Guutip oqaasia atuartaruk Taannalu sallusuissutikkut kiffartuullugu
Guutip oqaasia atuartaruk Taannalu sallusuissutikkut kiffartuullugu
„Ajoqersunnga Jehova aqqutigeqqusannik, saqisinnaaqqullunga sallusuissutinni.“ — TUSSIAAT 86:11.
1. Sallusuissut pillugu atuagassiap matuma normuani siullermi qanoq allassimasoqarpa?
JEHOVAP qaamassutsi sallusuissutsilu aallartittarpai. (Tussiaat 43:3) Oqaatsiminik, Biibilimik, atuarnissatsinnut piginnaanngortissimavaatigut, sallusuissummillu ilisimasaqalersilluta. Atuagassiap matuma normuani siullermi, 1879-imi juulimi saqqummersumi ima allassimasoqarpoq: „Sallusuissut naasumut mikisunnguamut assersuunneqarsinnaavoq, tammarnerit naasupiluppassuisa akornanniittoq taakkunanngalu ipitinneqangajalersoq. Naniumagukku ujartuaannartariaqarpat. Kusanassusia isigiumallugu tammarnerit naasupilui ilumoortuusaarniarnerullu orpii illuartittariaqarpatit. Pigerusukkukku sikittariaqarputit tigullugulu! Sallusuissummik naasoq ataasiinnaq naammagissanngilat. Ataasiinnaq naammakkaluarpat allat amerlanerusut nanineqarsinnaassanngillat. Naasut amerlanerusut naniniarniakkit katersorlugillu.“ Guutip oqaasia atuaqqissaartarutsigu eqqorluartumik ilisimasaqalissaagut taassumalu sallusuissutaani saqisinnaalluta. — Tussiaat 86:11.
2. Ezrap allallu Guutip oqaasia juutinut Jerusalemitoqqamiittunut atuffassissutigimmassuk qanoq kinguneqarpa?
2 Ukiup 455 u.n.s. kingorna Jerusalemip qarmai sananeqaqqereermata palasiusup Ezrap allallu Guutip inatsisai juutinut atuffassissutigaat. Tamatuma kingorna nuannaarlutik tupiusaliorfissiorput, ajortuliorsimanitik nassuerutigalugit naggataatigullu „unioqqutinneqartussaanngitsumik angerfigeqatigiillutik“. (Nehemja 8:1–9:38) Ima allassimavoq: „Guutip inatsisai imusami allassimasut atuarpaat, ataasiakkaarlugit, atuakkatillu nassuiarlugit inunnut paasinartunngorlugit.“ (Nehemja 8:8) Ilaat isumaqarput juutit hebriiarit oqaasii paasilluarsinnaasimanngikkaat taamaattumillu atuakkat aramæerisuunngorlugit nutsersimagaat. Kisianni allassimanngilaq inatsisit oqaasertaannik nassuiaanerinnaasoq. Ezrap allallu inatsisit nassuiarpaat inuit najoqqutassiaannik paasisaqarsinnaaqqullugit atuisinnaaqqullugillu. Atuagassiat atuakkallu Biibililersaarutit, ataatsimiinnerillu iluaqutigalugit Guutip oqaasianit paasisaqarnerulernissatsinnik siunertaqarput. Utoqqaanertat aamma assingusumik akisussaaffeqarput, taakku ’ajoqersuineq sapinnginnamik’. — 1 Timûtiuse 3:1, 2; 2 Timûtiuse 2:24.
Ataavartumik iluaqutissat
3. Biibili atuartarlugu qanoq iluaqutigisinnaavarput?
3 Ilaqutariit kristumiut Biibili atuaqatigiissutigisaraangamikku qularnanngitsumik ataavartumik iluaqutigissavaat. Guutip inatsisai ilikkassavaat, ajoqersuutillu, siulittuutit allallu pillugit paasisaqalerlutik. Biibilimi allassimaffiit ilaat atuffassissutigereerlugit ilaqutariit ittuat ima aperisinnaavoq: Uagut tamatumannga qanoq attorneqarpugut? Biibilimi ajoqersuutigineqartunut allanut qanoq attuumassuteqarpa? Oqaluussinitsinni qanoq atorsinnaavarput? Ilaqutariit ilisarsinerussapput Biibilimi atuarsimasatik pillugit paasissutissat amerlanerusut naniniartarunikkik qinerlerfissiat, soorlu Register til Vagttårnets publikationer (Vagttårnip naqitigaani ujarliut), atorlugit. Aamma Hjælp til forståelse af Bibelen-ip (Biibilimik paasiniaanermut ikiuutissiaq) atornissaa iluaqutaassaaq.
4. Josva 1:8-mi allassimasutut Josua qanoq unnersuunneqarpa?
4 Najoqqutassiat Biibilimeersut ulluinnarni atorsinnaavavut. Aamma Allakkat Illernartut atuartarutsigik taakku ’annattussanngornitsinnik ilisimalersitsisinnaapput’. (2 Timûtiuse 3:15) Guutip oqaasianit siulersorneqarutta taassuma sallusuissutaani saqiuarsinnaavugut, kissaatigisavullu eqqortut piviusunngortinneqarumaarput. (Tussiaat 26:3; 119:130) Josuatut, Mosesip kingoraartaatut, silassorissuseq ujartariaqarparput. Taanna ’Inatsisit allassimaffiat atuffassissutigiuartarpaa ullukkut unnuakkullu eqqarsaatigiuaannarlugu’. (Josva 1:8) Tamanna ima paasisariaqarpa paasissutissat tamakku allanut oqaluttuarinngitsoorsinnaanngikkai. Ullukkut unnuakkullu atuartassaguni eqqarsaatigeqqissaartariaqarpai atuaqqissaartarlugillu. Tamatumunnga assingusumik apustili Paulusip Timoteus kajumissaarsimavaa iliuutsini, kiffartornini ajoqersuininilu ’isumaliutigeqqullugit’. Kristumiutut utoqqaanertaagami Timoteus maligassaalluartariaqarpoq ajoqersuinermilu ilumut Biibilimut tunngaveqarnera qulakkeerniartariaqarlugu. — 1Timûtiuse 4:15.
5. Sallusuissut Guutimeersoq naniniaraanni qanoq iliortariaqarpa?
5 Sallusuissut Guutimeersoq erlinnartorujussuuvoq. Naniumagutsigu Guutip oqaasiani ilungersorluta ujartariaqarparput. Meeqqatut ilinniarusussusilittut Ajoqersuisorsuarmit ilinniartinneqarutta aatsaat ilisimasaqalissaagut paasilerlugulu Jehovamik mianerinninneq pisariaqartoq. (Ussatit 1:7; Jesaja 30:20, 21) Soorunami upperisarput Biibili tunngavigalugu uppernarsarsinnaasariaqarparput. (1 Pîtruse 2:1, 2) Juutit Berøamiut ’Thessalonikamiittunit isumaginnerupput; oqaaseq ilassivaat kajumigingaarlugu, ullullu tamaasa allakkat misissortarpaat tamakku taamaannersut [soorlu Paulus oqarsimasoq] misilikkumallugit’. Taamaalioramik Paulusimit nersorneqarput avoqqaarineqaratillu. — apustilit suliait 17:10, 11.
6. Sooq Jesus oqarsinnaasimava juutit ilaasa Allakkanik misissuinertik iluaqutiginngikkaat?
6 Jesusip juutit ilaat ima oqarfigai: ’Allakkat isumasiortarpasi, naassaanngitsumik inuussuteqaatigisorigassigik, massalu taakkua nalunaajaassutigaannga; inuussutissarsissagaluarlusili ornikkumanngilassinga.’ (Juánase 5:39, 40) Allakkat misissortarpaat eqqortumik isumaqarlutik — inuunissamut siulersorneqarumallutik. Allakkanilu siulittuuteqarpoq Messias pillugu, siulittuutit Jesusimut inuunermik tunisisinnaasumut tikkuussisut. Juutilli taanna itigartikkamikku Allakkat misissoraluarlugit iluaqutiginngilaat.
7. Biibili pillugu paasisaqarneruniaraanni suna pisariaqarpa, aamma sooq?
7 Biibili pillugu paasisaqarnerujumalluta Guutip anersaava imaluunniit pissaanera sulissutiginnittoq pisariaqartipparput. ’Anersaap suut tamaasa killisiortarpai Guutip itissusiinut allaat,’ pingaaruteqarnerat saqqummersinniarlugu. (1 Korintumiut 2:10) Kristumiut Thessalonikamiittut pruffiitisut oqaaserisat tusarsimasatik ’tamaasa misilittariaqarpaat’. (1 Tásalûníkamiut 5:20, 21) Paulusip Thessalonikamiut allaffigimmagit (ukiup 50-ip missaani u.n.k.) Allakkani Griikerisuuni iivangkiiliu Matîusip allagaa kisimi allanneqarsimavoq. Thessalonikamiut Berøamiullu Allakkanik Hebriiarisuunik nutsigaq griikerisooq Septuaginta-mik taaneqartoq atuarlugu ’suut tamaasa misilissinnaavaat’. Allakkat atuaqqissaartariaqarpaat uagullu taamaaliortariaqarpugut.
Tamatsinnut pingaaruteqarpoq
8. Utoqqaanertat toqqakkat sooq Biibilimik ilisimasaqarnikkut maligassaalluartariaqarpat?
8 Utoqqaanertat toqqakkat Biibilimik ilisimasaqarluartariaqarput. ’Ajoqersuineq sapernani’ ’oqaaseq ilumoortoq aalajangiussavaa’. Nakkutilliisoq Timoteus peqquneqarpoq ’oqaatsimik sallusuissutip pianik tunioraalluaqqullugu’. (1 Timûtiuse 3:2; Títuse 1:9; 2 Timûtiuse 2:15) Naak uppinngitsumik ataataqaraluartoq anaanaata Eunicep aanaatalu Loisip meeraaneraniit allakkanik illernartunik ajoqersortarsimavaat taamaalillutillu ’uppernermik peqqusersuitsumik’ ilisimalersillugu. (2 Timûtiuse 1:5; 3:15) Ataataasut uppertut meeqqatik ’Jehovamit perorsarlugit inertertariaqarpaat’, pingaartumillu utoqqaanertat ataataasut ’uppertunik qitornaqartariaqarput qussalaatsutut unnerluutigineqanngitsut naalasseriitsuunngitsullu’. (Evfisumiut 6:4; Títuse 1:6) Qanorluunniit atugaqaraluarutta paasisariaqarparput Guutip oqaasiata atuaqqissaartarnissaa maleruarnissaalu pingaaruteqarluinnartut.
9. Sooq uppeqatit kristumiut ilagalugit Biibilip atuaqqissaartarnera iluaqutaava?
9 Uppeqativut ilagalugit Biibili atuaqqissaartariaqarparput. Paulusip kissaatigaa kristumiut Thessalonikamiittut unnersuussutit allassimasani imminnik oqaloqatigiissutigissagaat. (1 Tásalûníkamiut 4:18) Sallusuissummik paasisaqarneruniarutta Biibilimik aallussilluarlutik atuaqqissaartartut allat ilagalugit Allakkat misissortarnissaannit pitsaanerusumik iliuuseqarsinnaanngilagut. Ussat manna ilumoorluinnarpoq: „Savimineq saviminermik ipissarneqartarpoq, inuillu imminnut ipissaqatigiittarpullusooq.“ (Ussatit 27:17) Sannatit saviminiusut atorneqanngikkunik ipissarneqaratilluunniit manngertornersinnaapput. Tamatumunnga assingusumik uaguttaaq ataatsimiittariaqarpugut immitsinnut ’ipissaqatigiinniarluta’ Guutip oqaasianik ilumoortumik paasisimasavut oqaloqatigiissutiginiarlugit. (Eprîarit 10:24, 25) Taamaalilluta anersaakkut qaamaneq qaammarissiartortoq iluaqutigissallugu qulakkeersinnaavarput. — Tussiaat 97:11; Ussatit 4:18.
10. Sallusuissummi saqineq qanoq paasisariaqarpa?
10 Biibili atuaqqissaarlugu tussiaasiortutut ima qinuneq naleqqulluartuussaaq: „Qaamassutsit sallusuissutsillu aallartikkit. Taakkua tasissersuullinnga.“ (Tussiaat 43:3) Guutimut iluarisaassagutta taassuma sallusuissutaani saqisariaqarpugut. (3 Juánase 3, 4) Taamaaliorneq taassuma ilitsersuutaanik maleruaanermik taassumunngalu aalajaalluni ilumoorlunilu kiffartornermik nassataqarpoq. (Tussiaat 25:4, 5; Juánase 4:23, 24) Soorlu Guutip oqaasianit naqitikkanillu ’kiffap aalajaallunilu silatuup’ pilersitaanit paasinarsisoq Jehova ilumoortumik kiffartorfigisariaqarparput. (Matîuse 24:45-47) Taamaattumik Guutip oqaasianik eqqorluartumik ilisimasaqartariaqarpugut. Qanorli ililluta Guutip oqaasia atuaqqissaartariaqarparput? Atuartariaqarparput Mosesimik allakkat siulliit, kapitali 1, versi 1 aallarnerfigalugu atuagartai 66-iusut tamaasa naallugit? Aap, kristumiut tamarmik Biibili tamaat oqaatsiminnut pisinnaagunikku Mosesimik allakkat siullianniit sarĸúmersitat tikillugu atuartariaqarpaat. Biibilimik naqitikkanillu Biibililersaarutinik atuartarnitta siunertaraa sallusuissut Biibilimeersoq Guutip ’kiffaq aalajaatsoq’ aqqutigalugu pilersitaa tamaat pillugu paasisaqarnerujartornissarput.
Guutip oqaasia atuffassissutigisaruk
11, 12. Ataatsimiinnerni Biibilimik atuffassineq sooq iluaqutaava?
11 Kisimiilluta immaqa nipaatsumik atuartarpugut. Itsarli aamma kisimiikkaluarlutik nipituumik atuarsinnaasarsimapput. Kunngip kiffarsua Etiopiamiu qamutimini ingerlatillugu iivangkiiliumik oqaluussisup Filipip tusaasinnaavaa taanna Esajasip siulittuutaanik atuartoq. (apustilit suliait 8:27-30) Hebriiarit oqaasiat ’atuarpoq’-mik nutserneqartartoq pingaartumik isumaqarpoq ’suaarpoq’. Taamaattumik atuffarippallaanngikkutta nipaatsumillu atuarneq saperaluarlugu nipituumik atuanngitsoortariaqanngilagut. Pingaarnerpaaq tassa Guutip oqaasia allanneqarsimasoq atuarlugu sallusuissummik ilinniarnissarput.
12 Iluaqutaaqaaq kristumiut ataatsimiinneranni Biibilimit atuffassisoqaraangat. Apustili Paulusip suleqatini Timoteus ima kajumissaarpaa: ’Atuaasartuinnarit oqaassisarlutillu ajoqersuisarlutillu.’ (1 Timûtiuse 4:13) Kulorsamiut ima allaffigai: ’Allakkat makku ilissinni atuarneqareerpata ilagiinnuttaaq Laodikeamiunut atuartikkisigik, Laodikeamillu pisussat ilississaaq atuarsigik.’ (Kulorsamiut 4:16) sarĸúmersitat 1:3-mi ima atuarpugut: ’Pilluarput takorluukkersaarutit makkua oqaasiinik atuaasorlu tusaasullu, taakkunanilu allassimasunik toqquisut, piffissaq qaneqimmat.’ Taamaattumik oqalugiartup ilagiinnut oqaaserisani uppernarsaatigisariaqarpai allassimaffiit Biibilimit atuffassissutigalugit.
Immikkut allaatigisanik atuaqqissaarneq
13. Sallusuissut Biibilimeersoq ilinniassagaanni periaaseq suna pitsaanerpaava, qanorlu ililluta allassimaffiit aalajangersimasut nanisinnaavavut?
13 Biibilip imarisaa ilinniassagaanni periaaseq sunniuteqarluarnerpaaq tassaavoq allaatigisat immikkoortitaarlugit misissornissaat. Biibilimi oqaatsinik qinerlerfissiami oqaatsit naqinnerit tulleriinnerat malillugu allakkani, kapitalini versinilu ataqatigiissatik naapertorlugu aaqqissorneqarput, taamaattumillu allassimaffiit allaatigisamut aalajangersimasumut tunngasut naniuminarnerupput. Paasinarsivortaaq allassimaffiit imminnut naapertuuttut, Biibilip atuakkiortua imminut assortorneq ajormat. Anersaani illernartoq atorlugu ukiut 1600-t ingerlaneranni angutit 40-t missaat isumassarsisippai Biibili allaqqullugu. Ukiut ingerlaneranni paasinarsisimavoq sallusuissut ilinniarniarlugu Biibilimik allaatigisatigut atuaqqissaartarneq tassaasoq periaaseq pitsaangaartoq.
14. Allakkat Griikerisuut atuaqqissaartillugit Allakkat Hebriiarisuuttaaq misissortarnissaat sooq iluaqutaava?
14 Sallusuissummik Biibilimiittumik pingaartitsinitta killittariaqarpaatigut Kristumiut Allagaataat Griikerisut Allakkallu Hebriiarisuut atuartaqqullugit. Taamaaliorutta paasissavarput Allakkat Griikerisuut Guutip siunertaanut qanoq attuumassuteqartut taamaalillutalu Allakkani Hebriiarisuuni siulittuutit paasinerussallugit. (Rûmamiut 16:25-27; Evfisumiut 3:4-6; Kulorsamiut 1:26) Ingammik Ny Verden-Oversættelsen af De Hellige Skrifter tamatumani iluaqutaasorujussuuvoq. Nutsigaq tamanna Guutimut kiffaasunit ilumooqqissaartunit suliarineqarsimavoq, ilisimatuut Biibilip allassimaqqaarfii, oqaaserisai tunuliaqutaalu pillugit ilisimasaqarnerujartornerat tunngavigalugu. Jehovap aamma ’kiffaq aalajaallunilu silatooq’ aqqutigalugu Biibilimik atuaqqissaarnermut ikiuutissat pingaartut pilersissimavai.
15. Qanoq ililluta uppernarsarsinnaavarput allassimaffiit Biibilimi sukkut tamaana innersuussutigineqartarnerat eqqortuusoq?
15 Ilaat immaqa oqarumassapput: ’Naqitikkassinni allassimaffiit tuusintilippassuit innersuussutigineqartarput, soormi allassimaffiit sukkut tamaana issuarfigiinnartarpisigik?’ Biibilip atuagartaanit 66-iusunit assigiinngitsunit innersuussuteqartarmat arlaleriarluni uppernarsarneqarpoq ajoqersuut aalajangersimasoq ilumoortuusoq. Jesusip nammineq ajoqersueriaaseq tamanna atortarsimavaa. Qaqqami oqaluutsimini Allakkat Hebriiarisuut 21-riarluni issuaaffigai. Mosesimik allakkat aappaat pingasoriarluni issuaaffigai, pingajui marloriarluni, sisamaat ataasiarluni, tallimaat arfinileriarluni, Kunnginik allakkat aappaat ataasiarluni, Tussiaatit sisamariarluni, Jesajap allagai pingasoriarluni kiisalu Jeremiap allagai ataasiarluni issuaaffigalugit. Jesusip taamaaliornermigut sunaluunniit uppernarsarniarpaa? Naamik, taanna ’naalattariaqartutut ajoqersuigami, allakkanik ilisimasutut pinnani’. Jesus taamaaliorpoq ajoqersuinini Guutip oqaasianut tunngaveqartillugu. (Matîuse 7:29) Apustili Paulus aamma taamaaliortarpoq.
16. Rûmamiut 15:7-13-imi allassimaffiit suut Paulusip issuaaffigai?
16 Rumamiunut allakkamini 15:7-13-imi Paulusimit Allakkat Hebriiarisuut immikkoortuinit pingasunit issuaavoq — Inatsisiniit, Pruffiitiniit Tussiaatiniillu. Takutippaa juutit juutiunngitsullu tamarmik Guuti unnersiutigiumaaraat, kristumiullu taamaattumik inuit inuiaqatigiinnit allaneersut ilassilluartariaqaraat. Paulus ima allappoq: ’Taamaattumik ilasseqatigiinniaritsi soorluttaaq Kristusip ilassigaatigut, Guuti naalannarseqqullugu. Oqarpungami Kristus Guutip sallusuissusia pillugu kipineqartunut kiffanngortoq siullernut unnersuutigisat aalajangeqqullugit; Guutimilli nalusut Guuti unnersiutigissavaat nallittuinera pillugu soorlu allassimasoq [Tussiaat 18:50-mi]: „Tamanna pillugu Guutimik nalusuni nassuerutigissavakkit, aqqillu erinalersuutigissavara.“ Aammalu oqarpoq [5 Moses 32:43-mi]: „Tipaatsugitsi Guutimik nalusut ukorsii, innuttai ilagalugit.“ Aamma ima [Tussiaat 117:1-imi]: „Jehova unnersiutigisiuk Guutimik nalususi tamassi, inuiaqatigiit tamarmik nersussavaat.“ Aammalu Esajas oqarpoq [Jesaja 11:1, 10-mi]: „Isajip soorlaa tassaajumaarpoq, nikuikkumaartorlu Guutimik nalusut naalakkersussallugit; taanna inuiaqatigiit neriuffigissavaat.“ Guutilli neriutsitsisup tamanik tipaatsungaartillisi eqqissisillusilu uppernissinni, neriugisaqangaaqqullusi anersaap illernartup pissaaneragut.’ Taamaalilluni allassimaffiit assigiinngitsut allaatigisaq aalajangersimasoq pillugu issuaaffigalugit Paulusip takutippaa qanoq allassimaffiit innersuussutigineqarsinnaasut ajoqersuut Biibilimeersoq tunngavissaqarluartinniarlugu.
17. Maligassiat suut takutippaat Biibilimi allassimaffiit sukkut tamaana innersuussutigineqartarnerat eqqortuusoq?
17 Apustili Peterip isumassarsisitaalluni allakkamini siullerni 34-eriarluni Inatsisit, Pruffiitit Tussiaatillu issuaaffigai, Biibilip atuagartaanit 10-nit assigiinngitsunit. Allakkami aappaanni atuagartaanit pingasunit arfinileriarluni issuaavoq. Matîusip iivangkiiliuani Mosesimik allakkat siulliannit Malakip allagai tikillugit 122-nik issuagaqarpoq. Allakkat Griikerisuut atuagartaanni 27-iusuni Allakkat Hebriiarisuut 320-riarlutik toqqaannartumik issuaaffigineqarput, saniatigullu arlalinnik hundrederiarlutik innersuussutigineqarput. Taamaattumik ullumikkut kristumiut apeqqut aalajangersimasoq Biibilimi misissorniaraangamikku Jesusip apustilillu maligassiaat maleruartarpaat Biibilimi allassimaffiit sukkut tamaana issuaaffigisarlugit. Taamaaliorneq naleqqulluarpoq, ingammik maanna ’ulluni kingullerni’ Allakkani Hebriiarisuuni aamma Griikerisuuni allassimasut amerlanersaat eqquukkiartortillugit. (2 Timûtiuse 3:1) ’Kiffap aalajaallunilu silatuup’ taamaalilluni Biibili naqitikkamini atortarpaa, Guutip oqaasianut ilaliussisoqanngilaq tamatumanngalu peersisoqarani. — Ussatit 30:5, 6; sarĸúmersitat 22:18, 19.
Sallusuissummi saqiuarniarta
18. Sooq ’sallusuissummi saqisariaqarpugut’?
18 Biibilip imarisaata ilaanik peersissanngilagut, tassami Guutip oqaasiani allanneqarsimasumi kristumiunut ajoqersuutit tamarmik tassaapput ’sallusuissut’ imaluunniit ’iivangkiiliup ilumoorsusia’. Annassagutta sallusuissummut tamatumunnga ilumoortuartariaqarpugut, aap, sallusuissummi saqiuartariaqarpugut. (Galâsiamiut 2:5; 2 Juánase 4; 1 Timûtiuse 2:3, 4) Kristumiuussuseq tassaammat ’sallusuissut aqqutigisassaq’, ’sallusuissummut suleqataasinnaavugut’ allat sallusuissutip soqutigisaanik siuarsaaqqullugit ikioraangatsigik. — 2 Pîtruse 2:2; 3 Juánase 8.
19. ’Sallusuissummi saqiuassagutta’ suna pisariaqarpa?
19 ’Sallusuissummi saqiuassagutta’ Biibili atuartariaqarparput taamaalillutalu ikiuineq anersaakkut ittoq Guutip ’kiffaq aalajaallunilu silatooq’ aqqutigalugu pilersitaa iluaqutigisarlugu. (3 Juánase 4) Nammineq iluaqutigissavarput taamaalillutalu allat Jehova Guuti Jesus Kristusilu pillugit Guutillu siunertaa pillugu ilinniartissinnaavavut. Jehovap anersaavata taassuma oqaasianik paasinninnissatsinnut sallusuissutikkullu kiffartornissatsinnut ikiortarmatigut qujamasuutigisariaqarparput. (wE 15/5 96)
Qanoq akissavigit?
□ Biibilimik atuartarneq ataavartumik iluaqutissanik sunik nassataqarpa?
□ Sooq uppeqatit ilagalugit Biibilimik atuaqqissaarneq iluaqutaava?
□ Sooq allassimaffiit Biibilimi sukkut tamaana innersuussutigissallugit eqqunnginnerarneqarsinnaanngila?
□ ’Sallusuissummi saqineq’ qanoq paasisariaqarpa, qanorlu ililluta taamaaliorsinnaavugut?
[Atuaqqissaarnermi apeqqutit]
[Qupp. 17-imi assiliartaq]
Angajoqqaat — meeqqasi Biibilimik ajoqersorsigik
[Qupp. 18-imi assiliartaq]
Qaqqami oqaluutsimini Jesusip allassimaffiit Allakkanit Hebriiarisuunit issuaaffigai