Upperisarsiornerit tamaasa guutip akuerai?
Upperisarsiornerit tamaasa guutip akuerai?
Isumaqarpit Guutip guutisiornerit tamaasa akuerisarai? Upperisarsiornerit nalunngisavit amerlanersaasa qularnanngitsumik ilaasortamik assuarnaatsumik inuunissaat pingaartitaraat. Guutimulli iluarisaassagaanni assuarnaatsumik inuuneq naammappa?
ILAAT oqartarput: „Guutip upperisamik ilumoorussinissaannaq piumasaraa. Upperisarsiornerit tamarmik ajunngitsortoqarput.“ Assersuutigalugu bahā’ī-mik upperisallit silarsuarmi upperisarsiornerit pingaarnerusut ilaat qulingiluat ajoqersuutigisaminnut ilanngutissimavaat. Upperisarsiortut taakku isumaqarput upperisarsiornerit tamakku tamarmik Guutimeersuusut sallusuissummullu ataasiinnarmut ilaasut. Qanorli ililluni taamaassinnaava?
Japanimi upperisarsiortut ilaat ungasinngitsukkut unnerluutigineqarput gassit toqunartut inuppassuit angalaffigisartagaannut siaruarteramikku taamaalillutillu inuit amerlasuut navianartorsiortillugit. Ukiut arlallit matuma siorna upperisarsiortut allat, Jim Jonesimit siulersorneqarlutik, ataatsimoorlutik imminorput. Upperisarsiornerit taamaattut Guutimit akuerisaanerpat?
Inuiaat oqaluttuarisaanerat eqqarsaatigalugu aperisinnaavugut Guutip upperisarsiornerit sorsunnermut, soorlu ukiuni 1618-imiit 1648 tikillugu sorsunnersuarmut, kajumissaarisut iluarinerai. Atuakkami The Universal History of the World-imi upperisaq pissutigalugu sorsunneq tamanna tassaanerarneqarpoq „Europap oqaluttuarisaanerani sorsunnerit amiilaarnarnerpaat ilaat“.
Ukiut 1000-kkut 1200-kkullu akornanni ilerfiarnerit toqorarnersuarnik ingasattunik kinguneqartarsimapput. Assersuutigalugu ilerfiarnerit siullianni Jerusalemimi musliimit juutillu ilerfiartunit kristumiuunerartunit naakkittaatsumik toqorarneqarput.
Ukiuni 1200-kkunni ajoqersuutinik killisiueqqissaarneq ukiunik 600-nik sivisussusilik aallartippoq. Upperisarsiornikkut siuttut peqqusineratigut inuit tuusintilikkuutaat anniartinneqangaarlutik ikuallanneqarlutik toqutaapput. Atuakkiamini Vicars of Christ — The Dark Side of the Papacy-mi (Kristusip sinniisui — paavip pissaanerata pitsaanngitsortai) Peter De Rosa ima allappoq killisiueqqissaartut ’paavip aqqani oqaluttuarisaanermi inuup ataqqinninneranut aatsaat taama sualutsigisumik sivisutigisumillu saassussineq akisussaaffigigaat’. Spaniami ajoqersuutinik killisiueqqissaartoq dominikaneriusoq Torquemada pillugu De Rosa ima allappoq: „1483-imi toqqarneqarluni ukiuni 15-ini naakkittaatsumik naalakkersuivoq. Inuit toqutaatitai 114.000-init amerlanerupput, taakkualu ilaat 10.220-it ikuallallugit toqutaapput.“
Kristumiuunerartut kisimik pinnatik aammik kuisinermik peqataasimapput. Filosoffeq franskiusoq Blaise Pascal atuakkiamini Pensées-imi (Eqqarsaatit) ima allassimavoq: „Aatsaat upperisaminnit killinneqarlutik inuit taama peqqissaartigisumik ilungersortigisumillu ajussuseqarlutik iliorsinnaasarput.“
Inerititamikkut ilisarineqarput
Guutip guutisiorneq aalajangersimasoq akuerissappagu arlalinnik piumasarisaqarpoq. Assersuutigalugu ajoqersuutigisat iliuuserisallu Guutip oqaasianut sallusuissutaasumut naapertuuttariaqarput. (Tussiaat 119:160; Juánase 17:17) Upperisarsiornerup inerititai Jehova Guutip najoqqutassiaanut naleqqulluartariaqarput.
Qaqqami oqaluutsimini Jesus Kristusip eqqartorsimavaa pruffiitioqqusersut Guutimut sinniisuunerartut takkukkumaartut. Ima oqarpoq: ’Pruffiitioqqusersunut misissoritsi; taakkua savatut atisaqarlutik ornittarpaasi, ilumikkulli amaruupput kiisortut. Inerititaannit ilisarissavasi. Kakillarnaqutinit viinnissanik katersuisinnaanerpat, fiiginilluunniit orpikkanit kiinnarissulinnit? Taama orpik ajunngitsoq nungullugit ajunngitsunik inerititaqartarpoq, orpilli ajortoq ajortunik inerititaqartarpoq. Orpik ajunngitsoq ajortunik inerititaqarsinnaanngilaq, orpillu ajortoq ajunngitsunik inerititaqarsinnaanngilaq. Orpiit ajunngitsunik inerititaqanngitsut tamaasa kipissavaat innermullu igillugit. Taamaattumik inerititaannit ilisarissavasi.’ (Matiuse 7:15-20) Oqaatsit tamakkua takutippaat mianersortariaqartugut. Immaqa isumaqarpugut upperisarsiornikkut siuttoq aalajangersimasoq imaluunniiit upperisarsiortut aalajangersimasut Guutimut akuerisaasut, imaassinnaavorli kukkusugut.
Mianersortariaqarpugut
Naak upperisarsiortut aalajangersimasut Guutimit akuerisaaneraraluarlutik palasiilu Biibilimit atuffassisaraluartut tamanna isumaqartariaqanngilaq taakkua Guuti iluarisaanik pallorfigisaraat. Upperisarsiornikkut siuttut immaqa Guutimit pisinnaatitaasorineqartumik iliorsinnaasarput. Kisianni guutisiornerat Guutip piumasaanik inerititaqanngikkuni asuliinnaassaaq. Mosesip nalaani Egyptenimi angakkuartartut tupinnartunik iliuuseqarsinnaasimapput, ersarissumilli Guuti iluarisaanik pallorfiginagu. — 2 Moses 7:8-22.
Tamatumunnga assingusumik ullumikkut upperisarsiornerit amerlasuut inuit eqqarsaataat isumaliutaallu siuarsartarpaat Guutip oqaasia malillugu sallusuissutaasoq aalajangiunnagu. Taamaattumik Biibilimi tulluartumik mianersoqqussuteqarpoq: ’Misissoritsi ilisimaqqissaarniutitigut salloqittaatitigullu piunngitsutigut piiarneqaqqunasi, inunnit maligassarsiat ilinniaqqaagassallu silap pii malillugit pisarmata Kristusilu malinnagu.’ — Kulorsamiut 2:8.
Inerititat ajunngitsut ajortullu oqaatigereeramigit Jesus ima nangippoq: ’Uannut oqartut: „Naalagaq, Naalagaq,“ qilammiup naalagaaffianut tamakkeratik isissapput, kisianni Ataatama qilammiusup peqqusaanik iliortut. Ullussami issumani qasseersuit uannut oqarumaarput: „Naalagaq, Naalagaq, atikkut pruffiitisut oqalunnginnerpugut? Atikkut anersaapilunnik anisitsinnginnerpugut? Atikkut qassiinik killinnartuliunnginnerpugut?“ Uangali taava nalunaarfigiumaarpakka: „Ilisarinngisaannarpassi; qimassinga, iluaatsuliorumatuususi-aa.“’ — Matiuse 7:21-23.
Inerititat misissortakkit
Taamaattumik pingaartorujussuuvoq upperisarsiortut inerititaat misissoqqaassallugit taakku Guutimit akuerineqarnersut isummerfigitinnagit. Assersuutigalugu, upperisarsioqatigiinnut ilaasortat naalakkersuinermut akuliuttarpat? Malugissavat Jâko 4:4-mi qanoq allassimasoqartoq: ’Taamaammat silap piinik asannikkumaannartoq Guutimut akerartortigitittaraaq.’ Jesusip ajersukkani ilumoortut ima oqaatigisimavai: ’Silarsuup inuisa ilaginngilaat, soorlu uangattaaq silarsuup inuisa ilaginngikkaannga.’ (Juánase 17:16) Pallorfiginnittut Guutimit iluarineqassagunik silarsuup matuma naalakkersuineranut akuliukkumanngillat, ’silarsuaq tamaat ajortup pissaaneqarfigimmagu’, tassa Satan Diaavulumit anersaamit takussaanngitsumit naalagaaffigineqarmat. (1 Juánase 5:19, NV) Akerlianilli aalajaallutik Guutip naalagaaffia Jesus Kristusip ataaniittoq siuarsarniartarpaat naalagaaffillu qilammiittoq tamanna pillugu nutaarsiassaq nuannersoq oqaluussissutigalugu. — Mákorse 13:10.
Upperisarsiorneq oqartussaasunut naalakkumanngissutsimut kajumissaariguni Guutimut akuerisaasimava? Akissutaa ersarippoq apustili Paulusip unnersuussutaa atuaraanni: ’Eqqaasinniakkit naalagaanernut naalakkersuisunullu naalattooqqullugit, peqqussutaallu maleqqullugit, ajunngitsuliassanullu tamanut kajumeqqullugit.’ (Títuse 3:1) Jesusittaaq erseqqissarsimavaa ajoqersukkami ’kaasari tunissagaat kaasarip pissaanik, Guutilu Guutip pissaanik’. — Mákorse 12:17.
Upperisarsioqatigiit ilaasa ilaasortatik sorsunnissamut peqataanissaannik kajumissaartarpaat. Pîtrusip agdlagai sujugdlît 3:11-mi ima kajumissaarneqarpugut: „Ajortoq nigorlugu ajunngitsuliorli, eqqissinissaq kajungeralugulu noqqaassutigiliuk.’ Upperisarsioqatigiit qanoq ilillutik Guutimut iluarisaasinnaappat ilaasortaat sorsukkiartortarpata uppeqatitillu toqorarlugit? Upperisarsioqatigiinnut Guutip iluarisaanut ilaasortat taassuma pingaarnerpaamik pissuserisaa, asanninneq, malinniartarpaat. Jesus ima oqarpoq: ’Matumannga tamarmik ilisarissavaasi ajoqersugarigissi: asaqatigiikkussi.’ (Juánase 13:35) Asanninneq tamanna uumissuingaarnermut inuiaqatigiit sorsuttartut pissuserisaannut akerliulluinnarpoq.
Upperisarsiornerup ilumoortup inuit sorsukkumatuugaluartut saamasunngortittarpai. Tamanna ima siulittuutigineqarsimavoq: „Saffiussavaat panatik assallatserummut savissaliaralugit, qalugiusatillu saviliaralugit viinnequtilerissutit; inuiaat panamik imminnut silugutissaassapput, sakkunik atuinissamut sungiusarunnaassallutik.“ (Jesaja 2:4) Pallorfiginnittut ilumoortut uumissuinermik oqaaseqaratik peqqussut manna maleruassavaat: ’Tullit ilittut asassavat.’ — Matiuse 22:39.
Jehova Guutimik ilumoortumik pallorfiginnittut taassuma qutsissumik najoqqutassiai maleruarusuttarpaat; ileqqorluttumik inooriaaseqarusunngillat. Guutip oqaasiani allasimavoq: ’Naluisiluunniit iluaatsut Guutip naalagaaffia kingornussarissanngikkaat? Tammaqinasi: Uersaasulluunniit Guutipilussiortulluunniit arnaanillilluunniit mumingasumilluunniit kanngunartuliorfigitittut kanngunartuliorfiginnittulluunniit tillittulluunniit piumatuulluunniit imerajuttulluunniit oqarnittulluunniit arsaarisulluunniit Guutip naalagaaffia kingornussarissanngilaat. Taamaattunillu ilaqarsimagaluarpusi; uffarsimavusili iluartitaallusilu iluartuutitaallusilu Naalakkap Jesus Kristusip aqqagut Guutittalu anersaavagut.’ — 1 Korintumiut 6:9-11.
Maanna qinersisariaqarputit
Eqqunngitsumik ilumoortumillu upperisarsiorneq immikkoortissinnaanissaat immikkut pingaaruteqarpoq. Biibilimi sarĸúmersitat-ni eqqunngitsumik upperisarsiornerup silarsuarmi tamarmi naalagaaffissua taaneqarpoq ’Babylon Angisooq’, uersartorsuaq ’nunap kunngiisa uersaagaat’. Aammik kuisinermut pisooqataavoq ’ermuserlu kuultiusoq tigumiaraa, maajunnartunik mingunnartunillu uersarnerata piinik ulikkaartoq’. (sarĸúmersitat 17:1-6) Taassumunnga atasut tamaasa Guutip maajugai.
Maanna qinersinissamut piffissanngorpoq. Pinngortitsisitta asannittup inuit eqqortuliorusuttut tamaasa suli Babylonimit Angisuumit qimaasimanngitsut ima kajumissaarpai: ’Nipilu alla tusarpara qilammit oqartoq: „Taassumannga anigitsi Babylon angisooq, innuttakka, ajortaasigut peqatigileqinavarsi, perluutissaanillu pineqaqinavusi.’ — sarĸúmersitat 18:4.
Guuti iluarisaanik pallorfigerusukkukku Jehovap Nalunaajaasuisa upperisaat misissorniaruk. Ungalusami Jehovap nalunaajaasuisa ajoqersuutigisaat Biibilimi uppernarsaatit ilanngullugit allattorneqarput. Nammineq biibiliutinni allassimaffiit qupperarukkit paasissavat Jehovap Nalunaajaasuisa upperisaat Guutip oqaasianut naapertuuttuusoq. Misissorniaruk guutisiornerat inerititaqarnersoq pallorfiginninnerup ilumoortup inerititarisariaqagaanik. Taamaappat upperisarsiorneq Guutip iluarisaa nanereersimassavat. (wE 15/9 96)
[Qupp. 30-mi ungalusaq]
JEHOVAP NALUNAAJAASUISA UPPERISAAT
AJOQERSUUT BIIBILIMI UPPERNARSAAT
Guutip aqqa tassa Jehova 2 Moses 6:3; Tussiaat 83:19
Biibili Guutip oqaaseraa Juánase 17:17; 2 Timûtiuse 3:16, 17
Jesus Kristus Guutip erneraa Matîuse 3:16, 17; Juánase 14:28
Inuit pinngortitsinikkut pilersimapput, 1 Moses 1:27; 2:7
ineriartornikkuunngitsoq
Inuit toqusarnerat inuup siulliup Rûmamiut 5:12
(ajortuliorneranik peqquteqarpoq)
Tarneq toqusuitsuunngilaq Nalunaajaasup oqaasii 9:5, 10;
Hesekiel 18:4, NV
„Unneriffik“ tassaavoq inuit Job 14:13; sarĸúmersitat 20:13
ataatsimut ilerfiat
Toqusimasut makititaajumaarput Juánase 5:28, 29; 11:25;
Kristusip inuttut inuunera Matîuse 20:28; 1 Pîtruse 2:24;
inuit naalattut (pillugit 1 Juánase 2:1, 2
akiliutaavoq utertitsissut)
Qinnutit taamaallaat Kristusikkut Matîuse 6:9;
Jehovamut apuussinnaapput Juánase 14:6, 13, 14
Biibilip ileqqussatigut 1 Korintumiut 6:9, 10
najoqqutassiai maleruarneqassapput
Assilissat guutisiornermi 2 Moses 20:4-6; 1 Korintumiut 10:14
atorneqassanngillat
Anersaarsiortoqassanngilaq 5 Moses 18:10-12;
Allap aavanik 1 Moses 9:3, 4; apustilit suliait 15:28, 29
pisoqassanngilaq
Kristumiu silamiunit Juánase 15:19; 17:16; Jâko 1:27; 4:4
avissaarsimassaaq
Kristumiut nalunaajaasariaqarput, Jesaja 43:10-12; Matîuse 24:14, NV; 28:19, 20
„nutaarsiassaq nuannersoq“ oqaluusssissutigalugu
Imermut morsutsitaalluni kuisinneq Mákorse 1:9, 10; Juánase 3:23;
Guutimut tunniulluinnarsimanermik apustilit suliait 19:4, 5
ersersitsineruvoq
Ilagiinni kiffartuutillit immikkut ataqqinaataasumik Job 32:21, 22;
(taaguuteqarnerat Biibilimut akerliuvoq) Matîuse 23:8-12
Ullumikkut „naggatissap Daniel 12:4; Matîuse 24:3-14; 2 Timûtiuse 3:1-5
nalaani“ inuuvugut
Kristus takussaanngitsumik najuuppoq Matîuse 24:3, NV; Juánase 14:19;
Satan silarsuup naalagaraa Juánase 12:31; 1 Juánase 5:19
takussaanngitsoq
Pissutsit aaqqissuussaanerat ajortoq Daniel 2:44; sarĸúmersitat 16:14, 16; 18:1-8
maannakkut atuuttoq Guutip aserorumaarpaa
Guutip naalagaaffia Kristusikkut Jesaja 9:6, 7; Daniel 7:13, 14; Matîuse 6:10
nunamutnaapertuilluartumik
naalakkersulerumaarpoq
’Savarpannguit’ Kristus qilammi Lúkarse 12:32; sarĸúmersitat 14:1-4; 20:4
naalagaaqatigissavaat
Allat Guutip iluarisai nunami Lúkarse 23:43; Juánase 3:16; sarĸúmersitat 21:1-4
paratiisiusumi inuuneq
naassaanngitsoq piumaarpaat
[Qupp. 29-mi assiliartaq]
Ajoqersuutit killisiueqqissarnerup nalaani inuit tuusintilippassuit toqutaapput
[Qupp. 31-mi assiliartaq]
Ilerfiarnerit aammik kuisinermik amiilaarnartumik kinguneqarput
[Qupp. 32-mi assiliartaq]
Upperisarsiorneq ilumoortoq inerititamigut ilisarineqarsinnaavoq