Jehovap piumasaanik iliortut

Jesusip naggataamik oqaasii malillugit

UNNUKKUT nisanip 14-ani ukiumi 33-imi u.n.k. Jesus Kristus apustilinilu aalajaatsut aqqaniliusut nereqatigiipput inimi qullermi Jerusalemimiittumi. Toqunissi qanillisoq nalunnginnamiuk ima oqarfigai: ’Najullatsiarallassavassi.’ (Juánase 13:33) Judas Iskariot angutit Jesusimik toqutserusuttut perlulioqatigiartorlugit anereersimavoq.

Pisut ilungersornassusiat inimi tassaniittuni Jesusip ilisimanerpaavaa. Nalunngilluinnarpaa naalliutsitaangajalerluni. Nalunngilaattaaq ajoqersukkami unnuk tamanna qimakkumaaraanni. (Matîuse 26:31; Sakarja 13:7) Unnuk tamanna Jesusip apustiliminik oqaloqateqarnissaminut periarfissarimmagu kingulleq, qularinngissinnaavarput naggataamik oqaasii taakku pingaaruteqarluinnartumut tunngassasut.

’Taamaaliortaritsi eqqaallunga’

Jesusip ajoqersukkani nalliuttorsiorfimmik nutaamik juutit poorskiannut taartaasumik pilersitseqatigai. Tamanna apustili Paulusip taavaa ’Naalakkap unnukkorsiortitsineranik.’ (1 Korintumiut 11:20) Timiusaq seernarsaateqanngitsoq tigullugu Jesus qujallunilu qinuvoq. Taava timiusaq ajoqersukkaminut agguaappaa imalu oqarluni: ’Nerisiuk. Tassa timiga.’ Taava ermuseq viinni tiguaa qujallunilu qinuvoq ajoqersukkaminullu tunniullugu ima oqarluni: ’Tamassi tassannga imeritsi, tassaammat aaga, angerutsip pia, amerlasuut pillugit kuisoq ajortit isumakkeerneqaatissaannik.’ — Matîuse 26:26-28.

Unnummi tassani suna pingaaruteqarpa? Jesusip timiusaq timiminut assersuutigaa. (Eprîarit 7:26; 1 Pîtruse 2:22, 24) Viinnilu aamminut kuisamut assersuutigaa ajortit isumakkeerneqaatissaat. Aammigut pilliutaa aamma angerfigeqatiginninneruvoq nutaaq Jehovap Guutip inuillu 144.000-it, Jesusip qilammi naalakkersueqatissaasa, akornanni atuuttoq. (Eprîarit 9:14; 12:22-24; sarĸúmersitat 14:1) Ajoqersukkani unnummi tassani nereqatiserigamigit, Jesusip takutippaa qilammi naalakkersueqatigiumaarlugit.

Eqqaaniaalluni nereqatigiinneq tamanna pillugu Jesus peqqusivoq: ’Taamaaliortaritsi eqqaallunga.’ (Lúkarse 22:19) Aap, Naalakkap unnukkorsiortitsinera tamanna ukiut tamaasa pisussaavoq, soorlu poorski ukiumut ataasiarluni pisussaasimasoq. Poorski tamanna Israelikkut nalliuttorsiutigisarsimavaat Egyptenimi inussiaataanerminnit aniguisitaanertik eqqaaniarlugu, Naalakkalli unnukkorsiortitsinera aniguisitaanermut pingaaruteqarnerujussuarmut eqqaaniaaneruvoq — inuiaat utertinneqarsinnaasut ajortimit toqumillu inussiaataajunnaarsinneqarnerannut. (Korintumiut 5:7; Evfisumiut 1:7) Aammalu timiusamik viinnimillu assersuutaasunik ilangiisut siunissami immikkut pisinnaatitaaffeqalerput kunngiusussaagamik palasiullutillu qilammi Guutip naalagaaffiani. — sarĸúmersitat 20:6.

Inuiaat oqaluttuarisaaneranni Jesus Kristusip toqunera pingaaruteqarnerpaavoq. Jesusip iliuuserisimasaanik pingaartitsisut Naalakkap unnukkorsiortitsinera pillugu taassuma peqqussutaa manna malillugu iliortarput: ’Taamaaliortaritsi eqqaallunga.’ Jehovap Nalunaajaasuisa Jesusip toqunera ukiut tamaasa eqqaaniartarpaat ullormi nisanip 14-ianut naapertuuttumi. Ukiorlu manna 1996-imi apriilip 2-ani pissaaq, seqernup tarrereernerani. Tikilluaqqusaangaarputit naalagaaffilersaarfimmi najugaqarfinniittumi najuunnissannut.

’Inassummik nutaamik tunivassi’

Naalakkap unnukkorsiortitsineranik pilersitsinermi saniatigut Jesusip ajoqersukkani naggataamik  unnersuuppai. Ajoqersorneqarluareeraluarlutik angutit taakku ilinniagassaqaqaat. Jesus, namminneq siunissarlu pillugu Guutip siunertai suli paasilluarsimanngilaat. Jesusilli tamakkorpassuarnik ingerlaannaq paasitinniarsarinngilai. (Juánase 14:26; 16:12, 13) Pingaaruteqartumilli oqaluffigai. Oqarpoq: ’Inassummik nutaamik tunivassi, asaqatigeeqqullusi; soorlu uanga asagissi, taamattaaq ilissi asaqatigiissaasi.’ Jesusilu ima nangilluni oqarpoq: ’Matumannga tamarmik ilisarissavaasi ajoqersugarigissi: ’asaqatigiikkussi.’ — Juánase 13:34, 35.

Qanoq ililluni tamanna ’peqqussutaava nutaaq’? Mosesip inatsisaani ima peqqussuteqarpoq: „Tullit ilittut asassavat.“ (3 Moses 19:18) Jesusilli malitsini peqquai imminnut pilliutigeriaannaallutik asanninnermik ersersitseqqullugit, kristumioqatit iluaqutissaannut inuunerminnik pilliuteqariaannaallutik. Soorunami ’asanninnissamik inassut’ aamma pissutsini oqinnerusuni atuuttussaavoq. Jesusimik malinnittut pissutsini qanorluunniit ittuni asanninnermik ersersitsillutik siulliullutik iliuuseqartariaqarput allat anersaakkut allatigullu ikiortarlugit. — Galâsiamiut 6:10.

Unnuk kingulleq tamanna Jesus toqungajalernermini asanninnermit killinneqarluni Jehovamut qinuvoq ajoqersukkani qinnullugit. Qinnummini ima oqarpoq: ’Uangalu silarsuarmiikkunnaarpunga, ukuli suli silarsuarmiipput, uangalu ornippakkit. Ataataq illernartutitaa, uannut tunniussatit aternut aalajangersikkit uatsitut ataasioqqullugit.’ (Juánase 17:11) Malugisariaqartuuvoq Ataataminut qinnummini tassani Jesus malitsini asanninnikkut ataasiussuseqarnissaannik qinnummagit. (Juánase 17:20-23) Pisariaqartippaat ’asaqatigiinnissartik soorlu Jesusip asagaatik’. — Juánase 15:12.

Jesusip naggataamik oqaasii apustilit aalajaatsut malippaat. Uaguttaaq peqqussutaa malittariaqarparput. Ulluni ajornakusoortuni makkunani pallorfiginnittut ilumoortut akornanni asaqatigiinnissaq ataasiussuseqarnissarlu aatsaat taama pingaartigipput. (2 Timûtiuse 3:1) Tassami kristumiut ilumoortut Jesusip peqqussutaanut naalattussaapput qatanngutigiittullu asaqatigiittussaallutik. Tamatumunnga ilaavoq Naalakkap unnukkorsiortitsineranut atatillugu peqqussutaanik malinninneq. (wE 15/3 96)