Utoqqatsissalluni pisariaqarpa?

’UTOQQATSINNGISAANNARPUNGA’ George Bernard Shaw allappoq. ’Allatut ajornaqaaq, qaangiutereerpoq’, ilaat immaqa taama oqarumassapput.

Immaqa kukkussutitsinnik anngiiarnissarput nangaassutigisinnaavarput nikagisaalernissarput annilaangassutigalugu. Eqqarsaatigineruleraangatsigulu immaqa isummertarpugut uagut nammineq pisuussutiginngikkipput. Imaluunniit utoqqatserusukkaluarluta sapilerluta kinguartittuartarparput puigorneqarnissaata tungaanut.

Qanoq ilisukkut utoqqatsernissaq pisariaqarpa? Taamaaliorneq pingaaruteqarpa?

Asanninnerup utoqqatsertarnissatsinnut inappaatigut

Jesus Kristusip oqaasii malillugit taassuma ajoqersugaasa ilumoortut asaqatigiinneq ilisarnaatigissavaat. Ima oqarpoq: ’Matumannga tamarmik ilisarissavaasi ajoqersugarigissi: asaqatigiikkussi.’ (Juánase 13:35) Biibilimi kristumiut kajumissaarneqarput ’uummammikkut ilungersorlutik asaqatigiinnissaannut.’ (1 Pîtruse 1:22) Qamannga pisumik asaqatigiinnerup utoqqatsernissatsinnut inappaatigut. Sooq? Inuup naammalluinnanngitsuunera pinngitsoorani inummik ajuallatsitsisoornermut pisooqataasarmat, ajuallatsinneqarnermilu ikeq maminngippat asanninneq killilersorneqalissammat.

Assersuutigalugu ilagiit iluanni arlaannik isumaqatiginngisaqarsimavugut taannalu ingalassimaniarsaralugu. Qanoq ililluta ajuallatsittoorsimasarput asannittumik pissuseqarfigileqqissinnaavarput? Amerlanertigut utoqqatsertariaqarpugut taavalu ilungersorluta uppeqaterput asannittumik pissuseqarfigisariaqarlugu. Kristumioqativut asanninnermik akiitsoqarfigaavut, pisimasumillu ajuusaarutiginninnerput paasitikkutsigu ’akiitsorput akilissavarput’. — Rûmamiut 13:8.

Assersuusioriarta. Mari Carmen Paquilu tassaapput arnat kristumiuusut ukiorpassuarnit ikinngutigiissimasut. Paquip oqaatiginerlunneqarnera upperalugu Mari Carmenip ikinngutigiunnaarsimavaa. Nassuianngivillugu Paqui alarsimavaa. Ukiulli ataatsip missaa qaangiummat Mari Carmenip paasilerpaa tusakkani ilumuunngitsuusut. Qanoq qisuariarsimava? Asanninneq pissutigalugu Paqui saaffigisimavaa maniguullunilu kukkusumik iliorsimanini utoqqatsissutigalugu. Tamanna pillugu tamarmik nuannaarnermik qullilisimapput, taamanimiilli ikinngutigiinnerulersimallutik.

Immaqa misigisimasinnaavugut kukkussuteqarsimanata, taamaakkaluarpalluunniilli utoqqatsersinnaasariaqarpugut, taamaalilluta paatsuuineq peerlugu. Manuel ima oqarpoq: „Ukiualunnguit matuma siorna anersaakkut qatanngutip arnap napparsimmavimmi uninnganerani illuani najugaqarsivugut. Napparsimanera tamaat meerai ilanngullugit sapinngisatsinnik ikiorniarsimavarput. Angerlaramili ikinngutiminut allamut maalaarsimavoq aningaasanik illumut nerisassanullu atugassanik torinngitsumik atuisimanerarluta.

Tamanna tusaratsigu qatanngut ornikkasuarparput nassuiaallugulu inuusuppallaarnerput aammalu misilittagakinnerput pissutigalugit immaqa taassuma piumasaatut iliunngitsoorsimasugut. Taanna akigasuarpoq nammineq uagutsinnut akiitsugaqarluni, aammalu imminut iliuuserisimasavut tamaasa qujamasuutigingaarlugit. Taamaalilluni ajornartorsiut qaangiuppoq. Taamatut misigisaqarneq ilikkassutigaara paatsuuisoqartillugu maniguulluni isumakkeerfigeqqunissap pingaaruteqassusianik.“

Jehovap aappariit taakku asannittuliorlutik ’eqqissinartunit piniarsimammatigik’ pilluaqquai. (Rûmamiut 14:19) Asanninneruvortaaq allat misigissusii eqqarsaatigissallugit. Peterip ’nallittuinermik takutitsisarnissatsinnik’ siunnersorpaatigut. (1 Pîtruse 3:8, NV) Nallittuigutta misigittaruttalu allat isumaalliorluta oqaatsitsigut iliuutsitsigulluunniit ajuallatsittoorsimagutsigik sukkanerusumik paasisinnaasassavarput. Aammalu utoqqatsernissatsinnut kajumissuseqarnerussaagut.

’Nikanartinnermit assuuseritsi’

Kristumiut utoqqaanertat aalajaatsut allaat ilaatigut assortuutingaalersinnaapput. (Naleqqiuguk apustilit suliait 15:37-39.) Taamaattoqartillugu utoqqatsernissaq iluaqutaavoq. Utoqqaanertalli imaluunniit kristumiup allap utoqqatsernissaminik ajornakusoortitsisartup suna iluaqutigisinnaavaa?

Maniguunnissaq imaluunniit nikanartinnissaq pisariaqarpoq. Apustili Peter ima siunnersuivoq: ’Tamassi ilissinnut nikanartinnermit assuuseritsi.’ (Pîtruse 5:5) Amerlanertigut tamarmik isumaqatigiinngissutinut immikkut pisooqataasarput, kisianni kristumiup maniguuttup nammineq kukkussutigisimasinnaasani eqqarsaatigeqqissaartarpai misiutiginagit. — Ussatit 6:1-5.

Soorunami utoqqatserfigineqartoq aamma maniguuttuusariaqarpoq. Assersuusioriarta. Takorlooriakkit angutit marluk tamarmik immikkut qaqqat qaanniillutik imminnut oqaluunniarsarisut. Qoororli avissaarutigisartik itivallaaqimmat imminnut oqaluussinnaangillat. Aappaa qooqqumut aterpat aappaatalu ammut ornippagu ajornartorsiornatik oqaluussinnaalerput. Tamatumunnga assingusumik iliortoqartariaqarpoq kristumiut marluk isumaqatigiinngikkaangata. Aappaa nikanartilluni iliuuseqarpat aappata ’qooqqumut’ ornittariaqarpaa utoqqatserlunilu. — 1 Pîtruse 5:6.

Aappariit iluanni utoqqatsersinnaaneq pingaaruteqarpoq

Aappariit tamarmik naammalluinnanngitsuummata pinngitsoornani ilaannikkut utoqqatsernissaq pisariaqartassaaq. Uiusup nuliaasullu nallittuigunik isumaalliorlutik oqartooraangamik imaluunniit iliortooraangamik utoqqatsersinnaanerussapput. Ussatit 12:18-imi allassimavoq: „Eqqarsariaqqaarnani oqaaserisat panatut kapisisarput, sianisuulli oqaasii katsorsaataasarput.“ ’Eqqarsariaqqaarnani oqaatsit panatut kapisisartut’ utertinneqarsinnaanngillat, kisianni iki qamannga pisumik utoqqatseraanni mamissinnaapput. Soorunami taamaliussagaanni  utoqqatsersinnaanissaq sulissutigiuartariaqarpoq.

Aappariinnertik pillugu Susan * ima oqarpoq: „Jackilu ukiut 24-t aappariippugut, kisianni suli immitsinnut tunngasunik ilikkagassaqartuaannarpugut. Ajoraluartumik sapaatit-akunnerini arlalinni qimassimagaluarpugut. Utoqqaanertanilli Biibilimeersunik siunnersorneqareerluta ineqatigeeqqilerpugut. Inuttulli assigiinngeqigatta tupinnanngitsumik immitsinnut saassuteqqajaasinnaavugut. Taamaalisooraangattalu utoqqatsipallanniarsarisalerpugut, ilungersorlutalu tamatta immikkut aappatta isiginnittaasia paasiniarsaralugu. Nuannaarutigalugu oqarsinnaavunga aappariinnerput pitsaanerulersimasoq.“ Jack nangippoq: „Eqqumaffiginerulerparputtaaq qanoq ilisoqartillugu immitsinnut saassuteqqajaasartugut. Taamaalisugut malugigaangatsigu aaqqinniapallattarparput immitsinnut qajassuulluta.“ — Ussatit 16:23.

Utoqqatsertariaqassaagut isumaqarutta uagut kukkussuteqarnermut pisuunngitsugut? Misigissutsit sakkortuut atuukkaangata sorliup kukkussutigineraa naapertuilluartumik aalajangissallugu sapernarnerusarpoq. Pingaarnerpaavorli aapparinnermi eqqissineq atatinniassallugu. Assersuutigalugu arnap Israelikkuusup Abigajilimik atillip uia Davidimut kusananngitsumik iliorsimavoq. Naak uimi sianiilliorneranut assuarineqarsinnaanngikkaluarluni Abigajilip David utoqqatserfigaa. ’Ilinnut inussiaasunga ajortuliannik isumakkeerfiginnga,’ David qinnuigaa. Davidillu naakkinnilluni qinnutaa tusaarpaa, maniguullunilu nassuerluni taassuma unitsissimanngikkaluarpani aammik pisuussuteqanngitsumik kuisisimassagaluarluni. — 1 Samuel 25:24-28, 32-35.

Arnaq kristumiu Junemik atilik ukiut 45-t katissimasoq oqarpoq aappariinneq ingerlalluassappat siulliulluni utoqqatserusussuseqarnissaq pisariaqartoq. Ima nassuiaavoq: „Imminut oqarfigisarpunga aappariinnerput inuttut misigissutsinnit pingaarnerusoq. Utoqqatseraangamalu misigisarpunga aappariinnitsinnut tapersiillunga.“ Angut utoqqaq Jimimik atilik ima oqarpoq: „Soqutaarpalunngikkaluaraangalluunniit nuliara utoqqatserfigisarpara. Nuliara ilungersunartumik pilatsereernermi kingorna aliatsajasorujussuanngorsimavoq. Taamaattumik eqillugu pakkuttarpara oqarlunga: ’Asasannguara, utoqqatserpunga, ajuallatsinnianngikkaluarpakkit.’ Taava ingerlaannaq naasutut imerterneqartutut illuni inuutsattarpoq.“

Asanerpaasarput ajuallatsittooraangatsigu utoqqatsipallattarnissaq pitsaanerpaavoq. Tassunga Milagros isumaqataalluarpoq oqarlunilu: „Imminut tatigineq amigaatigisorujussuuara, uimalu sakkortuumik oqaaseqarfigigaanganga nikallortarpunga. Utoqqatseraangallu tassuuguinnaq pitsaanerulersarpunga.“ Eqqorluartumik Biibilimi allassimavoq: „Tungusunnitsuutitut kusertut ipput inussiarnersumik oqaatsit tarnimut tungusunnitsut timimullu peqqisaataasut.“ — Ussatit 16:24

Utoqqatserneq ilinniaruk

Pisariaqartumik utoqqatserneq ileqquliukkutsigu allat qisuariarneri nuannersut malugilissavavut. Immaqalu taakku aamma taamaaliorusulissapput. Inuk misigissutsikkut eqqorsimallugu malugigutsigu utoqqatsersinnaanissaq ileqquliuttariaqarparput kukkusimanitta nassuerutiginissaa avaqqunniaannarnagu. Silamiut amerlasuut immaqa utoqqatserneq sanngiinnertut isigisarpaat, kisianni utoqqatserneq kristumiutut inersimalluarnermut ilisarnaataavoq. Soorunami kukkussutiminnik nassuerutiginnikkaluarlutik kukkussutiminnut akisussaajumanngitsut assigerusunngilavut. Assersuutigalugu, utoqqatsertarnerpugut ilumoorunnaguli? Inortuiuarutta tamannalu pillugu utoqqatsertuarluta, siunissami inortuinaveersaarnissarput sulissutigaarput?

Aap, utoqqatsernissaq pisariaqarpoq. Imminut allallu taamatut akiitsoqarfigaavut. Utoqqatserutta anniaatit naammalluinnanngitsuunitta pilersitai nipaallisissavavut, attaveqarnerlu najummassimanartoq qasukkartissallugu. Allat utoqqatserfigisarutsigik maniguunnissarput ajornannginnerulissaaq, allallu misigissusiinut eqqumaffiginninnerulerluta. Taamaliorutta uppeqatitta, aapparisatta allallu asaneqartarialittut tatigineqartarialittullu isigissavaatigut. Isummakkut eqqissisimalissaagut, Jehovallu Guutitta pilluaqqussavaatigut. (wE 15/9 96)

[Quppernerup ataani ilanngussaq]

 [Qupp. 26-mi assiliartaq]

Ilumoorluni utoqqatsertarnerup kristumiutut asanninneq annerulersissavaa.