Paqumisunneq nungutitaappat!

OQAATIGINEQARPOQ ilisimatooq Albert Einstein silarsuaq manna ajortoq pillugu ilaanni oqarsimasoq, paqumisunnerup peerniarnera atomip ataatsip ingutserneranit ajornarnerusoq. Tusagassiortoq Edward R. Murrow sorsunnersuup aappaani tusaamasanngorsimasoq kingusinnerusukkullu USA-mi Nalunaarusiorfimmut siulittaasunngorsimasoq tamatumunnga assingusumik nalunaarsimavoq „kialuunniit paqumisunnerit peersinnaanngikkai, taamaattoqarnerali nassuerutigiinnarneqartariaqartoq“.

Tamanna ilumoorpa? Immikkoortitsinerit naggueqatiginngisanillu qinngarsuinerit peerneqarsinnaanngillat? Paqumisunnerit pillugit Guuti qanoq misigiva?

Guuti nakerisarsiortuunngilaq

Biibilip nakerisarsiortuuneq ajoraa. (Ussatit 24:23; 28:21) Allassimavoq: „Ilisimassulli pavannga pisoq pingaarnerpaatillugu minguitsuuvoq, aammattaaq eqqissisitsiniartuuvoq, ingasaassinianngitsuuvoq, naalakkumasuuvoq, nallittuingaarlunilu ajunngitsunillu naammassisaqangaarluni, nakerisarsiorneq ajorpoq, pisuusaarneq ajorluni.“ (Jâko 3:17, NV) Ilisimassut taamaattoq Israelitoqqami eqqartuussisunut erseqqissarneqarsimavoq. „Eqqartuussigaangassi kinaassusersiussanngilasi,“  taama ilinniartitaasimapput. „Piitsoq ilumoortuunerassanngilarsi piitsuunera piinnarlugu, akimasoorluunniit akimanera piinnarlugu.“ — 3 Moses 19:15.

Biibilip nakerisarsiornernut paqumisunnernullu aalajaatsumik akerliunera Jesus Kristusip apustiliisalu Peterip Paulusillu erseqqissarsimavaat. Jesus inunnut ’paarinerlugaasunut isumakkiigaasunullu savatut paarsisoqanngitsutut ittunut’ nakerisarsiorneq ajorpoq. (Matîuse 9:36) Ima ajoqersuivoq: ’Ersitsorsiorlusi eqqartuusseqinasi, iluartumilli eqqartuussigitsi.’ — Juánase 7:24.

Peterip Paulusillu neriorsoqqissaarpaatigut Jehova Guutip nakerisarsiortuunnginneranik. Peter oqarsimavoq: ’Ilumut paasilerpara inuup kinaassusia Guutip pinngikkaa, kisianni inuiaqatigiinni tamani kinaluunniit mianerinnittini iluarnermillu sulisoq nuannarigaa.’ (apustilit suliait 10:34, 35) Apustili Paulus oqarpoq: ’Inuummi kinaassusia Guutimi atunngilaq.’ — Rûmamiut 2:11.

Biibilip sunniinera

Biibili inuit imminit siulersortittut pissusiinik allannguisinnaassuseqarpoq. Eprîarit 4:12-mi allassimavoq: ’Guutimmi oqaasia uumavoq killinnartorsuullunilu.’ Jehovap ikiuineratigut inuk paqumisuffigisaqartartup eqqarsariaatsini allangortissinnaavaa inunnullu allanut nakerisarsiortuujunnaarluni.

Assersuutigeriartigu Saulus Tarsusimeersoq. Biibilimi oqaluttuaq naapertorlugu, taassuma ilaanni kristumiut ilagiivi nakuuserfigisimavai upperisarsiornikkut ileqquusut sukannersut malikkamigit. (apustilit suliait 8:1-3) Juutit ileqqutoqaat malillugu kristumiut tamarmik Guutisiornermut ilumoortumut tunussisuuneri akeraanerilu qularutiginngilluinnarsimavaa. Paqumisunnerata kristumiunik toqoraanermik tapersersuisunngortissimavaa. Biibilimi allassimavoq ’sioorasaarisoq toqutsiniarlunilu Naalakkap ajoqersugaanik’. (apustilit suliait 9:1) Taamaaliornermini isumaqarsimavoq Guuti illernartumik kiffartuullugu. — Naleqqiuguk Juánase 16:2.

Taamaakkaluartoq Saulus Tarsusimeersup paqumisunneq sualuttoq soraarussimavaa. Allaat nammineq kristumiunngorsimavoq! Kingusinnerusukkut, Paulusitut, Jesus Kristusip apustiliatut, allassimavoq: ’Uanga siornagut mitallersuullungalu qinuginnittartuullungalu angutaasersorsuugaluartunga; nallittorneqarpungali sianiginagu taamaaliorama uppinngitsuullunga.’ — 1 Timûtiuse 1:13.

Paulus kisimi eqqarsariaatsiminik taama annertutigisumik allannguinngilaq. Paulus Titusimut, oqaluussisartoqatiminut, allakkamini kristumiut kajumissaarpai ’kimilluunniit mitalleqqunagit saqitsaagajoqqunagillu, piuaaqqullugilli inuillu tamaasa qanilaartumik pisartuaqqullugit’. Imalu nangippoq: ’Uaguttaarmi siornagut siuneqanngitsuuvugut naalanngitsuullutalu tammartarlutalu pilerigisavullu illigussusipiluillu tamalaat naalagaralugit, inuuvugullu ajortorsiorluta annerussillutalu uuminarlutalu uumissoqatigiillutalu.’ — Títuse 3:2, 3.

Paqumisuffigisaqarnernik qaangiiniarneq

Ullumikkut kristumiut ilumoortut siunnersuummik tamatuminnga maleruaaniartuupput. Qaaginnarsiorlutik inunnik allanik eqqartuineq pinaveersaarpaat. Tamatuma allanik ’mitallersumik’ oqalunnaveersaartippaat. Inuiaqatigiinnit naggueqatigiinnillu tamaneersunit silarsuullu matuma naggueqatigiinnit killigititai akimorlugit silarsuarmi tamarmi qatanngutigiissutut peqatigiinneq nuannaarutigaat.

Henriquep, taartumik amillip Brasiliamiup, misigisimasaa eqqarsaatigeriartigu. Ammip qalipaataa tunngavigalugu immikkoortitaasarsimasutut, qaqortunik amilinnik uumigisaqarneq itisooq ineriartortissimavaa. Oqaluttuarpoq: „Nalunaajaasut qaamasunik amillit marluk illunnukarput Guutillu aqqa eqqartorlugu. Aallaqqaammut tusarusunngilakka qaqortunik amillit tatiginnginnakkit. Erniinnarli takusinnaalerpara oqariartuutaat ilumoorunartoq. Biibilimik  atuaqqissaaqateqarnissara akueraara. Apeqqutigisara siulleq imaappoq: ’Oqaluffissinni qernertumik amillit amerlappat?’ Akipput: ’Aap.’ Taava Biibilimik oqaluttuaatikka-miþ * assiliaq kingulleq takutippaat, tassani takutinneqarput meeqqat naggueqatigiinnit assigiinngitsuneersut. Nukappiaraq qernertumik amilik ilaavoq, tamatumalu kajumissisippaanga. Kingusinnerusukkut Jehovap Nalunaajaasuisa naalagaaffilersaarfiat iserpara, tassanilu naggueqatigiinngikkuutaat imminnut ataqqeqatigiittut takuakka. Tamanna uannut pingaartuuvoq.

Maanna, Jehovap nalunaajaasuisa ilaattut, Henriquep kristumiut ilumoortut qatanngutigiittut peqatigiinnut ilaanini nuannaarutigaa. Paasisimavaa ataqqinaat inummut kimulluunniit tuttussaanngitsoq. Oqarpoq: „Ullumikkut Jehovap Jesusillu uannut iliuuserisimasaannut tamanut qujamasoqaanga. Jehovap kiffai ilumoortut naggueqatigiinnit, qalipaatilinnit tunuliaqutalinnillu tamaneersut millionillit suleqatigaakka.“

Dario alliartornermini paqumisuffigineqartarsimasut ilagaat. 16-inik ukioqarluni, Jehovap nalunaajaasui ilagalugit Biibili atuaqqissaartalersimavaa. Ima oqaluttuarpoq: „Paasisimavara nalunaajaasut akornanni naggueqatigiit arlaannaalluunniit pingaartinneqarnerunngitsoq.“ Asaqatigiinneq ilumoortoq malugisimavaa. Ingammik malugisimavaa naggueqatigiinnit assigiinngitsuneersut ilagiinni akisussaaffeqarlutik kiffartortut. Ilagiit avataanni paqumisuffigineqaraangami immikkoortinneqaraangamilluunniit, Dariop eqqaasarpaa Jehovap inuit tamaasa inuiaqatigiinnit, naggueqatigiinnit oqaaseqatigiinnillu tamaneersut asagai.

Qanoq akiorneqarsinnaasoq

Tamatta pingaartinneqarusullutalu ataqqineqarusuppugut. Taamaattuminguna paqumisuffigineqarneq misilinneqaataasartoq atoruminaatsoq. Kristumiut ilagiivisa silarsuarmi ajortumi matumani paqumisunnernut tamanut illersunngilaatigut. Silarsuaq manna Satan Diaavulumit aqunneqartillugu eqqartuinerluttoqartassaaq. (1 Juánase 5:19) sarĸúmersitat 12:12-mi mianersoqquneqarpugut: ’Eqqanaq nuna imarlu, Diaavulu ilissinnut aqqarmat kamattorsuulluni, piffissakissutsi nalunnginnamiuk.’ Akornusersuiniarnerinnaq siunertarinngilaa. Uumasumut kiisortumut assersuunneqarsimavoq. Apustilip Peterip oqaluttuuppaatigut: ’Akerartortersi Diaavulu liivertut uiannisaartutut angalasarmat iisassarsiorluni.’ — 1 Pîtruse 5:8.

Biibilimi allassimavoq: ’Taamaattumik Guutimut naalatsigitigitsi; Diaavululi assortorsiuk, qimassavaasilu.’ (Jâko 4:7, NV) Paqumisunneq akiorniarlugu Guutimit illersorneqarnissap ujartornissaa iluaqutaassaaq, soorlu kunngi David taamaaliorsimasoq: „Guutiga, aniguisinnga guutiitsut assaannit, persuaaniartut qunutitsisullu tigumminninnerannit.“ (Tussiaat 71:4) Tussiaasiortutut qinusinnaavugut: „Ikiunnga Guuti, inuit qinugimmannga, tatineqartuarama sorsuttunit.“ — Tussiaat 56:2.

Qinnutit taamaattut Guutip qanoq akissavai? Biibili akivoq: „Annaatissavai piitsoq ikioqqulluni suaartartoq, annikilliortitarlu ikiortissaaleqisoq. Nallittussavai sanngiitsoq piitsorlu, ajorsartut inuunerat annaatissavaa.“ (Tussiaat 72:12, 13) Eqqartornerlunneqarsimasut tamaasa Jehovap piffissaq eqqorlugu tuppallersarumaarai nalunagu nuanneqaaq.

’Ajortumik iliortoqassanngilaq’

Silarsuarmi naalakkersuisut paqumisunnerit inatsisiminnik pilersaarutiminnillu akiorniartuassavaat. Assigiissitsinermik naapertuilluarnermillu neriorsuiuassapput. Iluatsitsisinnaanngillalli. (Tussiaat 146:3) Guutip kisimi paqumisunnerit tamaasa peersinnaavai peerumavaalu. Inuiaat ilaqutariinngortissavai peqatigiissut. ’Amerlangaartut kisinneqarsinnaanngitsut, inuiaqatigiit immikkullu nagguveqatigiissut immikkullu inuiaasut immikkullu oqaasillit tamarmik ilaat’ silarsuup ajortup matuma naggatissaani annassapput  eqqissillutillu inuuneq nuannaarutigissavaat. — sarĸúmersitat 7:9, 10.

Nagguigisat innuttaaqatigiinnerillu tunngavigalugit paqumisunnerit tamaasa Jehovap piissavai. Eqqarsaatigeriaruk, kinaluunniit naapertuilluanngitsuliorfigineqassanngilaq! „Tamarmik eqqissillutik inuussapput viinnequtaatimik orpiutimillu figenillit ataanni kimilluunniit annilaartinneqaratik.“ (Mika 4:4) Jesaja 11:9-imilu allassimavoq: ’Ajortumik iliortoqassanngilaq.’

Maannakkut paqumisuffigineqaruit siunissamut neriuutip nuanningaartup tamatuma Jehovamut attaveqarnerit nakussatsissavaa. Aaqqissuussaanermilu ajortumi maani eqqartuussinerlunnernut naammagittarlutit atornissaanut ikiussavaatit. Paqumisunneq akiortillugu siumullu isigiitigalutit, Biibilimi siunnersuut silatooq maliguk: „Tatitusaaritsi, nikalloqinasi, tamassi [Jehovamik] neriuffiginnittusi!“ — Tussiaat 31:25. (wE 1/6 96)

[Quppernerup ataani ilanngussaq]

[Qupp. 4-mi suminngaanneernerat]

U.S. National Archieves-imit assiliaq