Jehovap piumasaatut iliorput

Piinsip ulluani Peter oqaluussisoq

UKIUMI 33-mi upernaakkut ullaajuvoq silalu nerumilluni. Pissanganartoqarpoq. Jerusalemip aqquserni juutinik juutinullu ilannguttunik ulikkaarput. Elamimiit, Mesopotaniamiit, Kappadokiamiit, Egyptenimiit og Romamiillu tikerarsimapput. Atisaat takullugit oqaasiilu assigiinngitsut tusaallugit pissanganartuuvoq. Ilaasa kilometerit 2000-ingajaat angalasimavaat pisussaq immikkut ittoq najuuffiginiarlutik. Pisussaq suna? Piinsi — suaasiassanik katersuinerup naammassinerani juutit nalliuttorsiornerat nuannersoq. — 3 Moses 23:15-21.

Naalaffiup pilliivianit pilliutit pujoorput, Levikkullu tussiaatit 113-miit 118-imut atorlugit tussiarput. Ullaap tungaa qulingiluanngulersoq tupinnartumik pisoqarpoq. Qilammit nipi tutsiuppoq ’ittuppaluk soorlu anorersuaq pitorartoq’. Jesus Kristusip ajoqersugaasa 120-t missaanniittut katersuuffigisimasaat illu tamakkerpaa. Biibilimi oqaluttuaq imaappoq: ’Taakkununngalu takutipput oqqat nuungajuttuut innerinnaasullusooq, tamakkualu taakku tamaasa immikkut tuffigaat. Taava tamarmik anersaamik illernartumik ilumioqangaalerput, oqaatsinillu allanertanik oqalulerput, imatut soorlu anersaap oqalutsikkaatik.’ — apustilit suliait 2:1-4.

Tamarmik immikkut namminneq oqaatsisik tusarpaat

Ajoqersukkat amerlasuut illumit anipput. Tupinnartumik oqaatsit assigiinngitsorpassuit atorlugit oqalussinnaalersimapput. Egyptenimiut Galilæamiut Egyptenimiutut oqaluttut tusaagaangamikik, Elamimiillu tikittut Persiamiutut oqaluffigineqaraangamik tupattarsimanissaat takorloorneqarsinnaavoq. Inuit ataqqinnilernerat tupinnanngilaq. ’Sunami-una manna?’ aperipput. Ilaasa ajoqersukkat mitallerfigalugit oqarput: ’Tungusunnitsumik viinnisorpallaarsimapput.’ — apustilit suliait 2:12, 13.

Taava Peter sassarpoq inunnullu oqalulluni. Nassuiarpaa oqaatsinik allanertanik oqalussinnaanerup tupinnartuliakkut tunissutaanera pruffiitikkut Joelikkut Guutip neriorsuutaata eqquunnerigaa: ’Uinilinnut tamanut anersaannik kuisiumaarpunga.’ (apustilit suliait 2:14-21; Joel 3:1-5) Aap, Guutip anersaani illernartoq Jesusip ajoqersugaanut kueqqammerpaa, tamannalu Jesusip toqusunik makititaasimaneranut qilammilu Guutip talerpiata tungaaniinneranut ersarissumik takutitsisuuvoq. Peter oqarpoq: ’Taamaattumik Israelikkut tamarmik nakimanaatsumik ilisimalissuk, Jesus taanna [nappakkamut naalliutsitaaffimmut, NV] kikiattugarsi Guutip naalaganngortillugulu Kristusinngortikkaa.’ — apustilit suliait 2:22-36.

Tusarnaartut qanoq qisuariarpat? Oqaluttuami allassimavoq: ’Uummatimikkut killinneqarput, Peterimullu apustileqataanullu oqarput: „Angutit qatanngutivut ukorsii, qanoq iliussaagut?“’ Peter akivoq: ’Allamik isumataaritsi, nungullusilu kueqqugitsi.’ 3000-it missaasa kajumissaarut malippaat, taava ’apustilit ajoqersuineri aalajangerfigaat’. — apustilit suliait 2:37-42.

Pisimasumi tassani pingaartumi Peter oqaaseqarami, ’qilammiup naalagaaffiata matuersaataasa’ siullersaat atorpaa, Jesusip imminut neriorsuutigisimasaa. (Matîuse 16:19) Matuersaatit taakkua inuiaat assigiinngitsut immikkut pisinnaatitaaffeqalersippaat. Matuersaatip siulliup juutit kristumiutut tanitanngornissaannut periarfissippaat. Kingusinnerusukkut Peterip matuersaatip aappaa pingajuallu atormagit, siullermik Samariamiut taava Guutimik nalusut pisinnaatitaaffimmut tamatumunnga ilaalerput. — apustilit suliait 8:14-17; 10:44-48.

 Qanoq ilinniarfigisinnaagipput

Naak juutit juutinullu ilannguttut taakku inuiattut isigalugit Jesusip toqunera akisussaaffigigaluaraat, Peterip ataqqinnittumik oqaluffigai ’qatanngutiminillu’ taallugit. (apustilit suliait 2:29) Allamik isumataartinniarpai, assuariniarnagit, taamaattumik isumalluarpaluttumik iliorfigai. Uppernarsaatinik saqqummiivoq oqaatsinilu Allakkanik issuaalluni tunngavilersortarlugit.

Ullumikkut nutaarsiassamik nuannersumik oqaluussisut Peterip maligassiaa malittariaqarpaat. Pulaakkatillu ataatsimut aallaaveqarnissartik ujartortariaqarpaat, taava periaaserilluni Biibili tunngavigalugu eqqarsalersinniartarlugit. Sallusuissut Guutip oqaasianeersoq isumalluartumik saqqummiunneqaraangat ajunngitsumik isumallit tusarliussamut kajungertassapput. — apustilit suliait 13:48.

Piinsimi Peterip aallussilluarnera nakimaanneralu sapaatit-akunneri arfineq-marluk tamatuma siorna Jesusimik miserratiginnissimaneranut akerliulluinnarpoq. Pisimasumi tassani Peter inunnut qununermik nukillaartinneqarsimavoq. (Matîuse 26:69-75) Jesusilli Peter qinnussimavaa. (Lúkarse 22:31, 32) Jesusip makinnermi kingorna Peterimut takutissimanera qularnanngitsumik apustilimut tassumunnga nukittorsaataassimassaaq. (1 Korintumiut 15:5) Peterip upperunnaannginneranik kinguneqarpoq. Sivitsunngitsoq nakimaalluni oqaluussisalerpoq, piinsimiinnaanngitsoq, toqunissili tikillugu.

Taavami, Peteritulli, arlaannik ajortuliorsimagaanni? Allamik isumataarnissaq, isumakkeerfigineqarnissamik qinuneq anersaakkullu ikiortissarsiornissaq pingaartorujussuuvoq. (Jâko 5:14-16) Kiffartornerput illernartoq Ataatatta, Jehovap, qilammiusup naakkinnittup akuerigaa tatigalugu siumukarsinnaassaagut. — 2 Moses 34:6. (wE 15/9 96)