugu. Inuit tunngavigisanit tamakkuninngaanerusoq aqunneqartut isumaqarunik Jehovap ullussaata annikilliornartussarsuullu pinissaat ungaseqisut immaqa taava ilungersuuteqarlutik Guuti kiffartorfiginavianngilaat.

Guutip siunissaq pillugu neriorsuutai nuannaarutigissallugit soorunami namminissarsiornerunngilaq. Ernerminut Jesus Kristusimut ajoqersugaasutut siunissaritinneqartut pilluaatigissagivut kissaatigaa. ’Neriugitsi tipaatsullusi’ apustili Paulus oqarsimavoq imalu nangilluni: ’Naalliukkaangassi ilalaaritsi; qasusuillusi qinugitsi.’ (Rûmamiut 12:12) ’Jehovap tipaatsunnerata’ qinunerullu naalliunnerit atorneqarsinnaanissaannut ikiortarpaatigut Guutillu neriorsuutaasa pivusunngortinneqarnissaannut naammagittarluta utaqqisinnaanngortittarluta. (Nehemja 8:10) Soorlu maanna takussagipput taamaalisoqarnissaata tungaanut Guuti kiffartorfigissallugu pissutissarpassuaqarpugut.

Pisussaaffik aamma immikkut pisinnaatitaaffik

Qilammi nunamilu kisimi oqartussaagami Jehova tamakkiisumik pallorfigineqartariaqarpoq. (2 Moses 20:4, 5) Kristumiut tamarmik Guutimik kiffartornissamut pisussaapput annikilliornartussarsuup aqagu, aappaagu imaluunniit kingusinnerusukkut pilernissaa apeqqutaatinnagu. Namminissarsiunngitsumik Jehovamik kiffartornissamut kajumissaarneqartutut misigisimapput Guuti uummatikkut tarnikkullu iluunngarlutik, isumakkullu iluunngarlutik nukisillu tamakkerlugit asagamikku. (Mákorse 12:30) Kristumiut siulliit ilaat isumaqarsimapput Jehovap ullussaa nalliukkaluttualersoq, ilimagisaalli piviusunngunngillat sulilu misigitinnagu toqullutik. (1 Tásalûníkamiut 5:1-5; 2 Tásalûníkamiut 2:1-5) Tanitalli taakkua toqussartik tikillugu aalajaakkunik qilammi inuunissamut makititaanermik Kristusip akilertussaajumarpai. — sarĸúmersitat 2:10.

Jehovamut nalunaajaasut kuisimasut aalaajaallutik kiffartorfigisariaqarpaat nammineq kajumissusertik malillugu peqqusaanik iliornissamut pisussaatissimagamik. Eqqarsaatigeriaruk! Inngilit iluartut assigalugit qilammi nunamilu kisimi oqartussaasup peqqusaanik iliorsinnaavugut. (Tussiaat 103:20, 21) Jesusip immikkut pisinnaatitaaffik tamanna pingaartittorujussuuaa: ’Neqissara tassa aallartitsisima peqqusaa malillugu suliareqqusaalu naammassillugu.’ (Juánase 4:34) Uaguttaaq taama isumaqarutta Jehova ilungersorluta nersortariaqarparput siunertarisaalu Biibilimi allassimasut allanut oqaluttuaralugit. Taamaalilluta allat anersaakkut ikiornissaat aamma immikkut pisinnaatitaaffigissavarput. Guutimut asanninnerup kingunerisaanik peqqusaanik malinninneq ilumut immikkut pisinnaatitaaffiuvoq angingaartoq, Jehovap ullussaa qaquguluunniit nalliutissagaluarpat.

Qujamasunneq kajumilersitsisarpoq

Guutip ernermi utertitsissutissatut tunniunneratigut asanninnerminik takutitsineranut qujamasunnitta Jehovamut kiffartornissamut aamma kajumissisittariaqarpaatigut. Ajorti pissutigalugu Jehova Guutimut attaveerussimagaluarpugut. Kisianni Jesus oqarpoq: ’Silamiummi [inuiaat silarsuaat] Guutip ima asatigaa ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Paulusip allannera naapertorlugu Jehova siulliulluni iliuuseqarpoq: ’Guutilli asannissutsi uatsinnut nalunarunnaarsippaa, suli ajortuliortilluta Kristusip toqussutigimmatigut.’ (Rûmamiut 5:8) Guutip asanninneranut tamatumunnga qujamasunnitta uummatikkut iluunngarluta taassumunnga kiffartulersittariaqarpaatigut.

Jehovap anersaakkut atortussatigullu tunissutaanut pingaartitsinitta aalajaalluta kiffartorfiginissaanut suli pissutissaqartinnerulersippaatigut. Guutip oqaasia ilitsersuisuuvoq qularnaatsoq — aqqutitsinnut qaammaqqut. Naqitikkat ’kiffaq aalajaallunilu silatooq’ aqqutigalugu naqiterneqartartut inuunitta Guutip peqqusaanut naapertuuttunngorsarnissaanut ikiorpaatigut. (Matîuse 24:45-47; Tussiaat 119:105) Guutillu naalagaaffia siulliukkatsigu Jehovap atortussatigut pilersorpaatigut. (Matîuse 6:25-34)  Tamakkununnga tamanut pingaartitsinerit takutittarpiuk?

Upperisarsiornermit eqqunngitsumit uagutsinnik aniguisitsisimanera Jehovamut kiffartornissamut pissutissat aamma ilagaat. Upperisarsiornikkut uersartoq Babylon angisooq ’imerpassuarni issiavoq’, ermillu taakkua tassaallutik ’immikkut inuiaasut inuppassuillu inuiaqatigiillu immikkullu oqaasillit’. (sarĸúmersitat 17:1, 15) Kisianni Jehovap kiffaani issianngilaq. Naalagaaffianit upperisarsiornikkullu sunniuteqarneranit taakkua naalatsigitinneqanngillat. Assersuutigalugu tarnip toqusuitsuuneranik ajoqersuut ilumuunngitsoq akuersugarinngilaat. Nalunngilaat inuk ’tarneq uumasutut’ pinngortinneqarsimasoq, toqungasut ’sumilluunniit sianigisaqanngitsut’ aamma toqusunik makititsisoqarumaartoq. (1 Moses 2:7; Nalunaajaasup oqaasii 9:5, 10; apustilit suliait 24:15) Taamaattumik toqungasut ersiginngilaat pallorfiginagilluunniit. Anersaakkut kiffaajunnaarsitaasimanermut tamatumunnga qujamasunnerpit tunussineq akiorsinnaatippaa Jehovamillu ilumoortumik pallorfiginninneq aalajangiusimaannartillugu? — Juánase 8:32.

Jehovap ulluinnarni tapersersuineranut qujamasunnitta aalajaalluta taassumunnga kiffartorniarluta aalajangernerput nukittorsartariaqarpaa. Tussiaasiortoq David ima nassuerpoq: ’Unnersiutigineqarli Jehova ullut tamaasa, Guuti kissumiarterput annatsitsiserpullu.’ (Tussiaat 68:20) Allami tussiaasiortoq ima oqarpoq: „Ataatamami anaanamalu qimakkaluarpannga Jehovap ilasiarissavaanga.“ (Tussiaat 27:10) Aap, Jehovamut aalajaalluni kiffartortup artorsaatini, aliasuutini misilinneqaatinilu Guutimut nammagassanngortissinnaavai. Jehovap tapersersuineranut pinngitsuunngisaannartumut qujamasunnerit aalajaallutit kiffartornikkut ersersittarpiuk? — Tussiaat 145:14.

Jehova naalagaaffialu unnersiutigikkit

Jehovap naalannarsisinneqarnissaanik kissaatip taassumunnga aamma kiffartortittariaqarpaatigut. Pinngortitat anersaajusut qilammiittut Guuti oqaatsinik imaattunik unnersiutigigaat tusarparput: ’Guuterput Jehova, ilinnut pigititassaapput naalannaat ataqqinaallu pissaanerlu, illit suut tamaasa pinngortikkakkit, illillu peqqusakkut ipput pinngortitaallutillu.’ (sarĸúmersitat 4:11) Kunngi Davidip Guuti unnersiutigaa oqaatsinik makkuninnga: „[Jehova], illit pigaatit angingaassuseq, pissaaneq, naalannassuseq, ataqqinassuseq qutsinnerussuserlu . . . [Jehova]. Illit pigaat naalagaaffik . . . Pisuussutit ataqqinaallu ilinnit pisuupput, suullu tamaasa illit aalajangertarpatit . . . Guuterput, taamaattumik maanna qutsavigiumavatsigit atillu illernartoq unnersiutigalugu.“ (1 Israelikkut kinguaariit oqaluttuarisaanerat 29:10-13) Neriorsuutaasa eqquutitinneqarnissaat utaqqisillugit Jehovamut kiffaasutut oqaatsit iliuutsillu saniatigut allatut unnersiutigisinnaanerparput? — 1 Korintumiut 10:31.

Guutip naalagaaffianik oqaluutiginninnissamut sakkortuumik kissaateqarneq Jehovamut kiffartornissamut  aamma kajumissaataavoq. Pissutigisaq pitsaasoq tamanna tussiaasiortup oqaasiisigut ajunngilluinnartumik ersersinneqarpoq: „Pinngortitavit tamarmik qutsavigissavaatsit, [Jehova], ilinnullu unneqqarissut unnersiutigissavaatsit. Oqaluttuarissavaat naalagaaffippit alutornassusia eqqartorlugulu pissaassutsit. Nalunaarutigissavaat naammassisatit asseqanngitsut, naalagaaffippit alutornangaassusia. Naalagaaffiit atassaaq naassaanngitsumut, naalagaassutsillu kinguaariikkuutaani.“ (Tussiaat 145:10-13) Kristumiut peqquneqarsimapput Naalagaaffimmik oqaluussissutiginneqqullugit, suliarlu tamanna suliarineqartut pingaarnersaaraat. (Matîuse 24:14; 28:19, 20) Jehovap unnersiutiginissaanut naalagaaffiatalu allanut oqaluussisutiginissaanut sakkortuumik kissaateqarpit?

Jehovap aqqata illernarsisinneqarnissaa kisimilu oqartussaassusianik qutsissisitsinissaq uagutsinnut ima pingaaruteqartigisariaqarpoq aalajaalluta kiffartorfiginissaa kissaatigissallutigu. Jehovap aqqata illernarsisinneqarnissaa kisimilu oqartussaassusiata qutsissisinnissaa qinnutigisarsinnaavarput. (Matîuse 6:9) Qinnutivut malillugit iliuuseqartarsinnaavugut kristumiutut kiffartornermut akuttoqatigiissumik peqataasarnitsigut ilumoortullu tamakkua pingaaruteqartut allanut ilisarititsissutiginerisigut. — Hesekiel 36:23; 39:7.

Nuannaarneq nalerisimaarnerlu

Aalajaalluta Jehovamut kiffartornitsigut uummataata nuannaartinnissaa nalerisimaarutigisinnaavarput Diaavulullu sallutuunera uppernarsarlugu. Satanip eqqunngitsumik inuit namminissarsiorneq pissutigalugu Guutimut kiffartornerarpai, Jehovamullu asanninnitsigut aalajaalluta kiffartorutta Satanip isumaata eqqunngitsuunera uppernarsassavarput. (Job 1:8-12) Taamaattumik Ussatit 27:11-imi allassimasutut iliortuaannarnissamut pissutissaqarluarpoq: „Ernera, silatuujuniarit taamalu uummatiga nuannaartillugu, mitallersikka uannut akisinnaaqqullugit.“ Jehova aalajaalluta kiffartorfigigutsigu Satan qanorluunniit akornusersuigaluartoq, assuarnaalluta inuusaasitta uppeqativut nukittorsassavai. — Filípimiut 1:12-14.

Anersaakkut katersuinermut peqataanermik tipaatsuutiginninnerup nalerisimaarutiginninnerullu Jehovamut aalajaalluta kiffartornissatsinnut aamma kajumissisittariaqarpaatigut. Jesus inunnik ikiuinermigut nuannaarutissarsisimavoq, pingaartumik anersaakkut. Matîuse 9:35-38-imut ima allassimasoqarpoq: ’Jesusillu illorpassuallit nunaqarfinnguillu tamaasa angalaffigai, naalagiartarfiini ajoqersuisarluni iivangkiiliulu naalagaaffimmik oqaluussissutigalugu, inuillu nappaataat nalinginnaat ajuutaallu nalinginnaat katsorsarpai. Inuppassuillu takugamigit nalligingaalerpai, paarinerlugaallutillu isumakkiigaammata savatut paarsisoqanngitsutut. Taava ajoqersukkani oqarfigai: Katersugassat amerlaqaat, sulisussalli ikeqaat. Taamaattumik katersugassat inuat qinnuigisiuk sulisussanik katersuiffimminut aallartitseqqullugu.’ Katersuiffik naatsorsuutigisatsinnit sivisunaarnerussappat allat anersaakkut ikiornerisigut tipaatsunnermik nalerisimaarnermillu nassaarnissatsinnut periarfissaqarnerussaagut. Tamanna aamma inoqatitsinnut asanninnitsinnut, uagutsinnit takutinneqartussatut naatsorsuutigineqartumut ersersitsinerusinnaavoq. — Matîuse 22:39.

Sooq Guuti kiffartorfigaajuk?

Jehovamut aalajaalluta kiffartortariaqarnitsinnut pissutissaalluartut amerlasuut ilaannanngui misissorpavut. Tamatta immikkut qinunikkut sooq Guutimut kiffartornitta eqqarsaatigeqqissaarnissaa pitsaassaaq, tamattami taanna naatsorsuiffigisassaraarput. (Rûmamiut 14:12; Eprîarit 4:13) Namminissarsiorneq kisiat tunngavigalugu taamaaliortut Guutimit iluarisaanavianngillat.

Jehovap aqqata illernarsisinneqarnissaa eqqarsaatitsinni pingaarnersaatikkutsigu taamaattumillu namminissarsiorata illernartumik kiffartorfigalugu, suna taava ilimagisinnaassavarput? Jehovap kiffartuuterput ilanngullugu pilluaqqussagaatigut. (Ussatit 10:22) Jehova aalajaalluta kiffartorfigigutsigu inuunermik naassaanngitsumik pissarsissaagut. (wD 15/5 93)

 [Qupp. 29-mi assiliartaq]

Japanimi tuusintilippassuit Jehova kiffartorfigaat

[Qupp. 30-mi assiliartaq]

Elfenbenskystenimi Jehovamut kiffartortut