Allat Jehovameersumik tuppallersakkit

’Ilissi pillusi neriunnerput aalajaappoq, ilisimagatta soorlu anniartut ilagigaasi, taamattaaq tuppallersarneqartut ilagissagaasi.’ — 2 KORINTUMIUT 1:7.

1, 2. Ullumikkut kristumiunngorsimasut ilarpassui sunik misigisaqartarpat?

NAPASULIAQ ALAPERNAARSUIFFIK-mik atuartartut ilarpassui sallusuissut Guutimeersoq nalullugu peroriartorsimapput. Immaqa aamma illit eqqarsaatigalutit taamaappoq. Taamaappat sallusuissut paasilerakku qanoq qisuariarsimanerit kingumut eqqarsaatigeriassagit. Eqqissiallanngilatit paasilerakku toqusimasut annianngitsut, ilisimasaqanngitsulli? Toqusunullu neriuut, inuit milliardilikkuutaat Guutip silarsuassaani nutaami inuunermut makititaanissaat, paasigakku tuppalliallanngilatit? — Nalunaajaasup oqaasii 9:5, 10; Juánase 5:28, 29.

² Guutip ajussutsimik nungutitsinissaminik nunarsuarmillu paratiisinngortitsinissaminik neriorsuisimanera paasigakku qilanaajummerlutillu tuppalliallanngilatit? Inuit ilaasa annannissamut paratiisimilu tamatumani toqunngisaannarlutik inuulernissamut periarfissaqarnerat paasigakku qanoq qisuariarpit? Qularnanngivissumik Guutip tusarliussaanik tuppallernartumik, ullumikkut nunarsuaq tamakkerlugu Jehovap nalunaajaasuinit oqaluussissutigineqartumik, tusarnerit qiimasuutigeqaat. — Tussiaat 37:9-11, 29; Juánase 11:26; sarĸúmersitat 21:3-5.

3. Sooq Guutip tusarliussaanik tuppallernartumik allanut oqaluussissutiginnittut aamma annikilliornartunit nalaanneqartarpat?

³ Taavali Biibilip oqariartuutaa allanut oqaluttuarigakku paasilerpat ’upperneq tassaanngitsoq tamarmik pigisaat’. (2 Tásalûníkamiut 3:2) Immaqa ikinngutigisimasavit Biibilip neriorsuutaanut upperninnik oqaluttuukkakkit asissorpaatsit. Immaqa allaat qinugineqarputit Jehovap nalunaajaasui ilagalugit Biibilimik atuartarnerit ingerlatiinnarakku. Immaqa akerlilersorneqarnerit ingasannerulerpoq inuunerit Biibilimi najoqqutassianut naapertuuttunngorsarlugu allanngortilerakku. Annikilliornartut, Satanip silarsuaatalu tuppallersaammik Guutimeersumik ilassinnittunut tamanut misigitittagaat, misigisalerpatit.

4. Soqutiginnilerlaat misilinneqarnernut qanoq qisuarsinnaasarpat?

⁴ Jesus siulittuisimavoq ajoraluartumik ilaasa akerlilersorneqarnertik mamiatsaatigalugu ilagiinnit kristumiunit nigussutigissagaat. (Matîuse 13:5, 6, 20, 21) Allalli neriorsuutit tuppallernartut ilikkakkamik siunnerfigeqqajuarneratigut annikilliornartut naammagalugit atortarsimavaat. Jehovamut tunniulluinnarsimapput erneranullu, Jesus Kristusimut, ajoqersukkatut kuisillutik. (Matîuse 28:19, 20; Mákorse 8:34) Soorunami kristumiup kuisinnera pissutigiinnarlugu annikilliornartut nungunneq ajorput. Assersuutigalugu, ileqqussatigut minguitsuujuarniarneq inuunerlussimasumut artornartorujussuusinnaavoq. Allat ilaquttamik uppinngitsut akerlilersuiuarnerat naammagalugu atorniartariaqartarpaat. Sumilluunniit misilinneqaraluarutta, aalajaallutik Guutimut tunniulluinnarnerminnik  eqqortitsisut tamarmik, qularinngissinnaavaat Guutip tuppallersaanera ikiuineralu namminneq inuttut misigiumaarlugu.

’Guuti tamanik tuppallersaasoq’

5. Paulusip misilinneqarnerpassuani ilutigalugit aamma suna misigisarpaa?

⁵ Apustilip Paulusip Guutimit tuppallersarneqartarnini assut pingaartissimavaa. Asiami Makedoniamilu misilinneqarnerpassuit atoreerlugit tuppalliutigisimaqaa tusarlugu Korinthimi ilagiit allakkani ilungersorluni oqaassinertallit ilassilluarsimagaat. Tamanna pillugu allaffigeqqippai, ilaatigut ima allalluni: ’Unnersiutigineqarli Guuti Naalakkatta Jesus Kristusip Ataataa, Ataataq nallittuisoq Guutilu tamanik tuppallersaasoq, taassuma annikilliuutivut tamaasa pillugit tuppallersarpaatigut.’ — 2 Korintumiut 1:3, 4.

6. Paulusip oqaasii Korintumiunut agdlagkat áipait 1:3, 4-miittut sumik ilinniarfigaavut?

⁶ Oqaatsit isumassarsiarititaasut tamakkua isumalerujussuupput. Atagu paasiniariartigik. Paulusip allakkamini Guuti unnersiutigigaangamiuk qutsavigigaangamiulluunniit, imaluunniit qinnuigigaangamiuk, aamma Jesusimik, ilagiinnut niaquusumik, pingaartitsinini oqaatigisarpaa. (Rûmamiut 1:8; 7:25; Evfisumiut 1:3; Eprîarit 13:20, 21) Paulusip taamaalilluni unnersiutiginninnini ’Guutimut Naalakkatta Jesus Kristusip Ataataanut’ sammitittarpaa. Allakkamini taakkunani taggit griikerisooq ’nallittuisoq’-mik nutserneqartoq aatsaat siullermeerluni atorpaa. Taggit tamanna oqaatsimik, naalliuttumut misiginneqataanermik ersersitsinermi atorneqartartumik, naggueqarpoq. Oqaaseq tamanna atorlugu Guutip kiffaminut aalajaatsunut annikilliortunut misiginneqataangaassusia Paulusip oqaatigaa, misiginneqataaneq taakkunnunga naakkinnittumik Guutimik iliortitsisoq. Paulusip Jehova pissutsimut pigerusunnartumut tamatumunnga pilerfiusutut isigaa ’Ataatamik nallittuisumik’ taagamiuk.

7. Sooq oqartoqarsinnaava Jehova tassaasoq ’Guuti tamanik tuppallersaasoq’?

⁷ Guutip ’nallittuinerata’ annikilliortoq ilorraallaatissittarpaa. Taamaattumik Paulusip Jehova ’Guutimik tamanik tuppallersaasumik’ taavaa. Uppeqatitsinnit asannittunit tuppallersarneqaraangatta tamatigut Jehova tuppallersaammut tamatumunnga pilerfiusutut isigisinnaavarput. Tuppallersaammik piviusumik ataavartumillu Guutiminngaanniinngitsumik nassaassaqanngilaq. Guutimmi imminut assililluni inuk pinngortissimavaa, taamaalilluni allanik tuppallersaasinnaassuseqartilluta. Guutillu anersaavata illernartup taassuma kiffai tuppallersarneqartariaqartunut naakkinninnermik ersersitsinissaannik kajumissisittarpai.

Tuppallersaanissamut ilinniartinneqartut

8. Guutip piliarinngisaanik akuerisaanilli misilinneqarnitsinni nikallujuinnerput qanoq iluaqutigisinnaavarput?

⁸ Jehova Guutip kiffami aalajaatsut assigiinngitsunik misilinneqartarnissaat akueraa, namminerli taamatut misiliinngisaannarluni. (Jâko 1:13) Misilinneqarnitsinni tuppallersaanera allat pisariaqartitaannik eqqumaffiginninnerulernissatsinnut ilinniutigisinnaavarput. Taamaalilluta ’nalinginnarnik annikilliuutillit uatsinnut tuppallersaammik Guutip uatsinnut tuppallersaatigisaanik tuppallersarsinnaavavut’. (2 Korintumiut 1:4) Jehovap taamaalilluta ilinniartippaatigut uppeqatitsinnik oqaluussinermilu naapitatsinnik imminermininngaanneersumik tuppallersaanissatsinnik, Jesus ilaarlugu ’aliasuttunik tuppallersaasarsinnaaqqulluta’. — Jesaja 61:2; Matîuse 5:4.

9. (a) Misilinneqarnitsinni nikallujuinnissatsinnut suut ikiorsinnaavaatigut? (b) Misilinneqarnitsinni nikallujuinnerput qanoq ililluni allanut tuppalliutaasarpa?

⁹ Paulusip misilinneqarnerpassuarmini Kristus aqqutigalugu naammattorsuarmik Guutimit tuppallersarneqartarnini iluaqutigisimavaa. (2 Korintumiut 1:5) Uaguttaaq naammattorsuarmik tuppallersarneqartarsinnaavugut  Guutip neriorsuutaanik naleqangaartunik eqqarsaatiginneqqissaartarnitsigut, anersaavatigut illernartukkut nakussatsinneqarnissatsinnik qinusarnitsigut, Guutillu qinnutitsinnik akisineranik misigisaqarnitsigut. Taamaalilluta Jehovap kisimi oqartussaassusianik qutsissisitsiuarnissatsinnut Diaavulullu sallutuujuneranik uppernarsaajuarnissatsinnut nakussatsinneqartassaagut. (Job 2:4; Ussatit 27:11) Misilinneqarnerput aalajaalluta anigoraangatsigu Paulusitut iliorluta ataqqinaat tamaat Jehovamut tutsittariaqarparput, taassumami tuppallersaanerata kristumiut misilinneqarneranni aalajaassinnaatittarpai. Kristumiut aalajaatsut nikallujuissusiat qatanngutigiissuarnut tuppallersaataasarpoq allallu ’anniaatinik anniaatigisatsitut ittunik’ atuinissaminnik aalajangiusimanninnerannik sakkortusaasarluni.— 2 Korintumiut 1:6.

10, 11. (a) Itsaq Korinthimi ilagiit qanoq misilinneqarsimappat? (b) Korinthimi ilagiit Paulusip qanoq tuppallersarpai, qanorlu neriunnini oqaatigaa?

¹⁰ Misilinneqarnerit kristumiut ilumoortut tamarmik atortagaasa ilaannik Korinthimiuttaaq misilinneqarput. Aammattaaq qatanngutip kanngunartuliortartup allamik isumataarumanngitsup anisinnissaa pillugu unnersuunneqarnissartik pisariaqartippaat. (1 Korintumiut 5:1, 2, 11, 13) Tamatuminnga iliuuseqarfiginnissimannginnerat aammalu akerleriinnermik avissaartuunnermillu unitsitsiniarsimannginnerat ilagiinnut ataqqinaataajaasimavoq. Paulusilli unnersuussutaa Korinthimiut malippaat allamillu isumataarlutik. Taamaattumik Paulusip assut nersualaarpai oqarfigalugillu allakkaminut ajunngitsumik qisuariarnerat tuppalliutigalugu. (2 Korintumiut 7:8, 10, 11, 13) Aamma anisitaasoq allamik isumataarsimagunarpoq. Taamaattumik Paulusip siunnersorpai taanna ’isumakkeerfigeqqullugu tuppallersaqqullugulu, aliasuppallaarnermit ajuleqqunagu’. — 2 Korintumiut 2:7.

¹¹ Paulusip allagaasa aappaat Korinthimi ilagiinnut assut tuppalliutaasimassapput. Tamannami aamma siunertaavoq, Paulusimi ima allappoq: ’Ilissi pillusi neriunnerput aalajaappoq, ilisimagatta soorlu anniartut ilagigaasi, taamattaaq tuppallersarneqartut ilagissagaasi.’ (2 Korintumiut 1:7) Allakkami naggataa-tungaani Paulus ima kajumissaarivoq: ’[Tuppalleritsi, NV] . . . Guutillu asannittup eqqissisaasullu najussavaasi.’ — 2 Korintumiut 13:11.

12. Kristumiut tamarmik suna pisariaqartippaat?

¹² Tassani pingaartorujussuarmik ilikkagaqarpugut: Ilagiinnut kristumiunut ilaasut tamarmik Guutip oqaatsini, anersaani illernartoq nunarsuarmilu peqatigiissortani aqqutigalugit tuppallersaatissarititaanik allanut tuppallersaasariaqarput. Aammattaaq anisitaasut isumataarsimagunik eqqunngitsumillu ileqqoqarunnaarsimagunik tuppallersarneqarnissartik pisariaqartissinnaavaat. „Inussiaq aalajaallunilu silatooq“ taakku ikiorniarlugit naakkinnittumik aaqqissuussisimavoq. Utoqqaanertat marluk anisitaasimasunut pikitsitsiniarpalaarunnaarsimasunut imaluunniit annertuumik eqqunngitsuliortarunnaarsimasunut ukiumut ataasiarlutik pulaarsinnaapput. Taama ittummi ilagiinnut ilaaleqqinnissaminnut pisariaqartunik alloriarnissaminnut ikiorneqarnissartik pisariaqartissinnaavaat. — Matîuse 24:45; Hesekiel 34:16.

Paulusip Asiami annikilliorneri

13, 14. (a) Asiami annikilliortitaanini ingasattut Paulusip qanoq oqaatigai? (b) Pisimasoq suna Paulusip eqqarsaatigisimasinnaavaa?

¹³ Misilinneqarnerit tamanna tikillugu Korinthimi ilagiit atorsimasaat Paulusip misilinneqarsimanerpassuinut assersuunneqarsinnaanngillat. Taamaattumik Paulus taakkununnga ima oqarsinnaasimavoq: ’Naloqqunngilassimi, qatanngutikka, qanoq Asiamiitilluta annikillisitaasugut, sualuttumik nanertugaagatta sapileraluarlutalu, inuunissarput  allaat nikalluukkaluarlugu. Isumatsigummi toqutassaatikkaluarpugut immitsinnik tatigiumanata Guutili toqusunit makititsisoq tatigiumallugu, taassuma toqussamit taama ittumit aniguisikkaatigut sulilu maannakkut aniguisilluta; neriuffigaarpullu aniguiseqqikkumaaraatigut.’ — 2 Korintumiut 1:8-10.

¹⁴ Biibilimik nassuiaasartut ilaat isumaqarput tassani Paulusip pigai Efesusimi eqqissiviilliornerit taassuma angalaqataasalu Makedoniamiuusut, Gajusip Aristarkusillu, inuunerannik akeqarsimasinnaagaluartut. Kristumiut marluk taakku pinngitsaalineqarlutik isiginnaartitsivimmut inunnik, ’nalunaaquttap-akunneri marluk missiliorlugit ima nilliasunik: „Artemis Efesusimiuniittoq angeqaaq!“’, ulikkaarluinnartumut isertinneqarsimapput. Naggataatigut inuppassuit nilliasut illoqarfimmi atorfilinnit nipangersinneqarsimapput. Gajusip Aristarkusillu toqunneqarnissaminnik sioorasaarneqarnerat Paulusip ernummatigisimassaqaa. Namminermi inuit ingasattajaarniat oqaluunniarlugit isiginnaartitsivimmut isernialersimagaluarpoq, taamaalillunili inuunerminik navianartorsiortitsinissaanik akornuserneqarsimalluni. — apustilit suliait 19:26-41.

15. Pisimasoq ilungersornartoq suna Paulusip Korintumiunut agdlagkat sujugdlît 15:32-mi allaatigisimasinnaavaa?

¹⁵ Aammali imaassinnaavoq Paulusip pisimasumit eqqartorneqartumit tassannga ilungersornarnerujussuaq pigaa. Korinthimiunut allakkamini siullerni ima aperisimavoq: ’Inuup ileqqua atorlugu taamani Efesusimi nersutit qaasuttut paagaluarakkit sussarsissutigaara?’ (1 Korintumiut 15:32) Imaassinnaavoq Paulusip inuunera inunnit nersutitut qaasuttutut pissusilersortunit navianartorsiortinneqaannarani  aamma Efesusimi isiginnaartitsivissuarmi nersutivinnik qaasuttunik paannittariaqarsimasoq. Taamanikkut pinerluttut ilaannikkut pillaatitut pinngitsaalillugit nersutinik qaasuttunik paannitsinneqartarsimapput inunnik aammik takorusoqisunik isiginnaartulerlugit. Paulus nersutivinnik qaasuttunik paannissimaguni immaqa peqqarniitsumik toqutaanissaraluaminit annaqqarsimavoq, soorlu Daniel liiviviit qarninit annaanneqarsimasoq. — Daniel 6:22.

Nalitsinni maligassat

16. (a) Sooq Paulusip annikilliuutigisarsimasai Jehovap nalunaajaasuisa ilarpassuisa paasilluarsinnaavaat? (b) Upperisartik pillugu toqutaasimasut eqqarsaatigalugit suna qularinngissinnaavarput? (c) Kristumiut ilaasa annaqqarnerat qanoq kinguneqarluartarpa?

¹⁶ Ullumikkut kristumiut ilarpassuisa Paulusip annikilliuutigisimasai paasisinnaavaat. (2 Korintumiut 11:23-27) Ullumikkummi kristumiut ilaat aamma ’sualuttumik nanertugaasarput sapileraluartarlutillu’, ilarpassuilu nalorninartorsiulertarsimagaluarput ’inuunissartik allaat’ ilimagiunnaarlugu. (2 Korintumiut 1:8) Ilaat toqoraasunit imaluunniit peqqarniitsumik qinuginnittunit toqutaasimapput. Qularinngissinnaavarput nukiup tuppallersaasup Guutimeersup nikallujuissinnaatissimagai, neriuutimillu, qilammi imaluunniit maani nunarsuarmi inuunissamik, piviusunngornissaa qularinagu toqusimasut. (1 Korintumiut 10:13; Filípimiut 4:13; sarĸúmersitat 2:10) Ilaatigut Jehovap pisut siulersortarsimavai qatanngutivut toqumit aniguisillugit. Taamatut misigisaqarsimasut qularnanngilluinnartumik ’Guutimik toqusunit makititsisumik’ tatiginninnerulerput. (2 Korintumiut 1:9) Tamatuma kingorna Guutip tusarliussaa tupallernartoq suli qulannginnerullutik allanut oqaluussissutigisarpaat. — Matîuse 24:14.

17-19. Misigisimasat suut takutippaat Rwandami qatanngutivut tuppallersaammik Guutimeersumik allanut aveqateqartarsimasut?

¹⁷ Qanittukkut Rwandami qatanngutivut asanartut Paulusip angalaqataasalu atorsimasaannut assingusunik atugaqarput. Ilarpassuisa inuunertik annaavaat, upperneralli Satanip sanngiillisissinnaasimanngilaa. Nunami tamatumani qatanngutitta tuppallersaat Guutimeersoq namminneq inuttut amerlasoorpassuartigut misigisarsimavaat. Rwandami tutsit hutullu toqoraannersuanni hutut ilaat inuunerminnik navianartorsiortitsisimapput tutsinik illersuiniarnerminni, tutsillu ilaat inuunerminnik navianartorsiortitsisimapput hutunik illersuiniarnerminni. Ilaat ingasattajaarnianit toqunneqarsimapput uppeqatiminnik illersuisimanertik pillugu. Assersuutigalugu, Gahizi, Jehovap nalunaajaasua hutukkunneersoq, qatanngut tutsiusoq Chantalimik atilik toqqorsimagamiuk toqunneqarpoq. Chantal tutsimik ueqarpoq Jeanimik atilimmik, Jeanilu qatanngummit arnamit hutuusumit Charlottemik atilimmit allami toqqorneqarsimavoq. Ulluni 40-ni Jean qatanngullu alla tutsiusoq pujoorferujussuarmi toqqoqqasimapput, unnuup ingerlanerani sivikitsuinnarmik anisinnaasarlutik. Ulluni taakkunani nerisaqarnissaat illersorneqarnissaallu Charlottep isumagiuarsimavaa, naak hutut sakkutuuisa tammaarfiisa eqqaanni najugaqaraluarluni. Quppernermi matumani assimi takusinnaavatit Jean Chantalilu qujamasuttut uppeqatimik hutukkunneersut pillutik ’inuunertik navianartorsiortissimammassuk’, soorlu Priskap Akvilallu apustili Paulus pillugu inuunertik navianartorsiortissimagaat. — Rûmamiut 16:3, 4.

¹⁸ Rwakabubu, Jehovap nalunaajaasua hutukkunneersoq, aviisimi Intaremara-mi nersualaarneqarsimavoq uppeqatiminik tutsikkuusunik illersuisimanini pillugu. * Aviisimi allassimavoq: „Kiisalu taaneqarsinnaavoq Rwakabubu, Jehovap nalunaajaasuisa ilaat,  qatanngutiminik (uppeqatigiit taakkua imminnut taama taaguukkamik) sumut tamaanga toqqortitsiuarsimasoq. Naak astmaraluarluni ulloq naallugu nerisassaannik imissaannillu pajuttortuartarsimavai. Guutilli nalinginnaanngitsumik nakussatsittarsimavaa.“

¹⁹ Aappariit hutukkunneersut soqutiginnittut, Nicodeme aamma Athanasie, toqoraanersuaqarnera sioqqullugu oqaluussisartoq tutsiusoq Alphonse peqatigalugu Biibilimik atuaqqissaartarsimapput. Namminneq inuunertik navianartorsiortillugu Alphonse angerlarsimaffimminnut toqqorsimavaat. Kingorna paasivaat illortik isumannaatsuunngitsoq sanilimik, hutukkuusut, nalunngimmassuk ikinngutertik tutsiusoq qangalili pulaartartoq. Taamaattumik Nicodemep Athanasiellu Alphonse eqqaminni illoqannginnersami assakkamut toqqorpaat. Tamanna ajunngeqaaq, saniliimi ullut tamangajaasa Alphonse ujarlugu aggertalerput. Alphonsep ulluni 28-ni assakkamiinnermini Biibilimi oqaluttuat ilaat eqqarsaatigeqqissaartarpai, ilaatigut Rahab, Jerikomi illumi qalianut Israelikkut ilaannik toqqorsisimasoq, pillugu oqaluttuaq. (Josva 6:17) Ullumikkut Alphonse Rwandami suli nutaarsiassamik nuannersumik oqaluussisartuuvoq, ikinngutimi hutukkuusut Biibilimik atuaqqissaaqatigisartakkami nammineq pilluni inuunermik navianartorsiortinnissaanut piumassuseqarsimanerat qujamasuutigalugu. Nicodemekkummi Athanasielu? Takkua massakkut Jehovamut nalunaajaasuupput kuisimasut soqutiginnittunillu 20-nit amerlanerusunik Biibilimik atuaqqissaaqateqartarput.

20. Rwandami qatanngutivut Jehovap qanoq ililluni tuppallersarsimavai, amerlasuulli suna suli pisariaqartippaat?

²⁰ Rwandami toqoraanersuaq aallartimmat tamaani 2500-nik oqaluussisartoqarpoq. Naak taakkua ilaat hundredelikkuutaat toqutaagaluartut imaluunniit nunamit qimaasariaqarsimagaluartut, Jehovap nalunaajaasui 3000-init amerlanerulersimapput. Tamatuma uppernarsarpaa qatanngutivut Guutip tuppallersarluartarsimagai. Soorunami iliarsuit uillarnerillu Jehovap nalunaajaasuisa akornanniittut annikilliornerminni tupallersarneqartarnissaminnik suli pisariaqartitsipput. (Jâko 1:27) Aatsaat Guutip silarsuassaani nutaami toqusunik makititsinermi taakkua qullii allarterluinnarneqarumaarput. Taamaakkaluartorli inuunertik ingerlatiinnarsinnaavaat qatanngutiminnit ikiorneqaramik, ’Guutilu tamanik tuppallersaasoq’ pallorfigigamikku.

21. (a) Qatanngutivut aamma sumiittut tuppallersaammik Guutimeersumik assut pisariaqartitsippat, qanorlu tamatta ikiuisinnaavugut? (Takuuk ilanngussaq „Ukiuni sisamani sorsunnermi tuppallersarneqartarneq“.) (b) Qaqugu tamakkiisumik tuppallersarneqassaagut?

²¹ Nunat ilarpassuini, ilaatigut Eritreami, Singaporemi Jugoslaviaasimasumilu, qatanngutivut annikilliortaraluarlutik aalajaallutik Jehovamut kiffartortuarsinnarput. Qatanngutivut nunani tamakkunaniittut ikiorniartigik tuppallersarneqarnissaannik qinnuttarnerisigut. (2 Korintumiut 1:11) Qanortorlu Guutip Jesus Kristus aqqutigalugu tamakkiisumik ’qullitsinnik tamanik isitsinnit allarterinissaa’ tikillugu aalajaalluta nikallujuittuarisa. Taamanikkussamut Jehovap silarsuassaani nutaami naapertuilluassuseqarfiusumi tuppallersaanissaa tamakkiisumik misigisinnaassavarput. — sarĸúmersitat 7:17; 21:4; 2 Pîtruse 3:13.

[Quppernerup ataani ilanngussaq]

Apeqqutit uteqqiissutissat

□ Sooq Jehova taaneqarpa ’Guutimik tamanik tuppallersaasumik’?

□ Annikilliuutivut qanoq isigisariaqarpavut?

□ Kikkut tuppallersarsinnaavavut?

□ Tamakkiisumik qanoq tuppallersarneqarumaarpugut?

[Atuaqqissaarnermi apeqqutit]

[Qupp. 22-mi assiliartaq]

Jean Chantalilu Jehovamut nalunaajaasuupput tutsikkuusut, nalunaajaasoqatiminnilli hutukkuusunit Rwandami toqoraanersuarmi toqqorneqarsimapput

[Qupp. 22-mi assiliartaq]

Jehovap nalunaajaasuisa Rwandami inoqatiminnut Guutimit tusarliussaq tuppallernartoq oqaluussissutiguarsinnarpaat