Qinngaqqunnanngitsumik eqqaaniaalluni nalliuttorsiorneq

UKIUMI 33-mi nisanip ulluisa 14-ianni unnukkut Jesusip eqqaaniaalluni nalliuttorsiorneq pilersippaa. * Apustilini 12-iusut ilagalugit poorskisiummik nereqqammerpoq, taamaattumik ulloq sunaasoq qularisariaqanngilarput. Killuussisoq Judas anisereerlugu, Jesusip ’timiusaq tiguaa, pilluaqqusillunilu aggorpaa, taakkununngalu tunniullugu oqarlunilu: „Tigusigitsi, tassa timiga.“ Ermuserlu tiguaa, qujallunilu taassuminnga tunivai; tamarmillu tassannga imerput. Oqarfigaalu: „Tassa aaga, angerutsip pia, amerlasuut pillugit kuisoq.“’ — Mákorse 14:22-24.

Jesusip ajoqersukkani peqquai toqunerminik eqqaaniaasaqqullugit, pingaaruteqaqimmat. (Lúkarse 22:19; 1 Korintumiut 11:23-26) Taassuma kisimi inuunini pilliutigalugu inuiaat ajortip toqullu kingornussaasut perloqqussutaannit utertissinnaavai. (Rûmamiut 5:12; 6:23) Timiusaq viinnilu timiminut naammalluinnartumut aamminullu assersuutitut atorpai. Ulloq eqqortoq nalunnginnatsigu ukiut tamaasa piffissami eqqortumi nalliuttorsiutigisinnaasarparput, soorluttaaq juutit taamanikkut poorskisiortarsimasut. Qinngaqqunnanngitsumillu taamaaliortariaqarpugut. Sooq?

Apustili Paulus allassimavoq timiusamik viinnimillu ilangiiffiginnittartut taamaalioraangamik ’Naalakkap toqua oqaatigisassagaat tikiutserlugu’. (1 Korintumiut 11:26) Taamaattumik nalliuttorsiornermi Jesusip toqunera tamatumalu inuiannut pingaaruteqarnera erseqqissarneqassapput. Tassaasariaqarpoq nalliuttorsiorneq persuarsiornartoq, Guutillu ajunngissusia aamma Jehovamik erneranillu pingaartitsinerput eqqarsaatigeqqissaartariaqarpavut. (Rûmamiut 5:8; Títuse 2:14; 1 Juánase 4:9, 10) Taamaattumik Paulus ima mianersoqqusivoq: ’Tamanna pillugu timiusamit tamatumannga nerisoq, Naalakkalluunniit ermusianit imertoq qinngaqqunnarluni, taanna pillagassaatippoq Naalakkap timaalu aavalu pillugit.’ — 1 Korintumiut 11:27.

Qinngaqqunnanngitsumik — qanoq ililluni?

Soorunami nalliuttorsiornerup tamatuma iliuutsinik naleqqutinngitsunik imaluunniit Guutimik nalusut ileqqorisaannik mingutsinneqasappat Guutip iluarissanngilaa. (Jâko 1:27; 4:3, 4) Aamma poorskip nalaani ileqqut inuit nuannarisaat eqqarsaatigalugit taamaappoq. Jesusip peqqussutaa malillugu ’eqqaallugu taamaalioraangatta’ eqqaaniaalluni nalliuttorsiorneq ilitsersuutai maleruaqqissaarlugit nalliuttorsiutigisariaqarparput. (Lúkarse 22:19; 1 Korintumiut 11:24, 25) Taamaattumik ileqqulersuutit kristumiuuneraqatigiinni nalliuttorsiornermut tamatumunnga ilanngunneqarsimasut naleqqutinngivipput. Qinerlerfissiami New Catholic Encyclopedia-mi miserratigineqanngilaq ’ullumikkut nerliiviliartarnerit Kristusip apustiliisalu iliuuserisarsimasaannit pilimanianngitsumit allaanerulluinnartut’. Aamma nerliiviliartarneq akulikitsumik, ilaanni allaat ullut tamaasa, pisarmat kristumiuuneraqatigiit Jesusip siunertaanit allaanerulluinnartumik iliortarput nalinginnaatillugulu.

Paulusip kristumiut Korinthimiittut mianersoqqusimavai qinngaqqunnanngitsumik nalliuttorsiortaqqullugit, ilagiinni taakkunani Naalakkap unnukkorsiortitsineranut atatillugu ajornartorsiuteqalersimammat. Nalliuttorsuup tamatuma illernassusia ilaasa ataqqinngilaat.  Namminneq unnukkorsiutissatik nassartarpaat ataatsimiinnerup siornani nalaaniluunniit nerillugit. Ilaannikkullu nerivallaarlutillu imerpallaartarput. Taamaalillutik aramallutillu puungalersarput. Isumakkut anersaakkullu eqqumannginnamik ’timi immikkoorsusiagut ilisarisinnaanngilaat’ ’pillagassaatillutillu Naalakkap timaalu aavalu pillugit’. Allalli nerisassaqaratik kaakkamik eqqarsaataat allamut sangoqqajaasarput. Iluamik oqaatigalugu, pingaartitsillutik nalliuttorsuullu persuarsiornassusianik — tassaaneranik Naalakkap toquneranik eqqaaniaaneq — paasinnillutik assersuutinik ilangiinissamut taamaatsillutik naleqqutinngillat. Taamaattumik pillagassaatipput tamanna ataqqinnginnamikku, allaallu asissoramikku. — 1 Korintumiut 11:27-34.

Siuneqassuseq pisariaqarpoq

Ilaasa eqqaaniaalluni nalliuttorsiornermi assersuutit ilangiiffigisarpaat taamaaliortussaanngikkaluarlutik. Ilangiiffiginnittussat tassaapput Guutimit toqqakkat, taakkulu Guutip anersaavanit tamatuminnga paasitinneqartarput. (Rûmamiut 8:15-17; 2 Korintumiut 1:21, 22) Namminneq aalajangersimanertik pissutiginagu taamaaliornissamut qinngaqqunnanngillat. Guutip Kristus ilagalugu qilammi naalakkersuisussat amerlassusiat killilersimavaa 144.000-inngorlugu, Kristusip utertitsissummik pilliutaanik iluaqutiginnittussanut tamanut naleqqiutissagaanni amerlavallaanngitsut. (sarĸúmersitat 14:1, 3) Siulliit Jesusip nalaani toqqarneqarsimammata paasinarsivoq ullumikkut ikittuinnaat ilangiiffiginnittussaasut. Taakkulu utoqqalillutik toqusaramik ikiliartuinnarput.

Sooq ilaasa eqqunngitsumik iliorlutik assersuutit ilangiiffigisoorsinnaavaat? Immaqa upperisarisimasartik pillugu — soorlu aalajaatsut tamarmik qilaliarnissaannik ajoqersuut. Imaluunniit pingaarniarusussuseq namminissarsiornerlu pissutaasinnaapput — ilaat isumaqarsinnaapput allanit pisassaqarnerullutik imaluunniit allanit ataqqinarnerullutik. Ilaasa immaqa ajornartorsiutit annertuut aliasunnerluunniit pissutigalugit misigisatik sakkortuut nunarsuarmi inuunissamik soqutigisaarusutigisimavaat. Aammalu qilaliartussat ilaannik qanimut ikinnguteqarneq pissutaasinnaavoq. Tamattali eqqaamasariaqarparput Guuti kisimi aalajangiisussaammat, uagut pinnata. (Rûmamiut 9:16) Assersuutinik ilangiiffiginnissimasup ’imminik misililluni’ paasileruniuk taamaaliortussaanani, taava maanna taamaaliortarunnaassaaq. — 1 Korintumiut 11:28.

Inuiaat amerlanersaat Guutip neriuutissaqalersissimavai nunarsuarmi paratiisiusumi naassaanngitsumik inuunissamik. Neriuut tamanna pilluaqqusaanerujussuuvoq kajumissinaqisoq. (1 Moses 1:28; Tussiaat 37:9, 11) Maani nunarsuarmi aalajaatsut asasatik toqusimasut makereerpata ilagalugit inuujumaarput, upperluartullu itsarsuaq inuusimasut, soorlu Abraham, Sara, Moses, Rahab, David kiisalu Johannes Kuisisoq, naapissinnaassallugit — taakku tamarmik Jesusip suli qilammi inuunissamut periarfissaq pilersinngikkallarmagu toqusimagamik. — Matîuse 11:11; naleqqiuguk 1 Korintumiut 15:20-23.

Nunarsuarmi inuunissamik neriuutissallit qinngaqqunnanngitsumik Naalakkap unnukkorsiortitsinera nalliuttorsiutigisinnaavaat najuullutik ataqqinnillutillu malinnaallutik, timiusaq viinnilu ilangiiffiginngikkaluarlugit. Taakkuttaaq Kristusip pilliutaa iluaqutigingaarpaat, tamanna tunngavigalugu Guutimut iluarisaasinnaagamik. (sarĸúmersitat 7:14, 15) Nalliuttorsiornermi oqalugiaat tusarnaaqqissaartillugu illernartunik pingaartitsinerat nakussatsinneqassaaq nunarsuarlu tamakkerlugu Guutip innuttaanut ataasiussuseqarnermik kissaateqarnerujartuinnassallutik.

Ukioq manna, sisamanngornermi, apriilip ulluisa 2-anni seqernup tarrinnerata kingorna, nunarsuaq tamakkerlugu Jehovap Nalunaajaasuisa ilagiivinni tamani 78.000-init amerlanerusuni eqqaaniaalluni nalliuttorsiorneqassaaq. Illit peqataarusuppit? (wE 1/4 96)

[Quppernerup ataani ilanngussaq]

 [Qupp. 8-mi assiliartaq]

Jehovap Nalunaajaasui ukiumut ataasiaannarlutik eqqaaniaallutik nalliuttorsiortarput