Guuti, naalagaaffik illillu

„Irlandimi oqaluffeqarfik naalagaaffillu inuit avinneq pillugu taasineranni akerleriittut inissisimapput.“

AVIISIMI The New York Times-imi qulequttap tamatuma takutippaa ullumikkut qanoq inuit naalagaaffiup piumasaqaataasa oqaluffeqarfiullu ajoqersuutigisaasa akornanni qinersisariaqalersinnaasartut.

Ilanngutassiami ima allassimavoq: „Avinnissamik inerteqqut atorunnaarsinneqassanersoq atuutiinnassanersorluunniit pillugu inuit taasisinneqarnissaat qaammataanngitsumilluunniit sioqqullugu Irlandimiut amerlanersaat katuuliusut naalakkersuinikkut siuttut oqaluffeqarfiullu siuttuisa akornanni akerleriinnersuarmik nalinginnaanngitsumik takusaqarput.“ Naalagaaffiup avinnissamik inerteqqutip taamaatinneqarnissaa siunnersuutigaa, ilagiilli katuullit avinnissaq kateqqinnissarlu akerlerilluinnarpaat. Katuullit Irlandimiut oqaluffeqarfik naalagaaffilluunniit qinertariaqarpaat. Inernera: naalagaaffik ajugaaqqarpoq.

Irlandimi avannarlermi inuit suli ilungersornarnerusumik misigisaqarsimapput, ukiorpassuarni inuiaassutsikkut oqartussaassuseq pillugu akiuunnermut akuliusimasimagamik. Amerlasuut toqutaasimapput. Katuullit Romalerisut naaggaartullu naalagaaffimmut sorlermut, imaluunniit naalakkersuisunut sorlernut, naalatsigitissanerlutik isumaqatigiissutiginngilaat: Irlandimi Avannarlermi tuluit naalakkersuinerat imaluunniit Irlandimut tamarmut naalakkersuisut qitiusut.

 Tamatumunnga assingusumik, Jugoslaviaasimasumi naalakkersuisut piumasarisimavaat upperisarsiornernut assigiinngitsunut ilaasortaasut, ilaatigut katuullit ortodoxillu, nunatat pillugit sorsussasut. Innuttaasut nalinginnaasut pingaarnerpaamik sumut pisussaaffeqarpat? Naalagaaffimmut sinniisuunerartut naalassanerpaat, imaluunniit Guuti ima oqartoq naalassanerpaat: ’Inuassanngilatit, . . . tullit ilittut asassavat.’ — Rûmamiut 13:9.

Immaqa eqqarsarputit pissutsinik taama ittunik ajornartorsiuteqalernaviarnak. Kisianni nalunaqaaq. Imaassinnaavoq tamatumannga attorneqareersutit. Atuakkiamini The State in the New Testament-mi (Naalakkersuisut Testamentitaaq naapertorlugu) upperisarsiornermik ilisimatuup Oscar Cullmannip eqqartorpai ’aalajangigassat inuunermut navianartorsiornartut ullumikkut kristumiut kisermaassillutik naalakkersuisunit sioorasaarneqaraangamik pissutsini isumatsannartuni aalajangigaassaat immaqaluunniit qinnuigineqarnermikkut aalajangigassaat’. Aamma eqqartorpaa „kristumiut tamarmik — allaat pissutsit ’nalinginnaasut’ inuuffigigaluarlugit — taamatulli pingaartigisumik akisussaaffeqartut kristumiuunertik pissutigiinnarlugu artornartunik ajornartorsiuteqaleraangamik“.

Taamaattumik ullumikkut kristumiut upperisarsiornerup naalagaaffiullu imminnut attaveqarnerat soqutigisariaqarpaat. Aallaqqaataaniilli kristumiut oqartussaasunut oqimaaqatigiissumik isumaqarfiginninneq ineriartortinniartarsimavaat. Naalagaat, Jesus Kristus, oqartussaasunit Romamiunit eqqartuunneqarluni toqutaasimavoq. Taassuma ajoqersugaasa kristumiutut pisussaaffitik aammalu Romamiut naalagaaffiannut pisussaaffitik imminnut aaqqiagiissinniartariaqarsimavaat. Taamaattumik ullumikkut kristumiut taakkua oqartussaasunut attaveqarsimanerat misissoqqissaarunikku najoqqutassianik iluaqutaasunik nassaarsinnaassapput.

[Qupp. 3-mi suminngaanneernerat]

Tom Haley/Sipa Press