Kristumiut paarsisut qanoq iliorlutik kiffartuukkaatsit

NUNAT ilaanni savanik paarsisut takuneqarsinnaasarput. Savaatit siulersortarpaat, illersorlugit isumagisarlugillu. Tamanna kristumiunut utoqqaanertanut immikkut soqutiginaateqarpoq, taakku ilaatigut paarsisutut akisussaaffeqaramik. Aap, akisussaaffigaat ’Guutip ilagiissai paarissallugit savarpaallu misissussallugit’. — apustilit suliait 20:28.

Illit kristumiut ilagiissaannut ilaasortaaguit anersaakkut paarsisut qanoq iliorlutik kiffartuussinnaavaatsit? Iluaqutissannullu iliuuseqaraangata qanoq qisuariartariaqarpit? Sooq taakkua ikiuinerat ilagiinniittut pisariaqartippaat?

Sunut illersuisuuppat?

Itsaq liivit uumasullu allat qaasuttut savaatinut navianartuupput savat ataasiakkaarlugit piniartaramikkik. Savanik paarsisut savanik illersuisariaqarput. (1 Samuel 17:34, 35) Satan Diaavulu assingusumik ’liivertut uiannisaartutut angalasarpoq iisassarsiorluni’. (1 Pîtruse 5:8) Kamaqaluni Jehovap nunarsuarmi peqatigiissortai ataatsitut piinnarnagit aammali Guutip kiffai ataasiakkaarlugit saassutarisarpai. Suna siunertaralugu? Jehovap innuttai nikallortikkumavai ’Guutillu inassutaanik maleruaanerat Jesusillu nalunaajaataanik’ nalunaajaatiginninnerat akornuserniarsaralugu. — sarĸúmersitat 12:17.

Israelitoqqami naalakkersuinikkut paarsisuusut paarsinerlunnerat pissutigalugu Jehovap avoqqaarisimavai savaatini ’ujajagassarsiatut pineqarmata nersutinullu kiisortunut tamanut nerisassanngormata’. (Hesekiel 34:8) Akerlianik kristumiut utoqqaanertat qamannga pisumik ilagiinniittut sernissorusuppaat, sumiginnaaneq pussutigalugu imaluunniit Satanip, silarsuup ’amaqqulluunniit’ tunussisut sunniineratigut arlaannaalluunniit tammaqqunagu. (apustilit suliait 20:29, 30) Qanoq ilillutik ilagiinni paarsisut ’savaatit’ ikiorsinnaavaat eqqumajuarnissaannik mianersornissaannillu? Ilaatigut taamaaliorsinnaapput naalagaaffilersaarfimmi piareersarluakkamik Biibili tunngavigalugu oqalugiartarnermikkut. Aammalu ataatsimiinnerit siornisigut kingornisigullu allat isumalluarnartumik  kajumissinartumillu oqaloqatigisinnaavaat. Kiisalu ’savat’ angerlarsimaffiini pulaarsinnaavaat kinguneqarluartumik. (Naleqqiuguk Tussiaat 95:7.) Paarsisutulli pulaarneq suua? Qanoq ililluni taamaaliortoqarsinnaava? Kikkullu pulaarneqartariaqarpat?

Paarsisutut pulaarneq sunaava?

Paarsisutut pulaarneq tassaaginnanngilaq pingaanngitsut oqaloqatigiissutigilaarniarlugit pulaarneq. Utoqqaanertat ilaat ima oqarpoq: „Oqaluussisartut amerlanersaasa allassimaffimmik atuaqatigiinnissaq imaluunniit inunnik Biibilimi eqqartorneqartut ilaannik oqaloqatigiissuteqarnissaq nuannarisarpaat. Soorunami utoqqaanertaq kisimi oqalussanngilaq. Oqaluussisartup pulaakkap amerlanertigut aamma Biibili pillugu eqqarsaatini oqaatigissallugit nuannaarutigisarpaa, taamaalioraangamilu uppernera nakussatsinneqartarpoq. Utoqqaanertaq Napasuliaq Alapernaarsuiffik-mik Iteritsi!-milluunniit nassataqarsinnaavoq ilanngutassiamik aalajangersimasumik ineriartornartumik oqaloqatigiissuteqarniassagamik. Immaqa anersaakkut oqaloqatigiinneq taama ittoq paarsisutut pulaarnerup inuttut pulaaginnarnermit allaassutigaa.“

Utoqqaanertaq alla misilittagaqarluartoq ima oqarpoq: „Pulaartinnani utoqqaanertap oqaluussisartup pularfigisassami pisariaqartitai eqqarsaatigisarpai. Suna taassumunnga ineriartornarsinnaava? Ilumoorluni nersualaarineq paarsisutut pulaarnermi pingaaruteqaqaaq, nersualaarinerup inuk nikallujuinnissaanut nakussatsittarmagu.“ Aap, paarsisutut pulaarneq tassaaginnanngilaq ilagiinni kikkut tamarmik ikinngutigiittut pulaaqattaannerat.

Paarsisup sooq pulaassavaatit?

Utoqqaanertaq pulaaraangami uppeqatimi kajumissaarnissaannut uppernikkullu aalajaattuaqqullugit ikiornissaannut piareersarsimasarpoq. (Rûmamiut 1:11) Taamaattumik utoqqaanertat pulaarumappatsit qanoq qisuariassavit? Nakkutilliisoq angalasartoq ima oqarpoq: „Aatsaat ajornartorsiuteqaleraangat paarsisutut pulaartoqartarpat pulaarfigisaq ima eqqarsassaaq: ’Eqqunngitsuliorsimanerama?’“ Anersaakkut paarsisut asannittut Jehova malinniartarpaat. Taassuma tussiaasiortoq isumagisimavaa ’nakussatsittarlugulu’, ingammik ajorsaateqaraangat immikkullu pisariaqartitaqaraangat.“ — Tussiaat 23:1-4.

Paarsisutut pulaarnerup ’ineriartortitsinissaq’ siunertaraa, ’aserorterinissaq’ siunertarinagu. (2 Korintumiut 13:10) Pulaakkap nikallujuissusianik, ilungersorneranik aalajaatsumillu sulineranik pingaartitsilluni oqaaseqarneq kajumissinassaqaaq. Utoqqaanertat ilaat oqarpoq: „Paarsisutut pulaartoq ajornartorsiutinik paasiniaalluni oqaloqatigiissutiginiarlugillu aggerniaruni pitsaavallaanngilaq. Soorunami imaassinnaavoq oqaluussisartup nammineq ajornartorsiut aalajangersimasoq oqaloqatigiissutigiumagaa. Pulaagarlu ilagiinnit immikkoorniarpallaarpat artorsaateqarpalluunniit ikiorniarlugu utoqqaanertaq iliuuseqartariaqarpoq.“

Kristumiut paarsisut qularnanngitsumik ima allaatigineqartunik immikkut isumaginnikkumassapput: „Savat tammartut ujassavakka siammartullu katersorlugit, ikiligaasut mattuserlugit, sanngiitsut nakussatsillugit pualasuullu nakuusullu paarisariaqarnerisut paaralugit.“ (Hesekiel 34:16) Aap, savat ujarneqarnissaat, katersorneqarnissaat, mattuserneqarnissaat nakussatsinneqarnissaallu pisariaqarsinnaapput. Israelitoqqami paarsisut akisussaaffik tamanna sumiginnarsimavaat. Paarsissagaanni savat ornittariaqarput pisariaqartitaallu soqutigisariaqarlugit. Ullumikkuttaaq paarsisutut pulaartoqaraangat tamanna malunnartariaqarpoq.

Savat peqqissut isumagineqartariaqarput

Ima paasisariaqarnerpa ullumikkut anersaakkut paarsisut savanik peqqissunik immikkut soqutiginnittariaqanngitsut? Savavik ajornartorsiorpat ikiornissaa  piuminarnerusarpoq savanik paarsisumik tatiginnikkaangat. Tamanna pillugu atuakkami ima allassimasoqarpoq: „Savat inunnut nujuartuupput, tatiginnilersikkuminaatsuuppullu.“ Savanit tatigineqarumagaanni atuakkami tamatumani ilaatigut ima siunnersuuteqarpoq: „Akuttunngitsumik savat oqaluffigisakkit. Nipit sungiutissavaat tatiginnilerlutillu. Mangiarfiini ornittakkit.“ — Alles für das Schaf. Handbuch für die artgerechte Haltung (Savanut tunngasut tamat. Qanoq ililluni paarilluarneqarsinnaasut).

Taamaattumik paarsisoq savalu tatigeqatigiilissagunik imminnut attaveqartariaqarput. Aamma kristumiut ilagiissaanni taamaappoq. Utoqqaanertat ilaat ima oqarpoq: „Ilagiinniittut nalunngippassuk utoqqaanertaq aalajangersimasoq paarsisutut pulaartartoq ajornartorsiutilimmut aggernissaa ajornannginnerussaaq.“ Anersaakkut paarsisut naalagaaffilersaarfimmiinnaanngitsoq ’savanik’ nerisitsillutillu isumaginnittussaapput. Periarfissaqarpat utoqqaanertat ’savanik’ inuttut ilisarisimannilerniartariaqarput angerlarsimaffiinut paarsisutut pulaartarlugit. Kristumiut ilaata eqqaamavaa utoqqaanertatut toqqarneqaqqammerluni nakkutilliisup siulittaasup sianerfigaluni qinnuigisimagaani qatanngut angut aqqusinikkut  angallannermi ajunaarnikkut panimminik annaasaqartoq pulaaqqullugu tuppallersarniarlugu. Ima nassuerpoq: „Ajuusaaqaanga, qatanngummi taanna pulaarsimanngisaannarpara nalullugulu sumi najugaqarnersoq! Qujanartumik utoqqaanertap inersimalluartup ilagiumavaanga.“ Aap, utoqqaanertat paarsisutut pulaartarnikkut ikioqatigiissinnaapput.

Paarsisutut pulaarnissamik piareersaaguni pulaarunilu utoqqaanertaq ilagiinni kiffartortumik ’suliaq pingaartoq’ suliariumallugu paarsisuuniartumik ilaqarsinnaavoq. (1 Timûtiuse 3:1, 13) Ilagiinni kiffartortut pingaartittarpaat takullugu utoqqaanertap qanoq ililluni ’savat’ kiffartuukkai paarsisutut pulaarluni! Utoqqaanertat ilagiinnilu kiffartortut taamaalillutik ilagiinniittut tamaasa qaninnerulersarpaat kristumiutut asanninneq ataasiussuserlu nakussatsillugit. — Kulorsamiut 3:14.

Paarsisutut pulaarnissamut piffissaqarneq

Ilagiit ilaanni utoqqaanertaqatigiit paarsisutut pulaartarneq eqqarsaatigalugu atuaqqissaaqatigiinnermik aqutsisartut siulliullutik iliuuseqartittarpaat. Taamaammat gruppit ilaanni oqaluussisartut tamarmik qaammatit arfinillit ingerlaneranni pulaarneqartarsimapput, gruppinili allani oqaluussisartut pulaarneqarsimanatik. Taamaattumik utoqqaanertaq ima oqarpoq: „Ersarippoq utoqqaanertat ilaat siulliullutik iliuuseqarlutik paarsisutut pulaakulasorujussuusut, allalli utoqqaanertaaqatiminnit taamaaliornissaminnut kajumissaarneqartariaqarlutik. Ilagiit ilaanni utoqqaanertaqatigiit oqaluussisartut tamarmik piffissap aalajangersimasup ingerlanerani pulaarneqartarnissaat isumagisarpaat.

Soorunami utoqqaanertap imaluunniit oqaluussisartup allap ilagiinniittut ilaat pulaarsinnaavai immikkut aqqissoorneqarnissaa utaqqinagu. Utoqqaanertat ilaat paarsisutut pulaartinnani sianertarpoq ima oqarluni: „Qaammatit tamaasa ilaqutariit ataatsit paarsisutut pulaartarakkit, qaammatip tulliani ilissi nalunaaquttap ataatsip missaani pulaarsinnaavassi? Qaqugu ilissinnut tulluassava?“

Paarsisutut pulaartarnerup pilluaqqussutissartai

Aaqqissuussaanerup matuma ajortup tatisinera ingasakkiartuinnartillugu paarsisut paasinnittut kajumissinartumik pulaartarnerat iluaqutaasaqaaq. Ilagiinniittut tamarmik paarsisunit pulaarneqarlutik kaammattorneqarlutillu ikiorneqartarpata ’savat’ tamarmik toqqissisimassapput.

Ilagiit oqaluussisartunik akulikitsumik paarsisutut pulaarfigineqartartunik ilaasortallit ima allaatigineqarput: „Paarsisut pulaartarnerat oqaluussisartut ajunngitsorujussuarmik isigilerpaat. Oqaluussisartut utoqqaanertanut saaffiginnikkulasarput, aperalugit qaqugu pulaaqqissanersut, kingullermik pulaarneqaramik oqaloqatigiinneq ineriartornartoq nuannaarutigigamikku. Paarsisutut pulaartarnerit ilagiit anersaavata pitsanngoriartornissaanut peqataapput.“ Nalunaarutit allat takutippaat paarsisut asannillutik taama kiffartortaraangata, ilagiit asanninnikkut, ataasiussutsikkut naakkittarnikkullu ineriartortartut. Ila, pilluaqqusaaneq angeq!

Kristumiut paarsisut ’savat’ anersaakkut iluaqutissaannut pulaartarpaat. Utoqqaanertat uppeqatitik kajumissaarniarpaat nakussatsinniarlugillu. Pulaartillutik paasilerunikku ilungersornartumik ajornartorsiuteqartoq, immaqa kingusinnerusukkut tamatuma oqaloqatigiissutiginissaa isumaqatigiissutigisariaqassavaat, ingammik utoqqaanertaq ilagiinni kiffartortumik ilaqarpat. Qanorluunniilli pisoqaraluarpat naleqqulluartuuvoq paarsisutut pulaarneq qinnummik naggaserneqarpat.

Anersaakkut paarsisut qanittukkut angerlarsimaffissinnut pulaassamaarpaasi? Taamaappat kajumissinassusissaa qilanaarisinnaavarsi. Kiffartuunniarlusi aqqummilu naassaanngitsumik inuunissamut sammisumi ingerlajuarsinnaaqqullusi nakussatsinniarlusi aggissapput. — Matîuse 7:13, 14. (wE 15/3 96)

[Qupp. 22-mi ungalusaq]

Paarsisutut pulaarnissamut siunnersuutit

□ Isumaqatigiissuteqarit: Amerlanertigut siumut isumaqatigiissuteqarnissaq pitsaasuuvoq. Utoqqaanertap ajornartorsiut annertooq sammerusukkuniuk oqaluussisartoq tamatuminnga siumut paasitittariaqarpaa.

□ Piareersarit: Pulaakkap inuttut pissusia pissutsillu atugai eqqarsaatigikkit. Ilumoorlutit nersualaaruk. ’Anersaakkut tunissummik’ kajumissinartumik uppernermullu nakussatsinnartumik tuniuk. — Rûmamiut 1:11, 12.

□ Kia ilagisinnaavaatit? Utoqqaanertaq alla imaluunniit ilagiinni kiffartortoq piukkunnaatilik.

□ Pulaartillusi: Utoqqaanertaq eqqissisimasariaqarpoq, asannilluni, isumalluarluni sumulluunniillu piareersimasariaqarluni. Ilaqutariit, peqqissusiat assigisaallu pillugit apersorit. Tusarnaaqqissaarit. Immikkut ajornartorsiuteqarpat tamanna pillugu paarsisutut pulaartoqaqqinnissaa isumaqatigiissutigiuk.

□ Qanoq sivisutigisumik isersimassavisi? Piffissaq isumaqatigiissutigisimasarsi eqqorlugu aggerit, pulaakkatillu suli nuannisartillugit anigit.

□ Pulaarnerup naggasernera: Qinnut naleqqulluartuullunilu pingaartinnartuussaaq. — Filípimiut 4:6, 7.

[Qupp. 20-mi assiliartaq]

Anersaakkut paarsisut aamma illersuisuupput

[Qupp. 22-mi assiliartaq]

Paarsisutut pulaarnermi anersaakkut kajumissaanissamut periarfissaqarluassaaq.