Pallorfiginninneq ilumoortoq ajugaangajalerpoq

„[Jehova] kunngiujumaarpoq nunarsuarmut tamarmut.“ — SAKARJA 14:9.

1. Kristumiut tanitat sorsunnersuup siulliup nalaani sunik misigisaqartarpat, tamannalu qanoq siulittuutigineqarsimava?

SORSUNNERSUUP siulliup nalaani kristumiut tanitat assut annikilliortitaasarput, ilarpassuilu naalaagaaffinnit sorsoqataasunit parnaarussaaqattaartarput. Jehovamut pilliutaat unnersiutiginnissutaasut annertuumik killilerneqarput, anersaakkullu tigusaaqqanermik misigisaqarput. Tamakku tamarmik Sakarja 14:2-mi siulittuutigineqarput, tassani eqqartorneqarami inuiaat tamarmik Jerusalem saassukkumaaraat. Illoqarfik siulittuummi tamatumani eqqartorneqartoq tassaavoq  ’Jerusalem qilammiittoq’, tassa Guutip qilammi naalagaaffia ’Guutip Savaaqqallu issiavissaarsuata’ sumiiffia. (Eprîarit 12:22, 28; 13:14; sarĸúmersitat 22:3) Guutip kiffai tanitat nunarsuarmiittut illoqarfimmut tassunga sinniisaapput. Taakkua akornanni aalajaatsut saassunneqarnertik tamanna anigorpaat ’illoqarfimmillu’ qimaatitaajumanatik. *

2, 3. (a) Jehovamik pallorfiginninneq qanoq ililluni 1919-imiilli ajugaasaqattaalersimava? (b) 1935-miit ineriartorneq suna pisimava?

² 1919-imi tanitat aalajaatsut tigusaaqqasutut atugaqarnerminnit aniguisitaapput, sorsunnerullu kingorna eqqissineqarnera erniinnaq atorlualerlugu. Jerusalemimit qilammiittumit aallartitatut Guutip naalagaaffia pillugu nutaarsiassaq nuannersoq oqalussissutigilerpaat 144.000-illu sinnerinik katersuinermut ikiuullutik. (Matîuse 24:14; 2 Korintumiut 5:20) 1931-mi eqqorluartumik Biibilimillu tunngaveqartumik taaguuteqalerput: Jehovap Nalunaajaasui. — Jesaja 43:10, 12.

³ Taamanimiilli Guutip nalunaajaasui tanitat tunummut qivianngisaannarput. Hitlerilluunniit nazisteqataasalu nipangersissinnaasimanngilaat. Naak silarsuarmi tamarmi qinugineqaraluartut suliaat nunarsuarmi tamarmi inerititaqarluarsimavoq. Ingammik 1935-p kingorna ’amerlangaartunit’ inuiannit tamaneersunit ilaaqqussorfigineqarput, sarĸúmersitat-ni siulittuutigineqartutut. ’Amerlangaartut’ taakkua aamma kristumiuupput tunniulluinnarsimasut kuisimasut. Allassimavoq taakkuagooq ’atisatik takisuut Savaaqqap [Jesus Kristusip] aavanik errorsimavaat qaqorsarlugillu’. (sarĸúmersitat 7:9, 14) Tanitaanngillalli, qilammi inuulernissaminnik neriugisaqanngillat. Adamip Evallu annaasimasaannik, tassa nunarsuarmi paratiisiusumi inuttut naammalluinnartutut inuunermik, kingornussinissartik neriugisaraat. (Tussiaat 37:29; Matîuse 25:34) ’Amerlangaartut’ ullumikkut 5 millioninit amerlanerulersimapput. Jehovamik pallorfiginninneq ilumoortoq ajugaasaqattaarpoq, inaarutaasumilli ajugaanissaa siunissami aatsaat pissaaq.

Guutip anersaakkut naalaffiani ’takornartat’

4, 5. (a) ’Amerlangaartut’ sumi Jehova pallorfigaat? (b) Taakkua sunik immikkut pisinnaatitaaffeqarpat, tamannalu siulittuutip suup eqquunneraa?

⁴ Siulittuutigineqarsimasutut ’amerlangaartut’ Guuti ’ullukkullu unnuakkullu’ kiffartorfigaat. (sarĸúmersitat 7:15) Taakkua tassaanngimmata anersaakkut Israelikkut palasit Johannesip qularnanngitsumik naalaffiup silarliliartaani silarlerniittut, tassa israelikkuunngitsunut silarliliamiittut, takuai. (1 Pîtruse 2:5) Jehovap anersaakkut naalaffia naalannangaarsutsimik ulikkaarluinnarsimavoq, tamaanga ’amerlangaartut’ ussagarsimammata anersaakkut Israelikkut sinneri ilagalugit Guutimik unnersiutiginnikkiartorlutik.

⁵ ’Amerlangaartut’ palasinut silarliliakkut ilorlikkut assersuutigineqartutut Guuti kiffartorfiginngilaat. Guutip anersaakkut ernerisut qitornarsiartaarineqartussatut naapertuilluartutut nalunaarutigineqarsimanngillat. (Rûmamiut 8:1, 15) Jesusilli pilliutaanut utertitsissutaasumut uppernermik kingunerisaanik Jehovamut minguitsumik attaveqalersimapput. Guutip ikinngutaatut naapertuilluartutut nalunaarutigineqarsimapput. (Naleqqiuguk Jâko 2:21, 23.) Taakkuattaaq Guutip anersaakkut pilliiviutaani iluarisaasunik pilliuteqarsinnaanermik immikkut pisinnaatitaaffeqarput. Taamaattumik Jesaja 56:6, 7-imi siulittuut taakkununnga misinnangaartumik eqquuppoq: „Takornartallu uannut [Jehovamut] ilannguttut kiffartuukkumallunga ateralu asanartillugu uannut kiffaajumallutik . . . taakku qaqqannut illernartumut pisikkumaarpakka tipaatsutsillugillu illunni qinusarfimmi. Pilliutaat ikikkagassat ilagiissutissallu iluarinartuutissavakka pilliiviutinni, illuga taaneqartassammat inuiaat tamarmik qinusarfiannik.“

6. (a) ’Takornartat’ sunik pilliuteqartarpat? (b) Puugutaasarsuaq imermik imalik palasinut silarliliamiittoq taakkununnga sumik eqqaasitsiva?

 ⁶ ’Takornartat’, imaluunniit allamiut, taakkua pilliutaat tassaapput ’qarlut Guutip aqqanik nassuerutiginnittut anitaat’ aamma allanut ajunngitsuliorneq tunisiumatunerlu. (Eprîarit 13:15, 16) Puugutaasarsuaq imermik imalik palasit asattoraangamik atortagaat ’takornartanut’ taakkununngattaaq pingaartumik eqqaasitsissutaavoq. Taakkuattaaq Guutip oqaasianik paasisaqarnerujartortillutik anersaakkut ileqqussatigullu minguiartittariaqarput.

Illernartoq pisataalu

7. (a) Palaseqatigiit illernartut immikkut pisinnaatitaaffii ’amerlangaartunit’ qanoq isigineqarpat? (b) ’Takornartat’ ilaat sunik immikkut pisinnaatitaaffeqalersimappat?

⁷ Illernartoq pisataalu ’takornartanut’ ’amerlangaartunut’ taakkununnga qanoq isumaqarpat? Illernartukkut assersuutigineqartoq angunngisaannassavaat, Guutip anersaakkut ernerisut qilammi najugaqartussatut ernioqqittussaannginnamik. Tamanna pillugu sinngappat? Naamik. Akerlianilli 144.000-it sinnerinik tapersersuisinnaatitaanertik nuannaarutigaat, Guutillu anersaakkut ernerit taakku, Kristus peqatigalugu inunnik naammalluinnartunngortitsisussat, qitornarsiartaarineratigut siunertaminik naammassinninnissaa pingaartilluinnarpaat. ’Takornartat’ ’amerlangaartut’ aamma nuannaarutigaat Guutip ajunngissutsimigut pisassarinngisaraluamikkut nunarsuarmi paratiisiusumi inuunissamik naassaanngitsumik neriugisaqalersissimammatik. ’Takornartat’ taakkua ilaat itsaq netinimikkutut immikkut pisinnaatitaaffeqarput, palaseqatigiit illernartut nakkutilliisutut suliassanik ikiorsinnaagamikkik. * (Jesaja 61:5) Taakkua akornanni Jesus ’nunarsuarmi tamarmi naalagarsuarnik’ toqqaassaaq. — Tussiaat 45:17.

8, 9. Illernartumi pisattanut atatillugu pissutsit aalajangersimasut ’amerlangaartut’ sunik ilinniarfigisinnaavaat?

⁸ ’Takornartat’ ’amerlangaartut’ Illernartumut assersuutaasumut isinngisaannassapput, pissutsilli pisattanut tassaniittunut atassuteqartut pingaartumik ilinniarfigisinnaavaat. Soorlu qullilerfimmi qulliit uuliamik orserneqartuartariaqartut, sallusuissutsit Guutip oqaasianeersut „inussiaq aalajaallunilu silatooq“ aqqutigalugu pisartakkatik paasisinnaassagunikkik ’takornartat’ anersaap illernartup ikuinera atorfissaqartittuarpaat. (Matîuse 24:45-47, NV) Aamma kajumissaarutip matuma ajunngitsumik qisuariarfiginissaanut Guutip anersaavata ikiortarpai: ’Anersaarlu nuliassarlu [tanitat sinneruttut] oqarput: „Aggerna!“ Tusartorlu oqarli: „Aggerna!“ Imerusuttorlu aggerli; piumasullu imeq inuunartoq akeqanngitsumik piliuk.’ (sarĸúmersitat 22:17) Taamaattumik ’amerlangaartut’ kristumiutut qaamasuunissamut aammalu eqqarsaatinik, isummanik, oqaatsinik iliuutsinillu Guutip anersaavanik illernartumik aliasutsitsisinnaasunik ingalassimanninnissamut pisussaanerannik qullilerfiup eqqaasittariaqarpai. — Evfisumiut 4:30.

⁹ Nerriviup isigiinnagassianik iffiartallip ’amerlangaartut’ eqqaasippai anersaakkut peqqittuaannassagunik anersaakkut inuussutissanik Biibilimeersunik atuagassianillu ’inussiap aalajaallunilu silatuup’ sanaavinik nerisaqartariaqartut. (Matîuse 4:4) Tipigissaatilliiviup eqqaasippai assuarnaassusertik attattuaannarniarlugu Jehovamut ikioqqullutik qinusarnissaat pingaartorujussuusoq. (Lúkarse 21:36) Aammattaaq qinusarnerminni Jehova uummammik qutsavigalugulu unnersiutigisariaqarpaat. (Tussiaat 106:1) Tipigissaatilliiviup eqqaasippaattaaq allatigut Guutimik unnersiutiginnittariaqartut, soorlu kristumiut ataatsimiinnerini Naalagaaffiup erinarsuutaanik erinarsoqataalluartarnermikkut ’qanikkullu nassuerluni annannissaq’ oqaluussissutiginnaaqqullugu piareersarluartarnermikkut. — Rûmamiut 10:10.

 Pallorfiginninnerup ilumoortup ajugaalluinnarnissaa

10. (a) Siunissami pisussat nuanningaartut suut misigisassaraavut? (b) Siullermik susoqassava?

¹⁰ Ullumikkut ’inuiaqatigiippassuit’ illumut Jehovamik pallorfiginnittarfimmut ussagartorsuupput. (Jesaja 2:2, 3) Tamanna sarĸúmersitat 15:4-mi uppernarsarneqarpoq, tassani ima allassimagami: ’Kia mianerissannginneraatit, Jehova, aqqillu unnersiutiginagu? Kisivit illernartorsuugavit. Inuiaqatigiimmi tamarmik aggerumaarput kiinnavit saani pallorlutik, peqqussutitit iluartut ersermata.’ Taava qanoq pisoqarnissaa Sakarja, kapitali 14-imi, allaatigineqarpoq. Nunarsuarmi inuit amerlanersaasa akeqqersimaarnerata annerpaaffissani ungasinngitsukkut angussavaa „Jerusalemimut“ — Jerusalemip qilammiittup nunarsuarmi sinniisaanut — sorsunniarlutik naggataamik katersuuppata. Taava Jehova iliuuseqassaaq. Inuiaat sapiiserlutik saassusisut tamaasa Guutip sorsuttartutut „sorsuffigiartussavai“. — Sakarja 14:2, 3.

11, 12. (a) Jehovap naalaffimmini pallorfiginnittunik nunarsuaq tamakkerlugu saassussineq qanoq qisuariarfigissavaa? (b) Guutip sorsunnera qanoq inerneqassava?

¹¹ „Perlussamik imaattumik [Jehovap] inuiaat Jerusalaamut sorsukkiartortut eqqorumaarpai: Suli nikorfatillutik uinngat mikiarumaarpoq; isaat mikiarumaarput isilerfiini, oqaallu qarnini. Taamaalisukkut [Jehovap] inuiaat taakku aallartitsivigiumaarpai annilaarnermik paatsiveerunnermillu. Nunaqqatigiit imminnut saassukkumaarput imminnullu sorsuullutik.“ — Sakarja 14:12, 13.

¹² Perlussaq tamanna piviusuunersoq assersuutaannaanersorluunnit paasiumaarparput. Ataaserli qularnanngilaq. Guutip akerai nunarsuaq tamakkerlugu Jehovap kiffaanik saassussigunik Guutip pissaaneranik ajorsarfeqanngitsumik takutitsinermit uissuumminartumit unitsinneqassapput. Nipangersitaassapput, oqaat unammillerpaluttut mikiartutut ilillutik. Ataatsimut anguniagartik aanngaassavaat, isitik mikiartutut ilippata. Timikkut pissaanerat, saassussinissaminnut sapiissuseqalissutigisimasaat, suujunnaarsinneqassaaq. Paatsiveerunnersuaqarpallu imminnut saassutissapput, taamaalilluni Guutimik pallorfiginninnerup nunarsuarmi akerai nungutitaallutik. Taamaalippat kiisami inuiaat tamarmik allatut ajornartumik Jehovap kisimi oqartussaanera akuerisariaqalissavaat. Taava siulittuut manna eqquutissaaq: „[Jehova] kunngiujumaarpoq nunarsuarmut tamarmut.“ (Sakarja 14:9) Taava Satan inngilipiluilu qilersorneqassapput Kristusillu ukiuni tuusintini naalakkersuinera aallartissalluni, inunnut pilluaqqussuterpassuarnik kingunilimmik. — sarĸúmersitat 20:1, 2; 21:3, 4.

Nunarsuarmi makititsineq

13. ’Inuit amiakkui tamarmik’ kikkuuppat?

¹³ Zakariasip siulittuutaa Sakarjap allagai, kapitali 14-imi, versimi 16-imi, ima nangippoq: „Inuit Jerusalaamik saassussisut amiakkui tamarmik ukiut tamaasa tassunga guutisioriartortassapput kunngersuaq katersaarsuit [Jehovaat] pallorfigiartorlugu, [tupiusaliorfillu nalliussiartorlugu, (nutsigaq pisoqaq)].“ Biibilimi oqaatigineqarpoq pissutsit aaqqissuussaanerata ajortup matuma naggatissaanik misigisaqartut pallorfiginninnerullu ilumoortup akeraatut eqqartuunneqartut tamarmik ’pillaammik atugaqassasut tammarnissamik naassaanngitsumik’. (2 Tásalûníkamiut 1:7-9; aamma takuuk Matîuse 25:31-33, 46.) Taakku makititaassanngillat. Taamaattumik „amiakkui tamarmik“ tassaagunarput inuit inuiannit tamaneersut Guutip inaarutaasumik sorsunnissaa sioqqullugu toqusimasut Biibililu naapertorlugu makititaasussat. Jesus ima neriorsuisimavoq: ’Ullut nalliukkumaarput, taava iliverniittut tamarmik taassuma nipaa tusarumaarpaat; anillutillu makissapput, ajunngitsuliorsimasut inuunermut pisussaallutik, ajortuliorsimasulli eqqartuussivimmut pisussaallutik.’ — Juánase 5:28, 29.

14. (a) Makititaasut naassaanngitsumik inuulissagunik qanoq iliortariaqarpat? (b) Jehovamut tunniulluinnarumanngitsut ilumoortumillu pallorfiginnikkumanngitsut qanoq pineqassappat?

¹⁴ Makititaasut tamarmik iliuuseqartariaqarput makititaanertik eqqartuussivimmut pinnani  inuunermut makititaanerussappat. Jehovap naalaffiata silarliliartaanut nunarsuarmiittunut isertariaqarput Jesus Kristusilu aqqutigalugu Guutimut tunniulluinnarnermikkut taassumunnga pallortariaqarlutik. Makititaasut taamaaliorumanngitsut perlummik ullumikkut inuiaat eqqorneqaatissaata assinganik eqqorneqassapput. (Sakarja 14:18) Makititaasut ilaat qassimmitaava nuannaarlutik ’amerlangaartunut’ ilaaqqutissappat tupiusaliorfimmillu assersuutaasumik nalliuttorsiutiginnillutik? Qularnanngitsumik amerlassapput, tamatumalu kingunerisaanik Jehovap anersaakkut naalaffissua suli naalannarnerulissaaq.

Tupiusaliorfik assersuutaasoq

15. (a) Israelikkut tupiusaliorfissiortarnerat sunik ilisarnaquteqarpa? (b) Sooq nalliuttorsiornermi ussigit 70-it pilliutigineqartarsimappat?

¹⁵ Itsaq israelikkut ukiut tamaasa tupiusaliorfissiortartussaasimapput. Tamanna sapaatip-akunneranik ataatsimik sivisussuseqartarpoq katersuiffiullu naanerani pisarluni. Nuannaarfiuvoq Guutimut qujamasuffik. Israelikkut sapaatip-akunnerani ataatsimi tupiusani orpiit piluttaannik, ingammik palmit pilutaannik, qulisani najugaqarallartarput. Nalliuttorsuup tamatuma israelikkut eqqaasittarpai Guutip qanoq ililluni siuaasatik Egyptenimit  aniguisissimagai qanorlu ililluni nunamut neriorsuutigisaasumut apuunnissaat tikillugu inoqajuitsumi ukiuni 40-ni ingerlaarneranni isumassorsimagai. (3 Moses 23:39-43) Nalliuttorsuarmi tamatumani ussigit 70-it pilliivimmi naalaffimmiittumi pilliutigineqartarput. Nalliuttorsuup ilaa tamanna Jesus Kristusip suliaanut naammalluinnartumut inuunermillu annaassissutaasumut siulittuutaalluni assersuutaagunarpoq. Taassuma pilliutaata utertitsissutaasup sunniutai iluaqutaasut naggueqatigiit Noamik naggueqartut 70-it kinguaarpassuinut iluaqutaalerumaarput. — 1 Moses 10:1-29; 4 Moses 29:12-34; Matîuse 20:28.

16, 17. (a) Tupiusaliorfik assersuutaasoq qanga aallartippa, qanorlu ililluni nangeqqinneqarpa? (b) ’Amerlangaartut’ qanoq ilillutik nalliuttorsioqataappat?

¹⁶ Tupiusaliorfik ajortilinnik utertitaasunik Jehovap anersaakkut naalaffissuanut katersortitsinermut nuannaarnartumut assersuutaavoq. Nalliuttorsuup tupiusaliorfiup assersuutaasup eqquunnera ukiumi 33-mi piinsip ulluani, anersaakkut israelikkut ilagiinnut kristumiunut katersorneqalermata, aallartippoq. (apustilit suliait 2:41, 46, 47) Tanitat taakkua paasivaat Satanip silarsuaani tassaallutik ’nunasisut takornartat’, ’nunavigisartik qilammiimmat’. (1 Pîtruse 2:11; Filípimiut 3:20) Nalliuttorsuarli nuannaarfiusoq tunussinermit, kristumiuuneraqatigiit pilernerannik kinguneqartumit, kipitinneqarallarpoq. (2 Tásalûníkamiut 2:1-3) 1919-imili, anersaakkut israelikkut 144.000-iusut sinneri katersorneqalermata nangeqqinneqarpoq, tamannalu nangiinnarlugu ’amerlangaartut’ sarĸúmersitat 7:9-mi eqqaaneqartut katersorneqalerlutik.

¹⁷ Oqaluttuarineqarpoq ’amerlangaartut’ palmit avalequtaannik tigumiartut, taamaalilluni erserluni tupiusaliorfik assersuutaasoq nuannaarlutik taakkuattaaq nalliuttorsiutigigaat. Taakkua pallorfiginnittunik amerlanernik Jehovap naalaffianut katersueqataanertik kristumiutut tunniulluinnarsimasutut nuannaarutigaat. Ajortiliugamik paasivaat nunarsuarmiissinnaatitaanertik qulakkeerluinnarneqanngitsoq. Makititaasut tamaasa peqatigalugit Kristusip pilliutaa utertitsissutaasoq upperisariaqarpaat, Kristusip ukiuni tuusintini naalakkersuinerata naanerani inuttut naammalluinnartunngornissartik tikillugu. — sarĸúmersitat 20:5.

18. (a) Jesus Kristusip ukiuni tuusintini naalakkersuinera naappat qanoq pisoqassava? (b) Jehovamik pallorfiginninneq ilumoortoq qanoq ililluni naggataatigut ajugaassava?

¹⁸ Taamaalippat Guutimik pallorfiginnittut nunarsuarmiittut tassaalissapput inuit naammalluinnartut palaseqatigiinnik qilammiunik pisariaqartitsinngitsut. Taava Jesus Kristusip ’naalagaaffimmik Guutimut Ataataminut’ tunniussinissaanut piffissanngussaaq. (1 Korintumiut 15:24) Satan ’sivikitsumik’ qilerussaarneqassaaq inuiannik naammalluinnartunngortitaasimasunik misiliissalluni. Ilumuunngitsut tamarmik, Satan inngilipiluilu peqatigalugit, naassaanngitsumut suujunnaarsinneqassapput. Aalajaattuaannartut naassaanngitsumik inuusinnaalissapput. Nunarsuarmi paratiisiusumi nunaqavissunngussupput. Taava tupiusaliorfimmik assersuutaasumik nalliuttorsiutiginninneq alutornaqisumik nuanneqisumillu naggaserneqassaaq. Pallorfiginninneq ilumoortoq ajugaareersimalissaaq, Jehovamut naassaanngitsumik ataqqinaataasumik inunnullu ataavartumik nuannaarutaasumik. — sarĸúmersitat 20:3, 7-10, 14, 15.

[Quppernerup ataani ilanngussaq]

Apeqqutit uteqqiissutissat

□ „Jerusalem“ qanoq ililluni sorsunnersuup siulliup nalaani saassunneqarpa? — Sakarja 14:2.

□ Guutip innuttai 1919-imiilli qanoq pisimappat?

□ Ullumikkut tupusaliorfimmik assersuutaasumik kikkut nalliuttorsiutiginneqataappat?

□ Pallorfiginninneq ilumoortoq qanoq ililluni tamakkiisumik ajugaassava?

[Atuaqqissaarnermi apeqqutit]

[Qupp. 23-mi assiliartaq]

Tupiusaliorfissiornermi palmit avalequtaat atorneqartarsimapput