Naalagaaffiup Nutaarsiassaatai-nik agguaassineq iluatsilluartoq

„SOOQ inuuneq taama ajornartorsiuteqartigaa? Paratiisi ajornartorsiuteqarfiunngitsoq pilersinnaava?“ Tamanna qulequtaavoq Naalagaaffiup Nutaarsiassaatai nr. 34-mut, naqitaaqqamut sisamanik quppernilimmut siorna apriilimi maajimilu oqaatsini 139-ni nunarsuaq tamakkerlugu siaruarterneqartumut. Qatanngutitta Jamaicamiittut suliniarnersuaq tamanna tassaanerarpaat „ukiup ingerlanerani pisimasut pingaarnerpaat ilaat“. Qatanngutivut Belgiamiittut unnersiorput tamanna ’qatanngutinut nuannaarutissarsiffiulluarsimasoq’. Qatanngutivut Tjekkiamiittut aatsaat siullermeerlutik Naalagaaffiup Nutaarsiassaatai-sa ilaannik agguaassisinnaasimapput. Tjekkiami immikkoortortaqarfik ima nalunaarpoq: „Suliniarnersuaq ilungersuussissutsimik nuannaarnermillu pilersitsivoq.“ Nunani allani amerlasuuni qatanngutivut tamakkununnga assingusunik oqaaseqartarput.

Naalagaaffiup Nutaarsiassaatai nr. 34 inunnut upperisarsiornerup aqqani maajunnartulianik anersaaruluutiginnittunut kappialaatiginnittunullu tusarliussamik immikkut ittumik imaqarpoq. (Hesekiel 9:4) Pissutsinik ajornakusoortunik sunniuteqarfigisinnaanngisaminnik atugaqartunut assut tuppallersaataasimavoq. (2 Timûtiuse 3:1) Naqitaaqqap Biibili innersuussutigaa erseqqissaatigalugulu ajornartorsiutit qanittukkut aaqqinneqarumaartut, aammalu qularinngissinnaagipput paratiisi ajornartorsiorfiunngitsoq atuutilerumaartoq. (Lúkarse 23:43) Naqitaaqqamik atuartut ilarpassuisa imarisai upperaat. Togomi angut oqaluussisartunut ima oqarsimavoq: „Tassani allassimasut assortuussutigineqarsinnaanngillat.“

Naqitaaqqamik Naalagaaffiup Nutaarsiassaatai-mik agguaassineq avataanit maluginngitsoorneqanngilaq. Danmarkimi naqitaaqqamik neqeroorfigitittoq ima oqarsimavoq: „USA-mit tikeqqammerpunga, tappavanilu misigisara kingulleq tassa naqitaaqqamik tunisinnera, maanilu misigisara siulleq tassa naqitaaqqap qallunaatuuanik tunisinnera!“

Nuannaarluni suliniaqataaneq

Jehovap nalunaajaasui nunarsuarmi sumi tamaaniittut naqitaaqqamik agguaassinermi nuannaarlutik peqataalluartorujussuupput. Caledonia Nutaaq, El Salvador, Haiti, Italia, Ungarn — nunat tamakku qaammatini naqitaaqqanik Naalagaaffiup Nutaarsiassaatai-nik agguaassiffiusuni oqaluussisartut amerlanerpaaffimminnik qaangiisimanerannik nalunaaruteqartut ilaannaraat.

Zambiami nakkutilliisup angalasartup panini pingasunik ukiulik, Deborah, illumiit illumut atuagassianik agguaassinermik ilinniartissimavaa. Naqitaaqqanik agguaassinersuarmi Deborahp Naalagaaffiup Nutaarsiassaatai nr. 34-t 45-nit amerlanerusut siaruartersimavai. Deborahp naqitaaqqamik tunisimasaasa ilai anaanaata Biibilimik atuaqqissaaqatigisalersimavai.

Afrika Kujalleq-mi inuusuttuaqqap atuaqatini Cashiamik atilik naqitaaqqamik tunisimavaa. Cashiap naqitaaraq atuareeramiuk oqarsimavoq: „Upperissallugu ingasappallaaqaaq — nunarsuarmi paratiisiusumi naassaanngitsumik inuuneq! Sooq siornatigut tamatuminnga oqaluttuunneqarsimanngilanga?“ Biibilimik atuaqqissaaqatigineqartalerpoq. Sapaatip-akunnera ataaseq qaangiutinngitsoq Cashia allaffigisartakkaminit katuuliusumit Cypernimeersumit aamma naqitaaqqamik  nassitippoq. Allaffigisartagaata nassuiaappaa sooq ilagiit katuullit ajoqersuutaat eqqunngitsuusut, allallunilu Jehovap nalunaajaasui ilagalugit Biibilimik atuaqqissaartalerusulluni. Soorunami tamanna Cashiap atuaqqissaartuaannarniarluni aalajangernermigut nakussatsissutigaa.

Schweizimi nukappiaqqap qulinik ukiullip anaanani naqitaaqqanik agguaasseqatigisimavaa. Nukappiaqqap arnaq inuusuttoq naqitaaqqamik tunisimavaa atuarnissaanillu kajumissaarlugu. Arnap inuusuttup nukappiaraq aperisimavaa naqitaaqqap saqqaani tunuanilu assiliartaq — nunarsuarmi inuuneq naassaanngitsoq — ilumut upperineraa. Nukappiaraq akisimavoq: „Aap, soorunami. Qularinngilluinnarpara.“ Taava arnaq oqaluttuarsimavoq upperisaq ilumoortoq ujarlugu upperisarsiortut nammineq ilaaffigisami ajoqersuutaat amerlavallaartut imminnut akerlilersormata. Kingorna arnaq inuusuttoq pulaaramikku Biibilimik atuaqqissaaqatigisalersimavaat.

Ingerlaannaq qisuariartut

Naqitaaqqamik Naalagaaffiup Nutaarsiassaatai-mik pisut ilaatigut ammasumik qisuariartarput. Belgiami niviarsiaqqap naqitaaraq atuareeramiuk nassuersimavoq pisiniarfimmi tillissimalluni. Anaanaata tamanna allanut oqaatigeqqusimanngilaa, niviarsiararli atuakkaminit nalunngeqatiginnissutsimigut attorneqarluni assut ilerasulerpoq, pisiniarfimmilu nakkutilliisumut saaffiginninnissani kimigiisissutigilerlugu. Naggataatigut anaanaata akueraa oqaluussisartorlu ilagitillugu niviarsiaraq pisiniarfimmukartillugu. Pisiniarfimmik nakkutilliisoq tupaallattorujussuuvoq. Paasigamiuk naqitaaraq Naalagaaffiup Nutaarsiassaatai niviarsiaqqap nassuernissaminut killinneqaatigisimagaa, nammineq aamma piumavoq suna taama sakkortutigisumik sunniuteqarsinnaanersoq paasiumallugu. Maanna niviarsiaraq siumukariartortumik Biibilimik atuaqqissaaqatigineqartarpoq.

Camerounimi oqaluussisartoq angummut naqitaaqqamik tunniussisimasoq oqaluttuarpoq: „Pulaaqqikkatsigu naqitaaraq titartuiffigereersimavaa apeqqutissarpassuaqarlunilu. Apeqqutissaminut naammaginartumik akineqareerami oqarpoq: ’Qularutissaanngilaq upperisarsiorneq inuit pilluaannerannut pisooqataasimammat. Naqitaaraatissi sorpassuarnik paasitippaanga, sulili paasisaqarnerorusuppunga.’ Maanna angut aalajangersimasumik Biibilimik atuaqqissaaqatigineqartarpoq.

Uruguayimi oqaluussisartup illumiit illumut angalaartilluni angut naqitaaqqamik tunisimavaa. Oqaluussisartup oqaluussinini ingerlateqqissimavaa, inissiarsuaq tamaat kaajallallugu angalaarfigalugu, naggataatigullu angutip naqitaaqqamik tunisami inaata tunuani matu tikillugu. Tupaallappoq takugamiuk angutip naqitaaraq tigummillugu utaqqigaani. Atuapallareersimavaa sulilu amerlanerusunik paasisaqarusulluni. Ingerlaannaq Biibilimik atuaqqissaaqatigilerpaa.

Allat agguaasseqataapput

Japanimi oqaluussisartoq inuusuttoq angummut 50-it missaanni ukioqarunartumut saaffiginnissimavoq naqitaaqqamillu takutillugu. Angutip aperisimavaa: „Tappiitsumik naapitaqaruit qanoq iliussavit?“ Oqaluussisartup tamanna eqqarsaatigisimanngilaa. Angutip utaqqilaaqquaa, illuminullu iserluni. Uterpoq naqitaaraq Naalagaaffiup Nutaarsiassaatai nassarlugu oqarlunilu: „Pereernikuuvunga. Isumaqarama soqutiginartorujussuarnik pingaartorujussuarnillu imaqartoq, braillemut [tappiitsut naqinnerinut] allaqqikkakku. Tappiitsunik naapitaqaruit taanna atorniariuk.“ Angutip nalunaaquttap-akunnerpassui atorsimavai naqitaaraq braillemut allaqqillugu imai aamma tapiitsut iluaqutiginiassammatigik.

Slovakiami angutip naqitaaraq nuannaringaaramiuk 20-nngorlugu qalipaateqanngitsumik kupeersimavaa nammineq  agguaanniassagamiuk. Schweizimi oqaluussisartup qanigisani naqitaaqqamik qimatsiffigisimavai taakkualu najugaqarfianni quleriiaani najugaqartut allat aamma kasuttorfigalugit. Atertilluni qanigisami ernera naapippaa. Taanna naqitaaqqanik 19-inik piumavoq. Atuarfiani atuartut ajornartorsiutit aaqqiissutissanillu pisariaqartitsineq pillugit allaaserisassinneqarsimapput. Sunaaffa atuaqatini tamaasa naqitaaqqamik ataatsimik tunerusukkai.

Qaangiinnarneqartoqanngilaq

Agguaassinersuarmut peqataasut kikkunnut tamanut anngunnissartik ilungersuutigisimavaat. Caledonia Nutaaq-mi oqaluussisartut marluk naggueqatigiinnut avinngarusimakuluttumi najugalinnut naqitaaqqamik agguaassiartorsimapput. Aqqutaani aqqusineq atorneqarpasinngitsoq malugisimavaat, taamaakkaluartorli aalajangerput aqquserngup isuani najugaqartoqarnersoq paasiniarniarlugu. Biilertik qimaannarlugu aqqusineq atuarlugu kuullu sinerlugu pisullutik aallarput, naggataatigullu illumut apuullutik. Tassani najugaqarput aappariit Jehovap Nalunaajaasui pillugit tusarsimanngisaannartut, naqitaaqqamillu Naalagaaffiup Nutaarsiassaatai-mik pipput. Kingorna oqaluussisartut taakkununnga pulaaqqikkamik tupaallaatigisaannik aappariit aqqusineq iluarsaassimavaat ikaartarfeeraliortitersimallutillu, oqaluussisartut illu tikivillugu biiliminnik ingerlasinnaaniassammata. Biibilimik atuaqqissaaqatigisalerpaat.

Polenimi oqaluussisartoq ataaseq sanaartorfikkooqqaartariaqarsimavoq illu ataaseq naqitaaqqamik aatsiviginiarlugu. Uterluni sanaartorfikkooqqimmat sanasut isikkuppaat. Naggataatigut sanasut ilaata suaarpaa puiussanngikkaatik. Oqaluussisartoq ornigummat unipput naqitaaqqamillu saqqummiussineranut tusarnaaqqissaalerlutik. Naqitaaqqamik atuagassianillu pipput, kingornalu pulaaqqinneqaramik ilaat aamma atuakkanik pipput.

Naqitaaqqat Naalagaaffiup Nutaarsiassaatai nr. 34-t oqaatsinut amerlasoorpassuarnut nutsikkat millionilippassuit agguaanneqarsimapput. Naqitaaqqap oqariartuutaa kimittuumik sunniuteqareersimavoq. Inuppassuit paasilersimavaat paratiisi ajornartorsiuteqarfiunngitsoq piviusunngorsinnaasoq. Eqqortumik isumallit qinnuppavut suli ajunngitsumik qisuariartarumaartut ’qanilaartunullu nunamik kingornussisussanut pilluangaarlutillu inuulersussanut ilaalerumaartut’. — Tussiaat 37:11. (wE 1/3 96)

[Qupp. 32-mi ungalusaq]

Atuagassianik agguaassiuaannarit!

Apriilimi maajimilu 1995-imi naqitaaqqamik Naalagaaffiup Nutaarsiassaatai nr. 34-mik iluatsilluartumik siaruarterinersuaqarpoq. Qaammatini marlunni taakkunani aammattaaq atuagassiat Napasuliaq Alapernaarsuiffik aamma Iteritsi! siaruarterluarneqarsimapput. Assersuutigalugu, Tjekkiami qatanngut angut nalunaarpoq apriilimi naqitaaqqat Naalagaaffiup Nutaarsiassaatai 250-it atuagassiallu 750-it agguaassimallugit. Guadeloupemi arfininngorneq apriilip 15-ia atuagassianik immikkut siaruarteriffissatut qinerneqarsimavoq. Nunami tassani oqaluussisartut tamangajalluinnarmik ullormi tassani oqaluusseqataasimapput! Slovakiami atuagassiat agguaanneqarsimasut amerlanerpaaffiat apriilimi qaangerneqarsimavoq, nunallu ilarpassui assingusunik nalunaaruteqarput.

1996-imi apriili maajilu atuagassianik immikkut agguaassiffigisuugutsigik? Ilagiit ataasiakkaat ullormik atuagassianik immikkut atuiffissamik aaqqissuussisinnaapput. Oqaluussisartut ilaat ikiorti-pioneeriusinnaapput. Taamatut allatulluunniit iliorluni atuagassianik agguaassisarneq siuarsarneqarsinnaavoq, naqitaaqqamilu Naalagaaffiup Nutaarsiassaatai nr. 34-mi tusarliussaq pingaarluinnartoq siaruarterneqartuassaaq. Taava soorlu siorna taama pisimasoq Jehovap suliniarluarnerput pilluaqqungaassavaa. — 2 Timûtiuse 4:22.