Kristusip inatsisai maleruartakkit

’Nanertortigisassinnik ersoqatigiigitsi, taamalu Kristusip inatsisai naammassiniarsigik.’ — GALÂSIAMIUT 6:2.

1. Sukkut takuneqarsinnaava Kristusip inatsisai ullumikkut ajunngitsumik sunniuteqartartut?

RWANDAMI ungasinngitsukkut naggueqatigiit assigiinngitsut imminnik toqoraanneranni Jehovap nalunaajaasuisa hutukkuusut tutsikkuussullu tamarmik inuunertik navianartorsiortippaat imminnut illersorniarlutik. Japanimi Kobemi nunap sajungaarnerani Jehovap nalunaajaasuisa ilaat ilaqutaminnik annaasaqarsimapput. Toqusoornertik aliasuutigigaluarlugu allat annaanniarlugit iliuuseqarput. Aap, ullumikkut nunarsuarmi sumi tamaani inoqarpoq Messiasip, imaluunniit Kristusip, inatsisaanik maleruaasunik. Inatsisit tamakku ajunngitsuliornissamut kajumissutissiilluarput.

2. Sooq oqarsinnaavugut kristumiuuneraqatigiit Kristusip inatsisaasa siunertaat paasisimanngikkaat, qanorlu ililluta inatsisit tamakku naammassisinnaavavut?

² Siulittuut Biibilimeersoq ’ullut kingulliit ajornartut’ makku pillugit maannakkut eqquutilereerpoq. Inuppassuit ’Guutimik mianerinninneq ileqqorisuusaarlugu pissaaneqarfigiumanngilaat’. (2 Timûtiuse 3:1, 5) Ingammik kristumiuuneraqatigiit akornanni ileqquusoq uummammiuginagu malinniaannarlugu iliuuseqarneq nalinginnaaqaaq. Kristusip inatsisaasa maleruarnissaat sapernarpallaarpa? Naamik. Malinneq ajornartumik Jesusip inatsisilersimanngilaatigut. Kristumiuuneraqatigiilli inatsisit siunertaat paasisimanngilaat. Oqaatsit isumassarsiarititaasut makku sianigisimanngilaat: ’Nanertortigisassinnik ersoqatigiigitsi, taamalu Kristusip inatsisai naammassiniarsigik.’ (Galâsiamiut 6:2) ’Kristusip inatsisai naammassisinnaavavut’ nanertuutigisatsinnik ersoqatigiikkutta, farisiiarillu assiginagit qatanngutivut pisariaqanngitsunik artornartorsiortinnagit.

3. (a) Kristusip inatsisaasa peqqussutit suut ilagaat? (b) Sooq isumaqassanngilagut ilagiit kristumiuusut ilitsersuutinit Kristusip oqaatigisimasaanit allanik ilisersuuteqartariaqanngitsut?

³ Kristusip inatsisai tassaapput Jesus Kristusip  peqqussutai tamarmik — kristumiunut oqaluusseqqusineq, ajoqersuganngortitseqqusineq, peqqusersuitsumik minguitsumillu iseqaqqusineq, tullermik eqqisseqatigeeqqusineq ilagiinnilu minguttut peernissaannik peqqusineq. (Matîuse 5:27-30; 18:15-17; 28:19, 20; sarĸúmersitat 2:14-16) Aap, kristumiut Jesusip ajoqersugaanut peqqussutit Biibilimiittut tamaasa maleruartariaqarpaat. Jehovap peqatigiissortai ilagiillu tamarmik aaqqissuussaalluassagunik pisariaqartunik malittarisassaqartariaqarput. (1 Korintumiut 14:33, 40) Assersuutigalugu, kristumiut ataatsimiittarsinnaanngillat siumut aalajangerneqarsimanngippat qaqugu, sumi qanorlu ilillutik ataatsimiissanersut. (Eprîarit 10:24, 25) Kristusip inatsisai naammassissagutsigik ilitsersuutit peqatigiiffimmi oqartussaassuseqartitat pilersitaat suleqatigiilluarluta maleruartariaqarpavut. — Eprîarit 13:17.

4. Pallorfiginninnermut ilumoortumut kajumisitsisussaq sunaava?

⁴ Kristumiut ilumoortut kissaatiginngilaat pallorfiginninnertik inatsiserpassuarnik siunertaqanngitsunik tunngaveqassasoq. Inummit peqatigiiffimmilluunniit peqquneqarnerput pissutigalugu Jehova kiffartorfigineq ajorparput. Akerlianik, pallorfiginninnerput asanninnermik tunngaveqarpoq. Paulus allassimavoq: ’Kristusip asanninnerata pinngitsaalivaatigut.’ (2 Korintumiut 5:14) Jesusip ajoqersukkani peqqusimavai asaqatigeeqqullugit. (Juánase 15:12, 13) Kristusip inatsisai imminut tunulliulluni asanninnermik aallaaveqarpoq, sutigullu tamatigut — ilaqutariinni ilagiinnilu — kristumiut ilumoortut tamatumannga killinneqartarput. Takoriartigu qanoq.

Ilaqutariinni

5. (a) Ilaqutariinni angajoqqaat qanoq ilillutik Kristusip inatsisai naammassisinnaavaat? (b) Meeqqat suna pisariaqartippaat, angajoqqaallu ilaasa pisariaqartitsineq tamanna matuniarlugu qanoq iliortariaqarpat?

⁵ Apustili Paulus ima allassimavoq: ’Ilissi angutit, nuliasi asaniarsigik, soorluttaaq Kristusip ilagiit asagai imminillu tunniulluni taakku pissutigalugit.’ (Evfisumiut 5:25) Uiusup Kristus malinniarlugu nuliani asannittumik paasinnittumillu iliorfigigaangamiuk Kristusip inatsisaasa ilaat pingaartoq naammassisarpaa. Jesusip meeraaqqattaaq asannittuliorfigisarpai, pakkuttarlugit, asamminik attortarpai pilluaqqusarlugillu. (Mákorse 10:16) Angajoqqaat Kristusip inatsisaanik naammassinnittut aamma meeqqatik asannittuliorfigissavaat. Angajoqqaat ilaannut tamatumani Kristusip malinniarnissaa unamminiarnartuusinnaavoq. Ilaasa misigissutsitik takutissallugit artornartittarpaat. Kisianni nakimagaluarlusi meeqqasi asanninnissinnik takutitsivigisariaqarpasi. Ilissi nalunngikkussiuk meeqqasi asallugit naammanngilaq. Taakkuattaaq nalunngittariaqarpaat. Asaneqarlutik nalunngissinnaavaat aatsaat asanninnersi ersersikkussiuk. — Naleqqiuguk Mákorse 1:11.

6. (a) Meeqqat angajoqqaaminit killilerneqarnissartik pisariaqartippaat? Nassuiaruk. (b) Angerlarsimaffimmi ilitsersuutinut tunngaviusoq suna meeqqat malugisinnaasariaqarpaat? (c) Kristusip inatsisai ilaqutariinni atuuppata suut ingalanneqarsinnaappat?

⁶ Meeqqat aamma killilersorneqarnissartik pisariaqartippaat, taamaattumik angajoqqaat malittarisassaliortariaqarput ilaannikkullu malinneqarnissaat perorsaanikkut isumagalugu. (Eprîarit 12:7, 9, 11) Meeqqat paasitinneqartariaqarput angajoqqaat asanninneq pissutigalugu malittarisassat pilersittaraat. Meeqqat ilinniartariaqarpaat asanninneq killissutigalugu angajoqqaatik naalattariaqarlugit. (Evfisumiut 6:1; Kulorsamiut 3:20; 1 Juánase 5:3) Angajoqqaat meeqqamik siuneqassuseqarnissaat anguniartarpaat, meeqqat piffissap ingerlanerani namminneq iluaqutissaminnik aalajangersinnaaqqullugit. (Rûmamiut 12:1; naleqqiuguk 1 Korintumiut 13:11.) Amerlavallaartunik malittarisassaliortariaqanngillat sukannerpallaartumillu perorsaasariaqarnatik. Paulus ima allassimavoq: ’Angajoqqaat ukorsii, qitornasi uumitsatseqinasigik anusinngoqqunagit.’ (Kulorsamiut 3:21; Evfisumiut 6:4) Ilaqutariinni Kristusip inatsisaanik maleruaasuni  kamajasoqartariaqarnanilu mitallersoqartariaqanngilaq. Angerlarsimaffimmi taama ittumi meeqqat toqqissisimasutut qiimmassarneqartutullu misigissapput, naqisimaneqarnatillu. — Naleqqiuguk Tussiaat 36:7.

7. Angerlarsimaffimmi ilitsersuuteqarneq eqqarsaatigalugu angerlarsimaffiit Beteliusut qanoq maligassaalluarpat?

⁷ Nunani assigiinngitsuni angerlarsimaffiit Beteliusut pulaarsimallugit ilaat oqarsimapput illumi oqimaaqatigiissumik malittarisassaqarnikkut maligassaalluartut. Angerlarsimaffinni Betelini inersimasut kisimik najugaqartarput, ilaqutariittulli inuusarlutik. * Assigiinngitsorpassuit Betelimi suliarineqartarmata arlalinnik malittarisassaqartariaqarpoq, ilaqutariinnut nalinginnaasunut naleqqiutillugu amerlanerusut. Taamaattoq Betelimi, allaffimmi naqiterivimmiluunniit, utoqqaanertat nakkutilliisut Kristusip inatsisai maleruarniartarpaat. Suliassanik aaqqissuussiinnanngillat, aammalu qatanngutimik anersaakkut siumukarnissaat isumagisarpaat suleqatimillu akornanni ’Jehovami nuannaarneq’ siuarsarniartarlugu. (Nehemja 8:10) Isumalluarnartumik kajumissinartumillu iliuuseqarniartarput ingassaassiniarnatillu. (Evfisumiut 4:31, 32) Taamaattumik tupinnanngilaq Betelimi sulisut nuannaarneq ilisarnaatigimmassuk.

Ilagiinni

8. (a) Ilagiinni suna anguniartarparput? (b) Suut eqqarsaatigalugit ilaasa malittarisassaqarnissaq kissaatigisimavaat?

⁸ Aamma ilagiinni asanninnikkut ineriartoqatigiinnissarput anguniarparput. (1 Tásalûníkamiut 5:11) Kristumiut tamarmik mianersortariaqarput allat erloqisinniarnagit allat namminneq aalajangertariaqagaat pineqaraangata isumaminnik pinngitsaaliissutigeqqunagit. Ilaannikkut ilaasa Napasuliaq Alapernaarsuiffiup Peqatigiiffia allaffigisarpaat paasiniarlugu fiilmit, atuakkat pinngussalluunniit aalajangersimasut qanoq isumaqarfigisariaqarnerlugit. Peqatigiiffilli tamakku pillugit oqartussaassuseqanngilaq. Amerlanertigut inuup nammineq imaluunniit ilaqutariit ittuata najoqqutassianut Biibilimeersunut asanninnini tunngavigalugu tamakku aalajangertariaqarpai. Allat Peqatigiiffiup siunnersuutai ilitsersuutaallu malittarisassatut atorajuppaat. Assersuutigalugu, Napasuliaq Alapernaarsuiffik-mi 1996-imi apriilimoortumi ilanngutassiami pitsaasumi utoqqaanertat kajumissaarneqarput ilagiinniittut paarsisutut aalajangersimasumik pulaartaqqullugit. Kajumissaarulli tamanna maleruagassatut atorneqartussaava? Naamik. Siunnersuutinik maleruaasinnaasut paasissavaat iluaqutaaqisoq, kisianni utoqqaanertat tamarmik taamaaliorsinnaanngillat. Tamatumunnga assingusumik 1995-imi Napasuliaq Alapernaarsuiffik-mi juunimoortumi „Atuartartut apeqqutaat“-ni siunnersorneqarpugut kuisittoqaraangat kuisittut ajugaasimaarpalullutik iliuuseqassanngitsut imaluunniit festerujussuassanngitsut, taamaaliornikkut kuisittoqarnermit allamut saatsinneqassagatta. Ilaasali ingasaassillutik aalajangersimavaat kuiserlaat kajumissinartumik allaffiginissaat eqqunngitsuliornerussasoq.

9. Sooq eqqartuussiniassanngilagut isornartorsiuiniassanatalu?

⁹ Eqqaamasariaqarpugut ’inatsisit naammalluartut kiffaanngissutsip pii’ maleruassagutsigik akuerisariaqaripput kristumiut assigiinngitsumik nalunngeqatiginnissuseqartut. (Jâko 1:25) Taamaattumik inuup nammineq aalajangersimanera Biibilip najoqqutassiaanut akerliunngippat akerleriissutaatissannginnatsigu. Taamaaliorneq assuariittoqarnermik kinguneqartarpoq. (1 Korintumiut 1:10) Paulus kristumioqatinik eqqartuussinissamut mianersoqqussilluni ima allappoq: ’Qeqartorluunniit orlusorluunniit naalagaataa pigaa. Qeqartuartitaasinnaagaluarporli Naalakkap qeqartuartinneq  sapinngimmani.’ (Rûmamiut 14:4) Apeqqutit nalunngeqatiginnissusermut tunngasut pillugit allat mamarleraluarutsigik Guutimut iluarisaajunnaassaagut. — Jâko 4:10-12.

10. Kikkut ilagiinni nakkutilliisussaappat, qanorlu ililluta taakku tapersersorsinnaavavut?

¹⁰ Eqqaamassavarputtaaq utoqqaanertat Guutip savaataanut paarsisussaasut. (apustilit suliait 20:28) Ikiuisussaapput. Taakku siunersiorsinnaavavut, Biibilimik Napasuliarlu Alapernaarsuiffiup Peqatigiiffiata naqitigaani sammineqartunik ilisimasaqarluartarmata. Utoqqaanertat malugilerunikku ilaat najoqqutassianik Biibilimiittunik unioqqutitsinissamut kinguneqarsinnaasumik iliuuseqartoqartoq, nangaassuteqaratik pisariaqartitat malillugit unnersuussissapput. (Galâsiamiut 6:1) Ilagiit Kristusip inatsisai maleruartarpaat paarsisut asannittut siulersuisussat taakku suleqatigigaangatigik. — Eprîarit 13:7.

Utoqqaanertat Kristusip inatsisai maleruartarpaat

11. Utoqqaanertat qanoq ilillutik ilagiinni Kristusip inatsisai maleruartarpaat?

¹¹ Utoqqaanertat ilagiinni ilungersorlutik Kristusip inatsisai naammassiniartarpaat. Nutaarsiassamik nuannersumik oqaluussinermi siulersuisarput, Biibili tunngavigalugu ajoqersuisarput allat uummataat killinniarlugu, paarsisutullu asannittutut saamasutullu ’nikallortut tuppallersarsinnaallugit’. (1 Tásalûníkamiut 5:14) Kristumiuunngitsutut isumaqarnerit kristumiuuneraqatigiit akornanni nalinginnaasut ingalassimasarpaat. Silarsuaq manna ajortunngoriartoqaaq, Paulusitullu utoqqaanertat amerlasuut ilagiit isumakuluutigisarpaat; isumakulullutilli taamaattut iliuuseqartikkaangatsik oqimaaqatigiissumik iliuuseqartarput. — 2 Korintumiut 11:28.

12. Kristumiup siunersiorpani utoqqaanertaq qanoq iliorsinnaava?

¹² Imaassinnaavoq kristumiup apeqqut pingaartoq Biibilimi eqqaaneqanngitsoq pillugu, imaluunniit kristumiunut najoqqutassiat arlallit assigiinngitsut pineqaraangata, utoqqaanertaq siunersiorniassagaa. Immaqa atorfimmini qaffatsitaanissamik neqeroorfigineqarpoq akissarsiaqarnerusumik aammalu akisussaaffeqarnerusumik. Imaluunniit ataataasup uppinngitsup ernimi kristumiup kiffartorneranut attuumassuteqartumik piumasaqarfigilerpaa. Apeqqutit taama ittut pineqaraangata utoqqaanertap nammineq isummani oqaatigissanngilaa. Akerlianik allassimaffiit Biibilimeersut takutissinnaavai taamaalilluni apeqquteqartoq nammineq najoqqutassianik naleqqulluartunik eqqarsarsinnaanissaanut ikiorlugu. Register til Vagttårnets publikationer (Vagttårnip naqitigaanut ujarliut) atorsinnaavaa paasiniarlugu ’inussiaq aalajaallunilu silatooq’ Napasuliaq Alapernaarsuiffik-mi naqitikkanilu allani tamanna pillugu qanoq paasissutissiisimasoq. (Matîuse 24:45) Taavami qatanngut kristumiu tamatuma kingorna utoqqaanertap isumaa malillugu sianiitsumik iliuuseqarpat? Najoqqutassiat inatsisillu Biibilimiittut unioqqutinneqanngippata utoqqaanertap akuerissavaa qatanngutip nammineq aalajangiisinnaanera, ’kialuunniit nammineq nammagassi naammassammagu’. Kristumiup nammineq eqqaamassavaa ’inuk siaruartikkani naapertorlugit katersuiumaarmat’. — Galâsiamiut 6:5, 7.

13. Sooq utoqqaanertat apeqqutit nalunngeqatiginnissutsikkut aalajangerneqartussat toqqaannartumik akinagit namminnerlu isummatik oqaatiginagit allat eqqarsarsinnaanissaannut ikiornerussavaat?

¹³ Sooq utoqqaanertat misilittagaqarluartut taama periaaseqartarpat? Minnerpaamik marlunnik pissuteqarput. Siullermik malugaat Paulus allassimasoq allat ’uppersusiannut naalagaanianngitsoq’. (2 Korintumiut 1:24) Utoqqaanertat qatanngutitik Allakkat tunngavigalugu eqqarsarsinnaanissaannut namminnerlu aalajangiilluarsinnaanissaannut ikioraangamikkik Paulus malinniartarpaat. Paasivaat killilimmik oqartussaassuseqarlutik, soorluttaaq Jesusip akuerisimagaa nammineq killilimmik oqartussaassuseqarluni. (Lúkarse 12:13, 14; Jûtarse 9) Imali paasisaqariaqanngilaq utoqqaanertat Biibili tunngavigalugu pisariaqarpat  iluaqutaasumik, immaqalu toqqaannartumik, unnersuussinissaminnut nangaassuteqassasut. Aappassaanik kristumioqatitik ajoqersortarpaat. Apustili Paulus ima allassimavoq: ’Inersimasulli nerisassamik mattusuumik pisariaqarput, tassa misigisaqartarnermit sungiusagaasunik sianissutillit ajunngitsorlu ajortorlu immikkoorsusiisigut ilisarisinnaallugit.’ (Eprîarit 5:14) Ineriartornissamut siumukassagutta nammineq sianissuterput atortariaqarparput allanillu qanoq iliortariaqakkatsinnik oqaluttuunneqartuartariaqarnata. Utoqqaanertat kristumioqatitik Allakkat tunngavigalugit eqqarsarsinnaanissamut ikioraangamikkik siumukarnissaannut ikiortarpaat.

14. Kristumiut inersimalluartut qanoq takutissinnaavaat Jehova tatigigitsik?

¹⁴ Tatigilluinnarparput Jehova Guutip anersaani illernartoq ikiortigalugu pallorfiginnitsimi ilumoortut uummataat sunnissagai. Taamaattumik kristumiut inersimalluartut qatanngutimik uummataat anguniarlugu kajumissaassavaat, soorlu Paulus taamaaliorsimasoq. (2 Korintumiut 8:8; 10:1; Fîlimût 8, 9) Paulusip nalunngilaa pingaartumik naapertuilluanngitsut, naapertuilluartut pinnatik, inatsisit sukumiisut pisariaqartikkaat eqqortuliorsinnaaqqullutik. (1 Timûtiuse 1:9) Qatanngutini pasinagit tatigai, ilagiit ilaat ima allaffigigamigit: ’Isumalluarfigaassi Naalakkami.’ (2 Tásalûníkamiut 3:4) Paulusip tatiginninnera kristumiunut taakkununnga kajumissinartorujussuuvoq. Ullumikkut utoqqaanertat nakkutilliisullu angalasartut tamatumunnga assingusumik anguniagaqartarput. Tamanna pillugu angutit aalajaatsut taakku paarsisutut asannittutut Guutip savaataanut ineriartortitsisarput. — Jesaja 32:1, 2; 1 Pîtruse 5:1-3.

Kristusip inatsisai maleruartarpigit?

15. Qatanngutitta attaveqarfiginerini Kristusip inatsisai maleruarnerlugit paasiniarlugu immitsinnut qanoq aperisinnaavugut?

¹⁵ Tamatta imminut misissortariaqarpugut paasiniarlugu Kristusip inatsisai maleruartarnerlugit siuarsartarnerlugillu. (2 Korintumiut 13:5) Tamatta imminut ima aperigutta iluaqutigissavarput: ’Kajumilersitsisarnerpunga imaluunniit isornartorsiuisarnerpunga? Oqimaaqatigiissumik ingasaassisumilluunniit isumaqartarpunga? Allat soqutigisarpakka imaluunniit nammineq anneruniartarpunga?’ Apeqqutissat Biibilimi toqqaannartumik  oqaatigineqanngitsut pillugit kristumiut qatanngutimik qanoq iliortariaqarnissaat imaluunniit qanoq iliunnginnissaat aalajangernianngilaat. — Rûmamiut 12:1; 1 Korintumiut 4:6.

16. Imminut avoqqaarisut nikallortullu qanoq ikiorsinnaavavut taamaalillutalu Kristusip inatsisaasa ilaat pingaartoq naammassillugu?

¹⁶ Ulluni ajornartuni makkunani kajumissaaqatigiinnissarput pingaaruteqartorujussuuvoq. (Eprîarit 10:24, 25; naleqqiuguk Matîuse 7:1-5.) Qatanngutivut eqqarsaatigigutsigik pissusii ajunngitsut sanngiissusiinit uatsinnut pingaaruteqarnerunnginnerpat? Jehovap isaani tamarmik erlinnartorujussuupput. Ajoraluartumik tamarmiunngitsut taama isumaqarput, aamma imminnik pillutik. Ilaasa sanngiissutitik naammalluinnanngissutitillu kisiisa eqqarsaatigisarpaat. Taakku allallu kajumissaarsinnaanerpavut, ataatsimiikkaangatta ataaseq marlulluunniit oqaloqatigalugit oqaluttuullugillu najuunnerat nuannaarutigalugu ilagiinnilu sulinerat pingaartillugu? Taamaalilluta nanertuutaat oqinnerulersikkutsigik pitsaassaaq taamaalillutalu Kristusip inatsisai naammassillugit! — Galâsiamiut 6:2.

Kristusip inatsisai sunniuteqarput!

17. Sutigut takuneqarsinnaava Kristusip inatsisai ilagiinni sunniuteqartartut?

¹⁷ Kristumiut ilagiissaanni Kristusip inatsisai sunniuteqartarput. Ullut tamaasa takusarparput — assersuutigalugu kristumioqatitta nutaarsiassaq nuannersoq ilungersorlutik oqaluussissutigigaangassuk, imminnut tuppallersaqatigiillutik kajumissaaqatigiikkaangata, atugarlioraluarlutik Jehova kiffartorfiginiaraangassuk, angajoqqaat meeqqatik Jehovamik asanninnermik nuannaarlunilu kiffartuunneranik perorsaraangatigik, nakkutilliisut asannittumik naakkittartumillu Guutip oqaasia ajoqersuutigigaangassuk taamaalillutillu ilagiit naassaanngitsumik Jehovap kiffartorfiginissaanik kissaateqalersikkaangatigik. (Matîuse 28:19, 20; 1 Tásalûníkamiut 5:11, 14) Tamatta immikkut Kristusip inatsisai inuunitsinni sunniuteqartikkutsigik Jehovap uummataa nuannaartissavarput. (Ussatit 23:15) Taassuma kissaatigaa inatsisiminik naammalluinnartunik nuannarisaqartut naassaanngitsumik inuunissaat. Paratiisissami inuit tamarmik naammalluinnartunngornissaat misigiumaarparput. Taamanikkussamut inatsisinik unioqqutitsisoqassanngilaq, uummatittalu kajumissusii aqulluinnarsinnaassavavut. Kristusip inatsisaanik maleruaanermut akissarsiassaq nuanningaarpoq! (wE 1/9 96)

[Quppernerup ataani ilanngussaq]

Uteqqiinissamut apeqqutissat

□ Suna pillugu kristumiuuneraqatigiit Kristusip inatsisaasa siunertaat paasisimanngilaat?

□ Qanoq ililluta ilaqutariinni Kristusip inatsisai maleruarsinnaavavut?

□ Ilagiinni Kristusip inatsisai maleruassagutsigik qanoq iliortariaqarpugut qanorlu iliortariaqanngilagut?

□ Utoqqaanertat qanoq ilillutik ilagiinnik iliorfiginninnerminni Kristusip inatsisai maleruarsinnaavaat?

[Atuaqqissaarnermi apeqqutit]

[Qupp. 25-mi assiliartaq]

Meeqqat asanninnermik pisariaqartitseqaaq

[Qupp. 26-mi assiliartaq]

Paarsisutta asannittut kajumissaarsinnaavaatigut