Guutip naalagaaffia — paasiviuk?
Guutip naalagaaffia — paasiviuk?
’Issorissumut siaruartersimasut tassa oqaatsimik tusartoq paasillugulu.’ — MATÎUSE 13:23.
1. ’Qilammiup naalagaaffia’ pillugu inuppassuit qanoq upperisaqarpat?
ILLIT Guutip naalagaaffia suusoq ’paasisimaviuk’? ’Qilammiup naalagaaffianik’ paasinnittaatsit ukiut hundredelikkuutaat ingerlaneranni assigiinngitsorpassuusimapput. Ullumikkut upperisarsiornerni oqaluffeqarfilinni nalinginnaasumik upperineqarpoq Guutip naalagaaffia tassaasoq inuk isumataaraangat Guutip taassumunnga uummammiuliutitittagaa. Allat isumaqarput tassaasoq inuit ajunngitsut toqugaangamik ornittagaat naassaanngitsumillu pilluarfissaat. Allat oqarniartarput Guutip inuit namminneq nunarsuarmi Guutip naalagaaffianik pilersitsisussanngortissimagai — kristumiut ajoqersuutaata ileqqussaasalu inuttut atugarisatigut naalakkersuinikkullu aalajangiinernut sunniuteqartinnerisigut.
2. Guutip naalagaaffia Biibilimi qanoq oqaatigineqarpa, naalagaaffiullu tamatuma suut naammassissavai?
2 Biibilimili erseqqissumik takutinneqarpoq Guutip naalagaaffia nunarsuarmiinngitsoq, aammalu tassaanngitsoq uummatikkut pissuseq imaluunniit inuiaqatigiinnik kristumiorpalaarnerusunngorsaaneq. Ilumoorpoq Guutip naalagaaffia pillugu eqqortumik paasinnittut tamatumunngalu uppernermik ersersitsisut inuunerminni annertuumik allannguisarmata. Guutilli naalagaaffia tassaavoq naalakkersuineq qilammiittoq Guutimit pilersinneqarsimasoq taassumalu piumasaanik naammassisitsisussaq, ajortip toqullu kingunerinik suujunnaarsitsisussaq nunarsuarmilu pissutsinik naapertuilluartunik pilersitseqqittussaq. Naalagaaffik tamanna qilammi atuutilereerpoq, qanittukkullu „naalagaaffiit [inuit pilersitaat] taakku tamaasa aserussavai sequmisillugit, namminerli soraajuitsumik atassaaq“. — Daniel 2:44; sarĸúmersitat 11:15; 12:10.
3. Jesusip kiffartornini aallartimmagu inuit sumut ammaanneqarpat?
3 Oqaluttuarisaanermik allattartoq H. G. Wells ima allassimavoq: „Qilammiup naalagaaffianik ajoqersuut tamanna, Jesusip ajoqersuutimini pingaarnerutitaa kristumiulli upperisamik nassuerutaanni pingaaruteqarpianngitsoq, upperisat inuit eqqarsartaasiannik allanngortitsilluinnarnerpaasimasut ilagaat.“ Aallaqqaataaniilli Jesusip kiffartornermini manna pingaarnerutitarisimavaa: ’Allamik isumataaritsi, qilammiup naalagaaffia qanillimmat.’ (Matîuse 4:17) Kunngitut tanitatut nunarsuarmiissimavoq, nuannaarutaasimaqaarlu inuit Naalagaaffiup pilluaqqussutissartaanik ilangeeqataasinnaaliinnaratik aamma naalagaaffimmi tamatumani Jesusimut naalakkersueqataallutillu palasioqataasinnaalernerat! — Lúkarse 22:28-30; sarĸúmersitat 1:6; 5:10.
4. Ukiuni hundredelinni siullerni inuit amerlanersaat ’Guutip naalagaaffia pillugu nutaarsiassamut nuannersumut’ qanoq qisuariarpat, tamannalu eqqartuussummik sumik kinguneqarpa?
4 „Guutip naalagaaffianik nutaarsiassaq nuannersoq“ inuppassuarnut tusarliunneqaraluartoq ikittuinnaat upperaat. Tamatumunnga ilaatigut pissutaavoq upperisarsiornikkut siuttut ’qilammiup naalagaaffia inunnut parnaartarmassuk’. Eqqunngitsunik ajoqersuinermikkut ’matuersaat ilisarsissut’ peersimavaat. Inuit amerlanersaasa Messiasitut Guutillu naalagaaffiani kunngissatut tanitaasutut akueriumanngimmanni Jesus ima oqarsimavoq: ’Guutip naalagaaffia ilissinnit peerneqassavoq, inuiannullu allanut tunniunneqassavoq inerititaanik naammatsitsisunut.’ — Matîuse 4:23; 21:43; 23:13; Lúkarse 11:52.
5. Jesusip assersuusiaanik tusartut amerlanersaasa qanoq ilillutik takutippaat paasinagu tusarnaaginnarlutik?
5 Ilaanni inuppassuarnut ajoqersuitilluni Jesus pisarnermisut arlalinnik assersuusiorpoq katersuussimasut misilinniarlugit Guutillu naalagaaffianik qarsupittumik soqutiginnittut immikkoortinniarlugit. Assersuusiaa siulleq tassaavoq angut issunut assigiinngitsunut sisamanut naatsiiassanik siaruarterisoq. Issut siaruarteriffigineqartut siulliit pingasut naatitsiffigiuminaatsuupput, kingullerli ’issorissuuvoq’ inerititaqarluarnartoq. Assersuusiani naatsunnguaq tamanna kajumissaarummik uuminnga naggaserpaa: ’Tusarsinnaasunik siutilik tusarli.’ (Matîuse 13:1-9) Najuuttut amerlanersaasa tusaavaat, tusarnaarnaguli. Naatsiiassat issunut assigiinngitsunut siaruarterneqartut qanoq ilillutik qilammiup naalagaaffianut assersuunneqarsinnaanersut paasissallugu kajumissuseqaratillu soqutigisaqanngillat. Angerlaramik ulluinnarni inuunertik ingerlateqqilerpaat, immaqa Jesusip assersuusiai oqaluttuliaannartut pitsaasutut ileqqussatigut najoqqutassartalittut isigalugit. Paasinninnissaraluartik naleqangaartoq immikkullu pisinnaatitaaffissaraluatik periarfissaraluatillu nuanningaartut uummatimikkut killinneqarsinnaannginnertik pissutigalugu maangaannartitaat angeqaat!
6. Sooq Jesusip ajoqersugai kisimik ’anngigisanik qilammiup naalagaaffiata piinik’ paasinnissinnaappat?
6 Jesusip ajoqersukkani ima oqarfigai: ’Ilissi tunineqarpusi anngigisat qilammiup naalagaaffiata pii ilisareqqullusigik, taakkuli taama tunineqanngillat.’ Esajas issuaaffigalugu oqaatsini ima ilavai: ’„Inuiaammi ukua uummataat manngertitaapput, siutiminnillu tutsariipput, isiminnillu pillitsipput, isiminnik takunninnaviassanatik siutiminnillu tusassanatik uummatiminnillu paasisaqassanatik allamillu isumataassanatik uannullu katsorsartissanatik.“ Ilissili isisi pilluarput takunnittaramik, siutisilu tusaasaramik.’ — Matîuse 13:10-16; Mákorse 4:11-13.
Guutip naalagaaffianik ’paasisaqarneq’
7. Sooq Guutip naalagaaffianik ’paasinninnissaq’ taama pingaartigaa?
7 Jesusip ajornartorsiutip qiterisaa tassani tikkuarpaa. Guutip naalagaaffia pillugu tusarliussamik ’paasisaqarneq’ pineqarpoq. Ajoqersukkani kisimeeqatigitillugit ima oqarfigai: ’Taava ilissi siaruarterisumik assersuut tusarsiuk. Naalagaaffimmik oqaaseq inuup tusaraangagu paasinagulu, taava ajortup issuma piiariartorarai uummataanut siaruartersimasut.’ Taava nangilluni nassuiarpaa issut assigiinngitsut sisamat tassaasut uummatit assigiinngitsunik pissusillit ’naalagaaffik pillugu oqaatsimik’ siaruarteriffigineqartussat. — Matîuse 13:18-23; Lúkarse 8:9-15.
8. ’Naatsiiassat’ issunut assigiinngitsunut pingasunut siullernut siaruarterneqartut sooq inerititaqarsinnaanngillat?
8 ’Naatsiiassaq’ siaruarterneqartoq tamatigut ajunngitsuuvoq, inerititaqarnissaanulli issup pitsaassusia aalajangiisuussaaq. Uummat issutut ittoq, ulapputissarpassuaqaruni, aqqusinertut aqqutigineqangaarami manngertissimasutut ikkuni, sammisassanik anersaamut tunnganngitsunik ulikkaarluni, Naalagaaffimmik tusarliussamik tusarlerneqaruni ajornassanngeqaaq Naalagaaffimmut piffissaqannginnini utoqqatsissutigissallugu. Naatsiiassaq sumiginnagaasoq sorlanilertinnagu peerneqariaannaassaaq. Uummammut issutut ujarattuutut ittumut naatsiiassaq siaruarterneqaruni naasinnaassagaluarpoq, kisianni naallualersinnaanissaminut manngunilluarsinnaanissaminullu sorlaninnissani ajornakusoortissavaa. Guutimut naalattuaannarnissaq, ingammik annertuumik qinugineqarnermini, eqqarsaatigissallugu merserisorujussuussavaa, nakkaannassallunilu. Uummallu issutut ittoq isumakuluuterpassuarnik imaluunniit pigisatigut pisuunngorusussutsimik kakillarnaqutitut ittunik ulikkaarpat naasoq qajannartoq ipitinneqassaaq. Ulluinnarni pissutsini taama ittuni inerititaqartoqarnavianngilaq.
9. Sooq naatsiiassaq issorissumut siaruarterneqartoq ajunngitsunik inerititaqarpa?
9 Taavami Guutip naalagaaffiata naatsiassartai issorissumut siaruarterneqartut? Jesus ima oqarpoq: ’Issorissumulli siaruartersimasut tassa oqaatsimik tusartoq paasillugulu, taavalu inerititaqalerluni, ilaat hundredeleriakkanik, ilaat arfinilinnik quleriakkanik, ilaat pingasunik quleriakkanik.’ (Matîuse 13:23) Guutip naalagaaffianik ’paasisaqartut’ tamarmik immikkut pissutsit atukkatik naapertorlugit ajunngitsunik inerititaqarsinnaassapput.
Akisussaaffik paasisaqarnerup malitsigisaa
10. (a) Jesusip qanoq ililluni ersersippaa Guutip naalagaaffianik ’paasinninneq’ pilluaqqussutinik aamma akisussaaffimmik nassataqartartoq? (b) Jesusip ajoqersuganngortitsiortoqqusissutaa ukiuni hundredelinni siullerni kristumiunuinnaq atuuppa?
10 Guutip naalagaaffiata immikkoortui assigiinngitsut nassuiarniarlugit arfinilinnik allanik assersuuteqareerluni Jesusip ajoqersukkani ima aperai: ’Tamakku tamaasa paasivisigik?’ Angermata oqarfigai: ’Taamaattumik allakkanik ilisimasup kialuunniit qilammiup naalagaaffianut ajoqersugaasup assigisaraa inuk illumi naalagaasoq, nutaanillu pisoqqanillu pequusivimminit annitsisartoq.’ Jesusip ajoqersuinerata kingunerisaanik ajoqersugai tassaalissapput kristumiut inersimalluartut ’pequusivimminni’ anersaakkut inuussutissarpassuarnik aallersinnaasut. Inuussutissat tamakku ilarpassui Guutip naalagaaffianut attuumassuteqarput. Jesusip erseqqissaatigaa Guutip naalagaaffianik ’paasisaqarneq’ pilluaqqussutinik nassataqaannarani aamma akisussaaffimmik nassataqartoq. Ima peqqusivoq: „Taamaattumik aallaritsi inunnillu inuiannit tamaneersunik ajoqersuganngortitsigitsi, . . . ajoqersorsigillu ilissinnut peqqussutikka tamaasa maleruaqqullugit. Atalu, ullut tamaasa najorpassi pissutsit aaqqissuussaanerata naggatissaa tikillugu.“ — Matîuse 13:51, 52; 28:19, 20, (NV).
11. Guutip naalagaaffianut atatillugu 1914-imi sunik pisoqarpa?
11 Jesusip neriorsuisimanermisut ajoqersukkani ilumoortut ukiut hundredelikkuutaat ingerlaneranni ulloq manna tikillugu najortuarsimavai. Ullussani kingullerni makkunani paasisaqartikkiartuaarsimavai, sallusuissutillu qaamarnanik annertusiartuinnartumik qanoq atuinerannik akisussaatissimallugit. (Lúkarse 19:11-15, 26) 1914-imi Naalagaaffimmut atatillugu maluginiarnartunik pisoqaqattaalerpoq. Ukiumi tamatumani Naalagaaffik erinigisaajuarsimasoq ’erniuvoq’ aamma „pissutsit aaqqissuussaanerata naggatissaa“ aallartippoq. (sarĸúmersitat 11:15; 12:5, 10; Daniel 7:13, 14, 27) Kristumiut ilumoortut pisut isumaat paasillugu oqaluttuarisaanermi Naalagaaffik pillugu oqaluussissutiginninnerit ajoqersuinerillu annersaat ingerlatilerpaat. Tamanna Jesusip ima siulittuutigisimavaa: „Naalagaaffimmillu nutaarsiassaq nuannersoq tamanna nunarsuarmi inuit najugarisaanni tamarsuarmi inuiaat tamarmik nalujunnaarutissaannik oqaluussissutigineqassaaq; taavalu naggatissaq nalliutissaaq.“ — Matîuse 24:14, NV.
12. (a) Nalitsinni Guutip naalagaaffianik nalunaajaassutiginninnersuaq qanoq kinguneqarsimava? (b) Silarsuarmi qularfioqisumi maani kristumiunut sumik navianartoqarpa?
12 Guutip naalagaaffianik nalunaajaatiginninnersuaq tamanna nunanut 230-nit amerlanerusunut anngussimavoq. Ajoqersukkat ilumoortut 5 millioninit amerlanerusut suliamut tamatumunnga peqataalereerput, sulilu allat maanna katersorneqarput. Ajoqersukkalli amerlassusiat nunarsuup inuinut 5,6 milliardiusunut sanilliukkutsigu takuneqarsinnaavoq Jesusip nalaanisut inuit amerlanerpaartaasa Guutip naalagaaffia ’paasisimanngikkaat’. Siulittuutigineqarsimasutut inuppassuit illaruaatiginnillutik oqartarput: ’Naammiuna tikiunnissamik unnersuut?’ (2 Pîtruse 3:3, 4) Uagutsinnut kristumiunut ulorianartoq tassaavoq inuit allat imminnut naammagisimaarnerat, qularnerat timillu piisigut pingaartitsinerat Naalagaaffimmut atatillugu immikkut pisinnaatitaaffitsinnik isiginninnitsinnut sunniukkiartuaarsinnaammat. Silarsuup matuma inuinit avatangerneqarsimagatta isumaasigut iliuusiisigullu ilaalersoorsinnaavavut. Taamaattumik pingaartorujussuuvoq Guutip naalagaaffianik ’paasisaqarnissarput’ tamatuminngalu aalajangiusimanninnissarput!
Naalagaaffimmut atatillugu imminut misissorta
13. Guutip naalagaaffia pillugu nutaarsiassamik nuannersumik oqaluussissutiginninneq eqqarsaatigalugu qanoq ililluta imminut misissorsinnaavugut ’tusartuaannarnerluta’?
13 Katersuiffik inuuffigisarput pillugu Jesus ima oqarsimavoq: ’Inuup Ernerata inngilini aallartikkumaarpai, taakkualu aserorsaarutit tamaasa iluaatsuliortullu naalagaaffianit katersorumaarpaat, . . . Taava iluartut seqinertut qaamatigissapput Ataatamik naalagaaffiani. Tusarsinnaasunik siutilik tusarli.’ (Matîuse 13:41, 43) Guutip naalagaaffianik oqaluussissutiginneqqussutip ajoqersuganngortitsiortoqqussutillu naalanneratigut ’tusaajuarpit’? Eqqaamajuk ’issorissumut siaruartersimasoq oqaatsimik tusartarmat paasillugulu’ ajunngitsunillu inerititaqarluni. — Matîuse 13:23.
14. Unnersuunneqaraangatta qanoq ililluta takutissinnaavarput unnersuussut ’paasisimagipput’?
14 Nammineq atuaqqissaaraangatta kristumiullu ataatsimiinnerinut najuukkaangatta ’uummatikkut iluunngarluta paasiniaasariaqarpugut’. (Ussiatit 2:1-4) Ileqqut, atisat, nipilersukkat aliikkutassallu pillugit unnersuussisoqaraangat uummatitsigut killinneqarnissarput akuerisariaqarparput pisariaqartumillu allannguilluta. Qisuariarnissannut nangaanngisaannarit allatigulluunniit utoqqatsissutissarsiunngisaannarit. Guutip naalagaaffia inuunitsinni piviusuutilluinnarutsigu tamatuma najoqqutassiai malillugit inuujumassaagut suliniarlutalu allanut oqaluussissutigisarlugu. Jesus oqarsimavoq: ’Uannut oqartut: „Naalagaq, Naalagaq,“ qilammiup naalagaaffianut tamakkeratik isissapput, kisianni Ataatama qilammiusup peqqusaanik iliortut.’ — Matîuse 7:21-23.
15. Sooq ’Guutip naalagaaffiata iluarnerullu taassuma piata piniaqqaartuarnissaat’ taama pingaartigaa?
15 Inuussutissat, atisassat inissarlu inuit isumakuluutigeqqajaasarpaat, Jesusili ima oqarpoq: ’Guutilli naalagaaffia iluarnerlu [Guutip] pia piniaqqaarsigik, taava tamakku tamaasa ilanngullugit piumaarpasi.’ (Matîuse 6:33, 34) Guutip naalagaaffia inuuninni sallerpaatittaruk. Pilimanngitsumik inooriaaseqarit, pigisatit pisariaqartut naammagalugit. Sianiilliornerussaaq inuunerput sammisassanik pingaaruteqanngitsunik pigisalerinersuarmillu ulikkaassallugu, immaqa patsisissarsiorluta oqarluta tamakku imminni ajortuunngimmata taamaaliornissaq ippinnanngitsoq. Tamanna ilumoorsinnaagaluartoq taamaattoq pitsaassaaq imminut aperissalluni pisariaqanngitsumik tamakkuninnga pissarsiniarneq atuinerlu nammineq atuaqqissaartarnermut, ataatsimiigiartarnermut oqaluussisarnermullu qanoq sunniuteqassanersut. Jesus oqarsimavoq Guutip naalagaaffia soorlu tassaasoq niuertoq sapanngamik nalilerujussuarmik nassaartoq, pinilu tamaasa akigeriarlugit sapanngamik pisisoq. (Matîuse 13:45, 46) Uaguttaaq Guutip naalagaaffia taamatut isigisariaqarparput. Demasitut, ’sila manna kajungerileramiuk’ kiffartornerminik sumiginnaasimasutut, pinnata Paulusitut iliortariaqarpugut. — 2 Timûtiuse 4:10, 18; Matîuse 19:23, 24; Filípimiut 3:7, 8, 13, 14; 1 Timûtiuse 6:9, 10, 17-19.
’Iluaatsut Guutip naalagaaffia kingornutissanngilaat’
16. Guutip naalagaaffianik ’paasinninnitta’ qanoq ililluni ileqqorluttumik iliulinnginnissatsinnut ikiussavaatigut?
16 Korinthimi ilagiit kanngunartuliorneq akueriinnalermassuk Paulusip toqqaannartumik ima oqarfigisimavai: ’Naluisiluunniit iluaatsut Guutip naalagaaffia kingornussarissanngikkaat? Tammaqinasi: uersaasulluunniit guutipilussiortulluunniit arnaanillilluunniit mumingasumilluunniit kanngunartuliorfigitittut kanngunartuliorfiginnittulluunniit tillittulluunniit piumatuulluunniit imerajuttulluunniit oqarnittulluunniit arsaarisulluunniit Guutip naalagaaffia kingornussarissanngilaat.’ (1 Korintumiut 6:9, 10) Guutip naalagaffia ’paasisimagutsigu’ imminut salloqittarnavianngilagut isumaqarluta kristumiutut kiffartornitsinni ulapputeqartuartilluta Jehovap kanngunartuliorutta akueriinnassagaa. Mingunnartulli suulluunniit akornatsinni taaneqassanngillalluunniit. (Evfisumiut 5:3-5) Silamiut eqqarsariaasii iliuusiiluunniit illit inuuninnut sunniutilersimasut paasigukku ingerlaannaq aaqqinniarniariuk! Tamakkua pissutigiinnarlugit Guutip naalagaaffia annaassallugu erlinnarpallaaqaaq. — Mákorse 9:47.
17. Guutip naalagaaffianik paasinninnitta qanoq ililluni maniguuttunngortittarpaatigut taamaalillutalu allanut naakkiussutaanissaraluarput pinaveersimatittarlugu?
17 Jesus ajoqersugaasa ima aperisimavaat: ’Kina qilammiup naalagaaffiani annerua?’ Meeraaraq akornannut piseriarlugu Jesusip ima akisimavai: ’Ilumut oqarfigaassi, uterlusi meerannguatut ilinngikkussi qilammiup naalagaaffianut pissanngilasi. Taamaammat meerannguatut uumatut ililluni imminik nikanartittoq qilammiup naalagaaffiani anneruvoq.’ (Matîuse 18:1-6) Pingaarniartut, piumasaqarpallaartut, asanninngitsut inatsisaatsullu Guutip naalagaaffianut pisinnaanngillat, imaluunniit Guutip naalagaaffianut innuttaasinnaanatik. Qatanngutinnut asanninninnit, maniguunninnit Guutimillu mianerinninninnit killinneqarlutit inooriaatsikkut allat ’naakkiuffissarsinissaat’ pinaveersaartittarpiuk? Imaluunniit „pisinnaatitaaffitit“ aalajangiusimaniaannartarpigit isummat iliuutsitillu qanorluunniit allanut sunniuteqassagaluarpata? — Rûmamiut 14:13, 17.
18. Guutip naalagaaffiata Guutip piumasaa ’qilammisut nunamissaaq’ pisippagu inuiannut naalattunut qanoq kinguneqassava?
18 Ataatatta qilammiusup, Jehovap, ilungersortumik qinnut manna qanittukkut tamakkiisumik akissavaa: ’Naalagaaffiit tikiulli; peqqusat qilammisut nunamissaaq pili.’ Ungasinngitsukkut Kunngi aqutsisoq, Jesus Kristus, eqqartuussisutut issiavissaarsuarminut ingissaaq, ’savat’ ’savaasanit’ avissaartiterniarlugit. Piffissami aalajangersarneqarsimasumi tamatumani ’kunngip talerpimmi tungaaniittut oqarfigiumaarpai: „Qaagitsi Ataatama pilluaqqusai ukorsii, naalagaaffik silarsuup tunngavileqqaarneranit ilissinnut piareersimasoq kingornussarisiuk“’. Savaasat ’naassaanngitsumik pillagaassapput, iluartulli naassaanngitsumik inuussallutik’. (Matîuse 6:10; 25:31-34, 46) ’Annikilliornartumi angisuumi’ aaqqissuussaanitoqaq Guutillu naalagaaffianik ’paasinnikkumanngitsut’ tamarmik suujunnaarsinneqassapput. ’Annikilliornartumili angisuumi’ aniguisut millionilikkuutaat toqumillu makititaasut milliardilikkuutaat Naalagaaffiup pilluaatissiissutai nunarsuarmi Paratiisinngorteqqinneqarsimasumi naassaanngitsumik nuannaarutigisinnaassavaat. (sarĸúmersitat 7:14) Guutip naalagaaffia tassaavoq nunarsuarmut naalakkersuisussaq nutaaq, qilammit ingerlanneqartoq. Nunarsuarmut inuiannullu atatillugu Jehovap siunertai piviusunngortissavai, taassuma aqqanut illernartumut ataqqinaataasumik. Naalagaaffik tamanna sulissutissallugu, pilliuteqarfigissallugu utaqqissallugulu pakatsiffiussanngeqaaq! Guutip naalagaaffianik ’paasinnissimagutta’ taamaaliornissamut kajumissuseqassaagut! (wE 1/2 96)
Qanoq akissavit?
□ Guutip naalagaaffia suua?
□ Sooq Jesusimik tusarnaartut amerlanersaasa Guutip naalagaaffia ’paasinngilaat’?
□ Guutip naalagaaffianik ’paasisaqarneq’ qanoq ililluni pilluaqqussutinik akisussaaffimmillu nassataqartarpa?
□ Oqaluussineq eqqarsaatigalugu suup takutippaa Guutip naalagaaffia ’paasisariaqaripput’?
□ Qanoq ililluta ileqqutsigut takutissinnaavarput unnersuunneqarnerput ’paasigipput’?
[Atuaqqissaarnermi apeqqutit]
[Qupp. 25-mi assiliartaq]
Jesusip ajoqersugaasa Guutip naalagaaffia ’paasivaat’ ajunngitsunillu inerititaqarlutik