Qanoq ililluta ilumoorfiginnittuarsinnaasugut
Qanoq ililluta ilumoorfiginnittuarsinnaasugut
’Inuttaaq Guuti assilillugu pinngortitaq atiniarsiuk iluartillugu illernartillugulu ilumoornikkut.’ — EVFISUMIUT 4:24.
1. Sooq Jehova Guuti ilumoorfigisussaavarput?
ILUMOORFIGINNINNEQ assigiinngitsorpassuarnik immikkoortoqarpoq. Pingaarnerpaamik Jehova Guutimut ilumoortussaavugut. Kinaassususia, uagutsinnut iliuuserisimasai taassumunngalu tunniulluinnarsimanerput eqqarsaatigalugit Jehova ilumoorfigisussaavarput. Jehova Guutimik ilumoorfiginninnerput tamanna qanoq ililluni ersertarpa? Pingaarnerpaamik taassuma najoqqutassiaanut naapertuilluartunut ilumoornitsigut.
2, 3. Ilumoorfiginninneq naapertuilluarnerlu imminnut qanoq atassuteqarpat?
2 Ilumoorfiginnittuarsinnaassagutta Pîtrusip agdlagai sujugdlît 1:15, 16-imi unnersuussut malittariaqarparput: ’Illernartoq qaaqqusisersi malillugu ilississaaq qanoq iliornissigut tamatigut iluartunngoritsi, allassimammat: „Iluartuussaasi, uanga illernartuugama.“’ Jehova Guutimut ilumoornerput pissutigalugu taanna tamatigut naalassavarput, aammalu eqqarsaativut, oqaatsivut iliuutsivullu taassuma piumasaanut illernartumut naapertuutsillugit. Tassa ilerasuuteqanngittuartariaqarpugut, Timûtiusimut agdlagkat sujugdlît 1:3-5-imi peqquneqarnitsitut: ’Inassutigineqartummi [allamik ajoqersuuteqannginnissamik oqaluttuanullu ilumuunngitsunut tusaaniannginnissamik inassutip] siunertarisaa tassa asanninneq uummammigut minguilluni tarnimigullu ilerasuutigisaqarnani uppernermigullu pisuusaarnani.’ Naammalluinnartuunngikkaluarpugut, sapinngisatsinnilli iliorniartariaqarpugut.
3 Jehovamik ilumoorfiginninnitta taassuma najoqqutassiaanut naapertuilluartunut akerliusumut namminissarsiorluta akuersiinnarnaveersaartissavaatigut. Ilumoorfiginnikkutta pisuusaarnavianngilagut. Tussiaasiortup ilumoorfiginninnissani kissaatigisimavaa, imami erinarsorsimavoq: „Ajoqersunnga [Jehova] aqqutigeqqusannik, saqisinnaaqqullunga sallusuissutinni. Uummatiga saatsiguk ataasiinnarmut matumunga: Aterpit mianerineqarnissaanut.“ (Tussiaat 86:11) Ilumoorfiginninneq eqqorluartumik tassaanerarneqarsimavoq ’inatsisinut najoqqutassianulluunniit inuit unioqqutitsaalisinnaanngisaannut naalanneq’.
4, 5. Ilumoorfiginnikkutta suut iliuuserinaveersaassavavut?
4 Jehova Guutimut ilumoornitta taassuma aqqanut naalagaaffianullu kanngunarsaataasumik iliornaveersaartissavaatiguttaaq. Assersuutigalugu, ilaanni kristumiut marluk ima aaqqiagiinngitsigilersimapput ajoraluaqisumik aalajangersimallutik ajornartorsiut eqqartuussisunut silamiunut tunniunniarlugu. Eqqartuussisup ima aperisimavai: ’Marluullusi Jehovamut nalunaajaasuuisi?’ Qularnanngitsumik eqqartuussivimmi suniarnersut paasisinnaanngilai. Kanngunaq! Qatanngutit taakkua Jehova Guutimut ilumoorsimagaluarunik apustilip Paulusip unnersuussutaa manna malissimassagaluarpaat: ’Matumuuna kukkuvusi: ilassinnut saqitsaateqartarassi [ilasi eqqartuussassanngortittarassigik]. Sooq iluarnerutinngilisiuk iluaatsuliorfigitillusi? Sooq iluarnerutinngilisiuk arsaartillusi?’ (1 Korintumiut 6:7) Jehovamik peqatigiissortaanillu kanngunarsaanissamut taarsiullugu inuttut ajorsarnissaq qineraanni Jehova Guutimut ilumoorneq ersersinneqassaaq.
5 Jehova Guutimik ilumoorfiginninnermut aamma ilaavoq inunnut ersinermut nakkaannannginneq. „Inunnik qunugisaqarneq napiaaniutinngortarpoq, [Jehovamilli] tunaarinnittoq aarlerissutissaqanngilaq.“ (Ussatit 29:25) Taamaattumik qinugineqaraangatta nakkaannartanngilagut, Jehovalli nalunaajaasuisa Sovjetunioniusimasumiittut, Malawimiittut, Etiopiamiittut nunanilu allarpassuarniittut maligassiaat malittarparput.
6. Ilumoorfiginnikkutta kikkut ilagiumassanngilavut?
6 Jehova Guutimut ilumoorutta taassuma akeraanik ikinngusersornavianngilagut. Ajoqersugaq Jakob ima allassimavoq: ’Uersartusi ukorsii-aa, ilisimanngilisiuk silap piinik asanninneq Guutimut akerartuutaasoq? Taamaammat silap piinik asannikkumaannartoq Guutimut akerartortigitittaraaq.’ (Jâko 4:4) Ilumoorfiginninneq kunngip Davidip imatut oqaatigisaa ersersikkusupparput: „[Jehova], uangami akeqqatit uumigaakka maajugalugillu akerartortitit. Uumiginninnermik asseqanngitsumik uumigaakka, uanga akeqqattut isigaakka.“ (Tussiaat 139:21, 22) Piaaralutik ajortuliortunik ikinngusersorusunngilagut, peqatigiissutissaqarfiginnginnatsigimmi. Guutimut ilumoornerput pissutigalugu Jehovap akeraasa tamakku inuttut imaluunnit tv-kkut peqatigisarnissaat ingalassimassannginnerparput?
Jehova illersoruk
7. Jehovamik ilumoorfiginninnerput qanoq ililluni ersissava, tamatumunngalu atatillugu Elihu qanoq maligassiuisimava?
7 Ilumoorfiginninnitsinnik killinneqarluta aamma Jehova Guuti illersorumassavarput. Tamatumunnga atatillugu Elihu maligassiuilluarsimavoq. Taanna pillugu Job 32:2, 3-mi ima allassimavoq: „Taassuma Job kamaffigaa imminut pinnani Guuti pisuutimmagu. Aammattaaq ikinngutai pingasut kamaffigai akiillermata taamaalillutillu Guutip iliornera eqqunngitsuutillugu.“ Jobimik allakkat-ni, kapitali 32-mit 37-mut, Elihup Jehova illersorpaa. „Naammagittarlutit utaqqilaariassasutit ajoqersorallassagakkit, Guuti illersorlugu suli oqaasissaqarama . . . pinngortitsisiga eqqortumik iliortoq. . . . Iluassuseqartut alarneq ajorpai.“ — Job 36:2-7.
8. Sooq Jehova illersortariaqarparput?
8 Sooq Jehova illersorneqassava? Ullumikkut arlalippassuartigut asissorneqartarmat. Oqartoqartarpoq Guuti piunngitsoq, ataasiullunilu pingasuusumut ilaasoq, anniarfimmi ikualasumi inunnik anniartitsisartoq, silarsuarmik mumisitsiniarnermini iluatsitsinngitsoorsimasoq, inunnik soqutigisaqanngitsoq, ilaallu ilanngullugit. Ilumoorfiginninnerput takutittarparput Jehova illersorlugu piuneralu nalunaajaassutigalugu; Guutiusoq silatooq, naapertuilluartoq, ajugaqanngitsoq asannittorlu; tamanut piffissamik aalajangersaasartoq; piffissamilu aalajangeriikkamini ajussuseq tamaat peerumaaraa nunarsuarlu paratiisinngortillugu. (Nalunaajaasup oqaasii 3:1) Taamaattumik periarfissat tamaasa atorlugit Jehovap aqqa naalagaaffialu oqaluussissutigisariaqarpavut.
Jehovap peqatigiissortaanut ilumoorneq
9. Ilaat sukkut ilumoorfiginninnginnermik ersersitsisimappat?
9 Maanna sammissavarput Jehovap peqatigiissortaanik takussaasunik ilumoorfiginninneq sumik nassataqartoq. Jehovap peqatigiissortai takussaasut ilumoorfigisassarilluinnarpavut, tamatumunngalu ilaavoq ’inussiamut aalajaallunilu silatuumik’, ilagiinnik kristumiunik anersaakkut nerlersuisuusumik, ilumoorfiginninneq. (Matîuse 24:45-47, NV) Qanoq iliussaagut Napasuliaq Alapernaarsuiffiup atuagassiaataani paasinngisatsinnik immaqaluunniit isumaqatigivallaanngisatsinnik naammattuugaqarutta? Ajuallalluta Guutip peqatigiissortai qimassavavut? Taamatut iliortoqarsimavoq ukiorpassuit matuma siorna Napasuliaq Alapernaarsuiffik-mi allaaserineqarmat angerusisaaq ukiuni tuusintini naalakkersuinissamut atuuttuusoq. Allat kalluunnaveersaartuunissamik apeqqut Napasuliaq Alapernaarsuiffik-mi allaaserineqarmat ajuallassimapput. Ajuallattut peqatigiiffimmut qatanngutiminnullu ilumoorsimasuugunik apeqqutinik tamakkuninnga Jehovap erseqqinnerusumik paasissutissiinissaa utaqqisimassagaluarpaat, piffissarmi aalajangersarsimasani nalliummat taamaaliormat. Taamaalilluni ilumoorfiginninnermut ilaavoq inussiap aalajaallunilu silatuup apeqqutinut aalajangersimasunut paasissutissiineroqqinnissaanut naammagittarluni utaqqineq.
10. Ilumoorfiginnikkutta sumut alapernaasissanngilagut?
10 Jehovap peqatigiissortaanik takussaasunik ilumoorfiginninnermut aamma ilaavoq tunussisunit avissaaqqaneq. Kristumiut ilumoorfigisassaminnut ilumoortut tunussisut isumaannut alapernaaserumanngillat. Inuit Jehova Guutip nunarsuarmi suliaminik siulersuisitai naammalluinnanngitsuupput. Kisianni Guutip oqaasiani qanoq iliussasugut oqaatigineqarpa? Guutip peqatigiissortai qimassagivut? Naamik. Qatanngutinut asanninnerput Guutip peqatigiissortaanut ilumoornissatsinnut killinneqaatigisariaqarparput, ’uummatitsigullu ilungersorluta asaqatigiittuarluta’. — 1 Pîtruse 1:22.
Utoqqaanertanut ilumoorfiginnittunik ilumoorfiginninneq
11. Ilumoorfiginnilluta qanoq ajortumik eqqarsarnaveersaartariaqarpugut?
11 Ilagiinniittut ilaat arlaannik paasiuminaatsitatsinnik oqarpata iliorpataluunniit, ilumoorfiginnilluta pissutiginiagaat qulalerfigissanngilarput, tamatumunngalu taarsiullugu isummiinnarluta immaqa apeqqut pineqartoq assigiinngitsunik isumaqarfigineqarsinnaasoq. Pitsaanerungaannginnerpami utoqqaanertat uppeqatittalu pissusii pitsaasut isiginiarnerugutsigik, kukkussutai pinnagit? Ajortumik eqqarsariaaseq sunaluunniit mianersorfigisariaqarparput, ilumoorfiginninnginnermummi atassuteqarmat! Aamma ilumoorfiginninnerput Paulusip ’kimilluunniit mitalleqqusinani’ unnersuussutaata naalannissaanut iluaqutigissavarput. — Títuse 3:1, 2.
12, 13. Ilagiinni utoqqaanertat suut eqqumaffigisariaqarpaat?
12 Utoqqaanertat immikkut ilumoorfiginniffissaqarput, soorlu allanut oqaatigeqqusaanngitsutigut. Utoqqaanertaq ilagiinnut ilaasortaasut ilaannit allanut oqaatigeqqusaanngitsunik oqaluttuarfigineqaruni ilumoorfiginnilluni allanut oqaluttuarnaveersaartariaqarpoq. Unnersuussut Ussatit 25:9-miittoq malikkumassavaa: „Allat isertugaat tamanut ilisimalersinniaqinagit.“ Tassa imaappoq, allaat nuliani tamatuminnga oqaluttuutissanngilaa!
13 Aamma allatigut utoqqaanertat ilumoorfiginninnerat misilinneqartarpoq. Inunnut iluareqqusaassanerpat, imaluunniit oqaaqqissaarneqarnissaminnik atorfissaqartitsisut sapiillutik saamallutillu ikiorumassanerpaat, aamma qanigisarigaluarunikkik ikinngutigigaluarunikkilluunniit? Jehovap peqatigiissortaanik ilumoorfiginninnerminnit killinneqarlutik utoqqaanertat anersaakkut ikiorneqartariaqartunik kikkunnilluunniit ikiuiumassapput. (Galâsiamiut 6:1, 2) Aammattaaq ilumoorfiginnikkunik apustili Paulusip apustili Peterimut oqalussimaneratut utoqqaanertaqatitik inussiarnersumik oqaaserpassuillu atunngikkaluarlugit oqaluuttassavaat. (Galâsiamiut 2:11-14) Taamatuttaaq nakkutilliisut isumaatsumik pissusilersornaveersaartariaqarput, nakerisarsiornaveersaarlutik allatigulluunniit oqartussaaffimminnik atornerluinaveersaartariaqarput, Guutip peqatigiissortaanik ilumoorfiginnittuarniarneq nakkutigisaminnut sapernarsiseqqunagu. — Filípimiut 4:5.
14, 15. Suut ilagiit ilumoorfiginninnermikkut misilinneqaatigisinnaavaat?
14 Allatiguttaaq ilagiinnik utoqqaanertanillu ilumoorfiginninnissaq pingaaruteqarpoq. Ilagiinni ajornartorsiuteqalerpat Jehovamik taassumalu sinniisaanik ilumoorfiginninnitsinnik takutitsinissamut periarfissaqalissaagut. (Takuuk Vagttårnet 15. juuni 1987-imoortoq, quppernerit 15-17.) Ilagiinnit anisitsisoqaraangat ilumoorfiginnilluta utoqqaanertat tapersersortariaqarpavut, anisitsinermullu naammattunik pissutissaqarsimanersoq namminersorluta apeqquserniarsareqinagu.
15 Ilagiinnik ilumoorfiginninnitsinnut ilaavortaaq sapaatip-akunneranut ataatsimiinnernik tallimanik tamanik pissutsit atukkavut naapertorlugit tapersersuisarnerput. Ilumoorfiginnikkutta ataatsimiigiartuaannaannarata aamma piareersarluartassaagut periarfissaqaleraangattalu kajumissinartunik oqaaseqartarluta. — Eprîarit 10:24, 25.
Aappariinnermi ilumoorfigeqatigiinneq
16, 17. Aappariinnermi ilumoorfigeqatigiinneq qanoq ersersinneqartarpa?
16 Kina aamma ilumoorfigisariaqarparput? Aappaqarutta katinnitsinni neriorsuuterput eqqortillugu aappatsinnut ilumoortariaqarpugut. Assersuutigalugu, angutit arnalluunniit allat aappatsinnit inussiarnerfiginerugutsigik kukkussaagut. Aappatsinnut ilumoorutta aappatta sanngiissutai kukkunerilu allanut siaruarterumassanngilavut. Aapparmik ammasumik oqaloqateqartarnerup ilungersorluni atatiinnarniarnissaanut, taamaalillunilu maleruagassap atortuujuaannartup malinnissaanut, taarsiullugu allanut unnerluaneq ajornannginnerusaqigami! (Matîuse 7:12) Aappariinnermi kristumiutut ilumoorfiginninnerup atatiinnarniarnissaa imaannaanngitsuusinnaavoq.
17 Iluatsitsissagutta annertuumik unioqqutitsinaveersaaginnarata aamma eqqarsaativut misigissutsivullu sernissortariaqarpavut. (Tussiaat 19:15) Pissanganartunut nuannaarniutinullu kipisaneq sakkortooq uummatitsinni salloqittaagajuttumi ineriartortikkutsigu pinnarinninnerup ajuutiginninnerullu akornanni killeqarfik namminissarsiornitsinni qaangertooriaannaassavarput. Kunngip Salomonip assersuutitigut oqalulluni aappariinnermi ilumoorfigeqatigiinnissaq kajumissaarutigigamiuk uiusut siunnersorpai ’imermik namminneq puilasuliaatimik imaannik imigaqaqqullugit’. (Ussatit 5:15) Aamma Jesus oqarsimavoq: ’Pileritsaallugu arnamut isigisup uummammigut arnaanerereerpaa.’ (Matîuse 5:28) Uiusoq atoqatigiinnermut tunngasunik kanngunartunik isiginnaagaqartartoq allasiornissaminut sunnertissinnaavoq, taamaalillunilu nuliaminut ilumuunngitsuliorluni. Nuliaasorlu tv-kkut isiginnaagassianik allasiornertaqaqisunik tiguartilluni isiginnaartartoq uiminut ilumuunngitsuliornissaminut ussernartorsiulersinnaavoq. Aapparmut ilumooraanni tamakkununnga taarsiullugu aappariittut ataqatigiinneq nakussassartariaqarpoq, taamaalillunilu Jehova Guutip iluarisaanik iliornissamut ikioqatigiilluni.
Ilumoorfiginnittuarnissamut ikiuut
18. Ilumoorfiginninnissatsinnut suna iluaqutigissavarput?
18 Jehovamik, taassuma peqatigiissortaanik, ilagiinnik aapparmillu ilumoorfiginninnissatsinnut suut iluaqutigissavavut? Iluaqutaassaaq paasigutsigu ilumoorfiginninnerput Jehovap kisimi oqartussaassusianik qutsissisitsinermut qanimut atassuteqartoq. Ilumoorfiginnittuaraangatta takutittarparput Jehova qilammi nunarsuarmilu kisimi oqartussaasutut isigigipput. Tamanna imminut ataqqinitta pigiinnarnissaanut Jehovallu silarsuassaani nutaami naassaanngitsumik inuunissamik neriuutitsinnik nakussatsitsinissamut iluaqutigissavarput. Ilumoorfiginninnitsinnik attassiinnarnissamut iluaqutigisinnaasarput tassaavoq ilumoorfiginninnerminnik ersersitsisimasunik qimerluuineq, soorlu Jehovamik namminermik upperluartunillu Biibilimi aammalu Napasuliaq Alapernaarsuiffiup Peqatigiiffiata naqitigaataani, ilaatigut ’Årbogini’, oqaluttuarineqartunik.
19. Upperneq qanoq ililluta ilumoorfiginnittuarnissatsinnut iluaqutigisinnaavarput?
19 Jehova Guutimut aalajaatsumik uppissuseqarutta taassumalu iluarinngisaanik iliortoornissarput annilaangagalugu, ilumoorfiginnittuarnissatsinnut iluaqutigissavarput. Uppernerput Guutimillu mianerinninnerput nakussatsissavavut eqiasuilluta Biibilimik atuaqqissaartarnitsigut kristumiutullu kiffartornermut peqataanitsigut. Taamaaliorutta Paulusip Evfisumiunut agdlagkat 4:23, 24-mi unnersuussutaa naapertorlugu iliornissatsinnut kajumississaagut: ’Nutaanngoritsi anersaassigut isumaqaatissigut, inuttaarlu Guuti assilillugu pinngortitaq atisiuk iluartillugu illernartillugulu ilumoornikkut.’
20. Pissuseq suna Jehovamik ilumoorfigisassatsinnillu allanik ilumoorfiginninnissatsinnut iluaqutiginerpaassavarput?
20 Aammattaaq Jehovap pissusiinik pingaartitsineq ilumoorfiginnittuarnissatsinnut iluaqutigissavarput. Ataatatsinnik qilammiusumik namminissarsiunngitsumik asanninneq — uummatikkut, isumakkut tarnikkullu iluunngarluta nukitsinnillu tamanik taassuminnga asanninnerput — uagutsinnullu iliuuserisimasaanik tamanik qujamasuutiginninneq taassumunnga ilumoornissatsinnut allanit tamanit iluaqutiginerpaassavavut. Kiisalu asanninneq Jesusip ajoqersukkaminut ilisarnaataaneragaa pigigutsigu kristumiunik ilagiinniittunik ilaqutariinniittunillu tamanik ilumoorfiginninnitsinnut siuarsaataassaaq. Allatulluunniit oqaatigalugu: Namminissarsiorneq imaluunniit namminissarsiunnginneq apeqqutaavoq. Ilumoorfiginninnginnerup assigaa namminissarsiorneq. Ilumoorfiginninnerup assigaa namminissarsiunnginneq. — Mákorse 12:30, 31; Juánase 13:34, 35.
21. Ilumoorfiginninneq pillugu sammeriikkavut qanoq ataatsimut eqikkarsinnaavavut?
21 Sammeriikkavut ataatsimut eqikkariartigik. Ilumoorfiginninneq pissusiuvoq kusanartoq Jehova Guutip, Jesus Kristusip Jehovallu kiffaasa ilumoortut tamarmik ilisarnaatigisaat. Jehova Guutimut attaveqarlualerumagutta peqqussutaanik naapertuilluartunik maleruaanitsigut, taassuma akeraanik peqateqarumannginnitsigut sukkulluunniillu oqaluussilluta Jehovamik illersuinitsigut taassumunnga ilumoortariaqarpugut. Aammattaaq Jehovap peqatigiissortaanut takussaasunut, ilagiinnut ilaaffigisatsinnut aappatsinnullu ilumoortariaqarpugut. Ilumoorfiginninnerput attatiinnaraangatsigu Jehovap kisimi oqartussaassusianik qutsissisitseqataasarpugut, taamaalillutalu apeqqummi akerleriissutaasumi taassumunnga illiuttarluta. Taamaalilluta taassumannga iluarisaassaagut ajugaasullu akissarsiassaanik, inuunermik naassaanngitsumik, akissarsilluta. Apustili Paulusip Guutimut tunniusimaneq pillugu oqaasii aamma ilumoorfiginninnermut tunngatinneqarsinnaapput. ’Inuunermut matumunnga piumaartussamullu’ iluaqutaavoq. — Tussiaat 18:26; 1 Timûtiuse 4:8. (wE 15/3 96)
Apeqqutit uteqqiissutissat
□ Guutimik ilumoorfiginninnerput qanoq ililluta ersersissinnaavarput?
□ Jehovap peqatigiissortaanik ilumoorfiginnissagaanni suut pisariaqarpat?
□ Utoqqaanertat ilumoorfiginninnertik qanoq takutittarpaat?
□ Aappariit suut eqqumaffigisariaqarpaat?
□ Pissutsit suut ilumoorfiginnittuarnissatsinnut iluaqutigisinnaavavut?
[Atuaqqissaarnermi apeqqutit]
[Qupp. 16-imi assiliartaq]
Utoqqaanertat ilagiinni ilaasortanik ilumoorfiginnikkunik allanut oqaatigeqqusaanngitsunik siaruarteriumassanngillat
[Qupp. 17-imi assiliartaq]
Aapparmut ilumooraanni aappariinneq nakussatsinneqartarpoq