Jehovap piumasaanik iliortut

Niviarsiaraq sapiissuseqarluni oqaluttoq

UKIUT 900-kkut u.n.s. ingerlaneranni Israelikkut Aramæerillu akunnerminni akersuuteqqajaasuusimapput. Sakkuaatikulasarsimammata ukiuni pingasuni eqqissisimaqatigiillutik sorsunngimmata oqaluttuarisaanermi ajunngitsumik eqqartorneqarsimapput. — 1 Kunngit 22:1.

Piiaasoqatigiit Aramæerit tamatuma nalaani immikkut sioorasaaruteqarsimapput, taakkualu ilarpassui tassaapput sakkutuut hundredelikkuutaat. Israelikkut saassunneqartarput ujajaaffigineqarlutillu. Inuppassuit aallarunneqarput inussianngortinneqarlutillu — meeqqanut allaat.

Aramæerit ujajaajartornermik arlaanni „niviarsiaqqamik“, ilaqutaanit Guutimik mianerinnittunit, soqutigittaatsumik aallarussipput. (2 Kunngit 5:2) Taanna Aramimut ingerlanneqarpoq, inunnilu sungiussimanngisamini pinngitsaalisaalluni najugaqalerluni immaqa tassunga annilaanganarsinnaasumi — inuit seqinermik, qaammammik, ullorissanik, orpinnik, naasunik allaallumi ujaqqanik pallorfiginnittuupput. Inunni taakkunani ilaquttaminit ikinngutiminillu, Guutimik ilumoortutuamik, Jehovamik, pallorfiginnittunit pissutsit allaanerulluinnarput. Taamaakkaluartorli niviarsiaraq Jehovamik pallorfiginninnissamut malunnartumik sapiissuseqarsimavoq, tamatumalu kinguneraa angutip nuimasup Aramip kunngiata ataani kiffartortumik, inuuneranik allannguisitsimmat. Qanoq pisoqarsimasoq takoriartigu.

Upperisamik oqaluutiginninnissamik sapiissuseqarneq

Niviarsiaqqap Biibilimi oqaluttuarineqartup atia eqqaaneqarsimanngilaq. Na’amanip nulianut kiffaalerpoq. Na’aman sorsullaqqissuusimavoq kunngillu Ben-Hadad II-p peqqusineratigut sakkutuut naalagaanertanngortinneqarsimalluni. (2 Kunngit 5:1) Ataqqisaalluartuuvoq, nappaammilli pupinnermik nappaateqalersimalluni.

Immaqa niviarsiaqqap ataqqinnippaluttumik pissusiata Na’amanip nuliata tassunga ammarusulersissimassavaa. Ilimanarpoq arnap niviarsiaraq aperisimassagaa: ’Pupissut Israelikkunni qanoq pineqartarpat?’ Ittooruteqanngilluinnarluni niviarsiaqqap Israelikkuusup nakimaalluni akivaa: „Naalagara pruffiitimut Samariami najugaqartumukassagaluarami! Taava pruffiitip ajorunnaarsissagaluarpaa.“ — 2 Kunngit 5:3.

Niviarsiaqqap oqaasii meerarpaluttutut tusarumannginneqanngillat. Akerlianik qanoq oqarsimaneranik kunngi Ben-Hadad nalunaarfigineqarpoq. Na’aman allallu 150 kilometerisut ungasitsigisumut Samariamut pruffiiti ujartillugu aallartippai. — 2 Kunngit 5:4, 5.

Na’aman ajorunnaarsinneqarpoq

Na’aman angutitanilu Israelip kunngianut Joramimukarput Ben-Hadadimit allakkanik aningaasarpassuarnillu tunissutissanik nassarlutik. Kunngi Joram nersuteeqqamik pallorfiginnittartoq niviarsiaqqatut kiffaasutut pruffiitimut upperisaqarpallaanngilaq. Isumaqarpoq Na’aman sorsuffiginiarluni patsisissarsiortoq. Pruffiitip Elisap Joramip isumanerluutaa tusaramiuk kunngimut aallartitsivoq, Na’amanilu imminukarteqqullugu. — 2 Kunngit 5:6-8.

Na’aman Elisap illuanut tikiummat pruffiiti ima oqarfigiartortitsivoq: „Jordanimut uffariartorit arfineq-marloriarlutit, taava ammit ajorunnaassaaq, minguissaatillu.“ (2 Kunngit 5:9, 10) Na’amanili kamalerpoq. Takorloorsimagaluarpaa tupinnartuliornikkut alutornartumik ajorunnaarsinneqassalluni. „Abana Parparilu, Damaskusip kuussui, Israelip erminit tamanit pitsaanerunnginneruneramik? Taakkunani uffarsinnaannginnerama minguerlungalu?“ Taama aperivoq taavalu kamaqaluni aallarluni. Na’amanilli kiffaasa oqaloqatigaat, naggataatigullu tunniutiinnarpoq. Kingorna Na’aman  Jordanip erngani arfineq-marloriarluni uffareerami, ’amia [mamippoq] nukappiarannguup amiatut pitsaatigilerluni, minguerporlu’. — 2 Kunngit 5:11-14.

Na’aman Elisamut uterami oqarpoq: „Maanna nalujunnaarpara nunarsuarmi tamarmi Israelip Guutia kiserluinnarmi Guutiusoq.“ imalu neriorsuilluni „maannamiit allanut pinnanga taamaallaat [Jehovamut] pilliisalerniarpunga ikikkagassanik ilagiissutissanillu“. — 2 Kunngit 5:15-17.

Pisimasoq sumik ilinniarfigisinnaagipput

Na’aman pruffiitimut Elisamut aallarsimanavianngikkaluarpoq niviarsiaqqap kiffaasup sapiilluni uppernini ersersissimanngikkaluarpagu. Ullumikkut meerarpassuit inuusuttullu taassuma maligassiaa malittarpaat. Immaqa atuarfimmi atuartunik ilaqarput Guutimik kiffartuussinissaminnut soqutiginninngitsunik. Taamaakkaluartoq sapiillutik allat upperisaminnik oqaluttuuttarpaat. Ilaasa ukiukitsunnguullutilli taamaaliorlutik aallartittarput.

Assersuutigalugu Alexandra eqqaasinnaavarput, niviarsiaraq sisamanik ukiulik Australiamiu. Atualermat arnaata ilinniartitsisua isumaqatigiissuteqarfigaa Jehovap Nalunaajaasuisa sumik upperisaqarnerat pillugu oqaloqatigiumallugu. Anaanaatali tupaallaatigisaanik ilinniartitsisua oqarpoq: „Maannakkut upperisassinnut tunngasunik nalunngisaqalereerpunga aammalu atuarfimmi Alexandrap suut peqataaffigissanerai suullu peqataaffigissannginnerai.“ Alexandrap anaanaa tupaallattorujussuuvoq, tassami atuarfimmi tassani Jehovap Nalunaajaasuisa meeraannik allanik soqanngimmat. „Alexandrap nammineerluni oqaluttuuppaatigut,“ ilinniartitsisua nassuiaavoq. Aap, niviarsiaqqap taassuma periaaserissumik ilinniartitsisuni oqaloqatigereersimavaa.

Meeqqat taamatut sapiillutik uppernerminnik ersersitsigaangata, Tussiaat 148:12, 13-imisut tulluartumik iliortarput, allassimammat: „Nukappiaqqat niviarsiaqqallu, utoqqaat inuusuttullu! [Jehovap] aqqa unnersiutigissavaat aqqa kisimi pissarsuummat, naalannassusia nunarsuarmut qilammullu anngussimammat.“ (wE 15/5 96)