Jehova qanoq ililluni ullumikkut ikiuisartoq

BIIBILIMI Jehova pillugu ima oqaluttuunneqarpugut: „Iluartup perlussiuutai amerlaqaat, [Jehovalli] tamakkunannga tamanit annaattarpaa.“ Aamma oqaatigineqarpoq ’Jehovap mianerinnitsini ussernartumit annaanneq nalunngikkai’. — Tussiaat 34:20; 2 Pîtruse 2:9.

Jehovap kiffani ajornartorsioraangata qanoq ililluni ikiortarpai? Tupinnartuliorluni pinngortitap nukingi noqinneq ajorpai arlaatigulluunniit tupinnartuliorluni, soorlumi inuppassuit taama iliortariaqartutut isumaqarfigisaraat. Aap, nukik alla amerlanerpaat paasilluarneq ajugaat atortarpaa — tassa asanninneq. Jehovammi innuttani asavai, taakkununngalu ikkussimavaa asaqatigiinneq ima nukittutigisoq tupinnartuliatut misinnartumik taakkununnga  iluaqutaasumik iliuuseqarsinnaasarluni. — 1 Juán. 4:10-12, 21.

Ilaat akerliliiumassapput oqarlutik ilaannikkut pisariaqartinneqartut tassaasartut nerisassat, nakorsaatit ajutuulernermilu atortut, asanninneq pinnani. Soorunami nerisassat, nakorsaatit ajutuulernermilu atortut pisariaqartuupput, apustililli Paulusip ima eqqarsaatissippaatigut: ’Uppernerlu tamaat pigigaluarukku qaqqarsuit nutsersinnaagaluarlugit allaat, asannissuseqarnangali, taava suunngeqqajaqaanga. Pikkalu tamaasa tunniukkaluarukkit, timigalu ikikkartikkaluarukku, asannissuseqarnangali, taava iluaqutiginngeqqajaqaara.’ — 1 Korintumiut 13:2, 3.

Akuttunngitsumik tusartarparput ajornartoortunut ikiuutissat umiarsualivimmut uniinnarsimasut tippaallutik teriarsuarnillu nerineqarlutik, uffa ikiorneqartussaagaluit perlerartut nappaatinillu naalliutsinneqartut. Ajornerusumilluunniit: ikiuutissaagaluit inuit piumatuut ilerasuuteqanngitsullu assaannut pisarput, taakkunanngalu iluanaarniutigipilunneqartarlutik. Tassa ikiuutissanik pissarsiniarneq allaavoq, ikiuutissallu ikiorneqartussanut apuunneqarnissaat aamma allaavoq. Asanninneq isumassuinerlu piviusut assigiinngissutaasinnaapput.

Iliuuseqarnikkut asanninneq

Septembarimi 1992-imi anorersuarujussuup Inikip qeqertaq Kauai qeqertani Hawaiiniittoq 55.000-inik inulik eqqorpaa. Anorip sakkortussusiata nalunaaquttap akunneranut kilometerit 200-t qaangersimavai, nalunaaquttap akunneranut 250 kilometerinik sakkortussusilinnik anoraasuartaqarluni. Marluk ajunaarput, 98-it aqqunartiterneqarlutik; illut tamarmik 75 procentii aseruatiterneqarput, 8000-inillu amerlanerusut angerlarsimaffeerupput. Koruunit 6 milliardit nalingi aserorneqarput. Qeqertaaqqami tassani najugaqartut akornanni 800-t missingi Jehovamut nalunaajaasuupput, ilagiinnut arfinilinnut agguataarsimasut. Taakku qanoq eqqorneqarpat?

Anorersuarujussuup Inikip qeqertamut anngutinnginnerani utoqqaanertat nakkutilliisumit angalasartumit siulersorneqarlutik ilagiinni tamaniittut attaveqarfigereersimavaat isumannaannersut anorersuarmullu piareersimanersut qulakkeerniarlugu. Isumassuineq tamanna pisooqataalluni Jehovap nalunaajaasuisa ilaannik ajunaartoqanngilaq ajoquserujussuartoqaraniluunniit. — Naleqqiuguk Jesaja 32:1, 2.

Attaveqaatit angallannerlu sumiiffiit ilarpassuini unipput, Napasuliaq Alapernaarsuiffiulli Peqatigiiffiata Honolulumi immikkoortortaqarfianit aallartitat pingasut ajunaarfimmut annguteqqaartunut ilaapput. Timmisartumik Kauaimukarnissaminnik ajunaartunik ikiuisartunit immikkut akuerineqarsimapput. Erniinnaq tamaani oqaluussisartut attaveqarfigaat aqaguanilu ullaakkut ikiuiniarnissaq aaqqissuunniarlugu ataatsimiisitsillutik. Ikiuiniat komiteannik, pisariaqartitanik naliliisussanik Honolulumilu immikkoortortaqarfik aqqutigalugu atortussanik pisariaqartunik pissarsiniartussanik, pilersitsipput. Pisariaqartitsisunut ikiuutissanik pajuttuillutik illunillu aseruatitersimasunik ipertaajaallutillu iluarsartuussillutik ulloq unnuarlu sulipput.

Aamma Jehovap nalunaajaasui qeqertani allaniittut qatanngutiminnik ikiortarialinnik ikiuiniapallattorujussuupput. Kauaimi timmisartoqarfik ammarniariartoq qatanngutit 70-it ikiuiartorlutik tamaannarput. Ikiuutissat koruuninik 600.000-inik nalillit nassiunneqarput, ilaatigut tassaasut generatorit, kissarsuuteeqqat,  qaammartartut nerisassallu. Qeqertami rigssalit ilaat peqqumaasiviliunneqarpoq. Ujajaaffigineqarnissaa qatanngutit annilaanngatigaat; taavali sakkutuut biilii usisaatillit rigssalip biilinut unittarfianut unipput, ingerlatitsisullu aperipput biilitik tassani uninngatissinnaanerlugit. Sakkutuut biilinik usisaatilinnik paarsisut taamaalillutik aamma rigssalimi ikiuutissamaatinik paarsipput.

Qatanngutit generatorit illumiit illumut angallateqattaarpaat nalunaaquttallu akunnerini marlunni-pingasuni illuni tamani ingerlatittarlugit, taamaalillutik inuit qerititsivii qerititsisinnaassuseqartuartinniarlugit. Qatanngutit eqimattakkuutaat illunut assigiinngitsunut ipertaajaanermut iluarsaassinermullu ikiuiartortinneqaqattaarput. Angut ataaseq nuliaminik Jehovamut nalunaajaasuusumik akerlilersuisorujussuusimasoq imminni qatanngutit ikiuutilermata killitsingaarami qeqqiinnarluni isiginnaaginnarsinnaasimavoq qulliliutigaluni. Allap tikeraartup oqaluussisartut eqimattat allat sulisut isiginnaarsimavai, pissusiallu aaqqissuussaanerallu tupigusuutigingaaramigit ornissimavai aperalugillu suna pillugu taama allaanerutiginersut. Qatanngutip akimmani tamanna Guutimut kristumioqatinullu asanninnermik pissuteqartoq, aperisimavoq: „Qanoq ilillunga Guuti ilinniarsinnaavara?“ (Matîuse 22:37-40) Oqaatsinilu ilasimavai: „Aaqqissuulluagaangaarassi qularnanngitsumik Floridamut tikikkuma utaqqineqassaanga!“

 Kauaimi illut katillugit 295-it Jehovap nalunaajaasuisa ipertaajaaqataaffigalugillu iluarsaateqataaffigaat. Taakkunannga 207-it annikitsumik iluarsaattariaqarsimapput, 54-illi annertuumik aseruatitersimapput, 19-inillu sequmivissimallutik. Ikiorneqartut ilagaat Jehovap nalunaajaasuisut ilisimaneqartut tamarmik, taamaattumik qulakkeerneqarsinnaasimavoq tamarmik pisariaqartitaat matuneqarsimasut. Qatanngut arnaq ikiuutinik pajunneqarmat saniliata Buddhasiortup malugaa, namminermi uppeqatiminit tiinnguanilluunniit misuttagannguanik sunneqarsimannginnami. Arnaq Jehovap nalunaajaasuinit ipertaajaassunneqartoq oqarsimavoq: „Matunnut kasuttortuartarsimavusi, innuttaaqataalluartutullu isigiuarsimavassi, tullermilli asanninnermik ersersitsinerup matuma takutippaanga peqatigiiffissi sumut tunngasoq. Ilungersornissinnut qujanaq.“

Ikiuiniarnermik siulersuisut uppeqatimik timikkuinnaq pisariaqartitaat eqqarsaatiginngilaat, aammali anersaakkut pisariaqartitaat eqqarsaatigalugit. Anorersuarujussuareerneranit ullut marluunngitsulluunniit qaangiummata ilagiit arlallit ataatsimiittaleqqereerput. Aamma atuakkamik atuaqqissaaqatigiit erniinnaq aallarteqqipput. Utoqqaanertat qulit qeqertanit saniliusuneersut Kauaimukarput qeqertami tassani qatanngutinut angutinut arnanullu paarsisutut pulaartarnermik utoqqaanertat tamaaniittut ikioriartorlugit. Sapaammi tulliuttumi ilagiit arfinillit tamarmik Napasuliaq Alapernaarsuiffik-mik atuaqqissaaqatigiipput nalunaaquttallu akunnerani affarmi ikiuiniat komiteata oqalugiaataanik tusarnaarlutik, naggataatigullu aamma nalunaaquttap akunnerata affaani Honolulumi immikkoortortaqarfiup ataatsimiititaata aallartitaata saqqummiuussaanik tusarnaarlutik. Najuuttut ilaat ima oqaluttuarpoq: „Kikkut tamarmik unnersuunneqarnermit pitsaasumit nakussatsinneqarput misigalutillu ajornartorsiutit sinneruttut anersaakkut nukissaqarfigilerlugit. Ataatsimiinneq naammat amerlanerit qullilipput, sivisuumillu ersaartaallutik.“

Nunarsuaq tamakkerlugu qatanngutigiissuit

Asanninneq taama ittoq Jehovap innuttaasa sumi tamaaniittut ilisarnaatigaat. Anoraasuarsuup ulussaarsuarmik malitseqartup Valip ukiumik ataatsimik tamanna sioqqullugu Vest-Samoa perlussiortimmagu aserukkat annertoorujussuusimapput, Jehovalli nalunajaasuisa allameersut qatanngutitik tamaani najugaqartut ikioriartupallassimavaat. Kingorna oqartussaasut upperisarsioqatigiinnut tamanut — aamma Jehovap Nalunaajaasuinut — aningaasaliimmata illuutiminnik iluarsaassinerannut atugassaannik, Jehovap Nalunaajaasuisa aningaasat utertippaat nalunaarlutik aserukkat tamarmik iluarsaanneqareersimasut, siunnersuuteqarlutillu aningaasat naalagaaffiup illuutaasa ilaannik iluarsaassinermut atorneqassasut. Tamanna tamaani atuagassiami eqqartorneqarpoq. Naalagaaffimmi atorfillip tamanna malugaa qatanngummullu oqaluttuarluni ilagiit nammineq ilaasortaaffini kanngusuutiginerarlugit aningaasaliissutit tamaasa tigusimammatigik uffa illuutitik aseruatitersimasut sillimmasersimasut.

Aamma septembarimi 1992-imi Frankrigip kujataata kangiani kuussuaq Ouvèze qarsutsimmat Vaison-la-Romainemilu illoqarfinnilu eqqaaniittuni allani 15-ini aseruatititsilluni Jehovap nalunaajaasui iliuuseqapallassimapput. Qarsutsinersuarmi inuit 40-t ajunaarput, illut 400-t aserorput,  hundredelippassuit allat aseruatiterneqarlutik ilaqutariillu tuusintilippassuit innaallagiaarunneqarlutillu imeerunneqarlutik. Aqaguani ullaannguaq oqaluussisartut tamaani najugaqartut ikiortarialinnik ikiuartortut siullersaraat. Illumik iserfissaaruttut qatanngutinit inoroorsaarfigineqarlutik illusitinneqarput. Qatanngutit hundredelippassuit sumit tamaneersut ikiuiartorlutik tikiussorput. Illoqarfimmi qanittumiittumi Orangemi ikiuiniat komiteat pilersinneqarpoq kajumissutsiminnik sulisut eqimattat sisamat ataqatigiissinniarlugit. Suleqatigiit taakkua minguiaapput illunillu ipertaajaallutik, atisarpassuit marulluinnaat errortiterlugit, sumiiffinnilu eqqorneqarsimasuni nerisassiorlutillu nerisassanik agguaallutik. Allaat kajumissutsiminnik atuarfiup kommunellu illuutaasa arlaqartut ipertaajarnissaannut neqerooruteqarput. Qasusuillutik sulinerat qatanngutinit tamaanilu najugaqartunit qujamasuutigineqartorujussuuvoq.

Sumiiffippassuarni Jehovap nalunaajaasui sanilimittulli ajunaarnernik soorlu qarsutsinernik, anorersuarnik nunallu sajunnerinik eqqugaasarsimapput. Tamakkununnga Guuti allaluunniit pisuutinniarneq ajorpaat, nalunnginnamikku pissutaasut tassaasut piffissaq nalaatsornerlu imaluunniit pissutsit allaqquttussaanngitsut allat. (Nalunaajaasup oqaasii 9:11) Pisuutitsiniaanissaminnut taarsiullugu isumalluarluinnartarput qanorluunniit nalaanneqassagaluarunik uppeqatimik imminnut pilliutigeriaannaasumik asannissuseqarlutik ikioriartorumaaraatik. Isumassuineq tamanna ataatsimut upperisaqarnerannik pissuteqarpoq. Soorlu ajoqersugaq Jakob oqarsimasoq: ’Qatannguteqarussi angummilluunniit arnamilluunniit tamaqanngitsunik ullormut neqissanik ajorsartunik, arlassilu oqarfigippagit: „Eqqissillusi aallaritsi, kissassarlusilu qaarsillarsarniaritsi,“ timaasalu iluaqutissaannik tuninagit, sumut iluaqutaava? Taamattaaq upperneq sulianik ilaqanngitsoq taamaannermini toqungavoq.’ — Jâko 2:15-17.

Sernissorneqarneq piviusoq sumi nanisinnaagipput

Jehovap nalunaajaasuisa Guutip akuliunneratigut tupinnartuliornerit naatsorsuutigineq ajorpaat, paasivaalli sernissorneqarfissartik tassaasoq nunarsuaq tamakkerlugu kristumiutut qatanngutigiissuseq. Qatanngutigiissuillu taakkua ajornartoorfinni iliuuserisartagaat tupinnartuliatut oqaatigineqarsinnaapput. Jesusip oqaasii Matîuse 17:20-miittut taakkua eqqaamavaat: ’Siinuppip naatsiiassartaatut atsigisumik uppersuseqarussi, qaqqamut uumunnga oqarsinnaassavusi: „Tassannga nutserit uunga,“ nutserumaarpoq taava, ajugaqassanngilasilu.’ Aap, akornutit qaqqatut ittut peertarput kristumiutut upperneq ilumoortoq asanninnermik ilalik iliuuseqartitsigaangat.

Piffissami nalorninartulimmi matumani Jehovap innuttaasa nunarsuarmi sumi tamaniittut Guutip assaa sernissuisoq malugisarpaat. Tussiaasiortutut misigipput: „Eqqissillunga innassaanga sinilerlungalu, illit [Jehova] kivisit eqqissinartumik qasuersaartikkamma.“ (Tussiaat 4:9) Tunaarinnillutik maanna suliassartik aalluppaat — ’naalagaaffimmik tusagassaq nuannersoq nunarsuarmi tamarmi inuiaat tamarmik nalujunnaarutissaannut oqaluussissutigalugu’, tamatumalu kingorna ’naggatissaq nalliutissaaq’. (Matîuse 24:14) Qularatillu Jehovap neriorsuutaa qilanaaraat, tassa silarsuaq nutaaq eqqissineqarfiullunilu naapertuilluassuseqarfiusoq, ajunaarnersuarnik inuit pinngortitalluunniit pilersitaannik nalaanneqartarunnaarfissartik.— Mika 4:4. (wD 1/12 93)

[Qupp. 13-mi assiliartat]

Qarsutsinersuaqareernerani Jehovap nalunaajaasui sumit tamaneersut ikiuiartukaapput